Choying Dzo - Chapter 1
@#/_/chos dbyings rin po che'i mdzod ces bya ba bzhugs so/_/
@##/_/rgya gar skad du/_d+harma d+hA tu rat+na ko Sha nA ma/_
bod skad du/_chos dbyings rin po che'i mdzod ces bya ba/_
dpal kun tu bzang po la phyag 'tshal lo/_
/gdod nas lhun grub ngo mtshar rmad kyi chos/_
/rang byung ye shes 'od gsal byang chub sems/_
/snang srid snod bcud 'khor 'das 'byung ba'i mdzod/_
/mi g.yo spros dang bral la phyag 'tshal lo/_
/theg pa'i yang rtse ri rgyal nyi zla'i klong /_
/'od gsal lhun grub rdo rje snying po'i klong /_
/rtsol zhing sgrub med rang bzhin babs kyi klong /_
/ye 'byams rmad du byung ba bshad kyis nyon/_
/lhun grub klong las thams cad 'byung ba'i gzhi/_
/ngo bo stong la rang bzhin ma 'gags pas/_
/cir yang ma grub cir yang 'char ba ste/_
/sku gsum klong nas 'khor 'das rang shar kyang /_
/dbyings las ma g.yos chos nyid bde ba'i zhing /_
/sems nyid klong chen 'gyur med nam mkha'i ngang /_
/rol pa nges med thugs rjes cho 'phrul klong /_
/thams cad dbyings kyi rgyan las logs na med/_
/phyi nang 'du 'phro byang chub sems kyi rtsal/_
/cir yang ma yin cir yang snang ba'i phyir/_
/ngo mtshar cho 'phrul ya mtshan rmad kyi chos/_
/phyi nang skye 'gro gzugs su snang ba kun/_
/dbyings kyi rgyan te sku yi 'khor lor shar/_
/ma lus grags pa'i sgra skad ji snyed kun/_
/dbyings kyi rgyan te gsung gi 'khor lor shar/_
/dran rig 'gyu 'phro mi rtog bsam yas kyang /_
/dbyings kyi rgyan te thugs kyi 'khor lor shar/_
/'gro ba rigs drug skye gnas bzhi po yang /_
/chos dbyings ngang las g.yos pa rdul tsam med/_
/snang srid yul drug gzung 'dzin snang ba yang /_
/chos dbyings ngang na med snang sgyu ma'i tshul/_
/rten med sang seng ye stong yangs pa che/_
/rang gsal ji bzhin chos dbyings rgyan du shar/_
/ji ltar snang grags dbyings kyi ngang chen 'dir/_
/lhun mnyam mi g.yo chos sku byang chub sems/_
/ye babs rang stong 'pho dang 'gyur med pas/_
/cir snang chos nyid rang byung ye shes ngang /_
/bya dang rtsol med bde klong gcig tu 'khyil/_
/rang gsal mi g.yo longs spyod rdzogs pa ni/_
/gang snang nyid nas rang bzhin lhun gyis grub/_
/bcos shing bsgyura med lhun mnyam gdal ba'o/_
/sna tshogs ma 'dres rol pa'i 'char tshul las/_
/sprul pa rang byung ya mtshan 'phrul gyi don/_
/bya bral kun tu bzang las g.yos pa med/_
/g.yang sa med pa'i byang chub sems nyid la/_
/rtsol ba med pa'i sku gsum lhun rdzogs kyang /_
/dbyings las ma g.yos lhun grub 'dus ma byas/_
/sku dang ye shes phrin las lhun rdzogs kyang /_
/tshogs chen ye rdzogs ye shar chen po'i klong /_
/ye nas lhun grub 'pho 'gyur med pa'i zhing /_
/chos dbyings ngang las chos nyid gzigs pa yang /_
/mkhyen pa ma 'gags dbyings kyi rgyan du shar/_
/byas shing sgrub med ye nas gnas pa nyid/_
/nyi mkha' bzhin te ngo mtshar rmad kyi chos/_
/ye nas lhun gyis grub pa'i dbyings rum 'dir/_
/'khor ba kun bzang mya ngan 'das pa bzang /_
/kun bzang klong na 'khor 'das ye nas med/_
/snang ba kun bzang stong pa kun tu bzang /_
/kun bzang klong na snang stong ye nas med/_
/skye shi kun bzang bde sdug kun tu bzang /_
/kun bzang klong na bde sdug skye shi med/_
/bdag gzhan kun bzang rtag chad kun tu bzang /_
/kun bzang klong na bdag gzhan rtag chad med/_
/med la yod par 'dzin pas 'khrul par btags/_
/rten med rmi lam 'dra ba'i rang bzhin la/_
/'khor 'das rang mtshan zhen pa mtshar re che/_
/thams cad kun bzang lhun grub chen po ni/_
/ma 'khrul mi 'khrul 'khrul par mi 'gyur bas/_
/srid pa ming tsam yod med mtha' las 'das/_
/su yang gang du sngar yang ma 'khrul la/_
/da lta mi 'khrul slad kyis 'khrul mi 'gyur/_
/'di ni srid gsum ka dag dgongs pa'o/_
/'khrul pa med pas ma 'khrul chos su med/_
/ye nas lhun grub rang byung rig pa che/_
/ma grol mi grol grol bar mi 'gyur la/_
/'das pa ming tsam su yang grol ma myong /_
/grol bar mi 'gyur bcings pa ye nas med/_
/mkha' bzhin rnam dag rgya chad phyogs lhung bral/_
/'di ni yongs grol ka dag dgongs pa'o/_
/mdor na lhun grub yangs pa'i dbyings rum nas/_
/rol pa'i rtsal gyi 'khor 'das ci shar yang /_
/shar tsam nyid nas 'khor 'das yod ma myong /_
/gnyid kyi rtsal las rmi lam ci shar yang /_
/don la med de rang rig bde ba'i mal/_
/lhun mnyam yangs pa chen por phyam gdal lo/_
/chos dbyings rin po che'i mdzod las/_
'khor 'das dbyings las ma g.yos par bstan pa'i le'u ste dang po'o// _//