Gateway to Knowledge Vol. 1 in Wylie

From Rangjung Yeshe Wiki - Dharma Dictionnary
Jump to navigationJump to search

mkhas pa'i tshul la 'jug pa'i sgo zhes bya ba'i bstan bcos bzhugs so,
rgya gar skad du/ pandi ta sya na yam a va ta ra mu kha: na ma shstram/ bod skad du/ mkhas pa'i tshul la 'jug pa'i sgo zhes bya ba'i bstan bcos/ dkon mchog gsum la phyag 'tshal lo,

don bcu yang dag thugs su chud gyur cing / phyag rgya bzhi yi don ni 'gro la ston/ tshig don dri med chos rab snang ba'i gter/ smra ba'i nyi ma snying la 'jug par mdzod/

'dir shes bya'i gnas ma nor bar gtan la 'bebs pa'i shes rab thob par 'dod pas mdo dang bstan bcos chen po rnams las gsungs pa ltar mkhas par bya ba'i gnas bcu la [2A] bslab par bya ste, gang zhe na phung po la mkhas pa dang / de bzhin du khams dang skye mched dang / rten 'brel dang / gnas dang gnas ma yin pa dang / dbang po dang / dus dang / bden pa dang / theg pa dang / 'dus byas 'dus ma byas la mkhas pa dang bcu'o, 'di bcu gtan la phab pa'i shugs kyis spang bya bdag tu lta ba bcu ldog pa sogs lta ba ngan pa'i rmongs pa kun las grol zhing / ji lta ji snyed kyi blo gros rgyas par 'gyur ba yin no,

phung po ni lnga ste, gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po'o, gzugs gang ci yang rung ba dus gsum dang / yul nye ring sogs dang / rnam pa bzang ngan sogs thams [2B] cad bsdus te gzugs kyi phung por bzhag pa de bzhin tshor ba sogs la'ang shes par bya ste, du ma spungs pas na phung po zhes bya'o, de la gzugs su rung ba'i mtshan nyid can gyi phung po de la dbye na, rgyu gzugs bzhi/ 'bras gzugs bcu gcig go, rgyu ni 'byung ba chen po bzhi ste, sa'i khams ni sra zhing gzhi 'dzin pa'i las byed pa, chu khams gsher zhing sdud pa, me khams dro zhing smin pa, rlung khams g.yo zhing 'phel bar byed pa'o, 'bras gzugs bcu gcig ni/ dbang po lnga dang / don lnga dang bcu/ mdzod ltar na rnam par rig byed min pa'i gzugs dang bcu gcig/ kun btus ltar na chos kyi skye mched pa'i gzugs dang bcu gcig go, gzugs phung 'di dag reg pa dang dpyad pa'i sgo nas gzugs su yod par bzhag ste, dang po lag pa dang dbyug pa dang rlung sogs kyis thug reg yod pa dang / gnyis pa mnyam par bzhag pa'am ma bzhag pa'i yid rtog bcas kyis gzugs 'di ni 'di lta bu'o, zhes bkra bar bzung bas so, de la dbang po lnga ni/ mig gi dbang po dang / de bzhin du rna ba sna lce lus kyi dbang po'o, dbang po lnga po 'di dag rang rang gi shes pa'i bdag rkyen thun mong min pa nang gi gzugs can dvang ba ste, mig gi dbang po zar ma'i me tog lta bu/ rna ba'i dbang po gro ga'i 'jor bu gcus pa lta bu/ sna'i dbang po zangs kyi mo khab gshibs pa lta bu/ lce'i [3A] dbang po zla ba bkas pa lta bu/ lus kyi dbang po bya reg na 'jam gyi pags pa lta bu'o, don lnga ni/ gzugs sgra dri ro reg bya'o, gzugs ni mig gi yul te, de la dbye na kha dog dang / dbyibs kyi gzugs gnyis/ dang po la sngo ser dkar dmar rtsa ba'i kha dog bzhi/ de'i yan lag tu/ sprin dang du ba, rdul dang khug sna, nyi 'od grib ma, snang ba mun pa rnams dang / yang dngon par skabs yod pa zhes pa gzugs de gzhan la thogs par byed pa'i reg bya dang bral ba bar snang skya sing po lta bu gzugs brnyan sogs kyang de dang cha 'dra'o, phyag 'tshal ba lta bu sogs rnam pa rig byed/ steng gi nam mkha' sngon pa kha dog gcig pa rnams te 'di rnams kyang gzugs su bsdu ba'i ched du bshad do, rtsa ba'i kha dog gi cha shas 'dres pa las byed brag gi yan lag mang du 'gyur ro, dbyibs gzugs la, ring po, thung ngu/ lham pa, lzum po, mtho ba, dma' ba, phra ba, rags pa, phyal le ba, phyal le ba ma yin pa rnams gyis spyir bstan te, nang gi dbye ba la, gru gsum/ zla gam/ 'jong mo sogs mang por 'gyur ro, dbyibs dang kha dog de dag bzang ngan bar ma gsum du 'du'o,
sgra ni rna ba'i yul te, de la zin pa'i 'byung ba'i rgyu las byung ba sems can gyi ngag dang se gol gyi sgra lta bu/ ma zin pa'i 'byung ba'i rgyu las byung ba, chu klung dang rlung sogs kyi sgra lta bu/ gnyis [3B] ka las byung ba rnga brdung ba'i sgra lta bu/ sems can du ston pa don rjod par byed pa, sems can du mi ston pa don rjod par mi byed pa, don rjod byed la 'jig rten pas tha snyad btags pa, 'phags pas tha snyad btags pa sogs kyi khyad par yod cing / de dag la snyan mi snyan bar ma'i dbye ba rnams so,
dri ni sna'i yul te, de la dri zhim mi zhim/ cha mnyam pa, lhan skyes/ sbyar byung ngo,
ro ni lce'i yul te, mngar ba, skyur ba, lan tsha ba, kha ba, tsha ba, bska ba drug dang / de dag 'dres pa las nang gi dbye ba du mar gyur ro, yang yid du 'ong mi 'ong bar ma gsum dang / lhan skyes dang / sbyar byung gi dbye ba yang yod do,
reg bya ni lus kyi yul te, rgyu 'byung ba bzhi'i reg bya dang / 'bras bu la, 'jam rtsub lci yang bkres skom grang ba bdun dang / mnyen pa, lhod pa, dam pa, tshim pa, na ba, rga ba, 'chi ba, ngal sos pa, spungs che ba zhes mi 'jigs pa ste lus stobs dang ldan nas ma zhum pa'o, 'di dag gis mtshon nas lus kyi phyi dang nang gi reg bya myong tshul du ma yod pa shes par bya'o,
chos kyi skye mched pa'i gzugs lnga ste, bsdus pa las gyur pa zhes pa rdul phra rab kyi gzugs ni gzugs yin kyang yid kyis shes par bya ba tsam mo, mngon par skabs yod pa'am gsal ba ni gong bshad ltar gzhan la mi thogs pa'o, yang dag par blangs pa las byung ba ni rnam par rig byed ma yin pa'i gzugs so, [4A] kun btags pa'i gzugs ni gzugs brnyan dang rmi lam gyi gzugs lta bu'o, dbang 'byor ba'i gzugs ni bsam gtan la dbang 'byor ba'i stobs kyis snang ba'i gzugs zad par sngon po la sogs pa lta bu'o, dbang 'byor ba'i gzugs lta bu sems kho na'i stobs kyis snang ba la ni rdul phran bsags pa med pa'i phyir de'i rgyu 'byung ba rnams ma yin te de las gzhan pa'i gzugs kyi dbang du mdzad nas de ltar rgyur gsungs so, rnam par rig byed min pa 'di gzugs ji ltar yin ce na, 'di ni sdom sdom min bar sdom thob pa'i lus ngag gi las zhig yin la, de ni g.yeng ba dang sems med pa'i skabs su'ang rgyun ma chad par yod pas sems kyis bsdus pa min pa dang / dang por rang rgyud kyi zin pa'i 'byung ba rnams rgyur byas nas skye shing / zin 'byung de la brten te ji srid rten nyams pa'am gtong rgyu ma byung gi bar du rgyun chags par 'byung pa yin pa dang / ngo bo dge mi dge gang rung du nges pa lus ngag gi las kyi bye brag zhig yin pa'i rgyu mtshan gsum po des gzugs su 'jog pa yin no, de yang dad pas phyag 'tshal ba'am/ mdo 'don pa dang sdang bas gzhan la brdeg pa dang tshig rtsub smra ba lta bu ni/ rgyu lus ngag gi rdul rnams las yan gar du med kyang / lus ngag g.yo ba dang bkod pa'i rnam 'gyur khyad par de la las su 'jog dgos so, las des ni rang kun nas [4B] slong byed lus ngag gi rdul kyi tshogs pa rnams gzhan la rig bar byed de, ji ltar na rde'u du ma rta sogs kyi dbyibs su bkod pa mthong ba na, rde'u rnams mthongs ba yin gyi de las gzhan mthong rgyu ci yang med mod/ rde'u rnams mthong ba'i sgo nas rde'u rnams bkod lugs kyi dbyibs de yang shes pa bzhin no, rig byed min gzugs kyang lus ngag gi las kyi khyad par yin pa la rig byed kyi gzugs dang 'dra yang / des rang kun nas slong byed lus ngag gi cha de rang gi rgyu yin par gzhan la rig par mi byed de, sdom ldan gyi gang zag gi sdom pa 'di lta bu'o zhes de'i lus sogs mthong ba tsam gyis mi shes pa bzhin no, des na 'di la rnam par rig byed min pa dang / bstan med thogs med kyi gzugs zhes bya bar brjod do,
dbang don bcu po de dag rdul phran bsags pa yin pa'i phyir gzugs kyi mtha' phra rab cha med kyi rdul las brtsams te je rgyas su 'gyur te,
ji ltar na rdul phra rab bdun la rdul phran gcig ces bya'o, de bzhin bdun 'gyur gyis/ lcags chu ri bong lug glang / nyi zer gyi rdul dang / sro ma dang / shig dang / nas dang sor tshigs kyi tshad kyi bar du'o, sor mo nyer bzhi la khru gang ngo, khru bzhi gzhu 'dom gang ngo, gzhu 'dom lnga brgya la rgyang grags kyi tshad ces bya'o, rgyang grags brgyad la dpag tshad gcig ste, dpag tshad des ri gling sogs kyi tshad 'jal bar byed de,
'dod khams na dbang po dang sgra med pa'i rdul gong la yang 'byung [5A] bzhi dang gzugs dri ro reg gi rdul brgyad yod la, sgra yod na sgra rdul dang dgu/ lus dbang yod na de'i rdul dang bcu/ dbang po gzhan yod na lus dbang de dang lhan cig yod pas rdul rigs mi 'dra ba bcu gcig yod do,
tshor ba ni nyams su myong ba'i mtshan nyid can no, tshor ba'i phung po de la dbye na, bde sdug btang snyoms gsum mam/ bde ba yid bde, sdug bsngal yid mi bde gnyis su phyes na tshor ba btang snyoms dang de lnga'o,
rten gyi dbang du byas na mig rna sna lce lus yid kyi 'dus te reg pa las byung ba'i tshor ba drug dang / de la bde sdug btang snyoms gsum gyi dbye bas yid nye bar rgyu ba'i tshor ba bco brgyad du 'gyur ro,
gzhan yang sgo lnga'i shes pa dang mtshungs ldan lus tshor/ yid shes dang mtshungs ldan sems tshor/ lus la sred pa dang mtshungs ldan gyi tshor ba zang zing bcas pa, sred pa dang mi ldan pa zang zing med pa'i tshor ba, 'dod yon lnga la sred pa dang mtshungs ldan zhen pa rten pa'i tshor ba, zhen pa med pa mngon 'byung rten pa'i tshor ba sogs kyi rnam grangs yod do,

'du shes ni mtshan mar 'dzin pa ste, de la rten gyi sgo nas dbye na, mig gi 'dus te reg pa las byung ba'i 'du shes sogs yid kyi bar gyi drug go, yang don la mtshan mar 'dzin pa sngo ser sogs snang ba 'dzin pa, tha snyead la mtshan mar 'dzin pa skyes pa bud med sogs su rtog pa ste,
nang gi dbye ba ni shes [5B] bya'i grangs snyed do, yang mtshan ma dang bcas pa'i 'du shes ni tha snyad la mi mkhas pa ste gzugs mthong yang brda la ma byung bas brda mi shes pa dang / mtshan med kyi dbyings dang / srid rtse la snyoms par zhugs pa'i 'du shes rnams ma gtogs pa de las gzhan pa'i 'du shes thams cad do, mtshan ma med pa'i 'du shes ni ma gtogs pa de dag go,
chung ngu'i 'du shes gang gis 'dod khams shes pa, de bzhin du rgya chen po'i 'du shes ni gzugs khams shes pa, tshad med pa'i 'du shes ni nam mkha' mtha' yas dang rnam shes mtha' shes pa, ci yang med pa'i 'du shes ni ci ang med pa'i skye mched shes pa ste drug tu dbye ba sogs so,

'du byed kyi phung po ni mngon par 'du byed pa'i mtshan nyid can/ phung po bzhi las gzhan pa'i 'dus byas thams cad la brjod de, ***
de la sems dang mtshungs ldan gyi 'du byed sems byung rnams dang mtshungs ldan min pa'i 'du byed thob pa sogs ldan min 'du byed rnams so, de yang sems byung lnga bcu nga gcig yod la lta ba lnga so sor brtsi na nga lngar 'gyur ro,
sems byung kun 'gro lnga ni/ sems pa dang tshor ba 'du shes yid la byed pa reg pa lnga las tshor 'du gnyis gong du bshad zin la de dag sems byung yin kyang 'du byed kyi phung por mi bsdu ste logs su bshad pa'i phyir ro,
sems pa ni sems yul la g.yo zhing 'jug pa ste, rten gyi sgo nas mig gi 'dus te sems pa sogs drug go, [6A] yid byed ni dmigs pa la sems 'dzin pa, reg pa ni gsum 'dus nas dbang po'i 'gyur ba yongs su gcod pa tshor ba'i rten byed pa'o, 'di lnga sems thams cad kyi 'khor du 'byung bas kun 'gro zhes bya'o,
yul nges byed lnga ni/ 'dun pa mos pa dran pa ting 'dzin shes rab bo, de la 'dun pa ni 'dod pa'i dngos po la de dang ldan par byed pa brtson 'grus rtsom pa'i rten byed pa, mos pa ni nges pa'i dngos po la de bzhin du 'dzin pa mi 'phrog pa'i byed las can no, dran pa ni/ 'dris pa'i don mi brjed pa mi g.yeng ba'i las can no, ting nge 'dzin ni brtag pa'i dngos po la sems rtse gcig pa shes pa'i rten byed pa'i las can no, shes rab ni brtag pa'i chos rab tu rnam par 'byed pa ste som nyi zlog pa'i las can no, gong gi bcu po 'di la sems kyi sa mang bcu zhes bshad do,
dge ba'i sems byung bcu gcig las/ dad pa ni yang dag pa'i gnas la dang 'dod yid ches pa ste 'dun pa'i rten byed pa'o, bag yod pa ni blang dor gyi gnas la bzob pa lhur len pa srid zhi'i legs pa sgrub pa'i las can no, shin tu sbyang ba ni lus sems dge ba la bkol btub pa'i las su rung ba ste gnas ngan len 'joms pa'o, btang snyoms ni chags sdang gti mug med par sems rnal du gnas pa ste, nyom mongs pa'i skabs mi 'byed pa'i las can no, ngo tsha shes pa ni bdag gam chos rgyu mtshan du byas [6B] te kha na ma tho ba la 'dzem pa nyes spyod sdom pa'i rten byed pa'i las can no, khrel yod pa ni gzhan nam 'jig rten rgyu mtshan du byas te kha na ma tho ba la 'dzem pa'i las can no, ma chags pa ni srid pa dang srid pa'i yo byad la ma chags pa ste nyes spyod la mi 'jug par byed pa'o, zhe sdang med pa ni sems can dang sdug bsngal gyi chos la kun nas mnar sems med pa ste nyes spyod la mi 'jug par byed pa'o, gti mug med pa ni so sor brtags pa'i sgo nas don la ma rmongs pa ste nyes pa la mi 'jug par byed pa'o, rnam par mi 'tshe ba ni zhe sdang med pa'i char gtogs pa snying rje ba'i sems te, gzhan la tho mi brtsam pa'i las can no, brtson 'grus ni dge ba'i gnas la sems mngon par spro bas 'jug pa ste, dge ba'i phyogs yongs su sgrub par byed pa'o,
mi dge ba'i sems byung la rtsa ba'i nyon mongs pa drug/ nye ba'i non mongs pa nyi shu yod pa'i/ dang po rtsa nyon drug gi ma rig pa ni las 'bras dang bden pa dkon mchog rnams kyi tshul mi shes pa ste, kun nyon rnams 'byung bar byed pa'o, 'dod chags ni khams gsum pa'i zag bcas kyi phung po la chags pa ste srid pa'i sdug bsngal skyed par byed pa'o, 'di la 'dod khams pa'i 'dod chags la 'dod pa'i 'dod chags dang / khams gong ma gnyis kyi 'dod chags la srid pa'i 'dod chags zhes gnyis su yang gsungs so, khong khro ni sems can [7A] dang sdug bsngal dang sdug bsngal gyi gzhi la kun nas mnar sems pa ste, bde bar reg pa la mi gnas shing nyes spyod kyi rten byed pa'o, nga rgyal ni 'jig lta la brten nas sems mtho ba'i rnam par khengs pa ste, gzhan la ma gus pa dang sdug bsngal 'byung ba'i rten byed pa de la dbye na bdun yod do, the tshom ni bden pa'i don la yid gnyis za ba ste, dge ba'i phyogs la mi 'jug pa'i las can no, lta ba nyon mongs can thams cad lta ba ste, lta ba ngan pa thams cad kyi rten byed pa'o, de ltar rtsa nyon drug go,
lta ba de la dbye na lnga ste, 'jig tshogs la lta ba ni nye bar len pa'i phung po lnga la bdag dang bdag gi bar lta ba ste, lta ba gzhan gyi rten byed pa'o, mthar 'dzin pa'i lta ba ni/ bdag gam phung po lnga la rtag pa dang chad par 'dzin pa ste, dbu ma'i lam gyis nges par 'byung ba la bar du gcod pa'i las can no, log par lta ba ni/ las rgyu 'bras sogs yod pa'i don la med par lta ba ste, dge rtsa gcod par byed pa'i las can no, lta ba mchog 'dzin ni gong gi lta ba ngan pa gsum dang lta ba'i gnas nyer len gyi phung po lnga la mchog dang dam par lta ba ste lta ngan la mngon par zhen par byed pa'o, tshul khrims dang brtul zhugs mchog 'dzin ni/ dag grol ma yin pa'i tshul khrims dang rtul zhugs dang de'i gnas phung lnga la 'dag grol nges 'byin du lta ba ste, ngal ba 'bras bu med pa'i las can [7B] no, mchog 'dzin gnyis po 'dis dngos po'i tshul la phyin ci log tu zhugs pa'i lta ngan dang / thar pa'i thabs min pa'i lam ngan la zhen pa kun kyang mtshon par byed do,
lta ba lnga po de thams cad shes rab nyon mongs can yin la, lta ba lnga dang lta min lnga ste rtsa nyon bcu po de las/ mchog 'dzin gnyis log lta the tshom bzhi kun btags yin zhing / lhag ma drug la kun btags dang lhan skyes gnyis yod do,
nye nyon nyi shu las/ khro ba ni khong khro 'phel te brdeg pa sogs gnod pa dngos du shoms par byed pa'o, khon du 'dzin pa ni khong khro ba'i char gtogs pa gnod pa'i bsam pa rgyun mi btong zhing mi bzod par byed pa'o, 'tshig pa ni khro ba dang khon 'dzin gyi rgyu las mi bzod par tshig rtsub smra bar byed pa'o, rnam par 'tshe ba ni khong khro'i char gtogs pa, snying brtse ba med par tho brtsam pa'i las can no, phrag dog ni khong khro'i char gtogs pa, rang rnyed bkur sogs la chags nas gzhan gyi phun tshogs la mi bzod par sems khong nas 'khrugs pa, yid mi bde zhing sems rnal du mi gnas la nyes pa'i rten byed pa'o, g.yo ni rnyed bkur sogs la chags pas rang gi nyes pa sbas te nyes rgyun skyong ba'i sems gya gyu ba chags sdang gti mug gi char gtogs pa ste yang dag pa'i gdams ngag rnyed pa'i bar du gcod pa'o, sgyu ni rnyed bkur sogs kyi phyir rang la med pa'i yon tan yod par 'chos [8A] nas bden pa min pas gzhan slu byed rmongs chags kyi char gtogs pa nyon mongs dang nye nyon gyi grogs byed cing log 'tsho sgrub pa'i rten byed pa'o, ngo tsha med pa ni bdag rgyu mtshan du byas te sdig pa la mi 'dzem pa dug gsum gyi char gtogs pa nyon mongs dang nye nyon gyi grogs byed pa'o, khrel med pa ni gzhan rgyu mtshan du byas te mi dge ba'i phyogs la 'dzem pa med par 'jug pa dug gsum gyi char gtogs pa, nyon mongs kun gyi grogs byed pa'o, 'chab pa ni gti mug dang chags pa'i char gtogs pa legs par bskur ba la mi 'jug cing rang gi nyes pa sgrib par 'dod pa ste, 'gyod pa dang reg par mi gnas pa'i rten byed pa'o, ser sna ni 'dod chags kyi rgyu las yo byad sogs bdog pa'i dngos po la dam du 'dzin pa ste yo byad mi bstung bar byed pa'o, rgyags pa ni nad med pa dang lang tsho sogs rang rgyud la yod pa'i zag bcas kyi phun tshogs gang yang rung ba la dga' zhing chags pa'i sems kyis rang mgus 'thigs ['GYINGS PA'I DON TE] pa ste, nyon mongs dang nye nyon gyi rten byed pa'o, ma dad pa ni gti mug gi char gtogs pa yang dag pa'i gnas dang dge chos la mi mos pa le lo'i rten byed pa'o, le lo ni nyal snyel 'phres sogs kyi bde ba lta bu'i bya ba ngan pa la zhen nas dge ba'i phyogs la mi spro zhing 'jug pa lhod par byed pa brtson 'grus kyi mi mthun phyogs so, bag med [8B] pa ni dug gsum le lo dang bcas pa'i rgyu las dge sdig blang dor la gzob pa lhur mi len pa bag yod pa'i mi mthun phyogs te, mi dge 'phel zhing dge ba 'grib pa'i las can no, brjed ngas ni dge ba'i dmigs pa mi gsal bar brjed pa, dran pa'i mi mthun phyogs su gyur pa'i nyon mongs dang mtshungs ldan gyi dran pa 'chal pa sems g.yeng ba'i rten byed pa'o, shes bzhin min pa ni nyon mongs dang mtshungs par ldan pa g.yeng ba'i shes rab ste, sgo gsum gyi spyod pa la shes bzhin du mi 'jug par bab bab du 'jug pa ste ltung ba 'byung ba'i rten byed pa'o, rmugs pa ni gti mug gi char gtogs pa lus sems lci ba'i rnam pas dmigs pa la 'jug mi nus par nang du sdud cing sems las su mi rung ba nyon mong pa'i rten byed pa'o, rgod pa ni sdug pa'i mtshan ma'i rjes su zhugs pa'i 'dod chags kyi char gtogs pa sems yul la 'phro bas las su mi rung zhing ma zhi bar byed pa zhi gnas kyi bar du gcod pa'o, rnam par g.yeng ba ni dug gsum gyi char gtogs pa sems yul la g.yo zhing 'phyan te dge ba'i dmigs pa la rtse gcig tu mi gnas par byed pa ste, 'di la phyi nang dang mtshan ma'i g.yeng ba sogs kyi dbye ba yod do, de ltar nyi shu ni rtsa nyon gyi char gtogs shing de dang nye bas nye nyon zhes bya'o,

gzhan 'gyur bzhi las gnyid ni gnyid kyi rgyu la brten nas dge mi dge rigs mi rigs dus dus min sogs [9A] kyi rnam 'byed med par sgo lnga'i shes pa nang du sdud par byed pa gti mug gi char gtogs pa bya ba shor ba'i rten byed pa'o, 'gyod pa ni sngar byas pa la yid mi dga' ba'i rnam pas yid la bcag pa sems gnas pa'i bar du gcod par byed pa'o, rtog pa ni sems pa dang shes rab la brten nas dmigs pa'i dngos po kun tu tshol ba'i yid kyis brjod pa ste, don 'ol spyi tsam 'dzin pa rtsing ba'i rnam pa can/ rgyang ring po'i gzugs la kham phor dang bum pa'i khyad ma phye bar de tsam 'dzin pa lta bu'o, dpyod pa ni sems pa dang shes rab la brten nas don de'i khyad par so sor rtog pa'i yid kyis gzhig nas bzung ba zhib pa'i rnam pa can de bum pa gsar pa ma gas par 'dzin pa lta bu'o, de rnams kun slong dang bsam pa'i khyad par gyis dge sdig lung ma bstan ci rigs par 'gyur bas gzhan 'gyur bzhi zhes bya'o,
sems byung 'di dag gis spyir sems kyi sa mang dang / dge sdig gi sems byung rnams kyi khyad par 'byed pa'i gtso bor 'di tsam gsungs zhing / gzhan yang sems pa dang 'du shes sogs kyi 'dzin stangs kyi khyad par las/ skyo ba dang mi skyo ba, dka' ba dang mi dka' ba, bzod pa dang mi bzod pa sogs rnam grangs shin tu mang por 'gyur ba shes par bya'o, de rnams ni sems dang mtshungs ldan gyi 'du byed do,

sems byung lta bu'i 'du byed min yang 'dus [9B] byas su ni gtogs dgos shing bem shes gang rung du bsdu bar mi 'os pa'i chos la sems dang mtshungs par ldan pa min pa'i 'du byed kyi chos yin pa zhes bya ste, de ltar bem shes ldan min gsum gyis 'dus byas thams cad bsdus par rig par bya ste, rdul du grub pa bem po'o, gsal zhing rig pa shes pa'o, de gnyis ma yin pa'i 'dus byas thams cad ldan min 'du byed do,
ldan min 'du byed de gang zhe na, rang gi rgyud la dge mi dge lung ma bstan gyi chos gang zhig sngar med gsar du thob pa dang thob pa de'i rgyun ldan pa la thob pa zhes pa ste, rgyud du gtogs pa'i chos yin la 'dus byas kyang yin pas ldan min 'du byed ces bya'o, de bzhin du dge sogs rang rgyud la thob pa las nyams te 'grib par gyur ba la ma thob pa zhes bya'o, sems can so so'i ris su skyes te skal pa mnyam pa'i chos de la skal mnyam mam ris mthun pa zhes bya'o, 'du shes med pa'i snyoms 'jog ni dge rgyas kyi 'dod chags dang bral la khams gong ma'i 'dod chags dang ma bral ba chig gis yid la byed pa'i sgo nas sems sems byung rgyun brtan pa ma yin pa 'jug shes drug po rnams gnas skabs su 'gog par byed pa ste, sems sems byung khegs pa'i gnas skabs de lta bu snyoms 'jog gi nus pas sngon med gsar du thob cing / yang de las ldangs te 'gag pa'i phyir skye 'gag yod kyang de bem shes gang yang [10A] min pa'i chos yin pas ldan min 'du byed du bzhag go, de bzhin du snyoms 'jug des 'phangs nas 'du shes med pa'i lha rnams kyi nang du skyes pa 'du shes med pa dang / 'gog pa'i snyoms 'jug ni srid rtse'i sems las gyen du bskyod de bdag med pa dang zhi gnas kyi 'du shes sngon du btang bas sems byung brtan pa min pa rnams dang brtan pa las kha cig ste, nyon yid kyis bsdus pa rnams khegs pa'o, 'di gsum ldan min 'du byed du 'jog pa'i skabs na ji srid sems sems byung 'gog pa'i nus pa de la go dgos so, brtan pa kun gzhi ni 'du shes med pa dang snyoms 'jug gnyis kyis mi khegs te de'i dbang gis sems slar yang skyes bar rung ngo,
srog gi dbang po ni sems can ris mthun par sngon las kyi dbang gis ci tsam gnas pa'i dus nges pa tshe zhes brjod pa gang yin pa'o, skye ba ni 'du byed rnams sngar ma byung ba las da ltar byung ba'o, gnas pa ni de'i rgyun gnas pa'o, rga ba ni rgyun gzhan du 'gyur ba'o, mi rtag pa ni rgyun 'jig pa ste 'di bzhi la 'dus byas su mtshon pa'i mtshan nyid bzhi zhes bya'o, ming gi tshogs ni ka bum sogs don gyi ngo bo tsam brjod pa'i brda'o, tshig gi tshogs ni don gyi ngo bo dang khyad par sbyar te ston par byed pa'i bla dvags so, yi ge'i tshogs ni ming tshig gnyis kyi rtsom gzhir gyur pa'i yig 'bru a la sogs [10B] pa'o, 'di gsum skad gdangs kyis bsdus na yang sgra tsam dang mi 'dra ba'i khyad par sems kyi brdar btags nas brjod bya lung ston pa sogs kyi nus pa can 'du byed kyi chos su gtogs pa'o, mngon pa mdzod las bcu bzhi po 'di tsam gsungs so,
mngon pa kun btus las snga ma bcu bzhi'i steng du/ so so'i skye bo ni 'phags pa'i chos ma thob pa'o, 'di ni bem shes ldan pa la btags pa'i gang zag gi bye brag go, 'jug pa ni rgyu dang 'bras bu rgyun mi 'chad par 'jug pa'o, so sor nges pa ni rgyu dang 'bras bu tha dad pa'o, 'byor 'brel ba ni rgyu dang 'bras bu rjes su mthun pa'o, mgyogs pa ni rgyu dang 'bras bu myur bar byung ba'o, go rim ni rgyu dang 'bras bu re re nas rim bzhin 'byung ba'o, dus ni rgyu dang 'bras bu rgyun du 'byung ba'i yun gyi gnas skabs so, yul ni phyogs bcu po thams cad na rgyu dang 'bras bu yod pa las btags pa'o, grangs ni 'du byed rnams so so tha dad ba la bgrangs te bzhag pa'o, tshogs pa ni rgyu dang 'bras bu'i rkyen 'dus pa'i gnas skabs las so, nyer bzhi po 'di dag gis mtshon nas bem shes kyi gnas skabs la btags pa'i chos 'dus byas su bsdu dgos la bem shes gang du bsdur mi 'os pa du ma yod pa shes par bya'o,

rnam par shes pa'i phung po ni/ chos rnams kyi don gyi ngo bo so sor rig par byed pa ste de la dbye na, mig gi rnam par shes pa nas/ [11A] yid kyi rnam par shes pa'i bar gyi tshogs drug ni/ bdag rkyen mig gi dbang po la brten nas skyes ba'i blo gang gis gzugs shes pa nas/ bdag rkyen yid dbang la brten nas skyes ba'i blo gang gis rang yul thun min chos khams dang de las gzhan pa rnams kyad shes pa'i bar do'o,
sems tsam gyi mdo dang bstan bcos las tshogs brgyad du bzhed de, yid shes kyi bye brag rtag tu rlom sems pa gang zhig/ nang du kun gzhi'i rnam shes la dmigs nas/ bdag tu lta ba dang / nga'o snyam ba'i nga rgyal dang / bdag tu chags pa dang / ma rig pa ste nyon mongs bzhi po dang mtshungs par ldan pa'i sems de ni/ 'phags lam mngon gyur dang / 'gog pa'i snyoms 'jug dang / mi slob pa'i sa ma gtogs par dge mi dge lung ma bstan gyi sems thams cad du 'gro ba la nyon mongs pa'i yid ces bya'o,
kun gzhi'i rnam shes ni phung khams skye mched kyis yongs su bsgos pa'i sa bon thams cad pa 'dzin pa sems kyi gzhi gsal rig tsam ris su ma chad pa ste, 'di la gnas don lus su snang ba 'byung rung gi sa bon tsam du gnas pa'i cha nas kun gzhi dang len pa'i rnam par shes pa zhes kyang bya, gnas don lus su snang yang rmi lam gyi snang ba ltar kun gzhi'i rnam shes nyid der snang ba tsam du zad pa'i cha nas rnam par smin pa'i kun gzhi 'am de'i rnam shes zhes kyang bya'o, sems dang yid dang rnam shes ni don [11B] gcig ming gi rnam grangs tsam du bzhed pa yod la, yang sems kun gzhi'i rnam shes/ yid nyon mongs pa'i yid/ rnam par shes pa tshogs drug gi ming du bzhed de,
de ltar phung po lnga po des 'dus byas kyi chos thams cad bsdus pa'i phyir na, de las brtsams te dus la sogs pa rnam grangs dang rnam bzhag mang po 'byung ba'i gzhi yin pas/ phung po lnga po de la dus dang gtam gyi gzhi dang / nges par 'byung ba dang bcas pa, rgyu dang bcas pa zhes zer zhing / 'jig rten dang lta ba'i gnas dang srid pa zhes kyang bya'o, 'dun pa dang 'dod chags kyi sgo nas nye bar len bas zag bcas nyer len gi phung po la ni 'thab pa dang bcas pa dang sdug bsngal dang kun 'byung zhes kyang bya'o,
phung po'i rab tu dbye ba'i skabs so,

khams bco brgyad di/ gzugs kyi phung po las khams bcu bzhag ste, gang zhe na mig gi khams nas lus khams kyi bar lnga dang / gzugs nas reg bya'i bar gyi khams lnga ste bcu 'o, rnam par shes pa'i khams ba dun te mig gi rnam shes kyi khams nas yid kyi rnam shes kyi khams kyi bar drug dang / yid kyi khams dang bdun no, yid kyi khams zhes pa yid kyi dbang po ste rnam par shes pa drug po 'gag ma thag pa de yid shes skyed pa'i dbang po yin no, chos kyi khams zhes bya ba, tshor ba 'du shes 'du byed kyi phung po gsum dang / rnam par rig byed min pa'i gzugs dang / 'dus ma byas thams cad do, [12A]
'dus ma byas la, so sor brtags pas 'gog pa dang brtags min gyis 'gog pa dang nam mkha' dang gsum du mdzod las bshad/ de lta na chos khams bdun du 'dod/ yang sems tsam pa sogs kyis de bzhin nyid bsnan te bzhir bzhed/ kun btus su/ dge mi dge lung ma bstan gyi de bzhin nyid gsum dang / 'du shes med pa dang / 'gog pa'i snyoms 'jug gi dus kyi sems khegs pa'i gnas skabs gnyis te, gong gi gsum dang bsdoms pas 'dus ma byas brgyad du bzhed do,
de la so sor brtags 'gog ni so sor brtags pa'i shes rab sogs lam gyi stobs las spang bya nyon mongs sogs gtan du bral ba'i 'dus ma byas kyi cha'o, brtags min 'gog pa ni/ so sor brtags pas khegs pa min yang rgyu rkyen ma tshang ba'i stobs kyis gang na gang med pa ste rta yi mgo la rva lta ba'o, phyogs gang na bum pa med lta bu sogs med pa'i bye brag thams cad 'dir 'du'o, nam mkha' ni gzugs rung med cing byed pa thams cad kyi go 'byed pa la mi sgrib pa'o, dge sogs chos rnams kyi de bzhin nyid ni chos kyi dbyings so, mi g.yo ba ni 'du shes med pa'i snyoms 'jug go, 'du shes dang tshor ba 'gog pa ni 'gog pa'i snyoms 'jug go,
de ltar chos kyi skyes mched pa'i gzugs lnga dang / tshor 'du 'du byed kyi phung po gsum dang / 'dus ma byas [12B] brgyad de bcu drug po de la chos kyi khams zhes bya'o, de ltar mig gi khams/ gzugs kyi khams dang / mig shes kyi khams nas/ yid shes kyi bar drug tshan gsum ste bco brgyad po de las/ mig nas yid kyi bar drug po yul la 'dzin par byed pa'i rgyu 'am rigs sam sa bon dang / de bzhin de gzugs nas chos kyi bar drug po gzung ba'i dang / mig shes nas yid shes kyi bar drug po yul dngos su 'dzin pa'i rgyu 'am rigs sam sa bon kyi don te khams zhes pa rgyu 'am rigs dang sa bon gyi don can no,
gzhan yang skyes bu khams drug pa zhes sa chu me rlung nam mkha' rnam shes khams drug gsungs pa de lus kyi 'byung ba bzhi dang / nang gi bu ga stong pa'i cha ni nam mkha' dang / rnam shes kyi khams te, des mtshon pa'i khams kyi ming gis btags pa'i dbye ba gzhan dag kyang don gyis khams bco brgyad du ma 'dus pa med do,
khams kyi rab dbye la khams bco brgyad las/ gzugs can du gtogs pa dbang lnga don lnga'i khams bcu dang chos khams kyi phyogs gcig ste, lhag ma gzugs can min pa'o, mig lam du bstan du yod pa ni gzugs khams gcig pu/ lhag ma bstan med do, phan tshun thogs pa dang bcas pa ni dbang lnga yul lnga ste gzugs can bcu las lhag ma rnams thogs pa med pa'o, zag med ni khams tha ma yid dang yid shes dang chos khams kyi sems byung lam [13A] bden du gtogs pa dang 'dus ma byas rnams yin la de rnams ma gtogs pa'i/ khams lhag ma rnams nyon mongs skye ba'i mngon sum gyi spyod yul yin pa'i phyir zag bcas so, 'dod khams na khams thams cad yod/ gzugs khams na dri ro dang sna lce'i rnam shes kyi khams ma gtogs pa bcu bzhi yod/ gzugs med na khams tha ma gsum gyi cha shas yod do,
sems khams bdun dang gzugs sgra dang chos khams bcu la dge mi dge lung ma bstan gsum char yod/ lhag ma rnams lung du ma bstan pa'o, gzugs sgra dri ro reg chos kyi khams drug phyi/ lhag ma bcu gnyis ni nang gi'o, dmigs pa dang bcas pa ni sems khams bdun dang / chos khams kyi phyogs gcig sems byung rnams so, lhag ma rnams dmigs pa med pa'o, rtog bcas ni yid dang yid shes kyi cha dang chos khams kyi phyogs gcig sems byung gi cha rtog bcas rnams so, rang rgyud kyi tshor bas zin pa dbang po lnga dang nang gi gzugs dri ro reg dgu'o, chos khams kyi phyogs gcig 'dus ma byas rtag pa yin la, gzhan rnams 'dus byas dang mi rtag pa'o, dbang po rnams dang sems sems byung rnams ni 'dzin pa dang / gzhan rnams gzung ba'o, rtog dpyod gnyis dang bcas pa ni rnam shes kyi khams lnga'o, yid yid khams sems byung rnams la rtog dpyod gnyis bcas/ gnyis med/ rtog med dpyod bcas gsum yod/ de dag gi lhag ma rnams rtog dpyod med pa'o, gzugs can gyi khams bcu ni rdul phran bsags pa'o, lhag ma rnams ma bsags pa'o, gcod byed yin [13B] pa dang bcad bya yin pa gzugs dri ro reg bzhi kho na ste, sreg 'jal kyang de bzhin no, gzugs can bcu dang mig shes sogs lnga ni sgom pas spang bya, khams tha ma gsum la mthong sgom gyis spang bya dang spang bya min pa gsum du yod do, byung ba gsum gyi khyad par phye na, rnam smin dang rgyas byung ni nang gi dbang po lnga'o, rang gi rigs 'dra'i rgyu mthun dang rnam smin las skyes pa sems khams bdun dang chos khams kyi phyogs gcig sems byung rnams te thogs pa med pa brgyad po de'i cha 'ga'o, sgra la rgyun med pas rnam smin las skyes pa min la, dbyangs snyan mi snyan du byed pa'i rgyu mgrin pa'i dbyibs sogs rnam smin las skyes pa'o, 'di dag gi lhag ma dbang po'i tshogs pa na yod pa rnams la rgyu mthun rgyas byung rnam smin las byung ba gsum yod la, phyi rol gyi khams rnams rgyu mthun kho na las so,
rgyas byung zhes pa lus rgyas pa'i rgyu bzhi ni/ zas dang / bku mnye dril phyis sogs legs par bya ba dang / gnyid dang ting nge 'dzin bzhi'o, dbang po rnams la rang gi shes pa dngos su rten pa'i bya ba byed bzhin pa sad cing gzugs la rtog pa'i mig dbang gi gnas skabs lta bu la dbang po rten bcas dang / de lta min pa gnyid log pa'i mig dbang lta bu la de mtshungs zhes bya'o, khams gong ma'i lus la 'og ma'i mig rten pa min te, rang sa na mig mchog tu gyur pa [14A] yod pa'i phyir ro, khams 'og ma'i mig dbang gis gong ma'i gzugs mi mthong ste phra ba'i phyir/ rna ba'ang de lta bu'o, 'dod pa'i khams pas bsgoms stobs kyis lha'i mig rna thob na, bsam gtan de pa'i sas bsdus pa'i 'byung ba rgyur byas pa'i dbang po dvangs pa rang gi mig dang rna ba'i thon kor du 'byung ste, dbang po de ni rtag tu rten bcas yin la, zhar 'on lta bu'i ma tshang ba med cing / thag ring ba dang phra ba'i gzugs dang / bsgrib cing bar chod pa rnams kyang mthong ba dang thos par byed pa'o, de yang bsam gtan dang po'i dbang pos rang sa dang 'dod pa'i spyod yul shes pa sogs 'gre'o, lha'i mig de lta bu dgra bcom pa la yod pas stong gnyis dang / rang rgyal bse ru lta bus stong gsum dang / sangs rgyas kyis grangs med pa'i bar du gzigs so, lha'i mig de tshe 'dir bsam gtan bsgoms stobs kyis min kyang / sngon bsgoms pa sogs kyi rnam smin las skyes pa skye bas thob pa yod kyang / des bar srid mi mthong zhes bshad do,
de la sogs pa'i khams gong 'og gi dbang po dang shes pa 'byung tshul sna tshogs shes par bya'o, khams kyi skabs so,

skye mched bcu gnyis ni/ mig gi khams dang mig gi skye mched don gcig ste, so so'i skabs kyi rnam bzhag bya tshul tsam mo, de bzhin du gzugs can [14B] gyi khams bcu ni de de'i skye mched dang / chos khams ni chos kyi skye mched do, rnam par shes pa'i khams bdun ni/ yid kyi skye mched du bsdus pa'o, de la mig gi skye mched dang / gzugs kyi skye mched nas/ yid dang chos kyi skye mched bar bcu gnyis so,
de yang mig nas yid gi bar nang gi drug po 'dzin pa dang / gzugs nas chos kyi bar phyi'i drug ni gzung ba ste, gzung 'dzin gyi sgo nas rnam shes yul la skye zhing mched pa'i sgor gyur pas skye mched ces bya'o, phung po lngas 'dus byas thams cad bsdus kyang / 'dus ma byas ma bsdus la, khams skyem ched du ni bsdus pa'i phyir 'de gnyis kyi khongs su shes bya thams cad 'du'o, gong du khams kyi rab dbye bshad pas skye mched la yang de ltar don gyis shes so,
skabs 'dir yid chos kyi skye mched las 'phros te tha snyad kyi rnam bzhag 'ga' zhig brjod pa la, yid kyis ni mig sogs kyi yul gzugs sogs kyang shes/ dbang lnga yang rnam shes dang rjes su 'gro ldog gi tshul gyis yod par shes pas shes bya thams cad kyi yul can no, der ma zad nang du shes pa'i rgyud gcig gis bsdus shing rang rig pa'i phyir/ yid shes rtog med kyi yul du sgo lnga'i shes pa dang / yid rang dang bcas pa yang 'gyur pas/ yid ni chos kun kyi yul can yin la, de'i phyir yid rtog bcas kyis ni phyi dang nang gi chos so, [15A] cog la tha snyad byed du rung zhing / de'i sgo nas shes bya rnams la ma rmongs par 'gyur ro, des na yid ni chos kun gyi yul can dang / chos rnams kyi don shes par byed pa dang / 'jug ldog byed pa po yin la, yid de dge na shes pa gzhan yang dge ba sogs dang / yid de'i yid byed kyi dbang gis shes pa gzhan yul la' jug ldog byed pa sogs kyi phyir yid ni gtso bo yin te, bcom ldan 'das kyis mdo las/ chos kyi sngon du yid 'gro ste, yid mgyogs yid ni gtso bo yin/ zhes gsyngs pa ltar ro, /de'i phyir shes byed thams cad blo dang / shes bya thams cad chos su 'du'o, /blo de la sgo lnga'i rnam shes ni rnam pa kun tu rtog med yin la, yid la rtog bcas rtog med gnyis yod de, rtog med kyi shes pa'i yul ni/ yul dus rnam pa ma 'dres pa, rang dus kyi rang mtshan ming gi sgra dang 'dres su mi rung ba'o, rtog bcas kyi yul ni bum pa sogs chos rnams kyi rang rang gi don gyi spyi tsam zhig yid ngor snang ba ste, 'di ni ming gi sgra dang 'dres su rung ba yin pas 'di la don spyi 'am sgra don zhes bya ste, brda la byang ba rnams kyis de dang sgra bsres nas bzung ba de'i sgo nas yul dus rnam pa bsres ba'i tshul gyis bum pa la sogs pa chos rnams kyi rnam bzhag sna tshogs phyed do,
shes bya dang / de'i dbye ba dngos dngos med gnyis dang / dngos po la bem shes ldan [15B] min 'du byed gsum du dbye ba lta bu'i tha snyad dang / de dag gong ma gong mar bsdu ba dang / shes bya dang dngos po ni bem po sogs kyi spyi yin pa dang / bem po sogs de'i bye brag yin pa dang / btags pa la mi ltos par rang nyid rdzas su yod pa sngon po lta bu dang / btags pa tsam gyis yod pa spyi la sogs pa lta bu dang / rtog med shes pa rnams snang pa'i sgo nas rdzas la 'jug pa dang / rtog bcas kyis de min gzhan rnam par bsal bas/ gzhan sel lam/ rnam bcad dam/ gzhan las ldog pa'i sgo nas btags pa rnams la sel bas 'jug pa yin zhing / de 'dra'i btags pa de la ldog pa zhes bya'o,
gzhan sel de la don rang mtshan de gzhan las log pa'i ngo bor gnas pa'i cha nas don rang mtshan gyi gzhan sel dang / gzhan sel ba dang mthun par 'dzin pa'i blo yi gzhan sel gnyis yod do, sel ba 'am rnam bcad de'i stobs kyis/ gzhan bum pa min pa rnam par bcad na, bum pa rang nyid yongs gcod du grub cing / bum pa'i steng na ma byas pa las logs pa'i cha nas byas pa, rtag pa las log pa'i cha nas mi rtag pa sogs ldog pa'i chos du mar 'byed pa'i rnam bzhag byed do,
yang yul can blo la rigs bzhi ste, ma rtogs/ log rtog/ the tshom/ yang dag par rtogs pa'o, ma rtogs pa'i bye brag la, mngon sum snang la ma nges pa dang / rjes dpag [16A] tshad ma la ma brten pa'i yid dpyod gnyis ni/ yid shes la nges pa 'dren mi nus pa'i cha nas bzhag pa'o, log rtog ni phyin ci log tu 'dzin pa'o, the tshom ni rtse gnyis su 'jug pa phyogs ma chod pa'o, yang dag par rtogs pa la rgyu mngon sum tshad ma dang / rjes dpag tshad ma gnyis so, de gnyis kyi 'bras bu bcad shes te nges shes so,
yul la snang yul ni rtog med shes pa'i yul gzugs sogs lta bu/ zhen yul ni rtog bcas kyi shes pas don spyi la yul du zhen pa, de gnyis kar yang skyes bu'i 'jug ldog gi yul du byed pa'i cha nas 'jug yul/ blos gzung bar bya ba'i yul yin pa'i cha nas gzung yul zhes brjod la, de ltar yul yul can gyi rnam bzhag dang /
yang 'gal 'brel kyi rnam bzhag la, 'gal ba gnyis te rgyun nus mtshungs su mi 'grogs pa lhan cig mi gnas 'gal yin la, de la bdag 'dzin dang bdag med 'dzin pa lta bu blo 'gal dang / tsha reg grang reg lta bu don 'gal dang gnyis yod/ phan tshun spang 'gal la dngos 'gal rtag mi rtag lta bu/ brgyud 'gal 'gal zla'i khyab bya dang 'gal zla cig shos te, rtag pa dang byas pa lta bu gnyis so,
'brel ba la byas mi rtag lta bu ltog pa tha dad kyang bum pa'i chos su ngo bo tha dad med pa lta bu bdag gcig 'brel/ me du lta bu de byung 'brel gnyis su yod do,
yang [16B] bum pa zhes pa'i btags don lto ldir ba bum pa 'jog byed kyi mtshan nyid/ des bzhag pa'i bum pa'i tha snyad mtshon bya, de gnyis gang la sgrub pa'i gzhir mtshon bya'i bye brag las gser kyi lto ldir ba'i gong bu 'dzin pa mtshan gzhi lta bu ste, de ltar mtshan mtshon gzhi gsum gyi rnam bzhag dang /
yang bum pa lta bu khyad gzhi chos can dang / de'i steng du kha khyer dang lto ba 'dab ma sogs dang byas mi rtag sogs chos ji snyed yod pa khyad par kyi chos zhes bya ba'i rnam bzhag dang /
yang brjod bya rjod byed kyi rnam bzhag ni/ brtag bya phyi rol kyi don dang / de'i don spyi blo la snang ba'i snang brtags gcig tu bsres nas brda' rnams don la 'byor bar 'gyur la, de la dpyad na ming gi sgras dngos kyi brjod bya don spyi/ zhen pas brjod bya don rang mtshan/ dngos kyi rjod byed sgra spyi/ zhen pas rjod byed sgra rang mtshan yin kyang / yid rtog bcas kyis sgra dang sgra spyi gcig tu bsres te rjod byed dang / don dang don spyi gcig tu bsres te brjod byar bzung nas/ rjod byed kyi tshig las brjod bya'i don rtogs pa yin no,
de la sogs pa'i tha snyad don mthun gyi nam bzhag 'di dag la brten nas shes bya'i don la ma rmongs par 'gyur ba yin no, tha snyad de la shes brjod 'jug gsum du bzhag pa ni sems dang ngag dang lus kyi sgo nas so, tha snyad byed pa'i rgyu'i sgo nas dbang shes kyis mngon [17A] sum mthong nas tha snyad byed pa mthong ba'i tha snyang / de bzhin du yid ches pa'i tshig las thos pa dang / rang gi yid kyis dpyad nas bye brag phyed pa dang / rang rig pas nyams su myong ba las tha snyad byed pa'i tshul bzhi dang /
yang yin yod du sgrub pa dang / med na yin du dgag pa ste, sgrub tshul gyi tha snyad dgag sgrub kyi yan lag bzhi ste, 'di nams kyis mtshon nas tha snyad kyi nam bzhag khong du chud par bya'o,

de ltar phung khams skye mched kyi rnam bzhag de yang / gzugs kyi phung po ni skye mched dang khams bcu dang / chos kyi khams dang skye mched kyi phyogs gcig gis bsdus so, de'i phyir chos kyi skye mched pa'i gzugs 'de phung lnga'i nang tshan byi gzugs su brjod kyi yul lnga'i nang tshan kyi gzugs kho na min no, gzugs brnyan dang sgra brnyan lta bu mig rna'i shes pa'i yul tsam yin par tha snyad du khas len pa la 'gal ba med kyang / de dag la gzugs sgra rang mtshan pa gang yang med pas med pa gsal snang tsam ste chos kyi skye mched kyi gzugs su bsdu yi/ gzugs sgra'i skye mched du mi bsdu'i/ phung po lnga'i bye brag tu gyur pa'i gzugs la, bstan yod thogs bcas ni ka bum sogs kyi gzugs lta bu'o, /bstan med thogs bcas ni dbang rten mig sogs mthong bya 'di'i nang na shin tu dangs pa nyi 'od ltar yod pa phal pas dbang pos gzung du med kyang thogs [17B] bcas su 'dod do, bstan med thogs med ni rnam par rig byed min pa'i gzugs te de gsum tsam gsungs kyang / gzugs brnyan la bstan yod thogs med kyi gzugs kyi tha snyad tsam 'dogs rung bar mngon no,
rnam par shes pa'i phung po ni yid kyi skye mched dang shes pa'i khams bdun gyis bsdus so, phung po gzhan gsum dang / gzugs phung gi phyogs gcig chos kyi skye mched kyi gzugs dang / 'dus ma byas dang bcas pa ni chos kyi skye mched dang chos kyi khams kyis bsdus so, de thams cad gzugs kyi phung po dang / yid kyi skye mched dang / chos kyi khams gsum gyi nang du 'du'o,
yang shes bya gzhi lngar 'du ste, snang ba gzugs kyi gzhi ni/ gzugs kyi phung po sngar ji skad bshad pa bzhin no, gtso bo sems kyi gzhi ni/ rnam par shes pa tshogs drug gam brgyad po de'o, 'khor sems byung gi gzhi ni sems byung rnams te tshor ba dang 'du shes dang bcas pa'i sems byung nga gcig go, ldan min 'du byed ni sngar bshad ba bzhin dang / 'dus ma byas kyi gzhi ni chos kyi khams su sngar bshad pa bzhin du shes par bya'o, skye mched kyi skabs so,

rten ci ra 'brel bar 'byung bgang zhe na, phyi dang nang gis bsdus pa'i chos 'di rnams rgyu med par byung ba ma yin/ rgyu min pa bdag dang dus dang dbang phyug sogs byed po rtag pa gzhan [18A] gyi rgyu las byung ba ma yin la, rang rang gi rgyu rkyen rten 'brel tshogs pa la brten nas skye ba ni rten cing 'brel bar 'byung ba zhes bya ste, tshul 'di lta bur smra ba ni sangs rgyas kyi gsung thun mong min pa'i rang lugs so,
de la phyi'i chos thams cad ni sa bon las myu gu skye ba la sogs pa'i tshul du rten cing 'brel bar 'byung la, nang gi chos sems can mchog dman bar ma'i phung po thams cad ni rten 'brel yan lag bcu gnyis kyi tshul tu 'byung ngo,
de ji ltar na phyi'i rten 'brel ni/ rgyu dang 'brel ba bdun dang / rkyen dang 'brel ba drug gi tshul gyis sa bon las myu gu sogs 'byung ba'i dpes mtshon nas shes par bya ste, rgyu dang 'brel ba ni/ sa bon dang myu gu dang / 'dab ma dang / sdong bu dang / sbu gu dang / snying po dang / me tog dang / 'bras bu rnams snga ma las phyi ma rim bzhin skye ba nyer len kyi rgyu'i dbang du byas te gsungs so,
rkyen dang 'brel ba ni/ sa chu me rlung nam mkha' dus dang drug ste, rim pa ltar brten pa dang sdud pa dang smin pa dang 'phel ba dang go 'byed pa dang rim pas 'gyur bar byed de, lhan cig byed pa'i rkyen 'di dag gis myu gu nas 'bras bu'i bar du bdun po 'byung ba'i grogs byed do,
nang gi rten 'brel la rgyu dang 'brel ba ni yan lag bcu gnyis te, gang zhe na mdo las/ rten cing 'brel bar 'byung ba zhes bya ba ni 'di lta ste, 'di yod pas [18B] na 'di 'byung la, 'di skyes pa'i phyir 'di skye ba ste, gang 'di ma rig pa'i rkyen gyis 'du byed rnams/ 'du byed kyi rkyen kyis rnam par shes pa sogs nas/ de bzhin du ming dang gzugs dang / skye mched drug/ reg pa, tshor pa, sred pa, len pa, srid pa, skye ba, rga shi'i bar du sbyar zhing / mya ngan dang / smre sngags 'don pa dang / sdug bsngal ba dang / yid mi bde ba dang / 'khrugs pa rnams 'byung ste, de ltar sdug bsngal gyi phung po chen po 'ba' zhig po 'di 'byung bar 'gyur ro,
de la ma rig pa 'gags pas 'du byed 'gags sogs nas/ skye ba 'gags pas rga shi dang mya ngan sogs sdug bsngal gyi phung po chen po 'ba' zhig po 'di 'gag par 'gyur ro, zhes gsungs pa ltar/ bden don mi shes shing / khams gsum gyi rang sa'i phung po rnams la, rtag pa dang bde ba dang bdag dang ril po dang gcig pu dang sems can dang bdag gir 'du shes pa la sogs pa dngos po'i rang bzhin dang mi mthun par phyin ci log tu 'dzin pa'i rmongs pa yang dag pa'i don la sgrib par byed pa'i kun rtog de la ma rig pa zhes bya'o,
bdag tu 'dzin pa'i ma rig pa de yod na de'i dbang gis chags sdang gti mug gis bskyed pa'i las bsod nams dge ba dang / bsod nams min pa mi dge bdang / mi g.yo ba'i las rnams 'byung bas ni/ rnam shes la yang srid kyi [19A] sa bon 'debs pas 'du byed ces bya ste, dge bas mtho ris kyi rten dang bde ba, mi dge bas ngan song gi rten dang sdug bsdal/ mi g.yo bas khams gong ma gnyis kyi yang srid 'du byed do,
'du byed des phyi ma'i srid pa'i skye gnas su 'gro ba'i rnam shes 'byung bar byed de, yang srid 'phyen byed kyi sa bon rnam shes la bzhag pa 'phen byed kyi rnam shes dang / nam zhig rkyen tshogs nas srid pa'i skye gnas su khrid pa 'phangs 'bras kyi rnam shes zhes bya zhing / de gnyis ka don du yang srid 'grub byed rnam shes kyi yan lag tug cig go,
rnam shes de'i dbang gis mngal du nying mtshams sbyar ba na rnam shes dang tshor 'du 'du byed di ming bzhi dang / de dang lhan cig pa'i mer mer po la sogs pa gzugs te ming gzugs kyi yan lag de dag mdung khyim ltar phan tshun brten pa'i tshul gyis srid pa'i lus kun nas 'dzin pa 'byung ngo,
de las ming gzugs kyi gnas skabs yongs su rdzogs pa nang gi mig sogs skye mched drug 'byung ngo, de las yul dbang shes gsum 'dus nas yul gyi 'gyur ba yongs su gcod pa mig gi 'dus te reg pa sogs drug 'byung ba ni reg pa'i yan lag go,
reg pa de las tshor ba bde sdug btang snyoms gsum gyi cha la nye bar longs spyod pa 'byung ba ni tshor ba'i yan lag [19B] go, tshor ba de la brten nas tshor ba bde ba la mi 'bral bar 'dod pa'i 'dod sred/ mi bde ba la 'dor bar 'dod pa'i 'jigs sred/ btang snyoms la rang gar gnas shing / gzugs nas chos kyi bar yul drug po de la sred pa skye ste, mdor na tshor ba'i rgyu las yul gyi ro myang ba dang dga' zhing zhen pa skye bas yul sdud pa ni sred pa'i yan lag go, 'di la 'dod gzugs gzugs med kyi sred pa gsum sogs su dbyer yod do,
sred pa de las bdag sdug pa dang bde ba'i ngo bo las bral bar ma gyur cig/ ces bskam chags kyi sred pa lhag par phel te, yul dang du len pa la dngos so sbyor ba ni len pa'i yan lag ste, 'di la dbye ba byas na, 'dod pa dang lta ba dang tshul khrims brtul zhugs mchog 'dzin dang bdag tu smra ba nye bar len pa bzhir yang gsungs so,
len pa des lus ngag yid gsum gyi sgo nas srid pa phyi ma 'grub pa'i las mngon du byas pa ni srid pa'i yan lag te khams gsum gyi srid pa gsum sogs su dbyer yod do, srid pa de'i mthus nam zhig rkyen tshogs pa na, yang srid kyi skye gnas der dngos su dang por skye ba dang lus rdzogs pa dang ris mthun par gnas pa ni skye ba'i yan lag ste, de ni rten de la sdug bsngal ji snyed myong ba'i gzhir gyur pa yin no,
skye ba de [20A] las phung po'i rgyun 'gyur pa'i rga ba dang / rgyun 'gags pa'i shi ba dang / des mtshon nas nang gi yongs su gdung ba mya ngan dang / de las byung ba'i tshig smra ba smre sngags 'don pa, sgo lnga'i shes pa dang mtshungs ldan gyi sdug bsngal ba, yid shes dang mtshungs ldan gyi yid mi bde ba, gzhan yang nyams su mi bde ba'i nye nyon rnams 'byung ba 'khrugs pa ste, de ltar mdor na sdug bsbal gyi phung po chen po 'ba' zhig po 'di ni 'khor bar skye ba las byung ba'o,
skye ba de yang srid pa las byung ba sogs yan lag snga ma snga ma 'di dag yod pas phyi ma phyi ma dag yod pa'i tha snyad 'byung la, snga ma dag skyes pas phyi ma skye ba'i don byed pa yin cing / snga ma med pa dang ma skyes pa na phyi ma 'di mi 'byung la mi skye ba yin pas/ sdug bsngal gyi phung po 'gag par 'gyur ro,
rkyen dang 'brel ba ni ma rig pa sogs nyon mongs rnams dmigs pa'i yul dang nang gi dbang po sogs kyis kyang grogs byas nas skye la, las kyang de bzhin te, sdug bsngal gyi gzhi ming gzugs sogs bdun ni/ nang gi sa'i khams sra ba dang / chu gsher bdang / me dro bas zas sogs 'ju ba dang / dbugs 'byin rngub sogs rlung gi khams dang / go 'byed pa'i bu ga rnams nam mkha'i khams dang / rnam par shes pa'i khams te khams drug gis lhan [20B] cig byed pa'i rkyen byas nas skye bar byed do,
mig shes ni rten mig dbang dang / dmigs pa gzugs dang / mgnon par snang ba dang / mi sgrib pa nam mkha' dang / bsam pa yid byed lngas lhan cig byas nas skye ba de bzhin du shes pa gzhan la'ang ci rig pa su sbyar te shes par bya'o,
de ltar phyi dang nang gi chos thams cad rang rang gi rgyu rkyen ji tsam tshogs dgos pa las gang yang rung ba ma tshang na mi skye la, tshang na nges par skye ba rten cing 'brel bar 'byung ba'i ngang tshul te, thog ma med pa'i dus nas rgyun gyi 'jug pa 'di la byed pa po bdag dang dbang phyug sogs gang yang med la, rgyu rnams kyis rang 'bras 'di dag skyed do snyam du mi rtog/ 'bras bu rnams kyis bdag 'dis skyed do snyam du mi rtog kyang / rgyu 'bras kyi rten 'brel khyad par lnga ldan du 'byung ste, gang zhe na, sa bon ma 'gags par yod bzhin myu gu skye ba min par sa bon 'gags nas myu gu skye ba'i phyir rtag pa min pa dang / sa bon 'gags te rgyun chad pa las skye ba min par sa bon 'gag pa dang myu gu skye ba srang mda'i mtho dman bzhin du bar ma chad par 'byung bas chad pa min pa dang / sa myug de gnyis ngo bo dang byed las kyi sgo nas gcig min pas snga ma phyi mar 'phos pa min pa dang / sa bon chung dus 'bras bu che ba 'byin pas rgyu chung ngus 'bras bu chen po 'grub pa dang / [21A] gro yi sa bon las gro yi myu gu dang / dge ba las bde ba lta bu rgyu dang 'bras bu 'dra ba'i rgyud dam rgyu mthun pa lnga yi tshul du phyi nang gi rgyu 'bras rnams shes par bya ste, dpe ji ltar na, kha thon mar me me long rgya, me shel sa bon skyur dang sgras/ phung po nying mtshams sbyor ba yang / mi 'pho bar yang mkhas rtogs bya, zhes gsungs pa ltar shes par bya ste, de ltar rtogs na chos 'di dag rten 'brel gyi snang ba bslu med tsam las/ bdag dang gzhan dang gnyis ka dang rgyu med las ma byung bas ma skyes pa, dus dang dbang phyug sogs byed pos ma byas pa, srog dang gang zag dang byed pa po dang bdag dang chos kyi ngo bo med pa, gsog dang gsob dang rang bzhin med par shes nas/ bdag sngon dang da lta phyi mar ci ltar gyur pa'i mtha' la rtog pa sogs kyi g.yo ba dang bral te phyis mi skye bar byed pa'i bzod pa dang ldan pa de la sangs rgyas rnams kyis bla med byang chub tu lung ston par 'gyur ro,
de ltar rten 'brel yan lag bcu gnyis po ni ma rig pa ma spangs kyi bar du rgyun gyis 'jug ste, sngon gyi dus kyi rgyu ma rig pa dang 'du byed kyis ni da lta'i 'phangs 'bras kyi rnam shes nas nyon mongs sred len gyis yang srid 'grub byed kyi las bsags pa srid pa'i bar du 'byung la, de las slad ma'i tshe las dang mthun par gnas ris gang [21B] du skye ba len cing / rten des 'khor ba'i sdug bsngal rga shi sogs myong ngo,
de ltar gyur pa'i rten de la yang / gzugs can gyi sems can rnams la rnam shes nas srid pa'i bar 'byung zhing / gzugs med du skye ba na rnam shes nas ming bzhi'i phung pos bsdus pa'i srid pa'i bar du 'byung la, gang dang gang du skyes kyang de'i skye ba dang rga shi 'byung ste, slar yang las nyon gyis 'phangs nas skye ba gzhan len pas/ de ltar mgal me'i 'khor lo dang zo chun khyud mo ltar khams gsum srid par yang nas yang du 'khor zhing 'phyan par 'gyur ro,
de ltar rgyun chags su 'byung tshul spyir shes par byas nas tshe du la rdzogs dpyad na sngon dang / da lta phyi ma'i skye ba gsum la rdzogs tshul bshad ma thag pa ltar dang / tshe sngon ma'i gnas skabs kyi phung pos bsdus pa'i ma rig pa dang / sred len gyi dbang gis las 'du byed pa dag gis 'phangs pa'i phyi ma'i skye ba len zhing de la rnam shes nas srid pa'i bar dang rga shi yang 'byung bas tshe gnyis kyis rdzogs pa'ang yod do, gang ltar kyang gcig la gcig brten nas rgyun chags par 'byung bas 'di la rgyun chags pa'i rten 'brel zhes bya'o,
gzhan yang bya ba rdzogs pa'i skad cig la bcu gnyis tshang tshul/ srog gcod pa lta bu la mtshon na, mi shes pas 'jug pa ma rig pa, de bzhin du las de 'du byed pa, de dus [22A] kyi shes pa rnam shes/ de dus kyi ming gzugs dang / skye mched drug mtshon bsnun pa sogs kyi reg pa, de dus rang gzhan gyi bde sdug myong zhing tshor ba, de la dga' bas 'jug cing sred pa, de las phyi ma'i cha dang du len pa, las byed dus kyi phung po srid pa, de las da lta dang phyi ma'i cha skye ba, de 'gyur zhing 'gag pa rga zhi'i yan lag gi tshul du 'dod de skad cig ma'i rten 'brel lo,
rgyun chags pa'i rten 'brel yan lag bcu gnyis po de dag bsdu na, ma rig pa dang 'du byed dang rnam shes gsum ni 'phen pa'i yan lag/ ming gzugs nas tshor ba'i bar bzhi 'phangs 'bras kyi yan lag/ sred len srid pa gsum mngon par 'grub pa'i yan lag/ skye ba dang rga shi gnyis mgnon par grub ba'i yan lag ste bzhir 'gyur ro,
yang gsum du sdud de ma rig pa dang sred pa dang len ba gsum ni nyon mongs pa'o, 'du byed dang srid pa gnyis ni las so, lhag ma bdun ni sdug ba sngal gyi gzhi bdun no, 'di gsum la rim ba ltar nyon mongs pas kun nas nyon mongs las kyi kun nas zhon mongs pa, tshe'am skye ba'i kun nas nyon mongs pa zhes 'dogs te 'gro ba rnams nyon mongs pa bar byed pa'i phyir ro,
yang rim pa ltar nyon mongs pa'i gzhan dbang dang / las kyi gnan dbang dang / sngug bsngal gyi gzhan dbang zhes kyang brdod [22B] do,
nyon mongs gsum las las gnyis 'byung la, de las sdug bsngal gyi gzhi bdun 'byung zhing / bdun po las slar yang nyon mongs dang las 'byung ste de ltar rgyun gyis 'khor ro,
yan lag bcu gnyis kyi nang nas las nyon lnga dang rnam shes rnams ni yan lag gzhan rnams sdud par byed pa'i rgyu ste, ma rig pa dang / las dang / sred pa dang / rnam shes bzhi'o, sred len gnyis sred pa dang / 'du byed srid pa gnyis las yin no, de la rnam shes ni sa bon lta bu/ las zhing sa, sred pa rlan/ ma rig pa 'debs byed dang lud lta bu ste, de bzhis srid pa'i skye gnas rnams su ming gzugs kyi myu gu 'grub par byed do,
lugs 'byung gi rten 'brel de dag bsdus na las nyon lnga ni rgyu kun 'byung gi bden pas bsdus la, lhag ma bdun ni sdug bden gyis bsdus pa'o,
lugs ldog gi dbang du byas na bden pa'i chos nyid rtogs pa'i ye shes kyis ma rig pa spangs nas las nyon lnga ldog pa lam bden dang / sdug bsngal gyi gzhi bdun de bzhin nyid du 'gog pa 'gog bden te bden don rnam pa bcu gnyis kyi rang bzhin no,
de ltar rten cing 'brel bar 'byung ba 'de ni sangs rgyas kyi gsung gi mdzod kyi nang na gces pa zab mor gyur pa ste, sus shes rab kyi spyan gyis rten cing brel bar 'byung ba mthong ba des 'phags lam brgyad kyi rang bzhin can gyi chos mthong [23A] zhing / ye shes kyi gzigs pas shes bya thams cad thugs su chud pa sangs rgyas chos kyi sku mthong ba yin no, zhes gsungs so, rten 'brel gyi skabs so,

gnas dang gnas ma yin pa ni shes bya thams cad la khyab pa ste, rgyu gang las gang 'byung mi 'byung gi khyad par/ dge ba'i las las bde ba 'byung zhing sdug bsngal mi 'byung ba dang / 'bras kyi sa bon las rang gi myu gu skye la nas kyi myu gu mi skye ba lta bu dang / gang bdag med par rtogs pa las thar pa thob ba gnas yin la, bdag yod par 'dzin pa las thar ba thob pa gnas min pa lta bu dang / me tsha ba yin zhing de la grang ba gnas med pa lta bu shes bya thams cad kyi rang bzhin la gnas dang gnas min sna tshogs yod do,
de mtshon byed tsam du gzhan dbang bdun gsungs te, mi 'dod pa gzhan dbang mi dge'i las kyis ngan 'gror 'gro ba lta bu/ 'dod pa gzhan dbang dge ba'i las kyis bde 'gror skye ba lta bu/ rnam par dag pa gzhan dbang sgrib pa ma spangs par rnam dag mi 'thob pa lta bu/ mnyam du 'byung ba gzhan dbang 'gran zla med pa'i las bsags pas sangs rgyas dang 'khor sgyur re re las zung re lhan cig mi 'byung ba lta bu/ dbang byed pa gzhan dbang bud med gyi rten gyis 'khor lo sogs rin chen sna bdun la dbang byed mi nus pa lta bu/ 'thob pa gzhan dbang bud [23B] med gyi rten la rang sangs rgyas mi thob pa lta bu/ kun tu spyod pa gzhan dbang 'pags pas srog gcod sogs mi spyod pa lta bu ste, 'di dag ni gnas dang gnas min gyi gzhan dbang gis byas kyis/ rang gang 'dod du ci dgar byed du med pa ni dngos po'i chos nyid yin no zhes bstan ba 'dis mtshon nas/ chos rnams la gang dang ci zhig gnas yod pa dang / med pa shes par bya ste, rgyu kun 'byung las sdug bsngal 'byung ba dang / lam las 'gog pa 'byung ba sogs gnas yod dang / lam las sdug bsngal dang / kun 'byung las 'gog pa 'byung ba gnas med sogs rten cing 'brel 'byung gi tshul gyis bden bzhi'i 'jug ldog gis bsdus pa thams cad kyang 'di'i khongs su 'du ste, mdor na shes bya rig pa'i gnas thams cad gnas dang gnas min shes pa'i ched du yin te, bzo rig pas gang la bya ba'i don legs pa dang mi legs pa'i gnas skabs shes par byed ba dang / gso dpyad kyi rig pas nad zhi ba dang mi zhi ba'i gnyen po sogs shes pa dang / sgra rig pas ming sogs kyi rang bzhin dang / de la sbyar ba'i rkyen dang / de las rnam 'gyur ji ltar bya ba'i gnas gnas min shes par byed pa dang / tshad ma rig pas bsgrub bya gang zhig sgrub byed gang las 'grub mi 'grub gyi tshul shes ba dang / nang rig pas dngos po'i de nyid shes shing don du gnyer bya'i gtso [24A] bo lam dang 'gog pa yang dag par shes par byed pa dang / de bzhin du mngon brjod kyis don gang la ming sna tshogs 'jug mi 'jug/ rtsis kyis grangs sogs ji lta bu'i gnas/ zlos gar gyis skad rigs sna tshogs/ snyan ngag gis brjod pa mdzes mi mdzes/ sdeb sbyor gyis tshigs bcad kyi lci yang sogs kyi gnas gnas min shes par byed pa yin mod kyi/ 'dir ni nang rig pa las grub pa'i mtha' mdor bsdus pa tsam zhig bshad par bya ste, de shes na gnas gnas min gyi don la mkhas par 'gyur ba'i phyir ro,
de yang grub pa'i mtha' la spang bya phyi rol pa dang / blang bya nang pa gnyis/ phyi nang tsam gyi khyad par dkon mchog gsum skyabs gnas yang dag tu khas len mi len gyis 'byed do, de dag gi grub mtha' la, phyi rol pa la lta ba drug cu rtsa gnyis sogs dbye sgo mang yang / bsdu na tar-ka sde lngar 'du zhing so so'i 'dod tshul mang du yod la, de thams cad kyi rtsa ba bsdus na rtag chad smra ba gnyis su 'du'o,
de la rtag smra ba rnams kyis bdag dang dus dang dbang phyug tshangs pa khyab 'jug sogs gang yin pa de 'jig rten kun gyi byed pa por lta zhing de nyid rtag par 'dod/ rtag pa de 'dra ba'i go' phang thob phyir lha mnyes par byed pa dang bsam gtan sgom pa sogs kyi lam yod do,
chad par smra ba rnams kyis sngon gyi las sogs kyi [24B] rgyu med par da lta'i 'jig rten 'di rang gi ngo bos byung ste, sems ni 'byung ba bzhi las glo bur du byung zhing / 'chi ba'i dus na rgyun chad pas thar pa sgrub phyir lam la 'bad pa sogs don med do zhes zer/
'di kun kyang bdag yod par sbra ba yin no, de la sangs rgyas pas dpyad na, rgyu rtag pa de 'dras 'jig rten skyed pa'i don mi byed de, 'jig rten thams cad cig char bskyed par ma dmigs la, rim gyis bskyed na rgyu mi rtag bar 'gyur ro, yang byed pa po de la rgyu gzhan yod na byed po thug med du 'gyur zhing mi rtag par yang 'gyur ba dang / med na de yod pa'i rgyu mtshan bsgrub du med par 'gyur ba dang / yang des bsam bzhin byed na bsam ba'i gzhan dbang can dang mi rtag par 'gyur la, sems can sdug bsngal can byed pa mi rigs pa byed par 'gyur ro, bsam bzhin mi byed na rang dbang med pa dang / de mchod kyang phan par mi 'gyur ba sogs rigs pa yang dag gi sgo du mas khegs pa yin no,
rgyu med par 'byung ba mi srid de, gal te 'byung na de 'dra yul dus kun na rtag tu khyad med bar yod par 'gyur ro, rgyu med kyang chos rnams kyi rang gi ngo bo srid par 'dod ba'i phyir ro,
yang na myu gu sogs yul dang dus gang na yang med par 'gyur te, sa bon dang chu sogs tshogs kyang de'i rgyu ma yin par 'dod pa'i phyir de gang gis kyang skyed pa med [25A] pa'i phyir ro,
de lta na yang dngos po rnams ni gang du rgyu rkyen tshogs pa'i yul dus de na yod cing / ma tshogs pa na med pas res 'ga' ba min pa'i phyir rgyu las byung bar grub bo,
yang 'byung ba bzhi las rnam shes gsar du 'byung ngo zhes 'dod na, rang gis chos rnams rgyu med du khas blangs pa yang nyams la, da lta'i rnam shes ni rang gi nyer len gyi rgyu rnam shes snga ma las skye zhing rgyun 'jug par mthong ba'i phyir/ sngar rang gi nyer len gyi rgyu med par bem po las 'byung mi srid de, rdo las myu gu dang / mun ba las snang ba bzhin no, rnam shes gsal rig gi rgyun 'di klog sogs byang ba ltar snga ma snga ma las phyi ma phyi ma dag 'byung zhing rgyun mi 'chad bar mthong na rgyu tshang bzhin 'chi ba'i tshe ji ltar rgyun chad par 'gyur te, sa bon skyon med pa sa chu sogs kyi rkyen dang ldan pa'am/ klung chen po'i rgyun 'jug pa bzhin no,
de ltar brtag na chos thams cad ni rang rang gi rgyu yod na skye la med na mi skye bas rten cing 'brel bar 'byung ba nyid du dngos stobs kyi rigs pas mthong ba'i phyir/ dbang phyug sogs kyi rgyu las ma yin zhing / rgyu med par yang min no,
de lta bas na rten nas 'byung ba'i phung po lnga po 'di la bdag dang byed pa po med de phung po dang gcig tha dad gang du yang ma dmigs pas so,
nang pa'i grub mtha' bye mdo dbu sems bzhi [25B] las/ bye brag smra bas shes bya gzhi lnga dang dus gsum sogs rdzas yod du 'dod de, gzhi grub pa rnams de dang de'i chos su yod pas thams cad yod par 'dod/ de la bcom pa'am blos gzhan bsal na gzhig tu rung ba bum pa lta bu la sogs pa kun rdzob tu yod pa dang / gzhig tu med pa rdul phra rab dang skad cig cha med gnyis ni don dam du yod pa ste dngos po kun gyi rtsom gzhi'o,
kun rdzob don dam du yod pa gnyis ka yang chos rang rang gi ngo bo rdzas su yod pas mi stong par 'dod/ gang zag gi bdag ni phung bo las gcig tha dad du med pas rdzas su med pa dang / mig dbang sogs la brten pa'i shes pas rang dang dus mnyam pa'i yul rnam med rjen cer du 'dzin pa dang / rang rig mi 'dod pa dang / skye sogs mtshan nyid rnams dngos po las tha dad par 'dod pa sogs/ tha snyad 'dod tshul du ma yod do,
mdo sde pas ni cha med gnyis dang bdag med 'dod tshul gong dang 'dra la, ldan min 'du byed dang 'dus ma byas rnams rdzas su grub pa med de kun gtags pa tsam mo, ldan min ni bem shes kyi gnas skabs la btags pa tsam las rang gi ngo bo rang rkya thub par logs su med la, 'dus ma byas ni dgag bya bcad pa las btags pa tsam mo, snga ma'i yul dbang shes gsum tshogs pa'i rgyu las da lta mig shes sogs skye zhing / shes pa [26A] des yul gyi rnam pa blo la shar ba de 'dzin gyi yul dngos su mi 'dzin te yul ni rnam pa gtod byed kyi rgyu lkog na yod pa'o, shes pa thams cad kyis rang rig par byed pa dang / dngos po rnams rkyen bzhi las skye zhing rang gi ngo bos skad cig gis 'gag pa'i chos can te, dngos po dang de'i mtshan nyid skye sogs tha dad du med de ldog pa'i sgo nas btags ba tsam du 'dod do, de dag ni phyi don gzhal ba la dngos stobs kyi rigs pa dang ldan zhing / btags pa rnams la rdzas su grub pa'i ngo bo med par rtogs pa sogs kyis dngos po'i don la phyin ci ma log par gzhal ba'i tshul 'ga' zhig gis byed smra'i grub mtha' las 'phags so, ldan min rnams btags pa yin kyang tha snyad don mthun yin pas dngos po'i steng na yod pa'i chos su khas len dgos te bye smras kun btags 'ba' zhig yin na dngos po'i steng na mi rtag pa med par 'gyur ba'i gnad shes par bya'o, de bzhin du nam mkha' sogs 'dus ma byas kyang tha snyad du yod par 'dod dgos pa yin no,
sems tsams pas ni/ 'di ltar snang ba thams cad thog ma med pa'i dus nas rnam rtog sna tshogs goms pa'i bag chags nyid kun gzhi'i rnam shes la bzhag pa de nyid kyi mthu las sems kun gzhi'i shes pa nyid gnas don lus kyi snang ba'i rnam pa nyid du shar ba ma [26B] gtogs gzhan med pas thams cad sems kyi snang ba tsam ste, dper na rmi lam gyi snang ba bzhin no,
shes pa las gzhan pa'i phyi rol gyi don ma grub ste, dngos po rags pa rnams gsal ba'i mtha' rtsom gzhi cha med gnyis kyang don dam par mi 'grub ste, rdul cha med kyis rags pa rtsom pa'i tshe, dbus rdul gcig la phyogs rdul drug gam bcus bskor ba na, rdul tha dad kyis reg pa'i cha re yod na cha bcas su 'gyur la, med na phra rdul ci tsam tshogs kyang je cher rgyas par mi 'gyur bas cha med gzhig tu mi rung ba ma grub ste btags pa tsam du 'gyur ro,
dus mtha'i cha med kyang / rang gi snga phyi'i cha med la phyogs pa'i cha tha dad yod na cha bcas su 'gyur la, med na dus mtha'i skad cig du ma bsags kyang rgyun ring bar mi 'gyur te skad cig tsam du 'gyur ro,
de phyir phyogs dang dus kyis bsdus pa'i snang ba thams cad rang sems kyi snang ba tsam mo, 'di lta bu'i rten 'brel gyi snang ba 'di la gzhan dbang zhes bya ste, rten 'brel gyi gzhan dbang gis snang ba las rang gi ngo bo nyid kyis snang ba min pa'i phyir ro, gzhan dbang gi snang ba 'di la 'dus byas dang 'dus ma byas kyi chos sna tshogs kyi ngo bo dang / gang zag tu sgro btags pa'i bdag gnyis ni kun btags so, kun btags pa'i spyod yul bdag gnyis po des gzhan dbang [27A] gi rnam par shes pa 'di stong pa ni yongs grub ste 'di'i chos nyid do, de lta na spros pa kun gyi yul min pa'i gzung 'dzin gnyis stong gi shes pa rang gsal tsam zhig don dam par yod par 'dod do,
dbu ma pas ji ltar phyi don ma grub pa de bzhin de la 'dzin pa'i sems kyang mi 'grub ste, de gnyis ka yang rten 'brel gyi snang ba rang gi ngo bo nyid med par mtshungs shing spros pa'i yul min pa'i shes pa zhig rdzas su yod pa'ang btags pa tsam ste, gang rang gi ngo bo yod cing dmigs su rung ba zhig yin phan chod/ de'i ngo bo la brtags na bden par grub pa cung zad kyang mi 'grub bo,
de ltar chos thams cad rten cing 'brel bar 'byung ba'i dbang gis snang ba bslu med du shar ba tsam las/ rang gi ngo bos bden par grub pa chung zad kyang med pas stong pa nyid du gnas so, de lta bu'i stong pa dang rten 'byung ldog pa tsam gyi sgo nas tha dad du bzhag kyang / ngo bo tha dad du ma grub par zung du zhugs pa'i don spros bral so so rang gis rig par bya ba ni chos kyi dbyings zhes bya la, de ni rtag chad dang snang stong sogs kyi mtha' dang bral ba dbu ma'i lam gyis rtogs bya yin zhing rtogs bya de'i ngang na stong rten 'byung don gcig par gyur pa'am/ tha dad du med pa dang / zung du zhugs pa pa dang / mnyam par gyur pa zhes 'dod do,
'di pas gnas lugs ji lta ba [27B] bzhin gtan la pheb pas na grub mtha' kun gyi nang na bla na med pa yin no,
bye mdo gnyis theg dman dang / dbu sems gnyis theg chen gyi grub mtha' ste, kun rdzob dang don dam pa'i sems rnam pa gnyis bskyed nas lam lnga sa bcur theg pa chen po'i don nyams su blangs pas/ 'bras bu mi gnas pa'i myang 'das sangs rgyas su 'grub par 'dod pa mtshungs pa'i phyir ro, dbu sems sogs nang gi bye brag las 'dod tshul mang yang / 'dir spyi'i gnad tsam brjod pa'o,
de ltar grub pa'i mtha' gong nas gong du je bzang du gyur pa'i tshul la brten te, kun rdzob dang don dam pa'i rang bzhin phyin ci ma log par rtogs pa las/ chos thams cad kyi gnas dang gnas ma yin pa la mkhas par 'gyur ro, gnas dang gnas min bshad pa'i skabs so,

dbang po nyer gnyis ni/ mig gi dbang po dang / de bzhin du rna ba nas yid kyi dbang po'i bar drug gis rang rang gi yul 'dzin pa la dbang byed/ srog gi dbang pos ris mthun par gnas pa la dbang byed/ pho dbang dang mo dbang gis so so'i rten can du byed pa dang mngal nas skye ba rgyun mi 'chad pa la dbang byed/ tshor ba bde ba'i dbang po, de bzhin du/ sdug bsngal/ yid bde, yid mi bde, btang snyoms kyi dbang po lngas rnam smin gyi 'bras bur longs spyod pa la dbang byed/ dad brtson dran pa ting 'dzin shes rab kyi [28A] dbang po lngas 'jig rten pa'i dge ba'am dag pa la dbang byed/ kun shes byed pa, kun shes pa, kun shes ldan pa'i dbang po zhes mthong sgom mi slob pa'i rgyud kyi dad sogs kyis 'jig rten las 'das pa'i dag pa la dbang byed pas dbang po zhes bya'o,
de la mig sogs dbang po drug ni sngar bshad pa bzhin la, de las khyad par du dbang po drug gi zlas phye ba'i yid dbang ni yid shes skyed pa'i rten tsam yin la, 'dir bshad pa'i yid dbang ni rten de las skyes pa'i yid shes la yang go dgos so,
de drug gis rang yul 'dzin tshul ni/ mig dang rna pa'i dbang pos yul ma phrad par rgyang nas 'dzin cing / yul rang las che chung nges med 'dzin/ sna lce lus dbang gsum gyis phrad nas 'dzin la yul che chung rang dang mnyam pa 'dzin te 'di dag gi yul yul can phan tshun thogs bcas kyi reg bya can yin pa'i cha nas phrad ma phrad dpyad du yod do, yid dbang ni rang yul chos khams tsam du ma zad chos thams cad kyi yul can yin pas/ des yul gang dang gang bzung ba la reg pa'i tha snyad byed pa ste, bla dvags tshig gi reg pa zhes kyang brjod do,
de'i phyir yul dang phrad ma phrad dang yul rang las che chung dpyad du med de, shes pa la gzugs med pa'i phyir ro, 'du shes rgya che chung sogs ni gzugs che chung ma yin te [28B] shes pa nyid kyi khyab rgya che chung yin no,
pho dbang dang mo dbang ni/ lus dbang gi bye brag mthe bong lta bu dang rnga'i sbub lta bu pho mo 'du 'phrad kyi bde ba myong ba sogs kyi rten byed pa'o, tshor ba lnga dang dad sogs dang srog ni sngar bshad pa bzhin no,
kun shes byed pa mthong lam pa'i rgyud kyi dad sogs lnga dang tshor ba bde yid bde btang snyoms gsum dang yid dbang dang dgu po de la brjod pa'o, sgom lam pa'i rgyud kyi de dgu la kun shes pa'i dbang po, mi slob pa'i rgyud kyi de dgu la kun shes ldan pa'i dbang po zhes bya'o,
de ltar dbang po la gzugs can bdun dang / gtso sems can gcig dang / sems byung bcu dang / ldan min 'du byed du gtogs pa gcig dang / sems sems byung dgu las btags pa zag med kyi dbang po gsum ste nyer gnyis so,
dbang po de dag gi rab tu dbye ba la, kun shes par byed pa sogs gsum ni zag med do, gzugs can bdun dang srog dang sdug bsngal yid mi bde bcas bcu po sgom pas spang bya yin pas zag bcas so, de'i lhag ma tshor ba gsum dang dad sogs lnga yid dang dgu la ni zag bcas zag med gnyis gyi cha yod do, srog ni rnam smin las skyes pa, dad sogs lnga kun shes sogs gsum yid mi bde ni rnam smin min pa'o, de la yid mi bde ni rtog pa tsam gyis rang 'dod kyis 'jug pas [29A] rang nyid rnam smin kyi 'bras bu min la, dge mi dge gang rung du nges pas rang gis rnam smin gyi 'bras bu 'byin pa dang bcas pa'o zhes bye smras 'dod kyang / rnam smin gyi cha lung ma bstan yang yod dgos par mngon no snyam/ 'di dag gi zhib cha gzhan du bshad par bya'o,
gong gi lhag ma bcu gnyis las/ gzugs can bdun rnam smin las byung ba dang / rgyas byung rnams rnam smin min kyang zer/ yid dang tshor ba gzhan bzhi la ni dge mi dge lung ma bstan gsum yod pas/ dge mi dge zag bcas rnams rnam smin dang bcas pa dang / lung ma bstan rnams la rnam smin med pa'o, dad sogs lnga zag bcas rnam smin dang bcas pa, zag med kyi yid dang tshor ba dad sogs lnga po rnams la rnam smin med do, rnam smin ni 'khor ba'i rnam smin la 'dzin dgos so,
dad sogs lnga dang kun shes sogs gsum dge ba'o, yid dang tshor ba bde sogs la dge mi dge lung ma bstan gsum yod do, gzugs can bdun dang srog dbang dang brgyad ni lung ma bstan no, dri med gsum ma gtogs pa gzhan bcu dgu po thams cad 'dod par gtogs pa na yod/ de las pho mo'i dbang po dang sdug bsngal gnyis ma gtogs pa gzhan gzugs khams na yang yod/ gzugs can bdun dang btang snyoms min pa'i tshor ba gzhan bzhi ma gtogs pa'i [29B] lhag ma rnams gzugs med na yod/ zag med gsum ni khams gsum pa'i chos su gtogs pa min yang / khams gsum pa'i rgyud la mi 'byung ba ma yin no,
yid dang tshor ba bde yid bde btang snyom bzhi la mthong spang sgom spang spang bya min pa gsum yod/ yid mi bde ni mthong sgom gnyis kyis spang bya'o, gong bshad ltar gzugs can bdun sogs bcu ni sgom pas spang bya'o, dad sogs lda zag bcas sgom spang / zag med spang bya min no, dri med kyi dbang po gsum spang bya min no,
dbang po de dag rnyed tshul ni/ 'dod khams su mngal skyes sogs kyi dang por rnam smin gyi dbang po lus srog gnyis rnyed/ rdzus skyes mtsan med bskal pa dang po'i mi rnams lta bus mig sogs lnga srog dang drug cig char rnyed/ mtshan gcig pa rdzus skyes 'dod lha rnams lta bus snga ma drug gi steng du pho mo'i dbang po gang rung ste bdun rnyed/ rdzus skyes mtshan gnyis pa ngan song la srid pas de lta na brgyad rnyed do, gzugs khams na de'i mig sogs lnga srog dang drug rnyed do, gzugs med na srog dbang gcig pu gsar du rnyed do,
yang gzugs med du 'chi ba na srog dang yid dang btang snyoms kyi dbang po gsum cig char du 'gag go, gzugs khams na de gsum dang mig sogs lnga ste brgyad dus gcig 'gag go, rdzus skyes rnams cig char 'chi [30A] bas mtshan gnyis pa la snga ma brgyad la mtshan gnyis bsnan pas bcu 'gag go, mtshan gcig la dgu dang / mtshan med la brgyad do, mngal skyes sogs rim gyis 'chi ba dag la lus yid srog btang snyoms bzhi cig char 'gag go, de rnams ni ma bsgrib lung ma bstan dang nyon mongs pas 'chi sems kyi dbang du byas kyi/ dge sems skyes thob la gnas te 'chi ba la thams cad du dad sogs lnga bsnan pas gzugs med du brgyad 'gag pa sogs so,
dbang po gang gis rgyun zhugs sogs 'bras bu bzhi thob tshul dpyad na, rgyun zhugs dang dgra bcom pa'i 'bras bu ni/ yid dang dad sogs lnga ste drug gi steng du/ rgyun zhugs ni 'dod khams la chags bcas yin pas mi lcogs med kyi btang snyoms dang / mthong lam skad cig bco lnga par kun shes byed pa dang bcu drug bar kun shes te dgus thob bo, dgra bcom pa bsam gtan dang bo gnyis kyi dngos gzhir brten na de gnyis kyi yid bde dang / gsum pa la brten na bde ba, de gsum ma yin pa'i sa gang la brten kyang btang snyoms ste, de gsum gang rung dang / bar chad med lam rdor ting kun shes pa dang / rnam grol lam kun shes ldan pa ste dgus thob bo, phyir 'ong phyir mi 'ong gnyis ni/ yid dang dad sogs drug gi steng du/ phyir 'ong rim gyis pa 'jig rten pa'i lam gyis 'bras bu thob par [30B] byed na mi lcogs med pa'i btang snyoms dang bdun/ 'das lam gyis thob na de'i dad sogs lnga la kun shes kyi ming thob pas de dang brgyad kyis so, 'jig rten pa'i lam gyis chags bral sngon song gis mthong lam du phyir 'ong rang 'bras thob pa la brgyad po'i steng du kun shes byed dang dgu'o, phyir mi 'ong dbang brtul gyis 'jig rten pa'i lam gyis mthar gyis thob na, dang po'i dngos gzhi'i yid bde rnam grol dgu pa'i tshe mngon du byed mi nus pas mi lcogs med kyi btang snyoms dang bdun no, yang mthar gyis pa dbang rtul 'das lam gyis thob na de steng kun shes dang brgyad/ gal te dbang rnon 'jig rten pa'i lam gyis kyang dngos gzhi'i yid bde mgnon du byed nus na yang de dang brgyad do, dbang rnon 'das lam gyis thob na btang snyoms yid bde gnyis dang bar chad med lam gyi tshe kun shes dang dgus thob po, yang chags bral sngon song gis rang 'bras thob na, tshor ba gsum gang rung dang / kun shes byed pa dang / kun shes pa dang dgus thob bo,
ldan tshul ni/ btang snyoms dang yid dang srog gang rung dang ldan na, gsum ka nges par ldan no, bde ba dang lus dbang ldan na, sngar gyi gsum ste rang rang dang bzhi ldan no, mig sogs ldan na gong gi gsum dang lus dang rang dang lnga ldan no, yid bde dang ldan na gong gsum lus dang rang bcas lnga ldan no, sdug bsngal [31A] ldan pa la gong gi gsum dang lus dang bde yid bde rang bcas bdun ldan no, pho mo'i dbang po gang rung dang ldan pa la gong gi bdun steng rang dang brgyad ldan no, yid mi bde ba la yang gong gi bdun steng rang bsnan te brgyad/ dad sogs lnga la gong gsum steng lnga po bsnan te brgyad do, kun shes ldan pa'i dbang po ldan na, zag med dgu dang srog dang rang bcas bcu gcig ldan no, kun shes byed pa 'dod pa'i rten can yin pas gong gi bcug cig po'i steng du lus dang sdug bsngal bsnan pas bcu gsum dang ldan no,
mang ldan nyung ldan gyi khyad par ni/ dge rtsa med pa'i nang na dbang bo nyung ba dang ldan pa dag lus dang tshor ba lnga srog dang yid bcas brgyad dang ldan no, gzugs med kyi byis pa yang / btang snyoms srog yid gsum dang dad sogs lnga ste brgyad dang ldan no, mang por ldan pa la so skye mtshan gnyis pa la dri med gsum ma gtogs pa bcu dgu ldan no, yang na 'phags pa chags bcas mtshan gcig pa la dri med phyi ma gnyis ma gtogs pa'i bcu dgu ldan pa shes par bya'o, dbang po'i skabs so,

dus zhes bya ba ni gsum ste, rgyu 'bras gnyis ka spyad zin pa la 'das pa'i dus zhes sngon byung zin nas 'gag pa'o, rgyu spyad la 'bras bu spyad ma zin pa da lta ba'i dus so, rgyu yod kyang da lta rgyu ma tshang bas 'bras bu yang spyad du med pa la, [31B] ma 'ong pa'i dus zhes bya ste, de ltar dus gsum po dag ni dngos po rnams kyi rgyu 'bras kyi snang ba la brten nas rnam bzhag gi sgo nas btags pa'o,
dus gsum kyis bsdus pa'i dus de dag yun ring thung gi tshad kyi sgo nas 'di dang 'di lta bu'o zhes shes par byed pa la, de'i yun zhes pa 'das da lta ma 'ongs pa'i tshul gyis skad cig ma'i phreng ba rim gyis 'byung ba'i tshul bshad na, dus kyi mtha' shin tu phra ba snga phyi'i cha dbyer med pa la dus mtha'i skad cig ma zhes bya'o, dus mtha'i skad cig ma brgya nyi shu la de yi skad cig gcig/ de'i skad cig drug cu la thang cig/ thang cig sum cu la yud tsam gcig/ yud tsam sum cu la nyin zhag gcig/ nyin zhag sum cu ra zla ba gcig/ zla ba bcu gnyis la lo gcig/ ces bya'o,
skar rtsis kyi gzhung nas skyes bu dar ma khams snyoms pa'i dbugs 'byin rngub rnal ma zung re gcig tu brtsis pa la dbugs gcig zhes bya, dbugs drug la chu srang gcig/ chu srang drug cu la chu tshod gcig/ chu tshod drug cu la zhag gcig tu bshad do,
de gnyis bstun te go bder brjod na, zhag gcig la dus mtha'i skad cig ma sa ya drug dang 'bum phrag bzhi khri brgyad yod do, dbugs nyi khri chig stong drug brgya yod/ dbugs re'i yun la dus mtha'i skad cig ma sum brgya yod do, dbugs 'byin rngub [32A] re'i yun la skyes bu nad med tha mal pa'i rtsa lan lnga 'phar ba yin pas/ yud tsam gcig la chu tshod gnyis yod chu srang ltar na brgya dang bchu gnyis yod/ thang gcig re ni chu srang bzhi'i yun no, de'i skad cig ma'i yun ni rtsa lan gnyis 'par yun no,
de ltar brtsis na rtsa re re 'phar yun dang se gol ran par gtogs pa dus mnyam par byas te, de'i yun la sho mang gi 'dab ma drug cu tham pa brtsegs pa khab kyis phug pas 'dab ma re re 'bug pa'i yun ni dus mtha'i skad cig ma'i tshad du shes par bya ste, 'dab ma rnams rim can du 'bug pa las cig char 'bug mi srid pas re re 'bug pa'i yun de las rjes su dpag nas shes pa yin no, drug cu rtsa bzhi dang rtsa lngar gsung pa brtsis na gzhung dang mi 'grigs pas dgongs pa brtag par bya'o,
skad cig ma 'di la dus mtha'i skad cig dang / bya rdzogs kyi skad cig ma gnyis yod pa'i/ dang po gong du bshad pa dus kyi thung mtha'o, gnyis pa bya ba gang yin pa de mgo brtsam nas yongs su rdzogs pa'i bar gyi yun la 'jog pas bya ba la ltos nas ring thung ma nges pa sna tshogs yod de, thung ba se gol tsam gtogs pa'i bya ba rdzogs pa la yang de'i ming thob cing / ring ba sangs rgyas kyis dang por thugs bskyed nas mthar bla med byang chub mngon du mdzad pa'i bar la yang bya ba rdzogs pa'i skad cig gcig tu 'dod rung ba yin no,
de ltar dngos po rnams kyi yun [32B] la skyes bu'i 'dod pa'i dbang gis dus su brda 'dogs pa'i phyir/ res da lta rang dus su yod pa kho na da lta ba, de'i sngar byung thams cad 'das pa, rjes su 'ong 'gyur ma 'ongs par brjod de skad cig la dpyad pa'i dbang du byas pa'o, res bskal pa 'di chags nas ma stong gi bar la da lta bar byed cing / de'i snga phyir byung ba 'das ma 'ong du byed do, de ni 'dogs yul gyi dbang gis dus kyi rgyun blos sdoms ste tha snyad de lta bu yang byed rung ba yin no, de'i phyir 'jig rten la brten te, bskal pa la chags gnas 'jig stong gi bskal pa bzhi dang / bar gyi bskal pa dang / bskal pa chen po dang / ya thog dang ma thog dang / bar khug dang / yar 'phel ba dang / mar 'grib pa dang / tha mar nad mtshon mu ge'i bskal pa dang / me chu rlung gis 'jig pa'i bskal pa dang / yang rdzogs ldan dang / sum ldan dang nyis ldan dang / rtsod ldan bzhi dang / bstan pa'i dbang du byas te 'bras bu dang / sgrub pa dang / lung dang / rtags tsam 'dzin pa'i dus ste bzhi dang gzhan yang mun pa'i bskal pa dang / sgron ma'i bskal pa la sogs pa dus la brten pa'i rnam grangs sna tshogs yod pa shes par bya'o,
nyi zla'i pa grod pa la brten nas zhag gsum gyi rnam bzhag byed de, nyi mas rlung 'gros gyis gling bzhi 'khor ba'i yun la chu tshod drug cu tham par nges pa nyin zhag gcig dang / rang 'gros kyi dbang gis zla ba'i cha bco lnga 'phel 'grib [33A] re'i yun la tshes zhag zhes bya ste, de la gnas skabs su 'phel 'grib ring thung yod kyang / dkar nag gi phyogs kyi mthar don la nyin zhag gi tshad las cung thung ba dang / nyi mas rang 'gros kyis khyim re re 'khor ba'i yun sum cur bcad pa la khyim zhag zhes bya ste, nyin zhag gi tshad las cung ring ba'o, zhag 'di gsum gyi dbang gis lo gcig gi dus rnams bzhag ste, nyin tshes bstun nas tshes kyi chad lhag dang / tshes zhag gi dbang du byas pa'i zla ba re dang khyim zhag gi bdang du byas pa'i zla ba gnyis ring thung ma snyoms pa'i dbang gis zla bshol 'byung ba ste, nyi ma khyim bcu gnyis su bgrod pa'i dbang gis gling bzhir dus bzhi 'byung ba dang / zla ba'i cha 'phel 'grib kyi dbang gis dkar nag gi phyogs dang / go la'i rlung 'gros kyis nyi ma 'char tshul las nyin zhag 'byung ba'i phyir/ de dag legs par ma brtsis na mthar dkar nag gi phyogs dang / dpyid sogs dus bzhi log par 'gyur ba'i phyir/ skar rtsis kyi gzhung las zhib par gtan la phab pa bzhin no,
de yang lo gcig la zla ba bcu gnyis zhag sum brgya drug cu/ de'i snga dro dang phyi dro zan za ba'i dus gnyis su brtsis bas za ma bdun brgya nyi shu zhes dang yang nyin mo dang mtsan mo, nyin gcig la yang tho rang dang snga dro sogs su phye bas/ thun bzhi dang / drug dang / brgyad dang bcu gnyis su dbye ba dang / zla ba re la dkar phyogs nag phyogs/ lo [33B] bcig la dbyar dgun ston dpyid bzhi dang / dgun stod dgun smad sogs dus drug dang / lho byang gi bgrod pa gnyis la sogs pa'i rnam bzhag byed do,
bgrang bya lo dang bskal pa la sogs/ de dag gcig dang bcu dang brgya sogs bcu 'gyur gyis grangs med pa'i bar du brtsis pa'i sgo nas yun gyi tshad thams cad gzhal nus so,
de ltar dus kyi rnam bzhag la brten nas sngar bskal pa 'di tsam na sangs rgyas 'di byon no zhes dang / ma 'ong ba'i dus dang bskal pa 'di tsam na 'di 'dra 'byung ngo zhes dang / theg pa che chung gi lam las rang 'bras dus ci tsam gyis thob pa, 'gro ba rnams kyi tshe tshad ci tsam yin pa sogs shes par byed pa yin no,
dngos po rnams dus skad cig ma'i skye 'gag gi phreng ba rim byung tsam yin par yang rtogs par 'gyur ro, yang nang sems can gyi phung po la brten nas/ skye ba dang / byis pa dang / gzhon nu dang / dar babs dang / na tshod yol ba dang / rgas pa dang / 'khogs pa dang / shi ba'i dus su bzhag pa dang / phyi'i chos la, sa bon dang myu gu'i dus sogs dang / bya ba la ltos nas dang po thugs bskyed pa, bar du tshogs bsags pa, tha mar sangs rgyas pa lta bu sogs shes bya'i rnam bzhag phal mo che dus la brten nas khong du chud dgos pa yin la, da lta ji ltar snang ba'i dngos po la da lta'i dus su 'dogs shing / de la brten nas 'das ma 'ong du yang sems par byed do,
de yang [34A] da lta'i skabs su sems can phal cher rgas pa, phar cher gzhon pa, phal cher skye ba sogs mi 'dra zhing / rang dus gang yin la ltos nas de'i snga logs su byung ba rnams 'das pa, phyi logs su 'byung ba rnams ma 'ong bar 'jog ba ni/ rang gi snang tshul tsam las dus su btags pa tsam yin gyis don la dus zhes rdzas su grub pa gang yang med pa rmi lam na dus ring thung sna tshogs snang ba ltar rang gi rtog pa'i dbang gis chos gcig 'das pa, kha cig da lta ba dang / kha cig ma 'ong par bzhag nas snang gi/ gnas lugs la chos gang yang sngar 'gag pa ming la, da ltar skye ba'ang med/ ma 'ongs pa na 'byung bar 'gyur ba yang med de dus gsum mnyam pa nyid du rtogs na dus la yang dag par mkhas pa zhes bya ste de la dgongs nas dus gsum dang / bsam gyis mi khyab pa'i dus bsnan te bzhir gsungs pa yang shes par 'gyur la, phyogs rnams kyang dus de dang 'dra bar btags pa tsam du shes par 'gyur zhing gnas lugs mnyam pa nyid khongs su chud par 'gyur ro, dus kyi skabs so,