Gateway to Knowledge Vol. 2 in Wylie

From Rangjung Yeshe Wiki - Dharma Dictionnary
Jump to navigationJump to search


bden ba la mkhas par bya ba la, blang dor du bya ba'i cha nas bden ba bzhir gsungs te, sdug bsngal gyi bden pa dang, kun 'byung gi bden pa dang, 'gog pa'i bden pa dang, lam gyi bden pa'o,
sdug bsngal bden pa'i gzhi ni ma dag pa'i snod bcud las nyon gyi dbang gis byung ba zag bcas 'bras gyur gyi cha thams cad do,
de la gang du skye ba'i snod ni 'og gzhi rlung dang chu dang sa yi dkyil 'khor dang, gling bzhi gling phran brgyad, lcags ri mu khyud, lan tshva'i rgya mtshor bcas pa dang, ri rab dang, ri bdun, mtsho bdun dang, 'dod lha drug dang, bsam gtan bzhi'i gnas ris rnams nam mkha' la chags pa'i bar gyi 'og gzhi dang gnas khang sogs la snod kyi 'jig rten zhes bya ste sems can rnams gnas pa'i snod yin pa'i phyir ro,
de yang yi dvags dang dmyal ba pa ni sa 'og sa dkyil gyi gnas su chags,
dud 'gro bying na gnas pa rgya mtsho chen po sogs la gnas, kha 'thor gyi dud 'gro phal cher sa chu shing sogs dang lha mi klu yi gnas sogs na gnas,
nyi tshe'i dmyal ba dang mkha' la rgyu ba'i yi dvags rnams kyang sa 'og dang mi yi gnas sogs ma nges pa na yod,
lha min ni ri rab kyi khong gseng dang gser gyi sa gzhir thug gi bar du gnas, klu phal cher rol mtsho sogs rgya mtshor gnas so,
sa'i 'og na gnas pa 'di rnams la sa 'og pa zhes bya'o,
mi rnams ni gling bzhi gling phran brgyad la gnas,
'dod lha drug gi sum cu rtsa gsum pa rnams ri rab kyi steng na gnas, rgyal chen bzhi'i ris kyi lha ni ri rab kyi bang rim bzhi dang, ri bdun gyi kha khyer dang, go la'i rlung gi gzhi sogs la gnas te,
'di thams cad la sa steng na gnas pa zhes bya'o,
sum cu rtsa gsum pa'i steng gi nam mkha' la steng nas steng du 'thab bral sogs bzhi dang, de dag gi steng na gyen du brtsegs te tshangs ris nas 'og min pa'i bar du gzugs khams bcu bdun gnas so,
gzugs med la gnas tha dad med kyang, 'di thams cad la sa bla'i 'jig rten zhes bya'o,
gang skye ba nang bcud kyi sems can ni khams gsum gyis bsdus pa ste,
'dod pa'i khams ni mnar med nas gzhan 'phrul dbang byed kyi bar te, 'dod lha drug mi bcu gnyis, dmyal ba bcu drug, dud 'gro dang, yi dvags bcas gnas ris so drug gam, lha min logs su phye na so bdun du yang 'gyur ro,
klu rnams las dbang che ba 'ga' zhig lha la'ang gtogs la, phal cher dud 'gror gtogs pa'o,
'gro ba so so'i nang gi dbye ba tshad med yod do,
dmyal ba la yang sos thig nag bsdus 'joms ngu 'bod ngu 'bod che ba tsha ba rab tu tsha ba mnar med de tsha dmyal brgyad,
a chu zer ba, kyi hud zer ba, so tham pa, chu bur can, chu bur rdol ba, pad+ma ltar gas pa, pad+ma chen po ltar gas pa, utpal ltar gyes pa ste grang dmyal brgyad,
tsha dmyal gyi phyogs bzhir nye 'khor bzhi bzhi ste bcu drug yod kyang dmyal ba'i nye 'khor zhes gcig tu byas so, nyi tshe ba yang de bzhin no,
yi dvags dang, dud 'gro yang rigs bsdus pa'o,
mi la lus 'phags dang, 'dzam bu'i gling, ba lang spyod, sgra mi snyan te gling bzhi, de dag la gling g.yog gnyis re ste, lus dang lus 'phags sogs brgyad do,
lha min ni, chu mtshams man chad kyi ri rab kyi khong gseng nas gser gyi sa gzhi'i bar du, steng nas mar, sgra gcan, dkar 'phreng, mgul 'phreng, thags bzang ris te rgyal po bzhi'i ris su gnas pa'o,
'dod lha rigs drug ni, rgyal chen bzhi'i ris, sum cu rtsa gsum pa, 'thab bral, dga' ldan, 'phrul dga', gzhan 'phrul dbang byed drug ste, dga' ldan na byams pa bzhugs la, gzhan 'phrul dbang byed na bdud sdig can gnas pa'o,
rgyal chen bzhi'i ris ni, ri rab bang rim bzhi'i steng ma la, rgyal chen bzhi 'khor dang bcas te gnas, de'i 'og gi bang rim la yas nas mar rim pa ltar, rtag myos dang, phreng thogs dang, gzhong thogs kyi lha rnams yod do,
ri bdun gyi kha khyer dang, nyi zla skar ma rnams kyang rgyal chen bzhi'i ris su gtogs pa yin no,
gzugs khams ni gzhan 'phrul pa'i steng gi nam mkha' la, bsam gtan dang po'i gnas gsum gyi 'og ma tshangs ris yod do, de'i steng na tshangs pa mdun na 'don gyi lha, de'i steng na tshangs chen te gsum mo,
de bzhin du steng nas steng du brtsegs te gnas pas mas nas yar bgrangs te, bsam gtan gnyis par 'od chung tshad med 'od 'od gsal gsum, gsum par dge chung tshad med dge dge rgyas gsum, bzhi pa la brgyad yod pa'i, sprin med 'od bsod nams skyes 'bras bu che ba gsum dang,
'phags pa sha stag gi gnas yin pas gtsang ma lnga ni, mi che ba, mi gdung ba, shin tu mthong ba, gya nom snang ba, kun gyi steng na 'og min no,
gzugs med pa'i khams bzhi ni, nam mkha' mtha' yas, rnam shes mtha' yas, ci yang med pa, yod min med min te skye mched mu bzhi'o, yod min med min skye mched pa la srid pa'i rtse mo'ang zer ro,
gnas ris so so'i tshe tshad dang, lus dang longs spyod kyi khyad par, bde sdug gi snang ba sogs ci lta bu yin pa'i tshul ni gzhan las shes par bya'o,
gling bzhi ri rab 'dod lha drug tshangs pa'i 'jig rten dang bcas pa la gling bzhi pa'i 'jig rten gyi khams zhes bya la, de stong la dang po spyi phud stong gi 'jig rten zhes bya'o,
de stong la bar ma'i stong gi 'jig rten gyi khams dang, de stong la stong gsum gyi stong chen po'i 'jig rten zhes bya ste, de na gling bzhi pa'i 'jig rten bye ba phrag brgya ste ther 'bum re yod pa de ni mchog gi sprul sku gcig gi 'dul zhing ngo,
de ltar bshad pa ni mi mjed kyi 'jig rten 'di'i dbang du byas kyi, gzhan du sems can gyi las snang dang, sangs rgyas kyi ye shes kyis bkod pa bsam gyis mi khyab pa'i dbang gis, nam mkha'i khams thams cad du, zhing la la chags bzhin pa, la la gnas pa, la la 'jig pa, la la dag pa, la la ma dag pa, de bzhin du rgya che chung dang dbyibs dang bkod pa mi 'dra ba sna tshogs bsam gyis mi khyab pa yod de sangs rgyas kyi spyod yul lo,
de la ma dag pa'i zhing rnams ni sdug bsngal bden pas bsdus la, dag pa'i zhing gi snod bcud rnams ni ma yin te, zag bcas rgyu 'bras su mi gtogs pa'i phyir ro,
gong du snod bcud bshad pa ltar gyi 'gro ba rnams gang du skye ba'i skye gnas ni rnam pa bzhi ste, brdzus skyes dang, drod gsher skyes dang, mngal skyes dang, sgong skyes bzhi gang rung du thog mar skye ba len te, bzhi po de gong ma gong ma bzang ngo,
brdzus te skye bas dang por skye mched drug cig char rdzogs la, mthar cig char 'gag ste ro med do, gzhan gsum rim gyis skye 'chi byed la ro yod do,
mi dang dud 'gro la skye gnas bzhi las skyes pa yod, dmyal ba rnams dang lha rnams dang srid pa bar ma ni brdzus te skye ba'o, yi dvags phal mo che brdzus skyes dang, mngal nas skye ba'ang yod do,
de yang skye srid dang, de nas 'chi ba ma byung gi bar sngon dus kyi srid pa dang, 'chi srid dang, bar srid bzhi'i gnas skabs can no,
srid pa bar ma zhes pa gang zhe na, sems can rnams shi nas gzugs med du skye ba rnams ma gtogs par gang du skye yang srid pa snga ma 'gag la phyi mar dngos su ma skyes pa'i bar der yid las byung ba dbang po kun tshang gi lus, ri brag sogs la thogs pa med pa, las kyi rdzu 'phrul dang bcas pa, dri za ba'i rigs can ste,
lus kyi cha byad srid pa snga ma'i gzugs dang, phyi ma skye 'gyur gyi rnam pa can du'ang gsungs la, yang dang por snga ma'i bag chags kyi dbang gis sngar gyi lus ltar snang ba dang, de nas de mi bsal bar phyi ma'i sha tshugs su snang zhes gzhung rnams las gsungs,
tshe tshad ni ring mtha' zhag zhe dgur gsungs te, bdun re'i nang du srang mda'i mtho dman bzhin shi nas yang re re skye bar gsungs, bar srid grub nas gang du skye ba len pa las mi ldog par nyan thos kyi gzhung las 'byung, ci ste rkyen dang ldan na ldog par theg pa gong ma'i gzhung las gsungs,
de'i kha dog ni ngan song du skye na phyar ba nag po'am mun nag lta bu dang, mtho ris su skye na snam bu dkar po dang zla 'od lta bur gsungs,
de la las gyi snang ba sna tshogs ma nges pa 'char zhing, de na gnas bzhin las bsags pa yang yod par gsungs so,
de gang gis mthong na gang du skye ba mtshungs pa de dag nang phan tshun du mthong la gzhan bsgoms pa las byung ba'i lha'i mig rmug gnyid rgod pa the tshom yid mi bde sogs skyon bcu gcig dang bral bas mthong ngo,
skyes nas 'gro ba rnams gnas ris de dag tu zas bzhis gnas par byed de, kham gyi zas dang, reg pa'i zas dang, sems pa'i zas dang, rnam par shes pa'i zas so,
kham gyi zas ni dri ro reg bya gsum gyi bdag nyid de, de dag sna lce lus kyis kham du byas te lus rgyas par byed pa'o,
gsum 'dus pa'i sems byung reg pa dang, sems byung sems pa dang, gtso bo rnam shes dang gsum gyis ni sems kyi khams rgyas par byed do,
yang na tshe 'dir brten pa lus rgyas par byed pa kham zas, rten sems sems byung rgyas pa reg pa, phyi ma'i srid pa gzhan 'phen pa sems pa, srid pa phyi ma mngon du 'grub pa rnam shes kyi zas te bzhir gsungs so,
zas de dag ni sems can byung ba rnams 'tsho zhing gnas par byed la, srid pa tshol ba bar srid pa rnams la phan par byed pa yin no zhes gsungs so,
kham gyi zas ni 'dod khams kho na na yod, gzhan gsum khams kun na yod do,
gang du skyes kyang, skyes pa'i mtha' 'chi ba, 'dus pa'i mtha' 'bral ba, 'byor ba'i mtha' rgud pa, mtho ba'i mtha' ltung ba ste mtha' bzhis ma bsdus pa med pa'i phyir 'khor ba las yid 'byung bar bya'o,
dge rtsa chad pa dang, slar mtshams sbyor ba, khams dvangs las 'dod chags dang bral ba dang, de las nyams pa, 'chi 'pho ba dang skye ba len pa rnams, yid kyi rnam shes kho nas byed do,
'chi 'pho ba dang skye ba ni tshor ba btang snyoms la gnas nas byed do, yid shes de nyid rtse gcig tu gnas bzhin pa dang, sems med kyi gnas skabs la gnas bzhin 'chi mi srid de, de las ldang ste 'chi'o,
sems med pa'i gnas skabs ni, 'du shes med pa dang, 'gog pa'i snyoms 'jug, 'du shes med pa'i snyoms 'jug gsum lta bu'o,
'gro ba de dag rigs bsdus na, dmyal ba yi dvags dud 'gro ste ngan song gsum dang, mi dang lha min lha ste mtho ris gsum dang bsdom pas rigs drug go,
yang lha min stod ris lha dang, smad dud 'gror bsdus te, lha mi ngan song gsum la lam rgyud lnga zhes bya'o,
yang 'phags pa rnams yang dag par nges pa'i phung po, dge rtsa chad pa dang mtshams med lnga byed pa log par nges pa'i phung po, de dag las gzhan pa rnams ma nges pa'i phung po ste gsum du bzhag pa sogs rnam grangs du ma gzhan las shes par bya'o,
sems can gyi 'jig rten de'i chos kyi rnam grangs 'ga' zhig bshad pa la,
dam chos kyi snod du rung ba'i rten khyad par can ni dal 'byor bco brgyad tshang ba ste, ngan song gsum dang 'du shes med pa'i lha ste mi ma yin pa'i mi khoms pa'i gnas bzhi, mtha' 'khob kla klo, log lta can gyi rigs, sangs rgyas ma byon pa'i zhing, dbang shes blun lkug brda mi 'jal ba ste mi'i mi khoms pa bzhi ste, brgyad po bral ba'i dal ba brgyad dang,
rang mir gyur, dbang po tshang, chos dar ba'i yul dbus skyes, las kyi mtha' ma log pa, dad pa yod pa ste rang 'byor lnga, sangs rgyas 'jig rten du byon, chos gsung, bstan pa gnas, de la 'jug pa yod, chos ston pa yod pa ste gzhan 'byor lnga bcas, bco brgyad tshang ba'o,
mthong ba'i chos la 'phags lam skye ba'i gegs sgrib pa gsum ni, ngan song gsum lha min sgra mi snyan du skyes pa lta bu rten gyi dbang gis lam mi skye ba rnam smin gyi sgrib pa, mtshams med lnga dang chos spong sogs byas pas bden pa mthong mi nus pa las kyi sgrib pa, nyon mongs shin tu drag po rgyun chags pas lam la 'jug mi nus pa nyon mongs pa'i sgrib pa'o,
lam skye ba dang rjes su mthun pa'i mthun rkyen 'khor lo bzhi ni, 'phags lam skye ba dang mthun par gyur pa'i yul lha mi'i 'gro ba na gnas pa, dge ba'i bshes gnyen skyes bu dam pa la brten pa, bdag nyid kyi blo chos la legs par smon pa, tshe rabs sngon du bsod nams bgyis pa'i rgyu yod pa bzhi'o,
skyes bu rnams kyis don du gnyer bya phun sum tshogs pa sde bzhi ni, mngon mtho nges legs sgrub pa'i chos dang, gnas grogs grags nor sgrub pa sogs don dang, de dag gi 'bras bu gnas skabs su 'dod pa la longs spyod pa, mthar thug thar pa thob pa ste, chos don 'dod thar bzhi'o,
mtho ris kyi yon tan bdun ni, tshe ring ba, nad med pa, gzugs bzang ba, skal pa bzang ba, rigs mtho ba, nor mang ba, shes rab che ba bdun te, rigs mtho zhing btsun pa rigs bzang ba'o,
kun gyis brtsi zhing dbang che ba dang don grub pa sogs skal ba bzang ba ste yon tan gzhan thams cad 'di'i nang du sdud rung ngo,
'di dag dge ba gang las kyang 'byung mod gtso bor gzhan la srog gi skyabs byed cing srog la 'tshe ba las ldog pas tshe ring ba, nad pa la sman dang g.yog byed pa sogs kyis phan btags pa dang gzhan la brdeg pa sogs spangs pas nad med pa, khro ba spangs te bzod par byas pas gzugs bzang ba, phrag dog spangs pas skal ba bzang ba, dam pa bkur zhing nga rgyal spang pas rigs mtho ba, rku ba spang zhing sbyin pa byin bas nor phun sum tshogs pa, blang dor 'dri ba dang chos kyi bstan bcos byin pas shes rab 'thob par gsungs so,
'jig rten pa'i chos brgyad ni, rnyed bde grags bstod bzhi 'dod cing dang du len la, de dag gi ldog phyogs bzhi mi 'dod pa'o, de'i dbang gis 'jig rten pa rnams rtsom pa sna tshogs dang, rtsod pa sogs 'byung ba'i 'jig rten phal ba'i chos so,
rtsod dus kyi snyigs ma lnga ni, srog rgud pa tshe'i snyigs ma tshe thung ba, longs spyod rgud pa dus kyi snyigs ma 'bru rnams ro nus chung zhing mi smin pa sogs so, khyim pa'i dge phyogs rgud byed nyon mongs pa'i snyigs ma, rab byung gi dge phyogs rgud pa lta ba'i snyigs ma, lus rgud pa sems can gyi snyigs ma ste, gzugs blo nad med sogs nyams pa'i snyigs ma lta bu'o,
'jig rten legs par byed pa'i chos ni, rgyu 'bras yod par shes pa'i yang dag pa'i lta ba, dge ba bcu'i lam, rig pa'i gnas, dam pa'i chos rnams so,
'dir de tsam las ma spros so,
de yang ma dag pa'i snod bcud rnams sdug bsngal bden pa'i gzhir ston pa dang, sdug bsngal zhes pa ci lta bu snyam na, 'di dag sdug bsngal gsum dang 'brel zhing de dag gi rten du gyur pa'i phyir ro,
gang zhe na 'khor ba'i bde ba ltar snang ba thams cad kyang mthar 'gyur ba'i sdug bsngal dang, tsha grang bkres skoms nad sogs ngo bo nyid kyis sdug bsngal ba sdug bsngal gyi sdug bsngal dang, zag bcas kyi phung po mtha' dag srid pa nye bar len pa'i rgyu yin pas khyab pa 'du byed kyi sdug bsngal dang gsum pos bcing ba'i phyir ro,
de'i phyir 'phags pa rnams kyis gzigs ngor zag bcas rnams sdug bsngal ba nyid du bden pa'o,
gzhan yang sdug bsngal brgyad de, skye ba dang, rga ba dang, na ba dang, 'chi ba dang, sdug pa dang bral ba dang, mi 'dod pa thog tu bab pa dang, 'dod pa btsal kyang ma rnyed pa dang, mdor na zag bcas kyi phung po lnga sdug bsngal ba ste gnas ngan len gyi phyir ro,
snga ma gsum dang bsdoms na rnam grangs bcu gcig yod kyang, 'di brgyad snga ma gsum gyi khongs su 'du'o,
gzhan yang gnas ris so so'i dbang du byas na, dmyal ba la tsha grang, yi dvags la bkres skoms, dud 'gro la blun rmongs dang, gcig la gcig za ba, kha 'thor rnams la bkol spyod gsod pa, lha min la 'thab rtsod, mi la skye rga na 'chi dang yongs tshol, lha la 'pho ltung sogs sdug bsngal gyi rnam grangs bsam gyis mi khyab pa yod do,
zag bcas kyi chos 'di dag skad cig gis mi rtag pa dang, sdug bsngal ba dang stong pa dang bdag med par gnas pa'i phyir snying po med pa dang, yid brtan gyi gnas ma yin la sdug bsngal ba nyid du bden pa zhes bya'o,
rgyu gang gis 'khor bar skye bar byed pa kun 'byung gi bden pa ni, zag bcas 'khor ba'i phung po 'di dag rgyu med pa dang, bdag dang dus dang dbang phyug sogs rgyu min pa gzhan las ma byung ste, las nyon gyi rgyu las byung ba'i cha nas kun 'byung gi bden pa zhes su rnam par bzhag go,
ji ltar byung na, sems can rnams las kyi rgyu las skyes ste, gnas rnams ni snang 'gyur thun mong ba'i las dang, so so'i lus dang bde sdug ni myong 'gyur thun mong min pa'i las kyis bskyed pa'o,
las de dag la rnam grangs du yod ce na, mtho ris kyi rten dang bde ba skyed byed dge ba'i las dang, ngan song gi rten dang sdug bsngal bskyed pa mi dge ba'i las dang, de gnyis gang yang mi skyed pa lung ma bstan pa'i las gsum du yod la,
las de dag sems kyis bsam zhing lus ngag gis 'jug pa'i phyir sems pa yid kyi las dang, des bskyed pa lus ngag gi las gnyis su yang dbye'o,
yang rten gyi sgo nas lus ngag yid kyi las gsum ste, de gsum dge ba la legs spyad dang gtsang byed, mi dge ba la nyes spyad dang mi gtsang ba sogs su brjod do,
yang 'khor ba'i 'bras bu skyed pa'i dge mi dge thams cad zag bcas kyi las, 'bras bu myang 'das skyed pa'i las lam bden ni zag med kyi las te zag bcas kyi las zad par byed pa'i gnyen po'o,
yang 'bras bu skyed pa'i cha nas gsum ste, bde ba myong 'gyur gyi las ni bsam gtan gsum pa man chad du rnam smin bde ba myong ba'i rgyu byed pa'i dge ba'o, bde min sdug min myong 'gyur ni, bsam gtan gsum pa yan chad kyi khams gong ma myong 'gyur gyi las so, sdug bsngal myong 'gyur ni 'dod khams su sdug bsngal myong bar byed pa'i las mi dge ba'o,
yang gsum ste, bsod nams ni 'dod par bde ba myong byed dge ba, bsod nams min pa 'dod par sdug bsngal myong ba'i mi dge ba, mi g.yo ba'i las ni, khams gong ma gnyis 'thob byed kyi dge ba ste, de dag sa de nyid du smin pa las gzhan du mi g.yo ba'i phyir ro,
yang las la gnyis te, rnam par rig byed kyi las ni lus ngag gi las rig byed de, de la dge mi dge lung ma bstan gyi las gsum yod de, rig byed min pa'i las ni sdom pa sdom min, bar ma'i sdom sdom min gsum gang rung gis bsdus pa ste, bya ba dngos su med kyang zin 'byung gi rgyus byung ba'i gzugs rgyun chags su yod pa'o, 'di dge mi dge gang rung du nges kyi lung ma bstan med do,
sdom pa ni ji srid 'tsho'i mtha' can dge ba la zhugs pa'o, sdom min ni ji srid 'tsho'i mtha' can mi dge ba la zhugs pa'o,
bar ma'i sdom pa ni dus ji 'dod zhig tu dge ba'am mi dge ba gang yin la 'jug pa thob pa ste, dper na zla ba gcig gi bar du zas ma zos gong du sangs rgyas la phyag 'tshal bar byed do snyam pa lta bu zla gcig gi bar du dge ba'i sdom pa thob pa dang, yang zla gcig gi bar du log par g.yem par bya'o snyam du dam bcas pas thob pa mi dge ba lta bu'o,
de dag zhing dang bsam pa dang khas len pa las thob bo,
bar ma'i dge mi dge ni dus sogs kyi rgyun 'jug pa'i nges pa med par thad ka thad kar dge mi dge byed pa ste de ni sdom sdom min gang yang min ste de dus kyi rnam par rig byed kyi las yin no,
sdom pa la so thar gyi sdom pa, bsam gtan gyi sdom pa, zag med kyi sdom pa gsum du yod pa'i dang po la,
so thar rigs brgyad de, dge slong pha ma gnyis, dge tshul pha ma gnyis, dge slob ma, dge bsnyen pha ma gnyis, bsnyen gnas so,
de dag cho ga bzhin du khas blang pa las thob bo, gzhan yang theg pa chen po byang sems dang rig 'dzin gyi sdom pa dag kyang so so'i gzhung las grags pa bzhin no,
bsam gtan gyi sdom pa ni khams gong ma'i bsam gtan thob ba'i stobs kyis bsam gtan de las ma nyams gyi bar du mi dge ba la 'jug pa ngang gis khegs pa thob pa'o,
zag med kyi sdom pa ni 'phags pa'i sa thob pa'i stobs kyis mi dge ba rnams la 'jug pa gtan du ldog pa thob pa'o,
so thar gyi sdom pa ni dge slong sogs ji srid 'tsho'i mtha' can rnams, shi ba dang brda 'phrod pa'i drung du 'slab pa phul bas gtong la, gzhan yang dge rtsa chad pas bsrung 'dod kyi gzhi rten med pa dang, mtshan gnyis cig char byung bas sdom pa'i lus rten can du mi rung bas kyang gtong ngo,
bsnyen gnas ni, dang po khas blang ba bzhin mtshan 'das nas gtong ngo,
sdom min ni shan pa sogs sdig byed kyi rigs su skyes shing rang gis kyang las 'dis bdag ji srid 'tsho bar bya'o snyam pa las sdom sems med pa dag bya ba de la dang por zhugs pa tsam gyis thob la, gzhan de 'dra'i rigs su skyes pa min kyang, rngon sogs bya'o snyam du khas blang ba las thob cing, ji srid sdom min de'i gnyen po sdom pa thob pa na gtong la, shi ba na yang gtong ngo, mtshan gnyis byung bas kyang gtong bar bshad do,
de'i phyir sdom sdom min 'di dag bya ba byed rung mi byed rung rgyun chags su 'phel bas dge mi dge lhag par che ba'i phyir sdom min spang ste sdom pa la gnas par nan tan bya dgos so,
bar sdom ni bsam pa'i 'phen shugs chad pa 'am, khas blang las ldog pa 'am, 'jug pa'i bya ba chad pa 'am, don gtsug lag khang dang rgya sogs lta bu chad pa dang, tshe 'phos pa rnams kyis gtong la, dge rtsa chad pa las dge ba'i sdom pa gtong ngo,
pho mo'i dbang po gang yang med pa'i za ma, yod kyang nyams pa ma ning, mtshan gnyis cig char yod pa, sgra mi snyan pa rnams ma gtogs pa'i mi rnams la sdom min sdom pa gnyis ka thob pa yod,
'dod pa'i lha rnams la bar sdom yod, mi rnams la so thar bsam gtan zag med kyi sdom pa gsum ka yod, 'dod gzugs kyi lha rnams la bsam gtan las skyes pa'i sdom pa skye ba yod, zag med kyi sdom pa ni 'du shes med pa ma gtogs pa la yod de, gzugs med 'phags pa la rang sa na 'byung ba med pa'i sdom pa mngon gyur med kyang sngar 'byung khams kyi zag med sdom pa gtong rgyu ma byung bas gzugs med du skyes pa la yang ldan par 'dod do,
tshangs chen ni phyin ci log gi lta ba can ste thams cad bdag gis byas so snyam du sems pas 'phags pa dag der mi skye bas zag med kyi sdom pa skye ba med ces bye smras 'dod, theg chen las byang sems rnams der skye ba bzhes pa yod par bzhed do,
bsam gtan gyi sdom pa ni snyoms 'jug las nyams pa dag gis gtong la, sa 'phos pa las rang sa'i bsdus pa thob cing sa gzhan gyi bsdus pa gtong ba tsam mo,
zag med la gtan nyams med kyang, theg dman gyi 'bras bu thob pa las re shig nyams pa las gtong yang de ni rtsal po che ldog 'dred pa ltar myur du sor chud par 'gyur ro zhes bshad, nyams pa 'di ni dman lam gyi 'bras bu las gnas skabs nyams tshul tsam mo,
dbang po rtul po rnon por 'phos pa dang, 'bras bu gong ma thob pa'i tshe snga mas bsdus pa gtong la phyi mas bsdus pa thob pa tsam gyis dbye ba mdzad do,
yid kyi sdom pa ni sems pa rgyun chags pa sa bon dang bcas pa ste, de'i dbang gis lus ngag gi sdom ba'ang 'thob par byed la, bsam gtan zag med kyi sdom pa ni sems kyi rjes su 'brang ba'o,
yid dang dbang shes kyi 'khor du byung ba'i dran pa dang shes bzhin la yid dang dbang po'i sdom pa zhes pa'i tha snyad mdzad do,
yang las rnams kun nas slong bar byed ba'i kun slong la, dang por yid kyi bsam pa rgyu'i kun slong, de nas las de dag la 'jug pa rnam shes tshogs drug gis grogs byas nas 'jug pa de dus kyi kun slong gnyis yod do,
las de dag nam myong tshul las mthong chos myong 'gyur gyi las ni tshe de la byas pa'i las stobs ldan tshe de nyid du smin pa rnams ste, byams pa'i ting nge 'dzin dang, nyon mongs med pa'i ting nge 'dzin dang, 'gog snyoms dang, 'bras bu bzhi po thob pa las lang ma thag pa la phan gnod byed pa, sangs rgyas dang dge 'dun la bya ba byas pa sogs zhing dang bsam pa drag po dang las stobs ldan byas pa 'ga' zhig lta bu'o,
skyes nas myong 'gyur gyi las ni mtshams med pa'i las lta bu skye ba phyi ma kho na la smin nges pa,
lan grangs gzhan la myong 'gyur de phan chad du myong ba'i las rnams so,
myong bar ma nges pa'i las bsags kyang so so'i gnyen po sogs kyis bcom nas rnam smin 'byin par ma nges pa ste bzhir gsungs so,
yang byas la bsags pa'i las ni kun slong drag pos bsam bzhin byed pa, dngos gzhi'i las te rdzogs par byas pa, rjes su 'gyod pa med cing yi rangs pa, de 'joms byed kyi gnyen po med pa, 'bras bu smin nges kyi nus pa yod pa drug tshang ba la brjod do,
byas la ma bsags pa'i las ni gong gi drug ma tshang bas las byas kyang 'bras bu ji lta ba bzhin smin par ma nges pa'o,
yang gnyis te 'phen byed kyi las ni gnas ris gang du skye bar byed pa'i las so, rdzogs byed kyi las ni skye ba de la bde ba dang sdug bsngal gyi myong ba ci tsam yod pa skyed cing rdzogs par byed pa'i las so,
'di dag la 'phen byed gcig gis skye ba du ma 'phen pa yang yod, du mas gcig 'phen pa yang yod, las gcig gis skye ba gcig 'phen pa yang yod, de bzhin du rdzogs byed la yang shes par bya zhing, 'phen rdzogs gnyis ka byed pa'i las kyang yod, gang rung re byed pa'i las kyang yod par shes par bya'o,
yang gsum ste las dang 'bras bu gnyis ka dkar ba gzugs khams dang gong ma myong byed kyi las, gnyis ka gnag pa 'dod par sdug bsngal myong byed, 'dres ma 'dod par bde sdug spel mar myong byed kyi las te las kyi ngo bo dkar nag 'dres pa min kyang byed las las de ltar bzhag go,
dkar nag gi las de dag zad par byed pa zag med kyi las ni mi dkar mi gnag pa'o,
dge sdig gang yang zhing dang bsam pa dang nan tan gyis rgyun du byed pa sogs las stobs che chung gnyis su 'gyur ro,
de la dge ba dang mi dge ba'i khyad par ci zhig gis 'byed na, ngo bo nyid kyis dge ba ni dad sogs dge ba'i sems byung bcu gcig go, de dang mtshungs ldan gyi chos rnams 'brel bas dge ba, de dag gi bag chags rjes 'brel gyi dge ba, de dag gis kun nas bslang ba'i las slong ba'i dge ba, de bzhin nyid dang myang 'das ni don dam pa'i dge ba zhes bya'o,
dge ba de dag 'thob tshul la, sngon goms pa'i rgyus tshe 'dir ngang gis dge ba byed pa thob pa skye bas thob pa'i dge ba,
sbyor bas dge ba ni dam pa bsten zhing chos mnyan bsam bsgrub pa las thob pa,
mdun du byas pas dge ba mchog gsum gyi rten mdun du byas te mchod pa byed pa,
phan 'dogs pa'i dge ba bsdu dngos bzhis sems can la phan 'dogs pa,
yongs su 'dzin pa'i dge ba bsod nams bya ba'i dngos pos mtho ris dang byang grol skyed pa,
gnyen po'i dge ba ni nyon mongs pa dang shes bya'i sgrib pa de dag rnam par sun 'byin pa dang thag bsring ba dang spong ba dang 'bral bar byed pa'i lam la brtson pa'o,
nye bar zhi pa'i dge ba ni nyon mongs pa spong ba dang, 'gog pa'i snyoms 'jug dang, lhag bcas lhag med kyi myang 'das dang mi gnas pa'i mya ngan las 'das pa rnams so,
rgyu mthun pa'i dge ba ni nyer zhi mya ngan las 'das pa thob pa de'i dbang gis 'jig rten las 'das pa'i mngon shes sogs yon tan 'grub pa'o,
mi dge ba la yang de bzhin du, 'dod khams 'dir 'jig lta dang mthar lta de gnyis dang lhan cig pa'i ma rig pa ni, bsgrib la lung ma bstan yin zhing, de gsum las gzhan pa'i rtsa ba'i nyon mongs pa dang nye nyon rnams nyes spyod kun nas slong ba'i phyir thams cad ngo bo nyid kyis mi dge ba'o,
de dag dang mtshungs ldan thams cad 'brel bas mi dge ba,
de rnams kyi bag chags rjes 'brel gyi mi dge ba,
de rnams kyis kun nas bslang ba'i lus ngag gi las thams cad slong ba'i mi dge ba,
don dam pa'i mi dge ba 'khor ba'o,
de yang sngon gyi mi dge ba goms pas tshe 'dir thob pa skyes thob kyis mi dge ba,
tshe 'dir dge ba las bzlog pa'i las la brtson pa sbyor ba'i mi dge ba,
'tshe ba'am lta ngan gyi sgo nas lha rten byed cing mchod sbyin ngan pa byed pa mdun du byas pa'i mi dge ba,
sems can la gnod par byed pa gnod par byed pa'i mi dge ba,
sgo gsum gyi nyes spyod kyi 'bras bu mi 'dod pa 'byin pa yongs su 'dzin pas mi dge ba,
dge ba'i gnyen po'am mi mthun pa sdig pa byed pa rnams mi mthun phyogs kyi mi dge ba,
dge ba'i bar chad byed pa'i chos rnams bar chod byed pa'i mi dge ba'o,
khams gong ma gnyis kyi nyon mongs pa thams cad ni bsgrib la lung ma bstan yin te rgyud ting nge 'dzin gyis khyab pas nyon mongs de dag gis rnam smin yid du mi 'ong ba 'byin mi nus pa'i phyir mi dge ba min no,
zag med la bsgrib pa'i mi mthun phyogs yin pas bsgrib pa yin te, nyon mongs pa la mi bsgrib pa mi srid do,
gong du bstan pa'i dge mi dge'i don mdor bsdus na mgon po klu sgrub kyis,
'dod chags zhe sdang gti mug gsum,
des bskyed las ni mi dge ba'o,
ma chags mi sdang gti mug med,
des bskyed las ni dge ba'o,
zhes gsungs pa ltar nges par bya zhing,
dug gsum dang de med pa'i sems gsum gang yang min pa'i sems kyis rang gar zhugs pa'i las thams cad ni lung ma bstan no,
ji ltar lung ma bstan yin na, de la'ang ngo bo nyid kyis lung ma bstan ni khams dang skye mched gzugs can brgyad dang de dang mtshungs ldan gyi yid dang, srog dbang dang ris mthun pa dang ming tshig yi ge'i tshogs rnams so,
'brel bas lung ma bstan ni, sdang ba dang dvangs pa gang yang min pa'i sems kyis kun nas bslang ba ming tshig yi ge de dag gis zin pa'i sems sems byung gi chos rnams so,
rjes 'brel ni des brjod pa'i bag chags so,
des bslang bas lus ngag gi las ni bslang ba'i lung ma bstan no,
don dam pa'i lung ma bstan ni nam mkha' dang brtag min 'gog pa'o,
de la'ang skye bas thob pa'i lung ma bstan ni, mi dge ba dang dge ba zag bcas kyi rnam smin rnams so,
sbyor bas lung ma bstan ni nyon mongs can dang dge ba'i sems gang yang min pas bskyed pa'i spyod lam dang bzo'i gnas so,
mdun du byas pa'i lung ma bstan ni 'tshe ba'am lta ngan ma yin pa'i lha'i rten gang rung byed pa dang, der skye bo rnams la bsod nams dang bsod nams min pa mi skye bar rang ga ba'i las byed pa'o,
phan 'dogs pa'i lung ma bstan gyi las ni, bran dang khye'u dang chung ma sogs la sdang ba'am dvangs pa med par sbyin pa byin pa'o,
nye bar spyad pas lung ma bstan ni, so sor brtag pa dang nyon mongs can gang yang min pa'i sems kyis longs spyod rnams spyad pa'o,
yongs su 'dzin pas lung ma bstan ni, dper na bzo gnas goms pas slad ma'i tshe de la goms pa myur du rdzogs pa lta bu'o,
gnyen pos lung ma bstan ni, dper na so sor ma brtag pa'i sman bsten pa lta bu'o,
nye bar zhi bas lung ma bstan ni, gzugs gzugs med na spyod pa'i nyon mongs pa rnams te zhi gnas dang ldan pa'i phyir 'bras bu mi 'byin pa'o,
rgyu mthun pas lung ma bstan ni, sprul pa'i sems dang lhan cig skyes pa'o,
bsdus na 'dod pa'i khams su lung ma bstan bzhi ste, rnam smin las skyes pa dang, spyod lam pa dang, bzo gnas dang sprul pa'i sems bzhis bsdus pa de dag go,
gzugs khams na bzo gnas ma gtogs pa gzhan gsum yod do,
lung ma bstan zhes pa la, dri ba mtha' gang rung du lung ma bstan pa dang tshor ba bde sdug gang du'ang lung ma bstan pa dang, bya ba 'jug ldog gang du'ang lung ma bstan pa sogs su yod pa las, skabs 'dir dge sdig gang du'ang lung ma bstan pa nyid go bar bya'o,
yang dge mi dge'i las kyi bye brag gi rnam grangs la, sbyin pa dang, tshul khrims, bsgoms pa las byung ba'i bsod nams bya ba'i dngos po gsum dang,
yang mtho ris kyi bde ba'i ched du dge ba byed pa bsod nams cha mthun, mya ngan las 'das pa'i ched du dge ba byed pa thar pa cha mthun, sbyor lam pa'i dge ba ni nges par 'byed pa mthong lam gyi rgyu yin pas nges 'byed cha mthun ste gsum du yod la, thar cha la theg pa che chung gi myang 'das la dmigs te sgrub pa'i cha nas gnyis su yod do,
yang g.yo las skyes pa'i sgo gsum gyi las la yon po dang, zhe sdang las skyes pa'i de gsum skyon can dang, 'dod chags las skyes pa'i de gsum la snyigs ma'i las zhes sogs rnam grangs mang po yod pa mdo las shes par bya'o,
smin par nges pa'i las ni chud mi za ba'i phyir bzod pa thob pa la ngan song du skye 'gyur gyi las dang, phyir mi 'ong thob pa la 'dod pa'i las dang, dgra bcom pa thob pa la khams gong mar skye 'gyur gyi las kyis gegs shin tu byed de, de dag thob phan chad las de dag myong ba'i skabs med pa'i phyir de'i sngon du smin par rtsom pa yin no,
spyir las kyi rnams grangs la nang gi dbye ba tshad med kyang, gtso bo che longs bsdus nas dge mi dge bcur gsungs te,
gang zhe na, mi dge ba bcu ni brnab sems zhes pa 'dod chags kyi rtsa ba las byung ba'i sems gang zhig ,pha rol gyi bdog pa la rang gir 'dod pa'o,
gnod sems ni zhe sdang gi rtsa ba can pha rol sdug bsngal bar 'dod ba'o,
log lta ni gti mug las skyes zhing de dang mtshungs ldan las rgyu 'bras med par lta ba'o,
de gsum yid kyi las te, las gzhan bdun po'i lam yang yin no,
pha rol gyi srog bsam bzhin gcod pa, gzhan gyi nor ma byin par len pa, gzhan gyi bud med sogs bgrod bya min pa la 'dod pas log par g.yem pa gsum ni lus kyi las so,
shes bzhin mi bden pa'i rdzun smra ba, pha rol mthun pa dbye ba'i tshig smra b phra ma, gzhan gyi snying la mi 'thad pa'i tshig ngan pa smra b tshig rtsub, de gsum min pa'i tshig gang zhig nyon mongs pas kun nas bslang te brjod pa ngag kyal ba bzhi ni ngag gi las so,
srog gcod sogs de dag dug gsum gang rung gis kun nas bslang te 'byung la, gsod pa gnod sems tshig rtsub rnams zhes sdang gis rdzogs par byed, log g.yem brnab sems ma byin len rnams chags pas dang, log lta gti mug dang, rdzun phra ma ngag 'khyal rnams chags sogs gsum po ci rigs pas rdzogs par byed do,
de yang gzhi bsam sbyor ba mthar thug tshang bas las rdzogs par byed de, gzhi ni srog gcod sogs zhe sdang gis mthar phyin pa gsum gyi gzhi ni sems chad dang, chags pas mthar phyin pa gsum gyi gzhi ni longs spyod dang, log lta'i gzhi ni ming gzugs kyis bsdus pa'i phung po lnga dang, rdzun sogs bzhi'i gzhi ni ming yin no, de dag kyang smra bar bya ba'i yul sems can rnams kyang gzhir 'gyur ro,
yul de dag la, bsam bzhin du las so so'i sbyor ba brtsam zhing mthar yongs su rdzogs par grub par byas pa'o,
dge mi dge gang yang rang gis bgyis pa dang, gzhan la bgyid du bcug na yang 'dra'o,
mi dge bcu po de dag gcig nas brgyad kyi bar dus gcig 'byung ba yod de, yid kyi gsum po gang rung mngon gyur tsam gcig dang, gnod sems dang ldan pas srog gcod na gnyis lhan cig 'byung ba sogs nas, gnod brnab gang rung mngon gyur gyis drug gzhan la bcol nas 'dod log rang gis spyod pa de thams cad dus mnyam par mthar phyin pa lta bu'o,
yid kyi gsum po lhan cig mi 'byung bas dgu dang bcu lhan cig 'byung ba med do,
dge ba'i skabs su sems pa dge ba la brnab sems dang gnod sems med pa gnyis 'bral med du yod pas gcig kho na 'byung ba med pa sogs shes par bya'o,
mi dge bcu po de las dmyal ba na kyal ba tshig rtsub gnod sems gsum ldan pa dang mngon gyur gnyis ka'i sgo nas yod, brnab sems dang log lta ldan pa tsam du yod kyang, las 'bras mngon du gyur pas log lta mngon gyur med pa dang, gzhan bsad kyang mi 'chi ba dang, longs spyod yid 'ong med pas brku ba med pa sogs kyis gzhan med do,
sgra mi snyan na yid kyi gsum ldan pa'i sgo nas yod, nyon mongs pa'i sems kyis glu len pa sogs kyal ba dngos su yod, gzhan med do,
'dod pa gzhan na mi dge bcu po ldan pa'am mngon gyur du yod do,
mi dge bcu po de dag gi re re'i yang, rnam smin gyi 'bras bu ngan song du ltung ba dang, rgyu mthun pa'i 'bras bu la byed pa rgyu mthun sdig pa gang byed de tshe rabs phyi ma rnams su sngar goms pa'i dbang gis yang byed 'dod pa, myong ba rgyu mthun srog bcad pas tshe thung ba, ma byin pa len pas dbul ba sogs dang, bdag po'i 'bras bu skye ba'i yul srog la 'tshe ba can du skye bar byed pa sogs bzhi re 'byin par 'gyur ro,
de dag kyang rgyu'i las lam rdzogs tshul che chung dang mthun par 'bras bu myong bar 'gyur ro,
mi dge ba bcu spang ba srog mi gcod pa sogs bcu ni dge ba bcu yin la, de ni mtho ris dang byang grol gyi rgyu ste so sor 'bras bu bzhi mi dge ba las bzlog pa'i tshul du 'byung ba shes par bya ste nyes spyod spang ba'i dge ba bcu'o,
srog gcod pa sogs spang ba de yang dngos dang de yi phyogs mthun phra mo'i bar du spangs te yongs su dag pa las, 'bras bu je bzang du 'gyur ba'i tshul rnams mdo sde dran pa nyer bzhag sogs las gsung pa bzhin du shes par bya'o,
yang srog mi gcod pa tsam du ma zad gzhan gyi srog bskyab pa, de bzhin du sbyin pa gtong ba, rang tshangs par spyod cing gzhan log g.yem las bzlog pa, drang por smra ba, phra mas dbye ba bzlum pa, don dang ldan pa chos mthun gyi tshig brjod pa, tshig yid du 'thad pas gzhan yid dga' bar byed pa, gtong sems goms pa, byams pa bsgom pa, yang dag pa'i lta ba goms pa rnams ni dge bcu khyad par can te dge ba chos sdud sgrub pa'i cha nas brjod pa ste phan yon khyad par can dang ldan pa'o,
yang gang zhig byas pas tshe 'dir 'phags lam skye ba'i gegs che shos byed cing gnyen pos ma bcom par shi na tshe 'di 'phos ma thag tu skye ba gzhan gyis bar ma chod par mnar med du skye bar nges pa mtshams med pa lnga'i las ni, pha gsod pa, ma gsod pa, dgra bcom pa gsod pa, de bzhin gshegs pa'i sku la ngan sems kyis khrag dbyung ba, dge 'dun 'khor lo'i dbyen byed pa lnga'o,
'khor lo'i dbyen zhes pa sangs rgyas bzhugs bzhin du de'i nyan thos bzhi grvar longs pa phan chod ston pa dang lam gzhan la khrid de 'byed pa'o, las kyi dbyen ni dge 'dun gyi sde gzhan 'byed pa'o,
mtshams med de dang cha 'dra ba nye ba lnga ni, ma yang yin la dgra bcom yin pa 'dod log gis sun phyung ba, byang sems nges gnas gsod pa, 'phags pa slob pa gsod pa, dge 'dun gyi 'du ba'i sgo 'phrog pa, mchod rten bshig pa'o,
mi dge bcu'i nang na log lta lci ste des dge rtsa gcod par byed cing, de'i dbang gis de'i rgyud la dge ba gang yang gnas par mi 'gyur la mnar med par skye bar byed pa'o,
de yang mi'i rten la chad lta ba'i bstan bcos ngan pa thos pa lta bu'i rkyen las, sred pa spyad pa tsam min par, lta ba spyad pa'i sgo nas las rgyu 'bras med nges so snyam du bsam pa brtan por skyes pas dge rtsa chad do,
yang rkyen la brten te las rgyu 'bras yod med the tshom skye la yod las che snyam pas mtshams sbyor zhing yod par bzung ba'i tshe na dge rtsa slar yang ldan par 'gyur ro,
yang tshe 'dir tshangs pa'i bsod nams skyed pa'i las bzhi ni, sngon med pa'i phyogs su de bzhin gshegs pa'i mchod rten byed pa, phyogs bzhi'i dge 'dun la kun dga' ra ba dang gtsug lag khang 'bul ba, sangs rgyas kyi nyan thos kyi dbye ba bzlum pa, byams pa tshad med bsgoms pa'o, zhes sogs rnam grangs du ma mdo las gsung pa bzhin no,
zhing gi dbang du byas te pha ma dang nad pa dang chos smra ba dang skye mtha'i byang sems la byas pa'i yon gzhal du med pa dang, yon tan gyi zhing ni gong nas gong du sangs rgyas kyi bar du cher 'phags shing, sdug bsngal gyi zhing ni 'og nas 'og tu bkren pa dang yi dvags spyi dang, 'jur 'gag gi yi dvags la sbyin pa byas pa phan yon che ba sogs mdo las gsung pa bzhin no,
sdig pa kun gyi nang na log ltas dge rtsa chad pa dang, dam pa'i chos spong ba sogs dkon mchog gsum la gnod pa bgyis pa sogs ches lci zhing mi bzad pa yin la,
bsod nams kun gyi nang na ches 'phags shing bsod nams bsam gyis mi khyab pa 'du byed pa ni, bla med byang chub tu sems bskyed pa, mnyam pa nyid kyi don bsgom pa, theg pa chen po'i chos 'chad pa sogs te rgyas par mdo las shes par bya'o,
gzhan yang dge sdig gang la yang bsam pa mnyam par zhugs pa thams cad byed pa po gcig bzhin du 'dra bar thob pa dmag la sogs pa lta bu dang, dge sdig gang la'ang rjes su yi rang na byed po dang 'dra bar thob pa dang, rjes su 'gyod na dge sdig gang yang 'dzad pa dang, thabs mkhas na sdig pa chen po yang myur du byang ba dang, dge rtsa chung ngu yang tshad med par 'phel ba sogs kyi tshul khong du chud par bya'o,
de lta bur 'khor bar skye ba 'grub byed kyi las de yang, dang por nyon mongs pa'i dbang gis byung la, mthar yang srid sogs nyon mongs pas gsos ma btab na skye ba'i 'bras bu mi 'byin pas nyon mongs pa ni klu gang du gnas par chu yod pa dang, shing rnams skye ba'i rtsa ba lta bu dang, myu gu skye ba'i sa bon dang, me 'bras rnams skyed pa'i ljon pa lta bu 'khor ba skyed byed yin no,
de las kyang dus dang sa dang dngos po thams cad yongs su tshol ba'i tshul gyis kun tu 'gro ba srid pa la dga' zhing chags pa'i sred pa gtso bor gyur pa'i nyon mongs pa rnams kun 'byung gi chos su gsungs so,
nyon mongs pa'i dbye ba ni drug gam bcur gong du bshad pa bzhin no,
de dag phra ba nas skye zhing cher rgyas par byed pas phra rgyas zhes kyang bya'o,
nyon mongs de dag skye ba'i rgyu ni, nyon mongs pa'i bag la nyal ma spang ba dang, nyon mongs skye ba'i yul nye bar gnas pa dang, tshul bzhin ma yin par yid la byed pa dang gsum tshogs nas skye bar 'gyur ro,
nyon mongs de'i byed las sems kyi rgyud rab tu ma zhi bar byed pa'o,
de yang 'dis 'khor bar zag par byed pa ni nyon mongs pa rnams yin la, nyon mongs de dag dmigs pa dang mtshungs ldan gang rung gi sgo nas phan tshun 'phrod cing gnas thob la, rgyas su rung ba'i chos rnams la zag pa dang bcas pa zhes bya ste, de gang zhe na lam bden dang 'dus ma byas ni zag med yin la de ma gtogs pa'i chos gzhan 'dus byas thams cad zag bcas so,
de la dmigs pas ji ltar rgyas par byed ce na, phung po lnga la dmigs nas bdag dang bdag gir lta zhing de'i dbang gis rtsa nyon dang nye nyon rnams rgyas par 'gyur ro,
lam dang 'gog pa dang 'dus ma byas rnams la lta ba sogs kyis dmigs pa tsam yod kyang, de dag gzhir byas nas mi rgyas te, lam dang 'gog pa ni zag bcas kyi gnyen po yin pas, de la 'dun pa 'dod chags min la, lam mngon du gyur ba na ma rig pa dang the tshom sogs nyon mongs rnams spong bar byed kyi rgyas par mi byed la, gnod pa mi byed pas zhe sdang yang rgyas par mi 'gyur zhing, zhi ba yin pas nga rgyal dang, nyon mongs spong byed dag pa yin pas lta ba mchog 'dzin sogs lta ba gzhan bcas dang, thar pa'i thabs mchog gyur yin pas de la mchog 'dzin byas pa tshul khrims brtul zhugs mchog 'dzin rgyas pa min pa'i phyir ro,
'dus ma byas ni bde sdug gi rten du mi rung bas de la nyon mongs mi rgyas so,
dmigs pas rgyas tshul la yang, sdug bden mthong bas spang bya lta ba lnga dang the tshom dang kun bden mthong bas spang bya log lta dang lta ba mchog 'dzin the tshom gsum dang, de rnams dang mtshungs ldan gyi ma rig pa dang, rtsa nyon gzhan dang ma 'dres pa'i ma rig pa ste bcu gcig po de la phra rgyas kun tu 'gro ba zhes bya ste 'dod pa sogs rang sa'i spang bya ris lnga po mtha' dag la kun tu dmigs shing de dag skyed pa'i rgyu byed do,
bcu gcig po de las 'jig mthar gnyis ma gtogs pa'i lhag ma dgus ni khams gong ma'i zag bcas la yang dmigs te tshul brtul gzhan rgyud kyi de la yang dmigs pa yod la, gzhan sems can du bzung ba tsam 'jig lta min zhing, de dang 'brel ba'i mthar lta'ang med ces zer, kun 'gro rnams dang lhan cig byung ba'i skye sogs mtshan nyid rnams la'ang kun 'gro'i ming thogs so,
kun 'gro ma yin pa rnams ni rang gi ris su gyur pa'i yul la rgyas kyi thams cad du min no,
mdor na lta ba dang the tshom ma rig pa ni kun 'gro yin la gong mar yang dmigs, lhag ma rnams de lta min pa'o,
'gog lam mthong bas spang bya log lta gnyis dang the tshom gnyis dang, de gnyis dang mtshungs ldan gyi ma rig pa dang, ma 'dres pa'i ma rig pa drug gis ni zag med la dmigs par byed do,
de ltar khams gong ma dang zag med la dmigs pa'i nyon mongs de dag kyang de la dmigs nas rgyas par mi 'gyur te, khams gong ma ni bdag gir ma byas pa dang, zag med ni gnyen po yin pa'i phyir ro,
mtshungs ldan gyi sgo nas rgyas pa gang zhe na, sems dang sems byung nyon mongs pa dang mtshungs ldan du gyur pa rnams te nyon mongs rnams ma spang gi bar du mtshungs ldan gyi sgo nas rgyas par 'gyur ro,
de yang nyon mongs rnams nang phan tshun gang dang gang mtshungs par ldan la gang dang mi ldan zhe na,
'dod chags ni, khong khro dang the tshom dang mtshungs ldan du mi 'byung, de gnyis las gzhan pa'i nyon mongs rnams dang lhan cig mtshungs ldan du 'byung ngo,
de bzhin du khong khro ni chags snyems lta ba gsum dang, nga rgyal ni khong khro the tshom gnyis dang, lta ba'ang de dang 'dra la, the tshom ni chags snyems lta ba gsum dang mtshungs par mi ldan te, gong bshad de dag gi lhag ma gzhan rnams dang de dag phan tshun mtshungs ldan du 'byung ngo,
khro ba sogs nye nyon rnams phan tshun mtshungs par mi ldan,
ma rig pa ni nyon mongs pa thams cad la mtshungs par ldan pa 'dres pa'i ma rig pa dang, ma 'dres pa ni bden pa rnams mi shes pa tsam gyi rmongs pa 'ba' zhig skyes pa'o,
ngo tsha med pa dang khrel med pa ni mi dge thams cad dang mtshungs par ldan no,
rmug rgod ma dad bag med le lo lnga ni nyon mongs thams cad dang mtshungs par ldan du rung ngo,
yang tshor ba gang dang mtshungs par ldan tshul ni, 'dod chags ni 'dod khams nas bsam gtan gnyis pa'i bar du bde dang yid bde btang snyoms gsum dang mtshungs par ldan no,
bsam gtan gsum par bde ba dang, de yan chad btang snyoms dang ldan no,
khong khro ni sdug bsngal yid mi bde btang snyoms gsum dang, nga rgyal ni 'dod par bde yid bde btang snyoms gsum dang, bsam gtan dang po gnyis su'ang de gsum dang, gsum par bde ba dang btang snyoms, bzhi pa yan chad btang snyoms kho na dang ngo,
'jig mthar mchog 'dzin gnyis te lta ba bzhi ni nga rgyal dang 'dra bar shes par bya'o,
log lta ni 'dod par yid bde mi bde btang snyoms gsum dang, gzugs gzugs med na tshor ba gang yod de dang mtshungs par ldan no,
the tshom ni 'dod par yid mi bde dang btang snyoms, khams gong ma gnyis na tshor ba gang yod pa de dang ldan no,
ma rig pa ni nyon mongs pa thams cad dang mtshungs ldan yin pas sa gsum na tshor ba gang yod pa de dang ldan no,
ma 'dres pa'i ma rig pa ni 'dod par yid mi bde dang btang snyoms de yan chad rang sar tshor ba gang yod dang mtshungs par ldan no,
ci'i phyir nyon mongs pa thams cad tshor ba btang snyoms dang mtshungs par ldan du rung zhe na, nyon mongs de dag skyes pa'i tshe btang snyoms tha mal par 'dug pa la brten nas nub par 'gyur ba'i phyir ro,
'gyod pa phrag dog khro ba rnam 'tshe khon 'dzin 'tshig pa rnams yid mi bde dang mtshungs ldan, ser sna yid bde dang ldan, g.yo rgyu 'chad gnyid bzhi ni, yid bde mi bde gnyis ka dang ldan rung ,
rgyags pa ni bde ba dang ldan la, tshor ba btang snyoms ni de kun dang ldan rung ngo,
ngo tsha med khrel med rmug rgod bzhi ni tshor ba lnga dang mtshungs ldan du 'jug rung ngo,
yang rnam shes gang dang lhan cig tu 'gyur zhe na, chags sdang rmongs gsum ni 'dod khams na rnam shes tshogs drug dang mtshungs par ldan rung la, chags rmongs gnyis ni gzugs khams na sna lce'i ma gtogs pa'i rnam shes bzhi dang, gzugs med na yid kyi rnam shes kho na dang ngo,
nga rgyal lta ba the tshom gsum ni sa thams cad du yid kyi rnam shes kho na dang ldan no,
yang 'dod chags khong khro nga rgyal gsum ni 'dod par dngos po'i phyogs gcig la dmigs nas 'jug ste thams cad la khyab par min no,
khams gong ma'i nga rgyal dang chags pa yang de dang 'dra'o, lhag ma rnams ni dngos po mtha' dag la'ang 'jug rung ngo,
yang zag pa'i sgo drug tu phye na, rtsa nyon dang nye nyon rnams zag pa'i ngo bo, de dang lhan cig 'byung ba'i sems sems byung rnams zag pa dang 'brel ba, de'i bdag rkyen mig sogs zag pa de dang mtshungs ldan gyi rten khams gsum gyi dge ba zag bcas rnams zag pas bcings pa, zag pa dang rjes su 'brel ba de'i gnas ngan len, zag pa'i rjes su mthun pa ni zag pa'i gnyen po min par zag pa dang 'phrod pa'am, yang na gzugs sogs la dmigs nas nyon mongs skye ba'i phyir zag pa'i dmigs pa ste, de drug dang 'brel ba'i chos ni zag bcas so,
nyon mongs pa de dag gi bye brag gi rnam grangs la, kun sbyor dgu ni, rjes su chags pa'i kun sbyor zhes pa khams gsum gyi 'dod chags ste, des khams gsum la yid mi 'byung bas dge ba mi spyod cing mi dge ba bsgrub pas phyi ma la sdug bsngal dang kun tu sbyor bar byed pa'o,
de bzhin du khong khro dang, nga rgyal dang, ma rig pa'i kun sbyor dang, lta ba 'jig mthar log gsum la lta ba'i kun sbyor zhes dang, mchog 'dzin gnyis la mchog 'dzin gyi kun sbyor zhes dang, the tshom dang, phrag dog dang, ser sna'i kun sbyor te de re res kyang mi dge ba spyod pas rgyu byas nas phyi mar sdug bsngal la sbyor ba'i phyir kun sbyor zhes bya'o,
de dag gis thar pa'i lam la bsgribs te, chags pas 'khor bar skye ba dang, khong khros sems btang snyoms su 'dug pa la bsgrib cing, lhag ma bdun gyis thun mong du de kho na nyid mthong ba la bsgrib cing, bye brag tu nga rgyal gyis 'jig lta'i nyes dmigs shes pa dang, ma rig pas 'jig lta de'i gzhi shes pa dang, lta bas 'gog pa mngon byed shes pa dang, mchog 'dzin gyis lam yang dag shes pa dang, the tshom gyis dkon mchog gi yon tan shes pa dang, phrag dog gis rnyed bkur gyi nyes dmigs shes pa dang, ser snas yo byad bsnyung ba yongs su shes pa la bsgribs nas dge ba la mi 'jug cing mi dge ba spyod pas 'khor bar kun tu sbyor bar byed pa yin pas nyon mongs pa'i sgrib pa zhes bya'o,
yang tha ma'i cha dang mthun pa'i kun sbyor lnga ni, 'jig lta, tshul khrims brtul zhugs mchog 'dzin, the tshom 'dod 'dun gnod sems te khams gsum pa'i tha ma 'dod khams pa'i rgyud kho na la yod pa 'dod 'dun dang gnod sems gnyis kyis 'dod pa las mi 'da' bar byed la, lhag ma gsum ma spang na 'dod khams pa lan gcig spangs kyang phyir ldog par byed pas 'di lnga spangs na phyir mi 'ong du 'gyur bar gsungs so,
yang 'jig lta dang, tshul khrims brtul zhugs mchog 'dzin the tshom gyi kun sbyor gsum spang bas, rgyun zhugs su 'gyur bar gsung ba ni, de ma yin pa'i rgyun zhugs kyis spang bya yang yod mod kyi 'di gsum lam bgrod pa la 'gro mi 'dod pa dang, lam nor ba dang, lam la the tshom skyes pas gegs byed pa lta bu'i kun sbyor yin pas gtso bo 'di gsum spangs na gzhan yang spang bar don gyis mtshon nas gsungs pa'o,
yang gong ma'i cha dang mthun pa'i kun sbyor lnga spang bas 'phags pa dgra bcom par 'gyur ro zhes gsungs pa, gzugs kyi 'dod chags dang, gzugs med pa'i 'dod chags dang, rgod pa dang, rmongs pa dang, nga rgyal lnga'o,
gzhan yang nyon mongs pa'i dri ma drug ste, sgyu dang g.yo dang rgyags pa dang 'tshig pa dang khon 'dzin dang rnam 'tshe ste, 'di dag gang la yod pa'i rgyud kyang dri mar byed do,
yang bag la nyal bdun ste, 'dod pa'i 'dod chags kyi bag nyal dang, khong khro'i bag nyal dang, srid pa'i 'dod chags kyi bag nyal dang, de bzhin du nga rgyal ma rig lta ba the tshom gyi bag nyal te, 'di dag so so'i phyogs mthun gyi gnas ngan len rnams la bag nyal zhes bya'o,
de yang 'dod pa tshol ba ma spangs pas 'dod pa'i 'dod chags dang khong khro'i bag nyal rgyas par 'gyur ro, srid pa tshol ba ma spangs pas srid pa'i 'dod chags kyi bag nyal rgyas par 'gyur ro, log pa'i tshangs spyod tshol ba ma spangs pas nga rgyal ma rig lta ba the tshom kyi bag nyal rgyas par 'gyur te, gnyen po chung ngu tsam kyis khengs pa dang, bden pa la rmongs nas log pa'i thar pa dang de'i thabs la rtog cing, sangs rgyas kyi bstan pa la the tshom za bar 'gyur ro,
kun nas dkris pa brgyad de, rmug gnyid rgod 'gyod phrag dog ser sna ngo tsha med khrel med pa'o, 'di dag gis zhi gnas dang btang snyoms gyi dus na yang yang sems la dkris par byed pas de skad du gsungs so,
yang chu bo bzhi ni, 'dod pa'i chu bo 'dod pa tshol ba la zhugs pa'am 'dod pa'i nyon mongs dang, srid pa'i chu bo khams gong ma'i de dang, lta ba'i chu bo dang, ma rig pa'i chu bo'o,
de bzhin du de bzhi la 'dod pa'i sbyor ba sogs bzhir brjod do,
nye bar len pa bzhi ni, 'dod pa nye bar len pa, de bzhin du lta ba, tshul khrims brtul zhugs, bdag tu smra ba nye bar len pa bzhi ste, dang pos ni 'dod pa la lhag par zhen pa'i rgyus khyim pa rnams dang rtsod pa byed cing srid pa nye bar len pa'o, gnyis pa ni lta ba la zhen nas rab byung rnams dang rtsod pa sogs so, gsum pa log pa'i tshul khrims dang brtul zhugs tha dad pas mu stegs can nang phan tshun rtsod pa dang, bzhi pa lta ba'i gnas 'jig lta la chags nas bdag med smra ba dang rtsod pa sogs byed pa'o,
mdud pa bzhi ste, brnab sems, gnod sems, tshul khrims brtul zhugs mchog 'dzin, 'di bden no zhes mchog tu 'dzin cing mngon par zhen pa, de re re'i mthar, lus kyis mdud pa zhes sbyar ba bzhi po des mnyam par bzhag pa'i yid kyi rang bzhin gyi lus kyi bar du gcod pa'i phyir mdud pa zhes bya ste,
'di ltar g.yeng ba'i rgyu bzhi ni, zang zing cung zad tsam gyi rgyus g.yengs pa dang, de bzhin du rtsod pa legs par mi sgrub pa'i rgyu dang, tshul khrims brtul zhugs drag pos sdug bsngal ba dang, tshul bzhin min par shes bya la rtog pa'i rgyus sems g.yeng bar byed do,
sgrib pa lnga ste 'dod pa la 'dun pa dang, gnod sems dang, rmug gnyid dang, rgod 'gyod dang, the tshom gyi sgrib pa 'di dag gis gong gi rim pa bzhin du rab tu byung bar 'dod pa'i dus dang, legs par bskul ba sgrub pa'i dus dang, zhi gnas kyi dus dang, sems rab tu 'dzin pa'i dus dang, btang snyoms kyi dus na dge ba'i phyogs la mi 'jug par byed pa'o, rmug gnyid gnyis, rgod 'gyod gnyis bya ba mtshungs pas gcig tu byas pa'o,
yang 'dod chags zhe sdang gti mug gsum la rang rgyud bcings pas 'ching ba gsum zhes kyang bya ste, 'dod chags kyi 'ching ba, zhe sdang gi 'ching ba, gti mug gi 'ching ba zhes bya zhing, 'og ma rnams su'ang de bzhin sbyar bar bya'o,
sngon goms pas da ltar spyod cing de ma spangs par sems las su mi rung ba dang, 'bral bar dka' ba'i tha ba gsum zhes kyang bya, de bzhin du de gsum la tshul khrims 'chal bas dri ma gsum dang, de dag la brten nas dus ring por skye 'chi myong bas sdig pa gsum dang, de dag gis 'khor zhing mchog gsum dang bden bzhi la the tshom za bas zug rngu gsum dang, de dag gis khon dang 'jigs pa dang g.yeng ba mang bar gnas par byed pas 'dod chags kyi ci yang sogs gsum dang, yang de dag gis sgo gsum log par spyod par byed pas nyes spyod gsum dang, de dag la brten nas 'dod pas phongs pas na phongs pa gsum dang, de dag la brten nas lus sems yongs su gdung bas yongs gdung gsum dang, de dag gis srid pa'i nags su skye ba sna tshogs len pas nags sbyor gsum dang, thar pa'i gegs su gyur pas gegs gsum dang, de bzhin 'khrugs pa gsum dang, 'thab pa gsum dang, dug gsum dang, rims nad gsum zhes sogs su brjod do,
yang zag pa gsum ste, mnyam par ma bzhag pa'i sa pa 'dod pa'i khams na sems phyi rol tu bltas te, rnam par 'phro zhing zag par byed pa 'dod pa'i zag pa, mnyam bzhag gi sa pa khams gong ma gnyis na sems kha nang du bltas te zag pa srid pa'i zag pa, zag pa de gnyis kyi gnas ma rig pa'i zag pa dang gsum du gsungs so,
nyon mongs pa 'di dag gi khong khro khams gong ma gnyis na med la, gzhan rnams khams gsum thams cad na yod do,
khams gsum na yod pa'i nyon mongs pa mthong sgom lam gyi spang byar gyur pa du yod ce na, mthong lam du sdug bsngal kun 'byung 'gog pa lam bden bzhi mthong bas spang bya bzhi dang, de steng sgom lam gyis spang bya dang bcas te ris lngar dbye ba las,
'dod pa'i khams 'dir sdug bden mthong bas spang bya lta ba lnga dang lta min lnga ste bcu yod cing, de yang 'jig mthar log gsum ma rig the tshom lnga ni sdug bsngal bden pa'i rang bzhin la dngos su log par zhugs pa ste, zag bcas 'bras gyur nyer len gyi phung po 'di bdag med cing rtag chad med pa'i don can yin pa la, rmongs nas bdag tu lta ba dang, rtag chad du lta ba dang, rgyu 'bras med par lta ba dang, bden don la the tshom za ba'i phyir ro,
'dod chags dang nga rgyal dang mchog 'dzin gnyis te bzhi ni, log pa la log zhugs zhes bya ste, bdag dang chos kyi ngo bo med pa la bdag tu bzung ba log pa de la chags shing nga rgyal du byed la, de'i lta ba dang, thabs min pa la yang mchog tu 'dzin pa'i phyir ro,
khong khro ni dbang gis log zhugs te bdag tu 'dzin pa'i dbang gis rang dang mi mthun pa la khro ba skye ba'i phyir ro,
kun 'byung bden pa mthong bas spang bya la rgyur gyur pa'i phung po la bdag tu mi lta la, de'i dbang gis bdag de rtag chad du mi 'dzin zhing, rgyu kun 'byung gi phung po tsam tshul khrims dang brtul zhugs min pas de'i mchog 'dzin kyang mi 'byung la, de gsum ma gtogs pa'i lhag ma bdun spang bar bzhed,
'gog pa la yang de dang 'dra ste bdun no,
lam bden mthong bas spang bya la bdun po'i steng du lam log pa la yang dag tu lta ba de 'dis spang bya yin pas tshul khrims brtul zhugs mchog 'dzin kyang spang byar 'dod pas brgyad du brjod do,
'gog lam la khong khro yang dngos su log zhugs yod de 'gog lam de la skrag nas sdang ba yod do zhes zer kyang bdag lta'i dbang gis skrag cing sdang bar 'dra'o snyam mo,
de ltar na 'dod par mthong spang so gnyis, khams gong ma gnyis na khong khro med pas nyer brgyad nyer brgyad re ste khams gsum na khyon bsdom pas mthong bas spang bya gya brgyad,
'dod pa na sgom lam gyis spang bya 'dod chags khong khro nga rgyal ma rig pa bzhi dang, khams gong ma gnyis na khong khro ma gtogs pa gsum re yod pas, khyon bsdom na sgom spang bcu'o,
de ltar 'dod par spang bya ris lnga char bsdoms pas so drug ,gzugs khams na so gcig ,gzugs med na yang so gcig ste, khams gsum gyi spang bya bsdom na dgu bcu go brgyad du yod pa mdzod kyi lugs so,
mngon pa kun btus ltar na, lta ba lnga dang lta min lnga ste bcu po de thams cad bden bzhi la khyad med par 'jug ste, gzhi de dag la bdag tu lta ba dang, rtag chad du lta ba dang, 'dag grol gyi rgyu min pa'i lam la mchog 'dzin yod pas so so'i bden pa mthong bas de dag spong bar byed pa la khyad med par bzhed de don la de bzhin yin no,
de'i dbang du byas na 'dod par mthong spang bzhi bcu, khams gong ma gnyis na khong khro med pas so drug pa tshan gnyis te, khams gsum na mthong bas spang bya'i nyon mongs pa brgya dang bcu gnyis yod do,
sgom spang la 'jig mthar gnyis lhan skyes kyang yod pas 'dod chags sogs gong gi sgom spang bzhi bcas 'dod pa na sgom spang drug, gong ma gnyis na khong khro med pas lnga re lnga re ste khyon sgom spang bcu drug tu bzhed do,
mthong sgom gyis spang bya de dag khams dang sa'i sgo nas dbye na du mar 'gyur ro,
yang sgom spang la khams dang sa dang rnam pa'i sgo nas rgyas par dbye na 'dod par sgom spang chung 'bring chen po gsum la nang gses gsum du dbye ba'i skor dgus phye na lnga bcu nga bzhi yod do,
de bzhin bsam gzugs kyis brgyad po'i re rer yang skor dgur phye nas, de rnams su khong khro ma gtogs pa lnga re brtsis pas sum brgya drug cu, 'dod pa dang bsdoms pas khams gsum na sgom spang bzhi brgya bcu bzhi yod do,
yang khams gsum sa dgu la nang gses dgu rer phye bas gya gcig la sgom spang lnga re ni de thams cad du yod pas gya gcig pa tshan lnga bzhi brgya dang lnga, de steng 'dod pa'i sa dgu'i khong khro dgu bsnan pas bzhi brgya bcu bzhi ste rtsi lugs tsam ma gtogs sngar dang don gcig go,
de las mdzod kyi lugs ltar byas pa'i khams gsum gyi spang bya ris lnga char bsdoms pa go brgyad po'i steng du 'dod pa'i spang bya la gong bshad kun dkris brgyad la khro ba dang 'chab pa bcas kun dkris bcur byas pa bsnan nas spang bya de dag thams cad bsdoms pas brgya dang brgyad po de la dgos pa'i dbang gis zag pa gsum dang, chu bo bzhi dang, sbyor ba bzhi dang, nyer len bzhir dbye ba las,
dang po khams gsum gyi ma rig pa bco lnga la ma rig pa'i zag pa zhes bya ste nyon mongs pa kun gyi rtsa ba'o, de'i lhag ma 'dod pa'i zag pa zhe gcig, khams gong ma gnyis na nyer drug tshan gnyis te srid pa'i zag pa lnga bcu nga gnyis yod do,
nyon mongs de dag gis srid rtse nas mnar med pa'i bar gyi srid par skye mched drug gi rma'i sgo nas zag par byed pas na zag pa zhes bya'o,
chu bo bzhi ni ma rig pa bco lnga la ma rig pa'i chu bo yang zer la, sbyor ba yang zer ro, khams gsum gyi lta ba so drug logs su phye ba la lta ba'i chu bo dang sbyor ba zhes bya'o, de dag gi lhag ma 'dod pa'i chu bo'am sbyor ba nyer dgu, srid pa'i chu sbyor nyer brgyad yod de, skye dgu rnams 'khyer zhing gnas min du sbyor ba'i gtso bo'i phyir skabs 'dir lta ba rnams logs su phye ba'o,
de yang 'di dag gis srid pa'i rgya mtshor rgyun phyogs su 'khyer bar byed pa'i phyir chu bo dang, 'khor ba'i 'dam du rnam shes sbyor bar byed pa'i phyir sbyor ba zhes bya'o,
yang nye bar len pa bzhir dbye ba la, ma 'dres pa'i ma rig pa tsam grogs med rkyang pas 'dod pa dang srid pa'i skye ba nye bar len pa min phyir tshur bsres, lta ba dang tshul khrims dang brtul zhugs mchog 'dzin gyis ni phyin ci log gi lta ba dang, log pa'i brtul zhugs des khyim pa dang rab tu byung ba rnams bslu ba'i phyir logs su phye ste, 'dod pa nye bar len pa so bzhi, srid pa nye bar len pa so brgyad, khams gsum gyi lta ba nye bar len pa sum cu, tshul khrims dang brtul zhugs mchog 'dzin nye bar len pa drug go,
de dag ni srid par skye ba len pa'i rgyu yin pa'i phyir nyer len zhes bya ste, gdul bya'i bsam pa la ltos nas dgos pa'i dbang gis dbye ba de ltar mdzad pa yin no,
gal te mngon pa gong ma'i lugs gzhir bzhag nas gong ltar dbye bar 'dod na, mthong bsgom gyis spang bya brgya nyer brgyad la 'dod par kun dkris bcu bsnan te brgya dang so brgyad 'byung ba de las,
ma rig pa'i zag pa bco lnga, 'dod pa'i zag pa nga gcig, srid pa'i zag pa don gnyis su 'gyur zhing, ma rig pa'i chu sbyor bco lnga, lta ba'i chu sbyor re drug, 'dod pa'i chu sbyor nyer dgu, srid pa'i chu sbyor nyer brgyad, 'dod pa nyer len so bzhi, srid pa nyer len so brgyad, lta ba nyer len nga bzhi, tshul khrims brtul zhugs mchog 'dzin nye bar len pa bcu gnyis su 'gyur ro,
de la mthong bas spang bya ni nyon mongs kun btags rnams te yang dag pa'i don la gzhan du rtog pa'i nyon mongs can gyi lta ba la, zhen pa dang, the tshom dang, lta ba'i gnas dang, lta ba de la log par zhugs pa'i nyon mongs dang nye nyon gang yin pa dang, lta ba des kun nas bslang ba'i lus ngag gi las dang, ngan song ba'i phung po khams skye mched ni mthong bas spang bar bya ba'o,
bsgom pa'i lam gyis spang bya ni mthong lam thob pa yan chad kyi rgyud kyi nyon mongs lhan skyes gang zhig mthong bas spang bar bya ba min pa rnams so,
spang bya min pa ni zag med do, ji ltar spong na nyon mongs pa de dag skye ba'i gzhi dang, nyon mongs pa rang gi ngo bo dang, de'i nyes dmigs ji lta ba bzhin yongs su shes pa'i shes rab kyis nyon mongs de dag 'byung bar 'gyur ba dang du mi len par byas pas, nam zhig gnyen po'i lam thob nas nyon mongs rnams slar yang skye ba'i sa bon gnas ngan len rtsad nas bcom ste phyis mi skye bar gyur pa la spang ba zhes bya'o,
de yang chos thams cad bsdom pa la bdag med pa'i rnam par yid la byed pas, mi rtag sogs rnam pa gzhan kyang de'i ngang du mthar thug ste yid byed des snang bas mun pa ltar nyon mongs pa'i sa bon 'joms par byed do,
spyir gnyen po la bzhi ste, sun 'byin pa'i gnyen po ni zag bcas rnams la nyes dmigs su lta ba'o, spong ba'i gnyen po ni bar chad med kyi sbyor ba dang bar chad med lam thams cad do, gzhi'am rten gyi gnyen po ni, rnam grol lam mo, thag bsring ba'i gnyen bo ni, de'i gong ma'i lam yin no, 'di ni kun btus ltar te mdzod na 'chad tshul gzhan yod do,
thag bsring ba la bzhi ste mtshan nyid mi mthun pas thag bsring ba tshogs pa gcig tu gnas kyang mtshan nyid mi mthun pas ma 'dres shing ring bar gyur pas sogs 'byung ba bzhi lta bu, mi mthun phyogs su gyur pa tshul khrims dang 'chal khrims lta bu, yul rnams bar chad pas ring ba shar nub kyi rgya mtsho lta bu, dus kyis ring ba 'das ma 'ongs lta bu'o,
spang bya spang pa'i 'bras bu yongs shes dgu ste, 'dod pa'i sdug kun gyi spang bya zad pa'i yongs shes gcig, 'gog lam gyi spang bya zad pa'i yongs shes gnyis te gsum, de bzhin du khams gong ma gnyis kyi gsum ste drug ni mthong lam bar chad med lam gyi 'bras bu'o,
tha ma'i cha mthun spangs pa'i yongs shes, gzugs kyi zag pa zad pa'i yongs shes, zag pa kun zad pa'i yongs shes gsum ni sgom spang spang ba'i 'bras bu'o,
gong du ji skad bshad pa'i nyon mongs pa dang las de dag ni 'khor bar skye ba'i rgyu dang, kun 'byung dang, rab skye dang, rkyen gyi rnam pa yin te de la kun 'byung gi bden pa shes bya'o,
'gog pa'i bden pa ni rgyu lam gyi stobs gang gis, de bzhin nyid gang du, nyon mongs pa rnams gtan du mi skye bar byas pa, 'khor ba'i rgyu 'bras rgyun chad pa'i go 'phang rtag pa dang dam pa'i bdag nyid skyes bus don du gnyer te thob par bya ba'i mchog, 'gog pa zhi ba gya noms pa nges par 'byung ba'i rang bzhin can mya ngan las 'das pa'o,
de la dbye na 'khor ba'i sdug bsngal nye bar zhi ba tsam gyi theg dman gyi myang 'das dang, khyad par 'phags pa theg pa chen po'i mi gnas pa'i myang 'das gnyis so,
'gog pa de la rnam grangs kyi dbye ba la yongs su ma rdzogs pa'i 'gog pa ni rgyun zhugs sogs 'bras bu dang po gsum gyis bsdus pa slob pa rnams kyi 'gog pa dang, yongs su rdzogs pa ni dgra bcom pa'i 'bras bus bsdus pa mi slob pa'i 'gog pa'o,
yang 'jig rten pa'i lam gyis spang bya'i sa bon nyams smad pas re zhig 'gog pa la brdas 'gog pa zhes dang, 'phags pa'i shes rab kyis spang bya'i sa bon gtan du bcom pa la don dam pas 'gog pa zhes bya'o,
dgra bcom pa de la gnyis te rgyan med pa ni shes rab kyis nyon mongs pa kun las rnam par grol ba'i dgra bcom pa'o, rgyan dang bcas pa ni rnam thar brgyad thob pas sems snyoms 'jug las kyang grol ba ste, mdor na gnyis ka'i cha las rnam par grol ba rig pa gsum dang mngon shes drug dang ldan pa'o,
yang phung po'i lhag ma dang bcas pa dang, lhag ma med pa'i dbye ba gnyis su yang yod do,
'gog pa de ni 'du byed kyi rgyun 'gag pa tsam las gzhan dang gzhan min sogs kyi spros pa nye bar zhi bas zab pa'o,
de ni 'dus ma byas pa dang, bdud dang bral ba, gnas dang gling dang skyob pa sogs su gyur pa, sha dang lha'i mig gi spyod yul las 'das pas, blta dka' ba, g.yo ba med pa, 'chi 'pho med pa, sdug bsngal thams cad dang bral ba, bde ba dge ba sogs yin no,
'gog pa mngon du byas pa'i dgra bcom thob pa de'i tshe yon tan gyi khyad par yang, sngon gnas zag zad 'chi 'pho skye shes gsum gyis sngon dang da lta phyi mtha' la rmong pa sel bas mi slob pa'i rig pa gsum dang nyon mongs snyoms 'jug gi sgrib pa las grol ba gnyis dang, mngon shes drug dang, shes pa bcu dang, mthar gyis gnas pa'i snyoms 'jug dgu dang, rnam thar dang zad par zil gnon dang, rnam par thar pa'i ting nge 'dzin gsum dang, nyon mongs med pa dang, smon nas shes pa dang, mi slob pa'i chos bcu dang, zag med kyi phung po lnga la sogs pa yon tan gyi rnam grangs mang po dang ldan par rig par bya'o,
lam gyi bden pa ni lam gang gis sdug bsngal yongs su shes pa, kun 'byung spong ba, 'gog pa mngon du byed pa'i phyir, lam bsgoms pa ste, de la tshogs sbyor mthong bsgom mthar phyin gyi lam lnga yod pa'i
dang po tshogs lam ni, rang 'bras byang chub gsum las gang 'dod pa la dmigs nas, de'i rgyur gyur pa'i dge ba gzhan dang, 'bras bu de thob byed kyi thos bsam bsgoms pa'i shes rab dang, so so'i skye bo'i tshul khrims dang ldan pas, dbang po'i sgo sdom zhing zas kyi tshod shes pa dang, nam gyi cha stod smad la mi nyal ba sogs kyis, dran pa nye bar bzhag ba bzhi sgom pa'i rnal 'byor la brtson zhing shes bzhin du gnas par mngon par dga' ba'o,
rgyu de dag gis mngon par rtogs pa dang rnam par thar pa'i gnas kyi snod nyid du 'gyur te, tshogs lam chung ngur dran pa nyer bzhag bzhi bsgom pa mngon par gong du 'phags te, 'bring por yang dag spong ba bzhi'i rang bzhin can gyi brtson 'grus 'byung ba dang, chen por rdzu 'phrul gyi rkang pa bzhi'i rang bzhin can gyi ting nge 'dzin 'byung ngo,
sbyor ba'i lam ni tshogs lam du bshad pa'i don la gong 'phel du 'bad pas nges par 'byed pa'i cha dang mthun pa'i dge rtsa rnams thob pa ste gang zhe na dro ba sogs bzhi'o,
de yang dro ba ni so so rang gis bden pa rnams la snang ba thob pa'i ting nge 'dzin dang shes rab mtshungs par ldan pa ste mthong lam gyi ye shes me lta bu'i drod thob pa'o,
rtse mo ni bden pa rnams la snang ba mched pa'i ting 'dzin dang shes rab mtshungs par ldan pa ste mi mthun phyogs kyis dge rtsa g.yo ba'i nang na rtse mor gyur pa'o,
'di gnyis su rnam byang la dbang byed pa'i dad sogs dbang po lnga 'byung ngo,
bden pa'i rjes su mthun pa'i bzod pa ni, bden pa rnams kyi phyogs gcig la zhugs shing rjes su song ba'i ting 'dzin dang shes rab mtshungs par ldan pa ste so skye yin kyang chos nyid kyi don la don spyi'i tshul gyis legs par khong du chud pa'o,
chos mchog ni so so rang gi shes pas bden pa rnams la de ma thag pa'i ting 'dzin dang shes rab mtshungs par ldan pa ste, mthong lam gyi snga logs de ma thag yin pas de dang nye ba'o, de ni 'jig rten pa'i chos kyi nang na mchog tu gyur pa ste, de'i rjes thogs su 'phags pa'i sa mthong lam 'byung ba'i phyir ro,
bzod mchog gnyis na dbang po lnga mi mthun phyogs kyis mi brdzi ba'i stobs su gyur pa yod do,
gang rtse mo thob nas de phan chad log ltas dge rtsa chad pa nam yang mi 'byung la, bzod pa thob phan chad ngan song du mi 'gro'o,
mthong lam ni chos mchog gi mjug thogs su mi dmigs pa'i ting nge 'dzin dang shes rab mtshungs par ldan pas chos nyid kyi bden pa mngon sum du gzigs pa'o,
'dir shes bzod kyi ye shes skad cig ma bcu drug du skye bar 'dod de, gang zhe na sdug bsngal la chos shes pa'i bzod pa dang, sdug bsngal la chos shes pa dang, sdug bsngal la rjes su shes pa'i bzod pa dang, sdug bsngal la rjes su shes pa dang, de bzhin du kun 'byung chos bzod chos shes, kun 'byung rjes bzod rjes shes bzhi dang, 'gog pa'i de bzhi dang, lam gyi de bzhi ste bcu drug skye bar 'dod la,
de yang snga ma snga ma skyes nas phyi ma phyi mas de yul tu byed cing shes pa sogs kyi bzhed pa du ma yod kyang 'dod khams kyis bsdus pa'i chos la bden pa bzhi mthong ba rnams la chos kyi bzod shes dang, khams gong ma gnyis kyi de bzhi la rjes su bzod shes zhes bya la, bzod pa ni bden pa mngon sum rtogs pa'i gnyen po bar chad med lam zag med kyi shes rab dang, shes pa ni de'i rnam grol lam mo,
bcu drug po 'di dag rim can du skye ba dang, cig char du skye ba dang so so'i 'jog tshul kyi bzhed pa 'ga' yod kyang, chos thams cad bdag med pa'i don mngon sum rtogs pa'i shes rab kyi bya ba rdzogs pa'i skad cig ma des khams gsum gyi bden bzhi'i chos nyid rdzogs par rtogs pa la ldog chas bcu drug tu dbye ba tsam du bzhed pa ni don la gnas shing, khyad par du chos thams cad stong nyid spros bral du gzigs pa'i theg chen gyi lugs la ni de ltar ches 'thad pa nyid do,
'on kyang bden bzhi'i rnam pa can gyi spros bcas kyi shes rab la ni sdug bsngal dang, de'i rgyu kun 'byung dang, de 'gog pa dang, lam gyi rim pas nges pa rim can skyes nas bden bzhi mthong ba'i bya ba rdzogs pa yang yod do,
mthong lam gyi skabs 'dir shes rab kyi spyan gyis chos nyid kyi bden pa gzigs pa la chos la chos kyi mig rdul med cing dri ma dang bral ba skyes so zhes gsungs te, bzod pa rnams ni rdul med pa dang, shes pa rnams ni dri ma dang bral ba'o,
gzhan yang chos mthong ba, soms nyi las brgal ba, gzhan gyi dring la mi 'jog pa, ston pa'i bstan pa las gzhan gyis mi bkri ba, chos rnams la mi 'jigs pa thob pa zhes sogs gsungs te, so so rang rig pas chos nyid mngon du byas pas mchog gsum la shes nas dad pa thob pa dang, 'phags pa dgyes pa'i tshul khrims thob pa sogs yon tan khyad par can thob pa'i phyir ro,
lam de ni chos nyid kyi bden pa mngon du gzigs pa'i chos rab rnam 'byed kye shes rab gtso bor gyur pa'i byang chub yan lag bdun gyi rang bzhin can no,
sgom pa'i lam ni mthong lam thob pa'i rjes su de'i gong du gyur pa'i rnal 'byor sgom pa ste,
de la 'jig rten pa dang thun mong pa dang, thun min 'jig rten las 'das pa gnyis so,
dang po 'jig rten pa'i lam ni bsam gtan bzhi dang gzugs med pa bzhi'i ting nge 'dzin te brgyad do, de dag ni yid la byed pa bdun gyi sgo nas so so'i snyoms par 'jug pa bsgrub pa yin te, gang zhe na,
mtshan nyid rab tu rig pa'i yid byed ni, bsam gtan dang po la mtshon na, 'dod pa'i khams ni mnyam par ma bzhag pa sogs sdug bsngal dang nyes pa mang bas rags pa dang, bsam gtan dang po ni de las bzlog pa zhi ba'i rnam pa can du lta ba'i thos bsam gyi shes rab kyis, sems nang du sdud cing yongs su sbyang ba la brtson nas bsam gtan dang po'i ting 'dzin bskyed pa la 'bad pa'o,
mos pa las byung ba'i yid byed ni snga ma ltar sbyang bas sgom byung gi shes rab kyis, thos bsam las 'das pa'i bsam gtan dang po'i ting 'dzin sbyang ba skye ba'o,
rab tu dben pa las byung ba'i yid byed ni yang snga ma bzhin du bsgom pas 'dod pa'i khams kyi sgom spang chen po spong ba'i gnyen po skyes nas 'dod nyon mngon gyur spong ba'o,
dga' ba sdud pa'i yid byed ni rab tu dben pa las byung ba'i dga' ba dang bde ba cung ngus rags pa spong ba la dga' zhing de la phan yon du mthong nas dus su dad pa chen po yid la byed pa ste des 'dod nyon 'bring spong ba'o,
dpyod pa yid byed ni de ltar gnyen pos nyon mongs phal cher spang bas da nyon mongs pa thams cad spangs sam snyam pa'i blo skyes nas nyon mongs skye mi skye brtag phyir nyon mongs pa skye ba dang mthun pa'i spyod pa yid la byed pa'o,
sbyor ba'i mtha' yid la byed pa ni, de ltar brtag na nyon mongs skye bar mthong ste, sngar bzhin zhi rags kyi rnam par bsgoms pas 'dod nyon chung ngu'i chung ngu'i gnyen po rgyud la skyes pa'o,
sbyor ba'i mtha'i 'bras bu yid byed ni gong gi lam de'i rjes la bsgoms pa de thams cad kyi 'bras bu nyams su myong ba yid la byed pa'o,
de ltar bsam gtan gnyis pa nas srid rtse'i bar du zhi rags rnam can du bltas te yid byed bdun gyis bsgrub pa yin no,
de la yid byed dang po gnyis rang lam de'i sbyor ba'i lam, rab dben dga' sdud sbyor mtha' gsum bar chad med lam, dpyod pa khyad par gyi lam, sbyor 'bras yid byed rnam grol lam mo,
rab dben dga' sdud sbyor mtha' gsum lam chung 'bring chen po gsum ste nyon mongs che 'bring chung ngu'i gnyen po rim bzhin yin no,
'og sa'i nyon mongs spangs nas sa rang rang gi dngos gzhi'i sems thob pa la,
bsam gtan dang po ni yan lag lnga dang ldan te, rtog pa dang, dpyod pa dang, dga' ba dang, bde ba dang, sems rtse gcig pa nyid do, de las rtog dpyod gnyis ni 'dod khams pa'i sems 'dod 'dun gnod sems rnam 'tshe sogs spong ba gnyen po'i yan lag go, mi mthun phyogs spang bas dben pa las skyes pa'i yid dga' ba dang, shin sbyang gi stobs kyis lus bde ba ni phan yon gyi yan lag go, sems rtse gcig pa'i stobs kyis de gnyis 'grub pa'i ting nge 'dzin ni gnas sam rten gyi yan lag go,
de bzhin du gnyis par yan lag bzhi ste, rab dvangs ni rtog dpyod spong ba'i gnyen po yin la, 'og ma'i skyon las nges par byung ba'i rang sa la rab tu dad pa'o, phan yon dga' bde, gnas ting nge 'dzin te bzhi'o,
gsum pa la lnga ste, 'du byed btang snyoms dang, sgom pa mi brjed pa'i dran pa, dran bzhin du gnas pa'i shes bzhin gsum ni 'og ma'i dga' ba spong ba'i gnyen po'o, bde ba phan yon, sems kun nas gnas pa rang bzhin nam rten no,
bzhi par bzhi ste, sa 'og ma'i skyon brgyad dang bral ba'i dran pa yongs su dag pa dang, 'du byed btang snyoms yongs su dag pa gnyis ni bsam gtan gsum pa'i bde ba spong ba'i gnyen po'o, tshor ba btang snyoms phan yon, ting nge 'dzin yongs su dag pa rten gyi yan lag go,
skyon brgyad ni bsam gtan dang po la yod pa'i rtog dpyod gnyis dang, gsum pa man chad na yod pa'i dbugs 'byin rngub dang, 'dod pa na yod pa'i sdug bsngal dang yid mi bde dang, gnyis pa man chad du yod pa'i yid bde dang, gsum pa'i bde ba ste de brgyad dang bral ba'i phyir rlung med pa'i mar me ltar g.yo ba med pa yin no,
de'i phyir 'bras bu skye ba'i gnas ris der me chu rlung gis 'jig pa med la, bsam gtan dang po na rtog dpyod me lta bu, gnyis par dga' bde chu lta bu, gsum par dbugs 'byung rngub rlung lta bu yod pas bskal pa 'jig pa'i tshe de dag gi gnas snod kyi khams kyang rim par me chu rlung gis 'jig pa yod pa'o,
bsam gtan dang po'i ting nge 'dzin thob pa'i tshe, gzugs khams la chags pa ma bral yang 'dod pa'i khams la chags pa bral ba'i phyir, 'dod khams kyi kham gyi zas dang, gnyid dang 'khrigs pa'i 'dod chags dang bral ba, de'i dbang gis gzugs khams pa la kham gyi zas med cing nang du ting nge 'dzin gyis lus rgyas pa yin la, mig rna lus shes gsum las, sna lce'i rnam shes mi 'byung ngo,
gzugs med pa rnams ni zhi gnas su ro gcig pa'i phyir yan lag so sor rnam par bzhag pa med la, thams cad gzugs la chags pa dang bral te gzugs kyi 'du shes nub pa yin zhing,
bye brag tu gzugs kyi 'du shes med par nam mkha' tsam mtha' yas so zhes de tsam la snyoms par zhugs pa nam mkha' mtha' yas pa dang, nam mkha'i 'du shes kyang bkag ste rnam shes tsam du 'du shes pa rnam shes mtha' yas dang, de yang bkag ste ci yang med pa'i 'du shes la gnas pa dang, de yang bkag ste yod min med min tsam du gnas pa srid pa'i rtse mo'o,
rgyu snyoms 'jug gi bsam gtan bzhi po de dag chung 'bring chen po gsum du goms pa'i rim pa dang mtshungs par, 'bras bu skye ba'i bsam gtan zhes pa gzugs khams kyi gnas ris rnams su skye bar byed pa ste, bsam gtan dang po'i snyoms 'jug chung ngur goms pa las tshangs ris, 'bring tshangs pa mdun na 'don, chen pos tshangs chen sogs 'bras bu che ba'i bar du de ltar shes par bya'o,
bsam gtan bzhi pa dang zag med spel te bsgom pa chung 'bring che ba shin tu che ba ches shin tu che ba lnga las gnas gtsang lngar skye ba'o,
gzugs med pa la gnas gzhan med pas skye ba tsam la tha dad med kyang, snyoms 'jug chung 'bring chen po'i rim pa bzhin skye ba mtho dman dang bzang ngan yod par gsungs so,
bsam gtan dang gzugs med kyi ting 'dzin de la nyon mongs can dang dag pa pa gnyis su yod te, dang po sred lta nga rgyal ma rig pa bzhis bslad pa can de ji ltar na, rang sa'i ro myang ba'i sred pa shas che ba'am, lta ba shas che ba'am, nga rgyal shas che ba'am, ma rig pa'i dbang gis the tshom shas che ba'i snyoms 'jug de la, rang sa na spyod pa'i nyon mongs dang nye nyon rnams 'byung ba'o,
dag pa pa ni skyon de dag med par gyur pa'i bsam gzugs kyi ting 'dzin ni dge zhing rnam par byang ba'o,
bsam gtan dang pos bsdus pa'i ting 'dzin ji snyed pa la sangs rgyas byang sems rnams snyoms par 'jug pa de dag gi ming tsam yang nyan thos dang rang sangs rgyas kyis mi shes la, bsam gtan dang pos bsdus pa'i ting nge 'dzin ji lta bar bsam gtan lhag ma dang gzugs med rnams la shes par bya ste, bsam gtan gyi pha rol tu phyin pa la brten nas de ltar ting nge 'dzin tshad med pa yod do,
rab kyi mtha'i cha las byung ba'i bsam gzugs de dag bden pa bzhi rtogs pa dang ma 'brel na 'jig rten pa'i lam zag bcas dang, bsam gtan bzhi dang gzugs med snga ma gsum ste bdun po la brten nas sgom lam du bden pa bzhi sgom pa ni, zag med 'jig rten las 'das pa'i lam mo,
srid rtse ni sems kyi rgyu ba mi gsal ba'i phyir de la zag med kyi lam mi brten pas de zag bcas kho na yin no,
bsam gtan dang po'i dngos gzhi la tsam po ba dang, khyad par can gnyis yod pa'i snga mar rtog dpyod gnyis ka yod la, phyi ma la rtog pa med la dpyod pa yod pas tsam khyad gnyis su phye'o,
zag med kyi lam brten pa'i gtso bo bsam gtan sa drug ni, bsam gtan dang po'i nyer bsdog mi lcogs med dang, dngos gzhi tsam khyad gnyis, bsam gtan gong ma gsum bcas drug po de la mthong lam sogs brten pas de ltar gsungs so,
thams cad kyi nang na bsam gtan bzhi pa mchog ste gzugs med lta bu ha cang zhi gnas shas che bas mi gsal ba yang min la, gsum pa sogs 'og ma ltar g.yo ba phra mo'i skyon kyang med pas rab tu gyur ba'o,
yang sa drug po'i steng du gzugs med snga ma gsum bsnan pas bsam gtan sa dgur 'dod do,
'di rnams la zag med kyi lam brten pa yin no, ji ltar brten na mthong lam ni sa drug gang rung la brten pa'o,
sgom lam ni zag med lam mi lcogs med la brten pas 'dod pa dang bsam gzugs brgyad des dgu po'i 'dod chags bral nus so, lhag ma brgyad kyis rang sa dang gong ma'i sa la chags pa bral bar byed do,
mngon shes dang po lnga ni bsam gtan bzhi po'i dngos gzhi na yod, de lnga rang sa dang 'og sa'i spyod yul can no, mngon shes rnams bsam gtan bzhi pa la brten nas bsgrub na mchog tu 'gyur ro,
de yang bsam gtan gyi sems la brten nas so so'i rnam gnas yid la byed pa'i sgo nas bsgrub par bya ba yin no, zag med kyi lam dang 'brel ba rnams kyi mngon shes ni 'jig rten pa las mchog tu 'gyur ro,
'gog pa'i snyoms 'jug ni 'jig rten las 'das pa ste dang por mi rnams kyi nang du bsgrub nas, mi rnams kyi nang du'am gzugs khams su mngon du byed cing, gzugs med khams su mngon du mi byed de, zhi ba'i rnam thar gyi rnam par smin pas gnas pa de dag de la 'bad pa mi rtsom pa'i phyir ro,
de yang mthar gyis bsam gtan dang po nas srid rtse'i bar du snyoms par 'jug cing, khams gsum na sems phra shos srid rtse yin pas de'i mjug tu 'du shes dang tshor ba mtha' dag 'gog pa la 'jug pa yin te 'phags pa rnams ma gtogs byis pa rnams kyis mi nus so,
sems sems byung gi 'jug pa zhi bas mthong chos bder gnas sogs kyi don du de la 'jug pa na ji tsam zhig na ldang bar bya'o snyam pa'i 'du shes des ji ltar 'phang ba ltar 'jug ldang byed pa yin no,
mthar gyis gnas pa'i snyoms 'jug dgu la rim gyis 'jug cing lugs las bzlog te mar 'ong nas, mnyam bzhag min pa 'dod pa'i sems kyis mtshams bzung zhing snyoms 'jug dgu po la gcig nas brgyad kyi bar rim par dor nas gzhan dang gzhan la 'jug pa ni thod rgal gyi ting nge 'dzin zhes bya ste, ting nge 'dzin rtsal sbyang ba'i ched du 'di bsgom pa yin no,
spyir lam de la chung 'bring chen po zhes pa sa dang sa'i nyon mongs spong tshul las bzhag pa dang, yang sbyor ba'i lam zhes pa gang gis nyon mongs pa spong bar rtsom pa bar chad med lam gyi sngon du 'gro ba dang, bar chad med lam ni sbyor ba'i rjes thog tu bar gcad du med par nyon mongs spong bar byed pa dang rnam grol lam nyon mongs spang ba'i rnam par grol ba mngon du byas pa'o,
khyad par gyi lam ni lam snga ma de las gong mar nyon mongs gzhan spong ba'i sbyor dang bar chad med rnam grol lam gsum la bzhag pa'o,
yang na nyon mongs spang ba min yang chos la sems pa'am, zhugs shing gnas pa'i snyoms par 'jug pa'am, yon tan khyad par can mngon par bsgrub pa'am, de la gnas pa'i lam la khyad par gyi lam zhes bya'o,
de ltar lam de ci'i phyir bsgom na dge ba'i phyogs 'phel zhing mi dge ba bsal ba'i phyir bsgom pa'o,
sgom pa'i lam gyi skabs su chos nyid kyi bden pa rtogs zin pa yin pa'i phyir rgyud yang dag pa'i lta bas khyab pa sogs yin pas 'phags lam brgyad 'byung ngo,
de ltar zag med kyi lam de dag ni byang phyogs so bdun gyis bgrod pa yin la
de yang dang por dran pa nyer bzhag bzhi ni dngos po la yongs su rtogs pa'i lam mo, de bzhin du spong bzhi nas rim par rtsol ba las byung ba'i lam dang, ting nge 'dzin yongs su sbyong bar byed pa'i lam dang, mngon par rtogs pa la sbyor ba'i lam dang, mngon par rtogs pa dang 'brel ba'i lam dang, mngon par rtogs pa'i lam dang, rnam par dag par nges par 'byin pa'i lam 'phags lam brgyad yin pa'i bar du sbyar te shes par bya'o,
yang lam gyi rnam grangs la bzhir gsungs te, mngon par shes pa bul la dka' ba'i lam ni dbang po rtul po dngos gzhi'i bsam gtan ma thob pa'o, mngon shes myur la dka' ba ni dbang rnon dngos gzhi'i bsam gtan ma thob pa'o, mngon shes bul la sla ba ni dbang rtul dngos gzhi'i bsam gtan thob pa'o, mngon par shes pa myur la sla ba ni dbang rnon dngos gzhi'i bsam gtan thob pa'o, 'di bzhi la gnas dang dbang pos tha dad pa'i lam zhes bya'o,
yang chos kyi gnas bzhi ste, brnab sems med pa dang, gnod sems med pa dang, yang dag pa'i dran pa dang, yang dag pa'i ting nge 'dzin ste dang po gnyis kyis lhag pa tshul khrims kyi bslab pa sbyong ba dang, dran pas lhag pa sems kyi dang, tha mas lhag pa shes rab kyi bslab pa sbyong ba'i phyir 'di bzhi la bslab gsum yongs su sbyong ba'i lam zhes bya'o,
yang zhi gnas dang lhag mthong la yon tan thams cad sgrub par byed pa'i lam zhes bya ste, mi g.yeng ba zhi gnas ni sems gnas pa'i thabs dgus shin tu sbyang ba dang ldan pa'i zhi gnas kyi sems grub pa'o,
phyin ci ma log pa lhag mthong ni phyin ci log gi mtshan ma dang gnas ngan len spong ba'i phyir bden gnyis kyi chos rnams spyi mtshan gyi sgo nas 'byed pa dang, rang mtshan gyi sgo nas rab tu 'byed pa dang, ngo bo la yongs su rtog pa dang khyad par la dpyod pa'i shes rab kyis yang dag pa'i don ji bzhin mthong ba'o,
de yang zhi gnas thob la lhag mthong ma thob pa sogs mu bzhir 'gyur te, gang thob pa de la brten nas cig shos tshol ba dang, gnyis ka ma thob pas gnyis ka la brtson pa dang, gnyis ka thob na zung du zhugs te don grub par 'gyur ro,
lhag mthong mtshan nyid pa ni zhi gnas la brten pa'i shes rab khyad par can gyi don yin kyang gong du mu bzhi'i skabs su shes rab kyi ldog pa nas bstan pa yin no,
lam gzhan sdud pa'i lam ni dbang po gsum ste, mi shes pa kun shes par byed pa'i dbang po ni sbyor ba'i lam dang mthong lam gyi skad cig dang po bco lnga la dbang byed pa'o, kun shes pa'i dbang po ni mthong lam skad cig bcu drug pa la brten nas slob lam thams cad la dbang byed pa'o, kun shes pa dang ldan pa'i dbang po ni mi slob pa'i lam la dbang byed pa ste, lam 'di dag thob pas lam gzhan sdud pa la dbang thob ba yin no,
gzhan yang bsam gtan dang po'i sas bsdus kyi lam bsgom pa na 'dod pa dang ldan pa'i dge rtsa rnams shugs kyis bsgom par 'gyur te de dag la dbang 'byor ba thob pa'i phyir ro,
de bzhin du gong ma'i lam bsgom pas rang rang gi 'og mar gyur pa'i sa rnams kyi dge rtsa rnams sgom pa la dbang thob pa des kun mtshon te shes par bya'o,
mthar phyin pa mi slob pa'i lam ni, spang bya rnams rgyun bcad nas bral ba'i thob pa mngon du byas pa ste, de yang rang lam gyi rdo rje lta bu'i ting nge 'dzin la brten nas de ma thag tu sems dang lam gyi gnas gyur thob cing zad dang mi skye ba shes pa gang yin pa'o,
zad pa shes pa bdag gis sdug bsngal shes so, kun 'byung spangs so, 'gog pa mngon du byas so, lam rgyud la brten zin te spang bya thams cad zad do zhes shes pa dang, yang sdug bsngal shes par byar med sogs bden bzhi'i tshul shes spang thabs rten slar yang byar med de dri ma rnams phyis mi skye bar shes pa'o,
de la theg dman gyi mi slob pa nyan rang dgra bcom pas ni khams gsum gyi nyon mongs pa sa bon dang bcas pa spang bas de'i dbang gis byung ba las dang rnam smin gyi gnas ngan len sogs zad pa'i bral ba thob nas 'gog bden mngon du byas pa'o,
theg pa chen po'i mi slob pa sangs rgyas kyi sar ni sgrib pa gnyis kyi sa bon bag chags dang bcas pa spangs pas spang ba chen po mthar thug pa'i 'gog bden mngon du mdzad pa ste, dag pa gnyis ldan gyi de bzhin nyid ngo bo nyid sku thob pa'o,
rdo rje lta bu'i ting nge 'dzin zhes pa gang zhe na theg pa che chung so so'i lam gyi 'bras bu mthar thug thob pa'i gegs su gyur pa'i spang bya mthar thug 'joms pa la thogs pa med pa'i gnyen po bar chad med lam mo, de la'ang sbyor dngos rjes gsum yod pa'i dang po rdor ting de ma thag tu 'dren nus pa'i dngos rgyur gyur pa la sbyor ba'i lam zhes bya zhing, dngos gzhi ni rdo rje lta bu'i ting nge 'dzin rang nyid de spang bya'i sgrib pa thams cad kyis tshur mi phyed la phar 'joms pa'i mthu dang ldan pa'o, de'i rjes thog la dngos 'bras su gyur pa zad mi skye shes pa 'byung ba'i gnas skabs la rnam grol lam zhes bya'o,
mi slob pa de ni mi slob pa'i chos bcu dang ldan te, gang zhe na mi slob pa'i yang dag pa'i lta ba nas, mi slob pa'i yang dag pa'i ting nge 'dzin gyi bar gyi 'phags lam brgyad dang, mi slob pa'i yang dag pa'i rnam par grol ba dang, mi slob pa'i yang dag pa'i shes pa ste bcu'o,
bcu po de dag zag med kyi phung po lngas bsdus te, ngag las mtha' 'tsho ba gsum tshul khrims gyi phung po dang, dran ting gnyis ting nge 'dzin gyi dang, lta rtog rtsol gsum shes rab kyi dang, rnam par grol ba'i dang, rnam par grol ba'i ye shes mthong ba'i phung po lnga nyid do,
de ltar lam gyi bden pa ni yang dag pa'i lam dang rigs pa dang, sgrub pa dang nges 'byin nyid du shes par bya'o,
blang dor du bya ba'i cha nas bstan pa bden pa bzhi bshad zin to,
skabs 'dir mngon par rtogs pa lam dang lam de thob pa'i gang zag gi chos kyi rnam grangs 'ga' zhig brjod na,
gong du bstan pa'i zag med kyi phung po lnga tsam nyan rang dgra bcom pa la yang yod mod kyi, de bzhin gshegs pa'i zag med kyi phung po lnga ni bsam gyis mi khyab ste, 'di ltar sangs rgyas kyi gzugs skur snang ba ni sems can phal pa'i gzugs lta bu ma yin te, zag med kyi bsod nams tshad med pa'i rgyu las phyogs bcu'i zhing gi gdul bya la cig char gzugs brnyan ltar snang ba, lhar bcas 'jig rten kun gyi nyes pa thams cad spong zhing dge chos rlab po che sdud pa'i don byed pa zag pa med pa'i tshul khrims kyi phung po nyid du rig par bya'o,
de bzhin du tshor ba sna tshogs pa mi mnga' ste rtag tu chos kyi dbyings las g.yo ba med pa'i ting nge 'dzin gyi phung po dang, 'du shes sna tshogs mi mnga' bar ji lta ji snyed kyi chos thams cad 'bad med lhun grub tu mkhyen cing rnam rtog dang bral ba shes rab kyi phung po dang, sgrib gnyis bag chags dang bcas pa spang bas phyi dang nang gi 'du byed kyi 'jug pa ma lus pa nye bar zhi ba rnam par grol ba'i phung po dang, rnam par shes pa tshogs brgyad kyi rang bzhin can gyi phung po'i chos las rnam par grol ba'i bdag nyid kyi ye shes nyid so so rang rig pas mthong ba'am gzigs pa ni rnam par grol ba'i ye shes gzigs pa'i phung po zhes bya ba yin no,
de ltar sangs rgyas kyi sa na tha mal pa'i phung po lnga dang khams skye mched rang rgyud du grub pa gang yang med pas khams gsum las 'das pa ste rigs lnga dang ye shes lnga dang zag med kyi phung po lnga'i rang bzhin du sangs rgyas pa yin la,
mdor bsdu na chos kyi dbyings dang gnyis su med pa'i ye shes kyi sku mnyam pa nyid rnam pa thams cad pa'i bdag nyid du bzhugs pa'i gnas tshul rig par byas nas, sku de nyid gdul bya'i snang ngor 'jig rten mthun 'jug gi thabs la mkhas pas gang zag phal pa rnams dang skal pa mnyam par phung po lnga ldan gyi tshul tu bstan zhing, de dang mthun par tha snyad btags pa rnams kyang don la 'gal ba cung zad med par snang tshul tsam gyi dbang du byas pa go dgos te,
dper na sangs rgyas la srid zhi tha dad kyi 'du shes dang rnam rtog gang yang med pas chos gang yang ma gsung zhes bstan pa dang, gdul bya'i khams dbang bsam pa so sor mkhyen nas de dang mthun par chos bstan to zhes gsung pa 'gal med don gcig tu 'char ba ni, gnas tshul mi rtog pa'i ye shes zab mo mnga' ba'i mthus gdul bya'i don cung zad kyang chud mi za ba'i stobs thob ste,
rnam rtog gis 'bad rtsol med kyang shes bya thams cad mkhyen pa dang phrin las kyi 'jug pa 'bad med lhun grub du yod pa'i dbang gis gdul bya rnams la snang tshul gyi dbang du byas na, so so rang rang gi khams dbang bsam pa gzigs nas de dang 'tshams pa'i chos ji ltar 'dod pa ston pa dang, gdul bya'i don la mi bsnyel bar 'bad rtsol sna tshogs mdzad par snang ba yang snang ngo la ltos nas de ltar bslu ba med pa yin pa bzhin no,
de ltar shes na theg pa chen po'i dgongs don la mi rmongs par 'gyur ro,
phung po rang mtshan pa dang tshor ba sogs tha mal pa mi mnga' ba'i phyir bdud bzhi bcom pa yin te, zag bcas kyi phung po 'grub par byed pa'i rgyu nyon mongs pa rnams la nyon mongs pa'i bdud ces bya'o, rgyu des grub pa'i zag bcas kyi phung po lnga ni phung po'i bdud do, zag pa zad byed kyi lam la gegs su gyur pa'i 'dod yon rnams la chags pa lha'i bu'i bdud do, phung po de nyid 'gag par byed pa 'chi bdag gi bdud de, 'di dag gis 'gro ba rnams 'khor ba las thar pa'i gegs byed pa'i phyir bdud yin la, sangs rgyas kyis de rnams gtan du bcom pa'i phyir bdud bzhi las yang dag par rgyal ba zhes bya zhing,
de bzhin du sgrib gnyis bag chags dang bcas pa spang ba, rtogs bya mtha' dag rtogs pa sogs kyi sgo nas dgra bcom pa dang yang dag par rdzogs pa'i sangs rgyas dang, de bzhin gshegs pa dang, bde bar gshegs pa dang, ston pa mtshungs pa med pa sogs mtshan gyi rnam grangs dang ldan pa'o,
skal pa drug ni 'dod dgur bsgyur ba'i dbang phyug phun sum tshogs pa, de bzhin du mtshan dpe'i gzugs bzang po, 'khor la sogs pa tshad med pa'i dpal 'byor, 'jig rten kun la snyan par grags pa, ji lta ji snyed mkhyen pa'i ye shes, sems can gyi don mdzad pa'i brtson 'grus phun sum tshogs pa ste, rim pa ltar bsam gtan bzod pa sbyin pa tshul khrims shes rab brtson 'grus kyi 'bras bu'o, 'di rnams la legs pa'i yon tan drug ces kyang bya'o,
rjes su dran pa drug ni sangs rgyas chos dge 'dun gtong ba tshul khrims lha rjes dran no,
sangs rgyas ni rang byung gi ye shes 'dus ma byas pa'i sku lhun gyis grub pa brnyes pas rang don phun sum tshogs pa, mkhyen brtse nus gsum tshad med pas gzhan don phun tshogs dang ldan pa ste, de la sku gsum gyi dbye bas yon tan tshad med pa mnga' ba'o,
chos la chags pa bral byed lam gyi bden pa ni rang gi ngo bo la nyon sgrib med pas dag pa, shes sgrib med pas gsal ba, de'i phyir sgrib gnyis kyi mun pa 'joms pa'i gnyen por gyur pa nyi ma lta bu'i yon tan mnga' ba dang, gang zhig chags pa dang bral ba 'gog bden ni spros pas spyod yul min pas bsam du med pa, las nyon gnyis med pas nye bar zhi ba, so so rang gis rig bya las rtog pa med pa gsum gyi rang bzhin te, mdor na de bzhin nyid rtog med zhi ba bsam gyis mi khyab pa'o,
de ltar 'gog lam gnyis po de ni rtogs pa'i chos so, de gnyis brjod byar byas pa'i rjod byed gsung rab rnams ni lung gi chos so, lung rtogs kyi chos de dag thog mtha' bar gsum du dge ba gsum dang, don dang tshig 'bru bzang po gnyis dang, gzhan dang thun mongs min pa ma 'dres pa dang, nyon mongs mtha' dag spong bas yongs su rdzogs pa, rang bzhin rnam dag gi chos nyid ston pas yongs su dag pa, glo bur gyi dri ma bral bar byed pas yongs su byang ba ste tshangs spyod kyi yon tan bzhi dang ldan pa'o,
dge 'dun ni chos nyams su len par byed pa rnams te de la skye 'phags gnyis, 'phags pa rnams ni chos nyams su blang bas chos nyid kyi bden pa mthong ba yin la,
de las khyad par theg chen 'phags pa ni, rang lugs theg chen gyi rtogs bya thun min zab cing rgya che ba so so rang rig pas rtogs nas, chags thog dman sgrib gsum las grol ba'i rig grol gyi yon tan khyad par can dang ldan pa'o,
de ltar dkon mchog gsum po de yi yon tan dran nas ston pa dang lam dang lam gyi grogs mtshungs pa med pa'i tshul du rjes su dran pa'o,
gtong ba dang tshul khrims kyi yon tan rjes su dran pa dang, lha ni 'dod gzugs kyi lha dang, 'phags pa rnams kyi yon tan rjes su dran pa dang, rang gi bya ba la dpang po'i tshul du yang dran par bya la, lha de dag gi rgyu dge bcu bsam gzugs rnam thar gsum rnams kyang dran pa ste 'di la rgyu 'bras kyi tshul du lha rjes su dran pa zhes gsungs so, de ltar rjes dran phyi ma gsum 'dis bsod nams bya ba'i dngos po gsum dran pa yin no,
'phags pa'i nor bdun ni, dad pa dang, gtong ba dang, tshul khrims dang, thos pa dang, khrel yod pa dang, ngo tsha shes pa dang, shes rab ste re re'i mthar yang phun sum tshogs pa zhes sbyar bar bya zhing 'phags pa rnams la bdun po 'di'i yon tan phun sum tshogs pa nam yang zad mi shes pa yod la de dag gi 'byor ba yin pas de skad ces bya'o,
spyan lnga ni bsod nams las skyes pa'i mig dbang gang gis dpag tshad brgya nas stong chen po'i bar gyi gzugs phra rags mthong ba sha'i spyan, tshe snga mar bsam gtan bsgom pa'i rnam smin las tshe 'dir 'bad med 'byung ba lha'i mig gis 'chi 'pho dang skye ba mthong ba lha'i spyan, chos nyid kyi bden pa mthong ba shes rab kyi spyan, lung rtogs kyi chos dang de ldan 'phags pa'i gang zag rnams kyi dbang po sogs rgyud tshod shes pa chos kyi spyan, shes bya'i rnam pa thams cad gzigs pa'i ye shes ni sangs rgyas kyi spyan no,
byang chub sems dpa'i rgyan rnam pa bzhi ni, tshul khrims dang, ting nge 'dzin dang, shes rab dang gzungs kyi rgyan no,
byang chub sems dpa'i smon lam chen po bcu ni, sangs rgyas mchod pa, dam chos 'dzin pa, lus kun du ston pa, zhing kun tu 'jug pa, phar phyin rdzogs pa, sems can smin par byed pa, zhing sbyang ba, byang sems rnams dang spyod yul mthun par gnas pa, spyod pa kun tu don yod pa, byang chub chen po 'thob pa'o,
smon lam de bcu la, smon lam gyi 'khor 'bum phrag grangs med yod cing, de bcu mtha' thug pa med pa'i gnas bcur sgrub ste, gang zhe na, sems can gyi khams dang, 'jig rten gyi khams dang, nam mkha'i khams dang, de bzhin du dam pa'i chos dang, mya ngan las 'das pa dang, sangs rgyas 'byung ba dang, sangs rgyas kyi ye shes dang, sems can rnams kyi sems kyi dmigs pa dang, sangs rgyas kyi ye shes kyi spyod yul gyi khams ji tsam du sgrub pa dang, de dgu po bsdus te 'jig rten gyi rgyud dang chos kyi rgyud dang ye shes kyi rgyud kyi khams zhes bya ba bcu po de ni phyogs dang dus kyi mu med par khyab pa yin la de snyed du smon lam gyi 'phrul ston pa la 'jug par rig par bya'o,
skyes bu chen po'i rnam par rtog pa brgyad ni bdag gis nam zhig sems can thams cad kyi sdug bsngal sel nus snyam pa dang, nam sems can dbul ba rnams 'byor ba chen po la 'jog nus snyam pa dang, nam sha khrag dang bcas pa'i lus kyis sems can gyi don bya nus snyam pa dang, nam zhig bdag dmyal bar yun ring gnas nas kyang sems can la phan 'dogs nus snyam pa dang, sems can la mi phan pa'i skye ba dang sgo gsum dang nor dang dbang phyug sogs dang ldan pa dang, don dam pa'i ro la gcig tu spyod pa dang, sems can la gnod pa byed par tshe rabs kun du ma gyur cig snyam pa dang, nam sems can kun gyi sdig 'bras bdag la smin cing bdag gi dge 'bras de dag la smin nas bde bar gyur cig snyam pa dang, nam zhig 'jig rten dang 'jig rten las 'das pa'i 'byor ba chen pos sems can rnams kyi re ba yid bzhin du rdzogs par byed nus snyam pa dang, nam zhig bdag sangs rgyas su gyur nas sems can thams cad sdug bsngal las 'byin nus snyam du sems pa'o,
yang 'khor lo gsum ni, klog pa thos bsam gyi 'khor lo, spong ba bsam gtan gyi 'khor lo, bya ba las kyi 'khor lo'o, phyi ma 'dir bstan 'gro'i don can gyi bzang po'i phrin las ji snyed pa 'dus so,
nyan thos rnams kyis rgyun du bsten pa'i 'du shes bcu ni, mi rtag, sdug bsngal, bdag med, mi sdug pa, 'chi ba, snang ba, chags bral gyi 'du shes rnams dang, zas la mi 'phrod pa, 'jig rten kun la mngon par mi dga' ba, mtshan ma kun 'gog pa'i 'du shes te gong ma rnams kyi mtha' yang 'du shes zhes sbyar bar bya ste de ltar bcu'o,
gzhan yang mdo las 'du shes sna tshogs gsung ba las, bdag 'khor ba las mthar ba dang, nyon mongs pa rnams las ma grol ba dang, sdug bsngal dang 'jig pa kun gyi g.yang sar lhung ba dang, las bdag gir bya ba las ma 'das pa dang, 'phags lam kyi yon tan ma thob bzhin du 'chi ba dang, yang srid par skye zhing de dal 'byor thob pa sogs kyi bde ba rnyed dka' ba la sogs pa'i 'du shes rnams kyis khyim pa sogs skyo ba dang dregs pa sel ba dang lam la 'jug par byed do,
bdag ni sangs rgyas kyi rjes su zhugs pa, khyim pa'i bya ba dang 'dod pa'i yul la rgyab kyis phyogs pa dang, lam dang 'bras bu'i yon tan don du gnyer ba yin na, bya ba ngan pa spangs sam, bzang po la zhugs sam 'bras bu gang yang thob bam snyam du brtag par byed ba'i 'du shes sna tshogs gsung ba ni, de dag gis rab tu byung ba rnams 'jug ldog gi gnas la brtson par byed pa'o,
sangs rgyas kyi yon tan shes nas byas pa gzo ba theg chen lam gyi khyad par shes nas gus pa skye ba, sangs rgyas byang sems kyi yon tan shes nas de thob par 'dod pa, sems can rnams mar shes shing snying rje'i sems bsgom pa'i 'du shes sogs ni theg chen la 'jug par byed pa'i don te, mdo las 'du shes 'di dag la rgyas bsdus kyi rnams grangs sna tshogs gsung pa rnams kyang shes par bya'o,
yang ting nge 'dzin gsum ste, rnam par thar pa'i sgo stong pa nyid kyi ting nge 'dzin ni bden bzhi'i rnam pa bcu drug gi nang nas stong bdag med gnyis kyi rnam pa can no, de bzhin du mi rtag sdug bsngal gnyis dang kun 'byung gi rnam pa bzhi ste drug po de'i rnam pa can ni smon pa med pa'i ting nge 'dzin no, 'gog lam gyi rnam pa brgyad kyi rnam can ni mtshan ma med pa'i ting nge 'dzin no,
yang ting nge 'dzin bzhir gsungs te, 'dod chags spang ba'i ting nge 'dzin ni mi gtsang ba bsgom pa, mthong chos bder gnas gyi ting nge 'dzin ni dben pa'i ting 'dzin las skyes pa'i dga' bdes lus mnyen cing khyab par byed pa'o, ye shes mthong ba thob pa'i ting nge 'dzin ni mtshan mo yang nyin mo'i dus ltar snang ba'i 'du shes bsgom pa'o, shes rab thob pa'i ting nge 'dzin ni bsam gtan bzhi pa'i ting nge 'dzin bsgom pa'o,
dge sbyong gi chos bzhi ni, dngos su tshig ngan pas spyos pa la slar mi spyo, brdeg pa la slar mi brdeg, lkog nas gshe ba la slar mi gshe, khros pa la slar mi khro ba ste, bzod pa las byung ba bzhi'o,
sems kyi spyod pa rnam par sbyong ba'i lam bsgom pa la, 'dod chags shas che na mi sdug pa, zhe sdang shas che na byams pa, gti mug shas che bas rten 'brel gyi don, nga rgyal shas che bas khams kyi rab dbye, rnam rtog shas che bas dbugs 'byung rngub dran pa rnams ni nyon mongs 'di dag lhag par spyod pa'i gnyen po yin no,
de la mi sdug pa ji ltar bsgom na mi gtsang ba dang, mi sdug pa dang, keng rus kyi rnam pa bsgom ba gsum las, dang po, gang la chags par bya ba'i lus kyi rang bzhin mi gtsang bar shes shing goms par bya ba ste, mi gtsang ba sum cu rtsa drug gi rang bzhin du'o,
lus la yod pa'i mi gtsang ba'i rdzas so drug ni, skra dang, kha spu dang, so dang, sen mo dang, phyi dang, gcin dang, rdul dang, bsnab dang, mchi ma dang, mchil ma dang, dri ma dang, pags pa dang, sha dang, khrag dang, rus pa dang, tshil dang, rkang dang, rtsa dang, rgyus pa dang, glo ba dang, snying dang, mchin pa dang, mtsher pa dang, mkhal ma dang, pho ba dang, rgyu ma dang, long ka dang, gnye ma dang, lgang pa dang, zhag dang, chu ser dang, rnag dang, bad kan dang, mkhris pa dang, klad pa dang, klad rgyas te, de ltar so drug go,
'di skabs dri ma zhes pa mig gi rngu ma dang, rna spab dang, so dregs sogs so, gzhan brda' 'phrod sla'o,
yang kha dog dang dbyibs dang reg bya dang bsnyen bkur la chags pa zhi bar bya phyir, dur khrod du bor ba'i shi ro g.yo med la bltas te de ji lta bar lus thams cad kyang de dang 'dra bar rtog pa ste, de la mi sdug pa'i 'du shes dgu ni, rnam par bam pa dang, rnam par 'bus gzhig pa dang, rnam par dmar ba dang, rnam par sngo ba dang, rnam bar gnag pa dang, rnam par zos pa dang, rnam par 'thor ba dang, rnam par tshig pa dang, rnam par rul ba'i 'du shes dgu'o,
keng rus kyi 'du shes ni gong gi chags pa bzhi po kun gyi gnyen po mchog tu gyur pa yin zhing, de yang mngal nas skyes pa'i lus rnams ni keng rus kyi rang bzhin las ma 'das pa yin la, keng rus de bsgom tshul dang por rang lus rkang pa'i mthe bong ngam dpral ba'i dbyes sogs nas myags te rus pa mtheb gang tsam la sems gtad nas, rim gyis lus ril po keng rus su bsgom zhing, keng rus des gnas khang dang mthar gyis rgya mtsho'i bar du khyab par spro zhing bsgom pa dang, tshur rang lus kyi keng rus tsam gyi bar sdud cing, yang sngar ltar spro zhing sdud pa'i tshe rkang pa'i rus pa bor nas gzhan rnams la sdud pa dang, yang spro zhing lus phyed dang thod pa'i phyed dang, smin ma gnyis kyi bar du rus pa mtheb gang tsam la bsdu ba sogs spro bsdu byed par bshad do,
gang ltar yang keng rus su dmigs nas goms pas chags pa spong bar byed do,
chags pa dang bral tshul gyi rnam grangs la chags yul phyogs re la chags pa bral ba, mtha' dag la chags pa bral ba, shes rab kyi rtogs pas chags bral, zhi gnas kyis gnon pas chags bral, gnyen pos spang ba'i chags bral lnga yod do,
yang rnam grangs bcu ste, sdug bsngal dang de'i gnas la rang bzhin gyis chags bral, 'khrigs zhugs gdung ba bral ba lta bu gnod pas chags bral, 'grangs pas zas zhim mi 'dod pa lta bu nye bar bstan pas chags bral, bzang po rnyed pas ngan pa mi 'dod pa lta bu phul du byung bas chags bral, byis pa rnams myang 'das mi 'dod pa rmongs pas chags bral, 'das dang ma 'das lam gyis nyon mongs spong ba gnyen pos chags bral, mthong lam thob nas khams gsum mi 'dod pa yongs su shes pas chags bral, sa nas sar nyon mongs rnams spang ba spong bas chags bral, 'jig rten pa dang nyan rang gi chags bral gong mar bcas pa'i chags bral, sangs rgyas byang sems kyi chags bral gong na med pa'i chags bral lo,
byams pa bsgom pa'i tshul ni, sems can thams cad bde ba 'dod cing sdug bsngal mi 'dod pa rang dang tshul 'dra bar shes shing bsam la, 'di dag rmongs pa'i dbang gis bde ba 'dor zhing sdug bsngal len pa snying re rje, 'di rnams sngon gyi tshe rabs rnams su bdag gi ma sogs su gyur pa grangs mang la, de'i tshul gyis pha ma dang, spun sring dang , bu bu mo dang, gnyen dang snag gi gnyen mtshams dang, bshes dang grogs kyi tshul du sems pa bcus sems can rnams yid du sdug pa'i rnam par bsgoms pa las de dag bde ba dang ldan 'dod kyi byams pa skye ba yin la, byams pa'i sems de lta bu yang yang goms par byas te sems can thams cad la khyab par bsgom pa'o,
bsam gtan bzhi gang rung la brten nas byams pa'i sems khon dang dgra zla med pas phyogs bcu'i 'jig rten mtha' dag la dmigs pas khyab par byas te, gnas pa ni byams pa'i ting nge 'dzin yin no, ting nge 'dzin du ma gyur kyang byams pa'i sems thang gcig tsam du bsgom pa yang phan yon dpag tu med par gsungs so,
de ltar byams pa bsgom pas de dang 'dzin stangs 'gal ba, kun nas mnar sems kyi gzhi dgu las byung ba'i zhe sdang rnams zhi bar byed do, mnar sems kyi gzhi dgu ni, 'dis bdag la sngar gnod pa byas so, da lta byed do, ma 'ongs pa na byed par 'gyur ro snyam pa dang, de bzhin du bdag gi mdza' ba la sbyar te gsum dang, bdag gi dgra la 'dis pan btags so, 'dog par byed do, 'dog par 'gyur ro snyam pa'o,
byams pa'i phan yon byams chos brgyad ni, lha dang mi rnams byams par 'gyur ba dang, mi ma yin rnams kyis srung ba dang, yid bde ba mang ba dang, lus bde ba mang ba dang, dug gis mi gnod pa dang, mtshon gyis mi tshugs pa dang, 'bad pa med par don rnams thob pa dang, tshangs pa'i 'jig rten du skye bar 'gyur ba'o,
gti mug gi gnyen por rten 'brel bsgom pa ni, gong du bshad pa ltar phyi nang gi chos thams cad rten cing 'brel bar 'byung te skye ba rtag chad med pa'i don gtan la phab nas de bzhin yang nas yang du goms par byas pas rmongs pa thams cad bral bar 'gyur ro,
nga rgyal shas che na khams kyi rab dbye bsgom par bya ste, de yang nga rgyal la bdun yod de, rang las yon tan chung ba la dmigs nas 'di las bdag che la, mtshungs pa dang mnyam mo snyam pa nga rgyal tsam mam chung ba'i nga rgyal, mtshungs pa bas kyang bdag che'am 'phags la che ba dang mnyam par 'dzin pa che ba'i nga rgyal, che ba bas kyang bdag 'phags snyam pa nga rgyal las kyang nga rgyal, nga'o snyam du nyer len gyi phung po lnga la bdag bdag gir lta ba nga'o snyam pa'i nga rgyal, gong ma'i yon tan ma thob pa la thob po snyam pa mngon pa'i nga rgyal, ches 'phags pa bas bdag chung dman mod kyi 'on kyang bzang ngo snyam pa cung zad snyam pa'i nga rgyal, yon tan min pa'i skyon nyid yon tan du rlom nas nga rgyal ba log pa'i nga rgyal lo,
de dag zhi ba'i ched du nga'o snyam pa'i gzhi rang gi phung po 'di dag la sa chu me rlung nam mkha' rnam shes kyi khams drug tu dbye zhing 'byung ba rnams rdul phra rab kyi mthar thug pa'i bar dang, rnam par shes pa bde sdug dge mi dge sogs sna tshogs dang dus mtha'i skad cig gi cha'i bar du dbye bar bya zhing de'i don la goms par byed pa ste, de yang lus 'di la mi gtsang ba'i rdzas so drug po'i bkod pa sna tshogs pa yod cing de yang rdul gyi mthar thug pa'i rang bzhin can,
nas dang 'bras sogs bsres pa'i phung po ltar blos dbye zhing de ltar phung po lnga cha dang char phye nas de yang skad cig gis skye 'gag byed pa'i rang bzhin la so sor brtag pa goms pas ril po dang gcig pu dang rtag pa'i 'du shes rmongs pa'i rang bzhin can gyi yul sun phyung bas nga'o snyam pa'i nga rgyal ldog la, de yi rtsa ba can gyi nga rgyal thams cad zhi bar 'gyur zhing bdag med pa'i don kyang mthong bar 'gyur ro,
rnam rtog shas che bas dbugs 'byin rngub rjes su dran pa goms pas sems gnas pa 'grub par 'gyur te, ji ltar na dbugs 'byin rngub kyi grangs bcu la sogs pa ma nor bar bgrang ba tsam la sems gtod pa dang, dbugs lus la 'gro ba dang 'ong ba'i rjes su sems 'gro ba dang, dbugs de sna rtse nas rkang mthil bar nor bu'i thag pa ltar nar gyis gnas pa la sems 'jog pa dang, dbugs 'byung rngub byed bzhin pa de la 'di ni rdul rdzas brgyad dang de la brten pa'i sems dang bcas pa'i phung po lnga'i rang bzhin yin par dpyad cing nye bar rtog pa dang, dbugs 'byin rngub dang dro ba sogs dge ba rnams sbyar te dmigs pa bsgyur ba la sems gtod pa dang, dbugs 'byin rngub de dag mthong sgom mi slob lam dang sbyar te yid la byed pa la yongs su dag pa zhes bya ste, de ltar rnam pa drug gi tshul gyis dbugs la sems gtad pas rnam rtog zhi bar byed do,
de rnams ni lam bden dang 'brel bar skabs kyi 'phros don chos kyi rnam grangs 'ga' zhig bstan pa'o,
yang sangs rgyas rnams kyis shes bya'i rang bzhin gtan la dbab pa'i phyir kun rdzob dang don dam pa'i bden pa gnyis su gsungs te,
de la kun rdzob kyi bden pa ni ji ltar snang ba'i chos gzhi 'dus byas dang 'dus ma byas kyis bsdus pa phung khams skye mched dang, lam phar phyin dang byang phyogs sogs dang, 'bras bu stobs bcu la sogs pa mdor na shes bya rnams kyi snang tshul bslu med kyi ngos nas bzhag pa ji snyed pa rgya che ba'i chos so,
don dam bden pa ni gzhi lam 'bras bu'i chos de dag rang bzhin cir yang ma grub pa'i stong pa nyid du gnas pa ni gnas lugs kyi ngos nas bzhag pa ste ji lta ba zab mo'i chos so,
de gnyis yang dag pa'i don du zung 'jug mnyam pa nyid du rtogs pa ni rtogs bya rnams kyi nang na mchog tu gyur pa mthar thug gi don no,
yang blo gros mi zad pas bstan pa'i mdo las, kun rdzob kyi bden pa dang, don dam pa'i bden pa dang, mtshan nyid kyi bden pa gsum du gsung ba yang, bden pa dang po gnyis su phye yang mthar thug so so'i mtshan nyid kyis grub pa med par bden pa gcig pu zung 'jug mnyam pa chen por bstan pa yin te, de ni don dam bden pa mthar thug pa chos kyi dbyings so,
bden pa la mkhas pa'i skabs legs par bshad pa'o,