nges don phyag rgya chen po'i smon lam

From Rangjung Yeshe Wiki - Dharma Dictionnary
Jump to navigation Jump to search

The Mahamudra Aspiration of True Meaning

//nges don phyag rgya chen po'i smon lam/

/mdzad pa po/
/karma pa rang byung rdo rje//

/na mo gu ru//

/bla ma rnams dang yi dam dkyil 'khor lha/
/phyogs bcu dus gsum rgyal ba sras dang bcas/
/bdag la brtser dgongs bdag gi smon lam rnams/
/ji bzhin 'grub pa'i mthun 'gyur byin brlab mdzod// 1

/bdag dang mtha' yas sems can thams cad kyi/
/bsamj sbyor rnam dag gangs ri las skyes pa'i/
/'khor gsum rnyog med dge tshogs chu rgyun rnams/
/rgyal ba skun bzhi'i rgya mtshor 'jug gyur cig// 2

/ji srid de ma thob pa de srid du/
/skye dang skye ba'i tshe rabs kun tu yang/
/sdig dang sdug bsngal sgra yang mi grags shing/
/bde dge rgya mtsho'i dpal la spyod par shog// 3

/dal 'byor mchog thob dad brtson shes rab ldan/
/bshes gnyen bzang bsten gdams pa'i bcud thob nas/
/tshul bzhin sgrub la bar chad ma mchis par/
/tshe rabs kun tu dam chos spyod par shog// 4

/lung rigs thos pas mi shes sgrib las grol/
/man ngag bsam pas the tshom mun nag bcos/
/sgom byung 'od kyis gnas lugs ji bzhin gsal/
/shes rab gsum gyi snang ba rgyas par shog// 5

/rtag chad mtha' bral bden gnyis gzhi yi don/
/sgro skur mtha' bral tshogs gnyis lam mchog gis/
/srid zhi'i mtha' bral don gnyis 'bras thob pa'i/
/gol 'phyugs med pa'i chos dang 'phrad par shog// 6

/sbyang gzhi sems nyid gsal stong zung 'jug la/
/sbyong byed phyag chen rdo rje'i rnal 'byor ches/
/sbyang bya glo bur 'khrul pa'i dri ma rnams/
/sbyangs 'bras dri bral chos sku mngon gyur shog// 7

/gzhi la sgro 'dogs chod pa lta ba'i gdengs/
/de la ma yengs skyong ba sgom pa'i gnad/
/sgom don kun la rtsal sbyong spyod pa'i mchog/
/lta sgom sbyod pa'i gdengs dang ldan par shog// 8

/chos rnams thams cad sems kyi rnam 'phrul te/
/sems ni sems med sems kyi ngo bos stong/
/stong zhing ma 'gags cir yang snang ba ste/
/legs par brtags nas gzhi rtsa chod par shog// 9

/yod ma myong ba'i rang snang yul du 'khrul/
/ma rig dbang gis rang rig bdag tu 'khrul/
/gnyis 'dzin dbang gis srid pa'i klong du 'khrums/
/ma rig 'khrul pa'i rtsad dar chod par shog// 10

/yod pa ma yin rgyal bas kyang ma gzigs/
/med pa ma yin 'khor 'das kun gyi gzhi/
/'gal 'du ma yin zung 'jug dbu ma'i lam/
/mtha' bral sems kyi chos nyid rtogs par shog// 11

/'di yin zhes bya gang gis mtshon pa med/
/'di min zhes bya gang gis bkag pa med/
/blo las 'das pa'i chos nyid 'dus ma byas/
/yang dag don gyi mtha' ni nges par shog// 12

/'di nyid ma rtogs 'khor ba'i rgya mtshor 'khor/
/'di nyid rtogs na sangs rgyas gzhan na med/
/thams cad 'di yin 'di min gang yang med/
/chos nyid kun gzhi'i mtshang ni rig par shog// 13

/snang yang sems la stong yang sems yin te/
/rtogs kyang sems la 'khrul yang rang gi sems/
/skyes kyang sems la 'gag kyang sems yin pas/
/sgro 'dogs thams cad sems la chod par shog// 14

/blos byas rtsol ba'i sgom gyis ma bslad cing/
/tha mal 'du 'dzi'i rlung gis mi bskyod par/
/ma bcos gnyug ma rang babs 'jog shes pa'i/
/sems don nyams len mkhas shing skyong bar shog// 15

/phra rags rtog pa'i rba rlabs rang sar zhi/
/g.yo med sems kyi chu bo ngang gis gnas/
/bying rmugs rnyog pa'i dri ma dang bral ba'i/
/zhi gnas rgya mtsho mi g.yo brtan par shog// 16

/bltar med sems la yang yang bltas pa'i tshe/
/mthong med don ni ji bzhin lhag ger mthong/
/yin min don la the tshom chod pa nyid/
/'khrul med rang ngo rang gis shes par shog// 17

/yul la bltas pas yul med sems su mthong/
/sems la bltas pas sems med ngo bos stong/
/gnyis la bltas pas gnyis 'dzin rang sar grol/
/'od gsal sems kyi gnas lugs rtogs par shog// 18

/yid byed bral ba 'di ni phyag rgya che/
/mtha' dang bral ba dbu ma chen po yin/
/'di ni kun 'dus rdzogs chen zhes kyang bya/
/gcig shes kun don rtogs pa'i gdengs thob shog// 19

/zhen pa med pa'i bde chen rgyun chad med/
/mtshan 'dzin med pa'i 'od gsal sgrib g.yog bral/
/blo las 'das pa'i mi rtog lhun gyis grub/
/rtsol med nyams myong rgyun chad med par shog// 20

/bzang zhen nyams kyi 'dzin pa rang sar grol/
/ngan rtog 'khul pa rang bzhin dbyings su dag/
/tha mal shes pa spang blang bral thob med/
/spros bral chos nyid bden pa rtogs par shog// 21

/'gro ba'i rang bzhin rtag tu sangs rgyas kyang/
/ma rtogs dbang gis mtha' med 'khor bar 'khyams/
/sdug bsngal mu mtha' med pa'i sems can la/
/bzod med snying rje rgyud la skye bar shog// 22

/bzod med snying rje'i rtsal yang ma 'gags pa'i/
/brtse dus ngo bo stong don rjen par shar/
/zung 'jug gol sa bral ba'i lam mchog 'di/
/'bral med nyin mtshan kun tu sgom par shog// 23

/sgom stobs las byung spyan dang mngon shes dang/
/sems can smin byas sangs rgya zhing rab sbyangs/
/sangs rgyas chos rnams 'grub pa'i smon lam rdzogs/
/rdzogs smin sbyangs gsum mthar phyin sangs rgyas shog// 24

/phyogs bcu'i rgyal ba sras bcas thugs rje dang/
/rnam dkar dge ba ji snyed yod pa'i mthus/
/de ltar bdag dang sems can thams cad kyis/
/smon lam rnam dag ji bzhin ‘grub gyur cig// 25