82
| Tibetan | ཁྲེགས་ཆོད་ལས་དབང་པོ་རབ་ཀྱི་བསྒོམ་པ་བསྟན་པ་གཉིས། |
|---|---|
| Tibetan Alternate | |
| Tibetan Definition | དེ་ཡང་། མདོ་རྒྱུད་རིན་པོ་ཆེའི་མཛོད་དེབ་གཟུགས་གླེགས་བམ་བཞི་པ་མདོ་རྒྱུད་རིན་པོ་ཆེའི་མཛོད་ཀྱི་རྒྱས་འགྲེལ་སྐབས་ཉེར་གཅིག་པ་ཁྲེགས་ཆོད་སྒོམ་པའི་རིམ་པ་ལས་བྱུང་བ་སྟེ།
1.ཐུན་མོང་ལས་འཕགས་ཚུལ་ནི། ཐུན་མོང་ལས་གནད་བདུན་གྱིས་འཕགས་པ་སྟེ། (1) རིག་པ་ཅེར་མཐོང་དུ་རྟོགས་པས་དབང་པོ་ལ་རྣོ་རྟུལ་མེད་པས་གནད། (2)ཆོས་ཉིད་དབང་པོས་མཐོང་བས་ཤེས་རབ་ལ་ཆེ་ཆུང་མེད་པའི་གནད། ། (3)གནས་ལུགས་རང་ངོ་རྟོགས་པས་ཚིག་གི་ཆོས་ཉིད་མི་མཐོང་བའི་གནད། ། (4)བླང་དོར་འབད་རྩོལ་མེད་པས་ན་སོ་ལ་རྒན་གཞོན་མེད་པའི་གནད། ། (5)རང་རིག་ལ་དྲི་མ་མེད་པས་ལས་ལ་བཟང་ངན་མེད་པའི་གནད།། (6)ཆོས་ཉིད་བསམ་རྫོགས་ལས་འདས་པས་ལྟ་སྒོམ་གཞི་ལམ་ལ་མི་ལྟོས་པའི་གནད། (7)འབྲས་བུ་ཀ་དག་ཡིན་པས་སྐུ་གསུམ་ལམ་སྣང་དུ་ཤར་ཏེ་ལམ་ས་གསུམ་མི་ལྡོག་པའི་གནད་དང་བདུན་ནོ། ། 2.གདམས་པ་དངོས་བསྟན་པ་ལ་གཉིས་ཏེ། (1)མན་ངག་གི་འབྲེལ་བཀོད་པ་ནི། འབད་མེད་ཁྲེགས་ཆོད་འབད་བཅས་ཐོད་རྒལ་ལམ། ། དེ་ཡང་ཁྲེགས་ཆོད་ནི་ལམ་འབད་མེད་དུ་རང་གྲོལ་བ་སྣང་བ་ལ་མ་ལྟོས་པར་རིག་པ་རྗེན་པ་ཉམས་སུ་ལེན་པ་ལེ་ལོ་ཅན་མ་བསྒོམས་པར་འཚང་རྒྱ་བ་དབང་པོ་རྣོན་པོའི་གནད་ཡིན་ལ། ཐོད་རྒལ་ནི་འབད་བཅས་སུ་གྲོལ་བ་འོད་གསལ་གྱི་སྣང་བ་ལ་ལྟོས་ནས་བརྩོན་འགྲུས་ཅན་ཚེ་འདི་ཉིད་དུ་རྡོས་བཅས་འོད་ལུས་སུ་དག་ནས་འཚང་རྒྱ་བ་སྟེ། མུ་ཏིག་ཕྲེང་བ་ལས། གང་ཟག་བློ་ཡི་བྱེ་བྲག་གིས། ། རིམ་པ་ཇི་ལྟར་བཤད་པར་བྱ། འབད་རྩོལ་མེད་པས་རང་གྲོལ་ཉིད། ། འབད་བྱས་ཉམས་སུ་བླང་བྱའོ། ། འབད་མེད་རྣམས་ནི་རང་དག་ཡིན། ། ཞེས་སོ། ། (2)འབྲེལ་བ་ཅན་གྱི་མན་ངག་ཉམས་སུ་ལེན་ཚུལ་བཤད་པ་ལ་གསུམ་སྟེ། ། [1]ཡང་རབ་རྟོགས་པས་གྲོལ་བར་བསྟན་པ་ནི། ཡང་རབ་རྟོགས་པས་རང་གྲོལ་བྱ་རྩོལ་མེད། ། ཅེས་འདི་ལྟར་སྔོན་བསོད་ནམས་བསགས་པའི་སྐལ་ལྡན་དབང་པོ་ཡང་རབ་པ་རྣམས་ཀྱིས་སེམས་ཉིད་རྣལ་མའི་དོན་བསྒོམ་བྱ་དང་སྒོམ་བྱེད་ལས་འདས་པ་ནམ་མཁའ་ལྟ་བུའི་དོན་བླ་མ་དམ་པའི་རྐྱེན་གྱིས་གྲོལ་ཏེ། འབད་པ་དང་བཅས་ནས་བསྒོམ་མི་དགོས་པར་སེམས་ཉིད་ཆུ་བོ་རྒྱུན་གྱི་རྣལ་འབྱོར་ལ་དུས་ཐམས་ཅད་དུ་ངང་གིས་གནས་པ་ནི། ཀུན་བྱེད་ལས། ཀྱེ་སྟོན་པ་ཀུན་བྱེད་ང་ཡིས་ལུང་བསྟན་པ། ། མ་ལས་སྐྱེ་མེད་རྣམ་དག་ཏིང་འཛིན་ཏེ། ། བསྒོམ་དང་མི་བསྒོམ་རྐྱེན་ལ་རག་མ་ལས། ། བསྒོམ་བྱ་ཇི་ལྟར་སྣང་བའི་ཆོས་རྣམས་ཀུན། ། གང་དུ་ཇི་ལྟར་བཞག་པའི་ཚུལ་མེད་པར། ། མ་བཙལ་རང་སར་གྲོལ་བས་བསྒོམ་པ་ཡིན། །ཀྱེ་བསྒོམ་དུ་མེད་པའི་མན་ངག་འདི་དག་ལ། ། ཚིག་དང་སྒྲ་ལས་འདས་པའི་དོན་ཡིན་ཕྱིར། ། སྔ་རབས་ཀུན་བྱེད་རྒྱལ་པོས་ལུང་མང་བསྟན། ། ཕྱི་རབས་ཀུན་བྱེད་རྒྱལ་པོས་ལུང་མི་སྟོན། ། ད་ལྟ་ཀུན་བྱེད་རྒྱལ་པོས་ལུང་བསྟན་མེད། ། ཀྱེ་སྟོན་པ་ཀུན་བྱེད་རྒྱལ་པོ་ཡིས། ། མ་ནོར་དགོངས་པའི་དོན་ལ་ལུང་བསྟན་པ། ། སྒྲོ་སྐུར་འདས་པ་དོན་གྱི་སྙིང་པོ་ལ། ། བསྒོམ་དང་མི་བསྒོམ་མཁའ་ལ་རྩོད་པ་འདྲ། ། ཞེས་སོ། ། [2]ཀློང་གྱུར་བསྒོམ་བྱ་སྒོམ་བྱེད་དང་བྲལ་བར་བསྟན་པ་ནི། ཀློང་གྱུར་ཐུན་མཚམས་མེད་པ་ཀུན་བཟང་ངང་། ། བདེན་ཞེན་གྲོལ་ནས་གཉེན་པོ་བསྒོམ་དུ་མེད་པས་ཀྱང་སྒོམ་པ་མེད་ལ། བདེན་ཞེན་མེད་པའི་ངང་ལ་རྒྱུན་དུ་གནས་པས་ཐུན་མཚམས་མེད་པའི་རོལ་པ་ངེས་མེད་ཕྱོགས་ལས་འདས་པ་རང་གྲོལ་ཀུན་ཏུ་བཟང་པོའི་ཞིང་ལ་སྤྱོད་པ་ནི། ཀུན་བྱེད་ལས། ཀྱེ་ཀུན་བྱེད་རྒྱལ་པོའི་དབང་ཐོབ་རིག་པ་ན། ། དངོས་པོ་མ་བཅོས་ཇི་བཞིན་རྟག་ཏུ་ཤར། ། རྒྱུ་དང་རྐྱེན་མེད་ཞི་བ་མཆོག་གི་ལམ། ། གཞི་བཞག་གང་ལྟར་གཞག་ཀྱང་དེ་ཉིད་དང་། ། ཀུན་བྱེད་རྒྱལ་པོའི་ཐབས་ཆེན་རྟོགས་པའི་དབང་། ། ཀུན་ཀྱང་ཇི་བཞིན་ཡུལ་ལ་འཇུག་པ་ན། ། སྐྱོན་དང་ཡོན་ཏན་གཉིས་ཀ་མཉམ་ཤེས་པས། ། འཇུག་དང་མི་འཇུག་དོན་ལས་ཤིན་ཏུ་འདས། ། མི་འགྱུར་ལྷུན་གྲུབ་ཀུན་བྱེད་རྒྱལ་པོའི་ཞིང་། ། མ་བགྲོད་མ་སྦྱངས་རང་བཞིན་ངང་གིས་རྫོགས། ། ཞེས་སོ། །(རབ་ཀྱིས་ཇི་ལྟར་བསྒོམ་པའི་རིམ་པ་ལོགས་སུ་བཀོད་ཡོད་པ་བཞི་ཚན་ནང་གཟིགས) |
| Tibetan Source | 《མདོ་རྒྱུད་མཛོད་ཙི་པ་》ཤ་189.5ལས་བཏུས། |
| Wylie | |
| Wylie Definition | |
| Wylie Synonym | |
| Sanskrit | |
| English | |
| English Definition | |
| English Synonyms | |
| Chinese | |
| Chinese (Simplified) | |
| Chinese (Traditional) | |
| Chinese Definition | |
| Page Number |