9440

Tibetan	སྨོན་ལམ་ཕུན་སུམ་ཚོགས་པ་བཅུ།
Tibetan Alternate
Tibetan Definition	དེ་ཡང་། འཕགས་པ་དཀོན་མཆོག་སྤྲིན་ཞེས་བྱ་བའི་མདོ་ལས་བྱུང་བ་བྱང་ཆུབ་སེམས་དཔའ་རྣམས་ཀྱི་སྨོན་ལམ་ཕུན་སུམ་ཚོགས་པ་བཅུ་སྟེ། 1. བྱང་ཆུབ་སེམས་དཔའ་མི་དམན་པའི་སྨོན་ལམ་པ་ནི། བྱང་ཆུབ་སེམས་དཔའ་སྲིད་པའི་བདེ་བ་འདོད་ཅིང་སྨོན་ལམ་མི་འདེབས་ཏེ། བྱང་ཆུབ་སེམས་དཔའ་མི་དམན་པའི་སྨོན་ལམ་པ་ཡིན་ནོ། ། 2. བྱང་ཆུབ་སེམས་དཔའ་མ་ཞུམ་པའི་སྨོན་ལམ་པ་ནི། བྱང་ཆུབ་སེམས་དཔའ་ནི། ཁམས་གསུམ་ལས་སྐྱོ་བ་དང་། འདོད་ཆགས་དང་བྲལ་བ་དང་། འགོག་པར་སྨོན་ལམ་མི་འདེབས་ཏེ། བྱང་ཆུབ་སེམས་དཔའ་མ་ཞུམ་པའི་སྨོན་ལམ་པ་ཡིན་ནོ། ། 3. བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་དོན་ལ་བརྩོན་པའི་སྨོན་ལམ་པ་ནི། འདི་ལ་བྱང་ཆུབ་སེམས་དཔའ་འདི་ལྟར་སེམས་ཅན་གྱི་ཁམས་ཇི་སྙེད་པ་མ་ལུས་པར་དེ་ཐམས་ཅད་ཡོངས་སུ་མྱ་ངན་ལས་འདས་ནས་བདག་ཕྱིས་སངས་རྒྱས་ཀྱི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདའོ། ། ཞེས་སྨོན་ལམ་འདེབས་ཏེ།དེ་ལྟར་ན། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་དོན་ལ་བརྩོན་པའི་སྨོན་ལམ་པ་ཡིན་ནོ། ། 4. བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱིས་ཡང་དག་པར་བསྔགས་པའི་སྨོན་ལམ་པ་ནི། འདི་ལ་བྱང་ཆུབ་སེམས་དཔའ་འདི་ལྟར་བྱང་ཆུབ་ཀྱི་སེམས་མ་བསྐྱེད་པའི་སེམས་ཅན་གྱི་ཁམས་ཇི་སྙེད་པ་དེ་དག་ཐམས་ཅད་བྱང་ཆུབ་ཏུ་སེམས་བསྐྱེད་དུ་བཅུག་སྟེ་མཐར་གྱིས་བྱང་ཆུབ་ཀྱི་སྤྱོད་པ་སྤྱོད་དུ་བཙུད་ནས་བྱང་ཆུབ་ཀྱི་སྙིང་པོར་འདུག་པ་རྣམས་ལ་མཆོད་པ་དང་། བཀུར་སྟི་བྱའོ། ། ཆོས་ཀྱི་འཁོར་ལོ་རབ་ཏུ་བསྐོར་བར་གསོལ་བ་གདབ་པོ། ། ཡོངས་སུ་མྱ་ངན་ལས་འདའ་བ་རྣམས་ཀྱང་སེམས་ཅན་ལ་ཕན་པའི་ཕྱིར་བཞུགས་སུ་གསོལ་ཞེས་སྨོན་ལམ་འདེབས་ཏེ། དེ་ལྟར་ན། བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱིས་ཡང་དག་པར་བསྔགས་པའི་སྨོན་ལམ་པ་ཡིན་ནོ། ། 5. བྱང་ཆུབ་སེམས་དཔའ་བདུད་ཐམས་ཅད་ཤིན་ཏུ་ཚར་གཅོད་པའི་སྨོན་ལམ་པ་ནི། འདི་ལ་བྱང་ཆུབ་སེམས་དཔའ་ནི། འདི་ལྟར་བདག་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་ན་ཅི་ནས་ཀྱང་བདུད་ཀྱི་སྒྲའམ། ། བདུད་ཀྱི་རིས་ཀྱི་ལྷ་རྣམས་འབྱུང་བར་མི་འགྱུར་བ་དེ་ལྟར་བདག་གིས་བྱའོ། ། ཞེས་སྨོན་ལམ་འདེབས་ཏེ། དེ་ལྟར་ན། བྱང་ཆུབ་སེམས་དཔའ་བདུད་ཐམས་ཅད་ཤིན་ཏུ་ཚར་གཅོད་པའི་སྨོན་ལམ་པ་ཡིན་ནོ། ། 6. བྱང་ཆུབ་སེམས་དཔའ་གཞན་གྱི་དྲིང་མི་འཇོག་པའི་སྨོན་ལམ་པ་ནི། བྱང་ཆུབ་སེམས་དཔའ་ནི། གཞན་གྱི་དྲིང་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་མི་འདེབས་ཀྱི། བྱང་ཆུབ་སེམས་དཔའ་ནི། བདག་ཉིད་ཀྱིས་ཤེས་རབ་ཀྱིས་དཔྱད་དེ། སེམས་ཅན་གྱི་ཁམས་སྡུག་བསྔལ་བ་ལ་བལྟས་ནས་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་འདེབས་ཏེ། དེ་ལྟར་ན། བྱང་ཆུབ་སེམས་དཔའ་གཞན་གྱི་དྲིང་མི་འཇོག་པའི་སྨོན་ལམ་པ་ཡིན་ནོ། ། 7. བྱང་ཆུབ་སེམས་དཔའ་མཐའ་ཡས་པའི་སྨོན་ལམ་པ་ནི། བྱང་ཆུབ་སེམས་དཔའ་ནི། འདི་ལྟར་སྟེ། བྱང་ཆུབ་ཀྱི་ཚོགས་རྣམས་ཀྱི་ཕྱོགས་འགའ་ཞིག་བཟུང་ནས་ཉི་ཚེ་བའི་སྨོན་ལམ་མི་འདེབས་ཀྱི། བྱང་ཆུབ་སེམས་དཔའ་ནི། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་སེམས་མི་སྐྱོ་བར་བྱས་ནས་ཕྱོགས་བཅུའི་འཇིག་རྟེན་གྱི་ཁམས་རྣམས་སུ་བལྟས་ཏེ། བྱང་ཆུབ་སེམས་དཔའ་གང་དག་ཕྱོགས་བཅུ་ན་གནས་པ་དང་། གང་དག་དཀའ་བ་སྤྱོད་པ་ལ་གནས་པ་དང་། གང་དག་བྱང་ཆུབ་ཀྱི་སྙིང་པོ་ལ་གནས་པ་དང་། སངས་རྒྱས་གང་དག་མངོན་པར་རྫོགས་པར་སངས་རྒྱས་པ་དང་། གང་དག་ཆོས་ཀྱི་འཁོར་ལོ་བསྐོར་བ་དེ་དག་རྣམས་ལ་སྙིང་ཐག་པ་ནས་བསམ་སྟེ། དེ་དག་གིས་ཆོས་བསྟན་པ་ཇི་སྙེད་པ་དེ་དག་ལ་མོས་པར་བྱེད་དོ། ། མོས་པར་གྱུར་ནས་རྗེས་སུ་ཡི་རང་ངོ་། ། རྗེས་སུ་ཡི་རང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། དེ་ལྟར་ན། བྱང་ཆུབ་སེམས་དཔའ་མཐའ་ཡས་པའི་སྨོན་ལམ་པ་ཡིན་ནོ། ། 8. བྱང་ཆུབ་སེམས་དཔའ་མི་སྐྲག་པའི་སྨོན་ལམ་པ་ནི། འདི་ལ་བྱང་ཆུབ་སེམས་དཔའ་ལས་དང་པོ་པ་ཡིན་ཡང་ཆོས་ཟབ་མོ་ཟབ་མོ་རྣམས་ཐོས་པ་དང་། སངས་རྒྱས་ཀྱི་ཆེ་བ་ཟབ་མོ་ཐོས་པ་དང་། བྱང་ཆུབ་སེམས་དཔའི་རྣམ་པར་རོལ་པ་ཟབ་མོ་ཐོས་པ་དང་། ཐབས་མཁས་པའི་ཚུལ་ཟབ་མོ་ཐོས་ཀྱང་མི་སྐྲག རབ་ཏུ་མི་སྐྲག ཤིན་ཏུ་སྐྲག་པར་མི་བྱེད་དོ། ། དེ་འདི་སྙམ་དུ་སངས་རྒྱས་ཀྱི་བྱང་ཆུབ་ཀྱང་མཐའ་ཡས། སངས་རྒྱས་ཀྱི་ཡུལ་ཡང་མཐའ་ཡས། སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་སྨིན་པར་མཛད་པའང་མཐའ་ཡས་ཏེ། དེ་ནི། བདག་འདྲ་བས་ཤེས་པར་མི་ནུས་ཀྱི། སངས་རྒྱས་ཉིད་ཀྱིས་མཁྱེན་གྱི་བདག་གིས་མི་ཤེས་སོ་སྙམ་དུ་སེམས་ཏེ། དེ་ལྟར་ན། བྱང་ཆུབ་སམས་དཔའི་མི་སྐྲག་པའི་སྨོན་ལམ་པ་ཡིན་ནོ། ། 9. བྱང་ཆུབ་སེམས་དཔའ་ཡོངས་སུ་མི་སྐྱོ་བའི་སྨོན་ལམ་པ་ནི། འདི་ལ་བྱང་ཆུབ་སེམས་དཔའ་སེམས་ཅན་དམུ་རྒོད་གདུལ་དཀའ་བར་རིག་སྟེ། དེ་རྣམས་ཀྱས་ཡི་ཆད་ནས་འདི་ལྟ་བུའི་དམུ་རྒོད་འདི་ལྟ་བུར་གདུལ་དཀའ་བའི་སེམས་ཅན་འདི་དག་གིས་ཆོག ། ཞེས་ཏེ། དེའི་ཕྱིར་ཡོངས་སུ་སྐྱོ་ཞིང་རྒྱབ་ཀྱིས་ཕྱོགས་པར་གྱུར་ཏེ་གང་ན་སེམས་ཅན་འདི་ལྟ་བུ་དག་གི་མིང་ཡང་མི་ཐོས་པའི་འཇིག་རྟེན་གྱི་ཁམས་ཡོངས་སུ་དག་པར་སྨོན་ལམ་མི་འདེབས་སོ། ། སེམས་ཅན་གྱི་དོན་ལ་མ་ཕྱོགས་པའི་བྱང་ཆུབ་སེམས་དཔའ་ནི། ཡོངས་སུ་དག་པའི་འཇིག་རྟེན་གྱི་ཁམས་སུ་སྐྱེ་བར་ཡང་མི་འགྱུར་ཏེ། དེ་ལ་བྱང་ཆུབ་སེམས་དཔའ་ཤེས་རབ་ཅན་ནི། འདི་ལྟར་སེམས་ཅན་གྱི་ཁམས་ཐམས་ཅད་ན་སེམས་ཅན་གང་རྣམས་ངན་པ། བརྩོན་འགྲུས་ཆུང་བ། བླུན་པོ་གླེན་པ། ལུག་ལྟར་ལྐུག་པའི་རང་བཞིན་ཅན། ཡོངས་སུ་མྱ་ངན་ལས་མི་འདའ་བའི་ཆོས་ཅན། སེམས་ཅན་གྱི་ཁམས་མ་ལུས་པ་དེ་ལས་བསྙིགས་པ། སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་སྤངས་པར་གྱུར་པ་ཡོད་པ་དེ་དག་བདག་གི་སངས་རྒྱས་ཀྱི་ཞིང་དུ་འདུས་པར་གྱུར་ལ། བདག་གིས་དེ་དག་བྱང་ཆུབ་ཀྱི་སྙིང་པོ་ལ་འདུག་ཏུ་བཅུག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་དུ་སེམས་བསྐྱེད་དེ། བྱབ་ཆུབ་སེམས་དཔའ་དེ་ལྟར་སེམས་པའི་སེམས་བསྐྱེད་པ་རེ་རེ་ལའང་བདུད་ཀྱིས་གནས་ཐམས་ཅད་རབ་ཏུ་གཡོའོ། ། སངས་རྒྱས་ཐམས་ཅད་ཀྱང་དེའི་བསྔགས་པ་གསུང་བར་འགྱུར་རོ། ། དེའི་སངས་རྒྱས་ཀྱི་ཞིང་ཡང་ཡོངས་སུ་དག་པར་འགྱུར་རོ། ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱ་སྟེ། དེ་ལྟར་ན། བྱང་ཆུབ་སེམས་དཔའ་ཡོངས་སུ་མི་སྐྱོ་བའི་སྨོན་ལམ་པ་ཡིན་ནོ། ། 10 .བྱང་ཆུབ་སེམས་དཔའ་ལེགས་པར་ཡོངས་སུ་རྫོགས་པའི་སྨོན་ལམ་པ་ནི། འདི་ལ་བྱང་ཆུབ་སེམས་དཔའ་གང་བྱང་ཆུབ་ཀྱི་སྙིང་པོ་འདུག་སྟེ་བདུད་ཀྱི་དཔུང་གཞོམ་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བ་དང་། ཡང་དེ་ལས་འདས་པར་སྨོན་ལམ་མི་འདེབས་པ་འདི་ནི། ལེགས་པར་ཡོངས་སུ་རྫོགས་པའི་སྨོན་ལམ་པ་ཞེས་བྱའོ། །
Tibetan Source	《མདོ་ཚ་པ་》ཤ་50ན་7ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number