View source for nges don phyag rgya chen po'i smon lam

//nges don phyag rgya chen po'i smon lam/<br><br>

/mdzad pa po/<br>
/karma pa rang byung rdo rje//<br><br>

/na mo gu ru//<br><br>

/bla ma rnams dang yi dam dkyil 'khor lha/<br>
/phyogs bcu dus gsum rgyal ba sras dang bcas/<br>
/bdag la brtser dgongs bdag gi smon lam rnams/<br>
/ji bzhin 'grub pa'i mthun 'gyur byin brlab mdzod// 1<br><br>

/bdag dang mtha' yas sems can thams cad kyi/<br>
/bsamj sbyor rnam dag gangs ri las skyes pa'i/<br>
/'khor gsum rnyog med dge tshogs chu rgyun rnams/<br>
/rgyal ba skun bzhi'i rgya mtshor 'jug gyur cig// 2<br><br>

/ji srid de ma thob pa de srid du/<br>
/skye dang skye ba'i tshe rabs kun tu yang/<br>
/sdig dang sdug bsngal sgra yang mi grags shing/<br>
/bde dge rgya mtsho'i dpal la spyod par shog// 3<br><br>

/dal 'byor mchog thob dad brtson shes rab ldan/<br>
/bshes gnyen bzang bsten gdams pa'i bcud thob nas/<br>
/tshul bzhin sgrub la bar chad ma mchis par/<br>
/tshe rabs kun tu dam chos spyod par shog// 4<br><br>

/lung rigs thos pas mi shes sgrib las grol/<br>
/man ngag bsam pas the tshom mun nag bcos/<br>
/sgom byung 'od kyis gnas lugs ji bzhin gsal/<br>
/shes rab gsum gyi snang ba rgyas par shog// 5<br><br>

/rtag chad mtha' bral bden gnyis gzhi yi don/<br>
/sgro skur mtha' bral tshogs gnyis lam mchog gis/<br>
/srid zhi'i mtha' bral don gnyis 'bras thob pa'i/<br>
/gol 'phyugs med pa'i chos dang 'phrad par shog// 6<br><br>

/sbyang gzhi sems nyid gsal stong zung 'jug la/<br>
/sbyong byed phyag chen rdo rje'i rnal 'byor ches/<br>
/sbyang bya glo bur 'khrul pa'i dri ma rnams/<br>
/sbyangs 'bras dri bral chos sku mngon gyur shog// 7<br><br>

/gzhi la sgro 'dogs chod pa lta ba'i gdengs/ <br>
/de la ma yengs skyong ba sgom pa'i gnad/<br>
/sgom don kun la rtsal sbyong spyod pa'i mchog/<br>
/lta sgom sbyod pa'i gdengs dang ldan par shog// 8<br><br>

/chos rnams thams cad sems kyi rnam 'phrul te/<br>
/sems ni sems med sems kyi ngo bos stong/<br>
/stong zhing ma 'gags cir yang snang ba ste/<br>
/legs par brtags nas gzhi rtsa chod par shog// 9<br><br>

/yod ma myong ba'i rang snang yul du 'khrul/<br>
/ma rig dbang gis rang rig bdag tu 'khrul/<br>
/gnyis 'dzin dbang gis srid pa'i klong du 'khrums/<br>
/ma rig 'khrul pa'i rtsad dar chod par shog// 10<br><br>

/yod pa ma yin rgyal bas kyang ma gzigs/<br>
/med pa ma yin 'khor 'das kun gyi gzhi/<br>
/'gal 'du ma yin zung 'jug dbu ma'i lam/<br>
/mtha' bral sems kyi chos nyid rtogs par shog// 11<br><br>

/'di yin zhes bya gang gis mtshon pa med/<br>
/'di min zhes bya gang gis bkag pa med/<br>
/blo las 'das pa'i chos nyid 'dus ma byas/<br>
/yang dag don gyi mtha' ni nges par shog// 12<br><br>

/'di nyid ma rtogs 'khor ba'i rgya mtshor 'khor/<br>
/'di nyid rtogs na sangs rgyas gzhan na med/<br>
/thams cad 'di yin 'di min gang yang med/<br>
/chos nyid kun gzhi'i mtshang ni rig par shog// 13<br><br>

/snang yang sems la stong yang sems yin te/<br>
/rtogs kyang sems la 'khrul yang rang gi sems/<br>
/skyes kyang sems la 'gag kyang sems yin pas/<br>
/sgro 'dogs thams cad sems la chod par shog// 14<br><br>

/blos byas rtsol ba'i sgom gyis ma bslad cing/<br>
/tha mal 'du 'dzi'i rlung gis mi bskyod par/<br>
/ma bcos gnyug ma rang babs 'jog shes pa'i/<br>
/sems don nyams len mkhas shing skyong bar shog// 15<br><br>

/phra rags rtog pa'i rba rlabs rang sar zhi/<br>
/g.yo med sems kyi chu bo ngang gis gnas/<br>
/bying rmugs rnyog pa'i dri ma dang bral ba'i/<br>
/zhi gnas rgya mtsho mi g.yo brtan par shog// 16<br><br>

/bltar med sems la yang yang bltas pa'i tshe/<br>
/mthong med don ni ji bzhin lhag ger mthong/<br>
/yin min don la the tshom chod pa nyid/<br>
/'khrul med rang ngo rang gis shes par shog// 17<br><br>

/yul la bltas pas yul med sems su mthong/<br>
/sems la bltas pas sems med ngo bos stong/<br>
/gnyis la bltas pas gnyis 'dzin rang sar grol/<br>
/'od gsal sems kyi gnas lugs rtogs par shog// 18<br><br>

/yid byed bral ba 'di ni phyag rgya che/<br>
/mtha' dang bral ba dbu ma chen po yin/<br>
/'di ni kun 'dus rdzogs chen zhes kyang bya/<br>
/gcig shes kun don rtogs pa'i gdengs thob shog// 19<br><br>

/zhen pa med pa'i bde chen rgyun chad med/<br>
/mtshan 'dzin med pa'i 'od gsal sgrib g.yog bral/<br>
/blo las 'das pa'i mi rtog lhun gyis grub/<br>
/rtsol med nyams myong rgyun chad med par shog// 20<br><br>

/bzang zhen nyams kyi 'dzin pa rang sar grol/<br>
/ngan rtog 'khul pa rang bzhin dbyings su dag/<br>
/tha mal shes pa spang blang bral thob med/<br>
/spros bral chos nyid bden pa rtogs par shog// 21<br><br>

/'gro ba'i rang bzhin rtag tu sangs rgyas kyang/<br>
/ma rtogs dbang gis mtha' med 'khor bar 'khyams/<br>
/sdug bsngal mu mtha' med pa'i sems can la/<br>
/bzod med snying rje rgyud la skye bar shog// 22<br><br>

/bzod med snying rje'i rtsal yang ma 'gags pa'i/<br>
/brtse dus ngo bo stong don rjen par shar/<br>
/zung 'jug gol sa bral ba'i lam mchog 'di/<br>
/'bral med nyin mtshan kun tu sgom par shog// 23<br><br>

/sgom stobs las byung spyan dang mngon shes dang/<br>
/sems can smin byas sangs rgya zhing rab sbyangs/<br>
/sangs rgyas chos rnams 'grub pa'i smon lam rdzogs/<br>
/rdzogs smin sbyangs gsum mthar phyin sangs rgyas shog// 24<br><br>

/phyogs bcu'i rgyal ba sras bcas thugs rje dang/<br>
/rnam dkar dge ba ji snyed yod pa'i mthus/<br>
/de ltar bdag dang sems can thams cad kyis/<br>
/smon lam rnam dag ji bzhin ‘grub gyur cig// 25<br><br>