View source for man ngag rdzogs pa chen po'i rgyud phyi ma

,  ,man ngag rdzogs pa chen po'i rgyud phyi ma,,  ,,
,  ,klong chen snying gi thig le las man ngag rdzogs pa chen po'i rgyud phyi ma bzhugs,  ,rga gar skad du,  ma h'a sandhi au pa de sha tantra na ma,  ,bod skad du,  man ngag rdzogs pa chen po'i rgyud phyi ma ces bya ba,  ma bcos rig pa'i klong la phyag 'tshal lo,  thog ma'i mgon po kun tu bzang,  sangs rgyas kun gyi mes po ngas,  ci yang ma yin 'od gsal dang,  nye bar len pa'i ma rig kun,  dbyings su bcom nas sangs rgyas te,  'khor bar 'khyams du ma myong bas,   nga la thog ma'i mgon du grags,  de tshe dbyings las rig pa'i rtsal,  lhun grub thugs rje'i sprin bkod tshe,  snying rjes 'khor ba'i sems can rnams,  ma bzodnga yi go 'phang la,  'god phyir 'gags med rang byung rtsal,  gzhi lam 'bras bu'i rgyud du bshad,  gzhi ni 'khor 'das 'dus ma byas,  lam ni gsal dangs phyed par shar,  'bras bu ma btsal lhun grub sbubs,  bcings grol med par bu ddha'o,  sa ma ya,  rgyu rkyen las 'das stongs pa nyid,  'od du gsal ba'i bdag nyid can,  sems can kun gyi rang rgyud la,  gnas kyang rang ngo rang gis bsgrigs,  las dang bag chags mun klong 'thums,  sna tshogs sdug bsngal las la spyod,  de dag snying rjes drang ba'i slad,  nga yi gnas lugs chen po la,  bzhungs tshul ngo bo brtags pa'i phyir,  skye med klong nas tshig gi rgyud,  'gags med rdo rje'i rol mor bsgyur,  sa ma ya,  sems zhes sna tshogs snang ba'i sgo,  mi dran dgu dran 'khor ba dang,  mya ngan 'das pa kun gyi gzhi,  byung ni dang po gang nas byung,  snang ba sa rdo brag dang,  stong pa cang med nam mkha'i dbyings,  de la sogs te snang btags kyi,  shes byas khyab pa'i yul kun la,  brtag dpyad gzhig 'brel ci byas kyang,  ngo bos stong pa'i chos nyid la,  byung sa stong bas byung mkhan med,  rgyu yis dpyad du med pa'i phyir,  ngo bo stong par nga yis bshad,  de bzhin lam gyi gnas skabs su,  bag chags las grub sems can gyi,  spyi bo'i gtsug nas rkang mthil yan,  gang di gnas pa'i yul btsal bas,  'tshol ba'i mkhan po stong par shar,  rkyen la bltos pa med pa'i phyir,  rang bzhin gsal ba nga yis bstan,  tha ma 'khor ba stongs gyur nas,  snod bcud ming yang mi grags tshe,  yul dang yul can la sogs te,  rang bzhin ci yi gnas su 'gro,  brtags kyang 'gro mkhan rnam dag pas,  'gro sa'i khungs dang bral ba'i phyir,  thugs rje kun khyab chen po'o,  sa ma ya,  de ltar byung gnas 'gro gsum gyi,  dpyad du med pa'i sems nyid 'di,  dngos po can nam dngos med can,  gsal ba can nam stong pa can,  'bras bu can nam 'bras med can,  don la yod dam med pa sogs,  ji ltar gzhins shing blos dpag kyang,  bya long nam mkha'i mtha' 'tshol bzhin,  shes byas thug par mi nus shing,  stong pa'i ngang las rig par shar,  rig pa'i ngo bo stong pa nyid,  rig stong gnyis su mi phyed la,  gcig kyang ma yin kun gyi srog,  sangs rgyas bzang pos ma bcos shing,  sems can ngan pas ma bsgyur pa'i,  da lta'i rig pa bzo med pa,  gcer yan dri med rang gsal ni,  gdod ma'i mgon po nga nyid do,  de nyid ma rig sems can rnams,  nga la gzugs su rtogs par byed,  bskal bar bsgrubs kyang nga mi mthong,  nga la sgra ru rtogs par byed,  rig pa bgrang kyang nga mi 'grub,  nga la thugs rje'i ye shes rtogs,  de yang gnyis 'dzin rnam rtogs ste,  dge sdig las dang de 'bras kyis,  phan gnod bzang ngan med pa'i dbyings,  spang blang bya rtsol dag pa'i klong,  gnas lugs don gyi kun bzang nga,  dus bzhi mnyam pa nyid du bzhugs,  mi gsungs rang gnas chen por bzhugs,  mi 'gyur g-yung drung lta bur bzhugs,  spros pa'i tshig gis bcos pa la,  nga yi dgongs par nye mi srid,  mngon sum gnad du phebs pa de,  nga dang gnyis su med pa'o,  sa ma ya,  rgya rgya rgya 
de ltar dgongs pa don rgyud la,  tshig rgyud rnam pa gsum du byung,  sems klong man ngag sde gsum mo,  dang po sems sde'i ngo bo ni,  mig gnyis nam mkha'i khams su blta,  'gyu ba'i dbugs kyang rang sor glod,  skyil krung mnyam gzhag lhod cha can,  yang na lag gnyis pus mor bkab,  chos kun byang chub sems kyi ngang,  gsal dangs phyed pa'i rig pa la,  'du shes grung pos mi lta bar,  blta bya lta byed gnyis med pa'i,  gnas lugs ye gzhag chen po la,  sgrim po'i blo yis mi 'chos so,  dran pa'i gzeb kyis mi 'ching ngo,  gnyen po'i lhad kyis mi bslad do,  de tshe dran bsam ci shar yang,  sems las byung zhing sems kyi ngang,  'khor 'das ma lus sems su rdzogs,  de ltar gnas pa'i chos nyid la,  tha snyad tshig gis smra ma shes,  bcos ma'i mig gis mthong ma gyur,  ka dag gting gsal chen po'o,  sa ma ya,  gnyis pa klong sde'i ngo bo ni,  phyogs ris med pa lta ba'i klong,  dmigs gtad med pa sgom pa'i klong,  re dogs med pa spyod pa'i klong,  the tshom med pa 'bras bu'i klong,  bzang ngan med pa chos sku'i klong,  dran 'dzin med pa longs sku'i klong,  rtag chad med pa sprul sku'i klong,  sgom du med pa 'od gsal klong,  gnyen po med pa dran pa'i klong,  bde chen kun tu bzang mo yi,  bha ga yangs pa'i klong chen mor,  bcos ma'i chos rnams rdzogs sangs rgyas,  de phyir nga yi mkha' klong du,  rgyal ba kun gyi thugs rdo rje,  'du 'bral med pa ae ma ho,  sa ma ya,  gsum pa 'od gsal man ngag sde,  gnad kyi yang zab thig le'i skor,  dpral ba'i mig las gces pa ste,  snying gi khrag las phangs pa'i don,  ci phyir blo yis byas pa'i chos,  theg brgyad tshig gi grub mtha' dang,  rtog pas brtags pa'i stong pa nyid,  rtsol bas gcun pa'i shes nyams la,  gnas lugs yin du mi re bar,  khregs chod gdeng du gyur ba las,  nang du stong pa'i nyams shar bas,  phyi ru gsal ba'i ye shes ni,  snying nas mig tu 'brel ba yi,  rang byung gsang ba chen po'i rtsa,  ka ti shel gyi spu gu can,  dar dkar snal ma lta bu'i lam,  brgyud de dbang po'i mngon sum par,  lhag mthong rdo rje lu gu rgyud,  mu tig bstar la brgyus pa ltar,  gsal 'tsher dangs snyigs phyed par 'char,  'di ni sangs rgyas thams cad kyi,  ye shes chen po'i lam yin pas,  mthong zhing gnad la sus phebs pa,  khams gsum ldog pa ma yin no,  de phyir lhag mthong rig pa de,  sku gsum bzhugs stangs gzigs stangs dang,  sgo yul rlung gi gnad bstun te,  sgron ma rnam bzhir gcun pa las,  nang dbyings rnam dag sgron ma'i klong,  rig pa bcud du smin pa la,  phyed skur 'char ba nyams gong 'phel,  rigs lnga'i tshom bu tshad phebs nyams,  de yang snang dang mi snang gi,  'dzin pa'i chos nyid las 'das shing,  rags pa'i lus dang dbang po'i yul,  thams cad dbyings su dag pa la,  chos nyid zad ces nga yis bshad,  yid dpyod theg pa'i sku gsum gyi,  'bras snang 'di yi lam snang du,  skad cig tsam la rtsal rdzogs pas,  stong chen gzhon nu bum pa'i sku,  nang gsal thim la ma rmugs pa'i,  dbyings su mngon par sangs rgyas tshe,  spangs rtogs mtha' ru phyin pa'o,  nga dang gnyis su med pa'o,  chos sku rang gsal chen po'o,  de phyir shin tu gsang chen gyi,  lam mchog bla na med pa 'di'i,  lam gyi khrid tshul rgya chen rgyud,  'od gyi yang zhun bcu bdun gyi,  gnas rnams 'das rjes gsum du bsdus,  de nyid ltar du rig par bya,  sa ma ya,  rgya rgya rgya,
dpal kun tu bzang po'i dgongs pa'i klong las rang shar ba pan chen dri med 'od zer gyi brdas brgyud be,  klong chen nam mkha'i rnal 'byor gyis sgra rang 'gyur,  don dgongs bsgyur,  man ngag gnad bsgyur gyi tshul du gtan la phab pa rdzogs so,  dpal ldan sngags kyi srung mas dam nyams bka' rkun gyi lag tu ma gtang zhig,,  ,, 


[[Category:Wylie Texts]][[Category:Longchen Nyingthig]]
[[Category:Nyingma Literature]][[Category:Dzogchen Literature]][[Category:Tibetan Literature ]]