Buddhas

_ch 2_
dbyings kyi rang bzhin gdod nas lhun grub la/_
/phyi dang nang med kun tu khyab par gdal/_
/mtha' yi mu med steng 'og phyogs mtshams 'das/_
/yangs dog gnyis med rig pa mkha' ltar dag_
/dmigs bsam spro bsdus bral ba'i klong nyid du/_
/skye med dbyings las skye ba'i cho 'phrul rnams/_
/cir yang ma nges gar yang rgya chad med/_
/'di zhes mi mtshon dngos po mtshan ma med/_
/phyogs 'byams nam mkha' 'dra ba'i rang bzhin la/_
/skye med lhun grub snga phyi thog mtha' bral/_
/'khor 'das kun gyi ngo bo byang chub sems/_
/ma byung ma skyes ma nges lhun grub ni/_
/gang nas ma 'ongs gar yang song ba med/_
/snga phyi ris med byang chub sems kyi klong /_
/'gro dang 'ong med kun tu khyab par gdal/_
/thog mtha' dbus med chos nyid de bzhin nyid/_
/phyam gdal mkha' mnyam dag pa'i rang bzhin la/_
/thog mtha' med de snga phyi'i yul las 'das/_
/skye 'gag med de dngos po mtshan ma med/_
/'gro 'ong med de 'di zhes mtshon dang bral/_
/rtsol zhing sgrub med bya ba'i chos kyi stong /_
/phyogs cha dbus med de bzhin nyid kyi gzhi/_
/dmigs med rgyun chad med de mnyam pa'i klong /_
/thams cad chos nyid mnyam pa'i rang bzhin las/_
/mnyam pa'i klong na mi gnas gcig kyang med/_
/gcig mnyam kun mnyam byang chub sems kyi ngang /_
/ma skyes mkha' mnyam yangs par phyam gdal bas/_
/mnyam nyid ngang la rgyun chad med pa'i phyir/_
/lhun grub phyogs med kun khyab gdal ba'i rdzong /_
/steng 'og bar med ye klong yangs pa'i rdzong /_
/phyogs med kun shong skye med chos sku'i rdzong /_
/mi 'gyur lhun grub rin chen gsang ba'i rdzong /_
/snang srid 'khor 'das ye rdzong phyam gcig rdzogs/_
/phyogs med kun khyab gdal ba'i sa gzhi la/_
/'khor 'das ris med byang chub sems kyi mkhar/_
/chos nyid klong yangs rtse mo lhun mtho zhing /_
/ma byas rang bzhin phyogs bzhi yangs pa'i dkyil/_
/rim rtsol bral ba'i 'jug sgo shin tu yangs/_
/lhun grub 'byor pa'i bkod pas brgyan pa der/_
/rang byung ye shes rgyal po gdan la bzhugs/_
/'du 'phror snang ba ye shes rtsal rnams kun/_
/blon por gyur pas yul la dbang bsgyur zhing /_
/rang gnas bsam gtan btsun mo dam pa dang /_
/dgongs pa rang shar sras dang bran g.yog bcas/_
/bde chen klong dkyil rang gsal rtog pa med/_
/mi g.yo bsam brjod bral ba'i ngang nyid las/_
/snang srid snod bcud kun la mnga' dbang bsgyur/_
/chos dbyings yangs pa'i yul khams rgya che'o/_
/yul der gnas na thams cad chos kyi sku/_
/rang byung ye shes gcig las ma g.yos par/_
/ma byas ye zin stsol sgrub 'das pa nyid/_
/grwa zur med pa'i thig le zlum pas na/_
/ji bzhin dbye gsal med pa'i klong du 'khyil/_
/'gro drug gnas dang sangs rgyas zhing khams kyang /_
/gzhan na med de chos nyid nam mkha'i ngang /_
/rang gsal byang chub sems su ro gcig pas/_
/rig pa'i ngang du 'khor 'das 'ub chub bo/_
/thams cad kun 'byung chos dbyings mdzod 'di ni/_
/'das pa ma btsal ye nas lhun grub pas/_
/chos sku mi 'gyur yul med kun 'byams la/_
/phyi nang snod bcud snang ba longs spyod rdzogs/_
/gzugs brnyan lta bur rang shar sprul pa'i sku/_
/sku gsum rgyan du ma rdzogs chos med pas/_
/thams cad sku gsung thugs kyi rol par shar/_
/bde gshegs zhing khams ma lus grangs med kyang /_
/nyid las byung ba'i sems nyid sku gsum klong /_
/'khor ba'i rang bzhin 'gro drug grong khyer kyang /_
/chos dbyings ngang las gzugs brnyan shar ba tsam/_
/skye shi bde sdug sna tshogs snang ba yang /_
/sems nyid klong 'dir sprul pa'i ltad mo bzhin/_
/med la yod la snang la gzhi med pas/_
/mkha' la sprin bzhin glo bur rkyen byung tsam/_
/yod min med min rang bzhin mtha' 'das pas/_
/spros bral thig le'i ngang du 'ub chub bo/_
/sems nyid byang chub sems kyi rang bzhin ni/_
/mkha' ltar dag pas skye shi bde sdug med/_
/dngos po ris med 'khor 'das chos las grol/_
/'di zhes mi mtshon mkha' klong rab yangs pas/_
/mi 'gyur mi 'pho lhun grub 'dus ma byas/_
/'od gsal rdo rje snying por sangs rgyas pas/_
/thams cad kun kyang rang byung bde ba'i zhing /_
/lhun mnyam byang chub mchog gi ngang nyid do/_
/chos dbyings rin po che'i mdzod las/_
snang srid zhing khams su shar ba'i le'u ste gnyis pa'o//__//