Choying Dzo - Chapter 7

_ch 7_
rang bzhin lhun grub byang chub sems kyi lung /_
/ma byas don grub ri rgyal rtse mo ni/_
/kun las 'phags so theg mchog rgyal po che/_
/ji ltar ri rgyal rtse mor phyin pa na/_
/dma' ba'i lung rnams dus gcig mthong ba ste/_
/lung gi rtse mo'i rang bzhin mthong dang bral/_
/de bzhin a ti rdo rje snying po ni/_
/theg pa'i yang rtse don kun gsal bar mthong /_
/'og ma'i theg pas 'di don mthong ba med/_
/de phyir lhun grub rtse mor gyur pa'i tshe/_
/ji ltar yid bzhin nor bu chen po la/_
/gsol ba btab na 'dod dgu ngang gis 'byung /_
/phal pa'i dngos la de lta ma yin no/_
/rdo rje snying po sku gsum lhun grub pas/_
/rang bzhag dbyings las sangs rgyas rang la 'grub/_
/rtsol zhing sgrub med che ba de nyid do/_
/'og ma'i theg pas blang dor 'bad byas kyang /_
/bskal par mi 'grub tshi chad nad du che/_
/ye nas lhun mnyam rig pa byang chub sems/_
/ji bzhin rang babs chos nyid yangs pa ni/_
/rang bzhin chos sku mnyam nyid gdod ma'i klong /_
/kun la yod de skal ldan 'ga' yi yul/_
/ji bzhin bzhag na ngang der babs kyis 'grub/_
/khyab gdal rang gsal lhun grub longs spyod rdzogs/_
/kun la yod kyang mthong ba 'ga' yi yul/_
/gang snang rang gzhag bya rtsol bral na mngon/_
/ma 'gags rol pa sprul sku gdal ba'i klong /_
/kun la yod de 'char ba'i dus na gsal/_
/yid bzhin yon tan phrin las cho 'phrul yang /_
/gzhan na med de rang rig dag pa'i klong /_
/chu dang rnyog bzhin rang dvangs bzhag na gsal/_ /btsal bas mi rnyed gdod nas dag pa'i chos/_
/sangs rgyas byang chub rang byung klong na gsal/_
/sngar grub zin pas da gzod bsgrub mi dgos/_
/che ba rang gnas dgongs pa chos nyid klong /_
/mi 'gyur lhun gyis grub la rtsol mi byed/_
/ye gzhi babs gzhi byang chub snying po'i gzhi/_
/rang bzhin ngang las g.yos pa 'ga' med pas/_
/klong gsal rig pa'i don las ma g.yo zhig_
/thams cad bzhag pas 'grub pa'i rgyu mtshan yang /_
/mi 'gyur kun 'gro khyab bdag ye shes lnga/_
/sku lnga gsung lnga thugs lnga yon tan lnga/_
/phrin las lnga ste dang po'i sangs rgyas kyang /_
/thog mtha' med pa'i klong 'dir lhun grub pas/_
/gzhan du ma 'tshol rang bzhin ye nas grub/_
/sangs rgyas kun gyi chos sku byang chub kyang /_
/mi 'gyur mnyam pa'i don las gzhan du med/_
/de yang rang byung ngang 'dir lhun grub pas/_
/ma tshol ma sgrubs re dogs lhun gyis zhog_
/sems can kun gyi rang byung ye shes kyang /_
/ma byas ma btsal chos skur lhun grub pas/_
/spang blang ma 'dzin chos dbyings ngang 'dir zhog_
/mi g.yo mi bsam lhun mnyam ngo bo la/_
/ma byas don grub gzhi klong yangs pa yin/_
/mi 'gyur kun 'gro sku dang ye shes bdag_
/rgyal thabs spyi blugs rang byung chen po'i dbang /_
/snang srid snod bcud ye grol lhun grub pas/_
/bya rtsol mi dgos rang bzhin lhun gyis grub/_
/thams cad kun grub lhun grub chen por rgyas/_
/chos dbyings rin po che'i mdzod las/_
thams cad byang chub kyi sems su ye nas lhun gyis 'grub par bstan pa'i le'i ste bdun pa'o//___//