79240

རྟེན་འབྲེལ་ཡན་ལག་བཅུ་གཉིས་སྔ་མ་ལས་ཕྱི་མ་འབྱུང་བ་ (1)

Part of speech	མིང་ཚིག
Definition	ཡན་ལག་སྔ་མ་ལས་ཕྱི་མ་འབྱུང་བའི་ཚུལ་ནི། མ་རིག་པའི་རྐྱེན་གྱིས་འདུ་བྱེད་འབྱུང་སྟེ། མ་རིག་པའི་དབང་གིས་ཡང་སྲིད་འཕེན་བྱེད་ཀྱི་ལས་གསར་དུ་སོག་པ་དེ་འབྱུང་བའི་ཕྱིར། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་འབྱུང་སྟེ། རྣམ་པར་ཤེས་པ་རྒྱུའི་ཆ་བཟུང་ན། འདུ་བྱེད་སྔ་མ་ལས་བག་ཆགས་ཅན་གྱི་རྣམ་ཤེས་ཕྱི་མ་དེ་འབྱུང་བའི་ཕྱིར། རྣམ་པར་ཤེས་པ་འབྲས་བུའི་ཆ་བཟུང་ན། འདུ་བྱེད་སྔ་མ་ལས་རྣམ་ཤེས་སྐྱེ་གནས་སུ་འཕེན་པ་དེ་འབྱུང་བའི་ཕྱིར། རྣམ་པར་ཤེས་པ་ལས་མིང་གཟུགས་འབྱུང་སྟེ། རྣམ་ཤེས་རྒྱུའི་ཆ་བཟུང་ན་བག་ཆགས་ཅན་གྱི་རྣམ་ཤེས་ལས་མིང་གཟུགས་ཀྱི་བག་ཆགས་རིམ་གྱིས་བརྟས་པ་དེ་འབྱུང་བའི་ཕྱིར། རྣམ་པར་ཤེས་པ་འབྲས་བུའི་ཆ་བཟུང་ན། སྐྱེ་གནས་སུ་དང་པོར་གྲུབ་པའི་སྐད་ཅིག་གཉིས་པར་མིང་གཟུགས་རིམ་གྱིས་གྲུབ་པ་དེ་འབྱུང་བའི་ཕྱིར། མིང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་འབྱུང་སྟེ། མིང་གཟུགས་རིམ་གྱིས་འཕེལ་བ་ལས་སྐྱེ་མཆེད་དྲུག་ཚང་བར་དོད་པ་དེ་འབྱུང་བའི་ཕྱིར། སྐྱེ་མཆེད་དྲུག་གི་རྐྱེན་གྱིས་རེག་པ་འབྱུང་སྟེ། སྐྱེ་མཆེད་དྲུག་ཡུལ་དང་ཕྲད་པ་ལས་ཡུལ་དབང་རྣམ་ཤེས་གསུམ་འདུས་པས་ཡུལ་གྱི་འགྱུར་བ་ཡོངས་སུ་གཅོད་པ་དེ་འབྱུང་བའི་ཕྱིར། རེག་པ་ལས་ཚོར་བ་འབྱུང་སྟེ། རེག་པས་ཇི་ལྟར་བཅས་པ་ལྟར་ཚོར་བས་ཉམས་སུ་མྱོང་བ་དེ་འབྱུང་བའི་ཕྱིར། ཚོར་བ་ལས་སྲེད་པ་འབྱུང་སྟེ། ཚོར་བའི་དབང་གིས་ཚོར་བ་བདེ་སྡུག་ལ་བླང་དོར་དུ་ཆགས་པ་དེ་འབྱུང་བའི་ཕྱིར། སྲེད་པ་ལས་ལེན་པ་འབྱུང་སྟེ། ཚོར་བའི་ངོ་བོ་ལ་ཆགས་པས་ཚོར་བའི་རྒྱུ་ཚོར་བ་ལ་འདུན་ཅིང་ཆགས་པ་དེ་འབྱུང་བའི་ཕྱིར། ལེན་པ་ལས་སྲིད་པ་འབྱུང་སྟེ། ལེན་པའི་དབང་གིས་ཡང་སྲིད་འཕེན་བྱེད་ཀྱི་ལས་ནུས་པ་མཐུ་ཅན་དུ་གྱུར་པ་དེ་འབྱུང་བའི་ཕྱིར། སྲིད་པ་ལས་སྐྱེ་བ་འབྱུང་སྟེ། སྲིད་པའི་དབང་གིས་འགྲོ་བ་གཞན་དང་སྐྱེ་གནས་གཞན་དུ་འདྲེན་པ་དེ་འབྱུང་བའི་ཕྱིར། སྐྱེ་བ་ལས་རྒ་ཤི་འབྱུང་སྟེ། སྐྱེ་བའི་དབང་གིས་ན་ཚོད་གཞན་དུ་འགྱུར་བ་དང་སྲོག་གི་དབང་པོ་འགག་པ་དེ་འབྱུང་བའི་ཕྱིར་རོ་ཞེས་ཀུན་མཁྱེན་གོ་རམས་པའི་རྟེན་འབྲེལ་རབ་གསལ་ལས་སོ། །
Domain	ཆོས་ལུགས།

{{#arraymap:རྟེན་འབྲེལ་ཡན་ལག་བཅུ་གཉིས་སྔ་མ་ལས་ཕྱི་མ་འབྱུང་བ་

|; |@@@ | | }}