7519

Tibetan	ཟས་ཀྱི་རྣམ་པར་གཞག་པ་རྣམ་པ་བདུན།
Tibetan Alternate
Tibetan Definition	དེ་ཡང་། འཕགས་པ་དགོངས་པ་ངེས་པར་འགྲེལ་པའི་མདོའི་རྣམ་པར་བཤད་པ་ལས་བྱུང་བ་སྟེ། 1. ཁམས་ཀྱི་རབ་ཏུ་དབྱེ་བ་ནི། ཁམ་གྱི་ཟས་ཀྱིས་ནི་འདོད་པ་ན་སྤྱོད་པའི་སེམས་ཅན་རྣམས་གནས་ཤིང་འཚོ་བའོ། ། རེག་པ་དང་། ཡིད་ལ་སེམས་པ་དང་། རྣམ་པར་ཤེས་པའི་ཟས་ཀྱིས་ནི་ཁམས་གསུམ་ན་སྤྱོད་པའི་སེམས་ཅན་ཐམས་ཅད་གནས་ཤིང་འཚོ་བའོ། ། 2. རགས་པ་དང་ཆ་ཕྲ་བའི་རབ་ཏུ་དབྱེ་བ་ནི། ཁམས་ཀྱི་ཟས་རགས་པ་ནི་དུད་འགྲོ་དང་། ཡི་དྭགས་དང་། མི་བཙས་དུས་ཚུན་ཆད་ལ་གནས་པ་རྣམས་ཀྱིའོ། ། ཆ་ཕྲ་བ་ནི་སེམས་མངལ་ན་གནས་པ་མེར་མེར་པོ་ལ་སོགས་པའི་དུས་རྣམས་དང་། ལྷའི་རིས་དྲུག་པོ་དག་གི་སྟེ། དེ་དག་ནི་ཁམ་གྱི་ཟས་ཟོས་པའི་མོད་ལ་ལུས་ཀྱི་ཡན་ལག་ཐམས་ཅད་དུ་ཅིག་ཅར་དུ་འཇུ་ཞིང་རིམ་གྱིས་མ་ཡིན་པས་དེ་དག་ལ་བཤད་པ་དང་། གཅི་བར་གྱུར་པ་ཡང་མེད་དོ། ། ཉི་ཚེ་བའི་སེམས་ཅན་དམྱལ་བ་ཁ་ཅིག་མ་གཏོགས་པ་སེམས་ཅན་དམྱལ་བ་པ་རྣམས་ལ་ཡང་ཁམ་གྱི་ཟས་མེད་དེ། དེ་དག་ནི་རླུང་ཕྲ་མོ་རྗེས་སུ་ཞུགས་པ་ཟས་ཀྱི་ཐ་སྙད་ལ་མ་གཏོགས་པ་དང་། ཟས་ཀྱི་དབང་གིས་གནས་ཤིང་འཚོའོ། ། རེག་པ་དང་། ཡིད་ལ་སེམས་པ་དང་། རྣམ་པར་ཤེས་པའི་ཟས་རགས་པ་གང་ཞེ་ན། འདོད་པ་ན་སྤྱོད་པ་རྣམས་ཀྱིའོ། ། ཆ་ཕྲ་བ་གང་ཞེ་ན། གཟུགས་དང་གཟུགས་མེད་པ་ན་སྤྱོད་པ་རྣམས་ཀྱིའོ། ། 3. དངོས་པོའི་རབ་ཏུ་དབྱེ་བ་ནི། ཁམ་གྱི་ཟས་ཀྱིས་ནི་འདའ་གུ་དང་། སྣུམ་ཁུར་དང་། འབྲས་ཆན་དང་། ཟན་དྲོན་དང་། ཞུན་མར་དང་། སྦྲང་རྩི་དང་། བུ་རམ་གྱི་དབུ་བ་དང་། ཤ་དང་། ཉ་དང་། ཤ་སྐམ་དང་། ལན་ཚྭ་དང་། འོ་མ་དང་། ཞོ་དང་། མར་དང་། གཞན་ཡང་དེ་ལྟ་བུའི་ཡོ་བྱད་གང་དག་ཁམ་དུ་བྱས་ཏེ། བཟའ་རུང་བ་དག་སྟེ། དེའི་ཕྱིར་ཁམ་གྱི་ཟས་ཞེས་བྱའོ། ། རེག་པའི་ཟས་ཀྱིས་ནི་རེག་པའི་སྐྱེ་མཆེད་དྲུག་གིས་བསྡུས་པའི་རེག་པའི་ཚོར་བ་དྲུག་པོ་བདེ་བ་དང་། ཡིད་བདེ་བ་དང་། བཏང་སྙོམས་ཀྱི་ཚོར་བ་སྐྱེད་པར་བྱེད་པ་ལྟར་བྱུང་བ་དག་གོ ། ཡིད་ལ་སེམས་པའི་ཟས་ཀྱི་འདུས་ཏེ་རེག་པའི་ཚོགས་དྲུག་གིས་བསྡུས་པའི་སེམས་པའི་ཚོགས་དྲུག་པོ་མ་འོངས་པའི་ཡུལ་ལ་འདོད་པ་ལས་དམིགས་པ་དག་གོ ། རྣམ་པར་ཤེས་པའི་ཟས་ཀྱིས་ནི་ཡིད་ཀྱི་སྐྱེ་མཆེད་ཀྱིས་བསྡུས་པ་རྣམ་པར་ཤེས་པའི་ཚོགས་བརྒྱད་པོ་ཟས་གསུམ་པོ་རྣམས་ཀྱིས་ད་ལྟར་དང་མ་འོངས་པ་ལས་དམིགས་པས་ཕན་བཏགས་ཤིང་སྟོབས་དང་ལྡན་པ་དག་གོ ། 4. གནས་སྐབས་ཀྱི་རབ་ཏུ་དབྱེ་བ་ནི། ཁམ་གྱི་ཟས་དུས་གང་གི་ཚེ་ཟས་ཉིད་དུ་རྣམ་པར་གཞག་ཅེ་ན། འཇུག་པའི་ཚེ་ཁོ་ན་ཟས་སུ་རྣམ་པར་གཞག་གི། ཟ་བའི་ཚེ་ནི་མ་ཡིན་ནོ། ། རེག་པ་དང་། ཡིད་ལ་སེམས་པ་དང་། རྣམ་པར་ཤེས་པའི་ཟས་ནི་གང་གི་ཚེ་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་རྒྱས་པར་འགྱུར་བའི་ཚེ་ན་ནི་ཟས་སུ་རྣམ་པར་གཞག་གོ ། 5. ཟས་དང་ཟས་མ་ཡིན་པའི་རབ་ཏུ་དབྱེ་བ་ནི། ཁམ་གྱི་ཟས་ནི་དབང་པོ་དང་འབྱུང་བ་ཆེན་པོ་འཕེལ་ཞིང་ཡངས་པ་དང་རྒྱས་པར་བྱེད་པ་ནི་ཟས་ཡིན་ལ། དེ་ལས་བཟློག་པ་ནི་ཟས་མ་ཡིན་ཏེ། དེ་ལ་ཁམ་གང་ཟ་བའི་ཚེ་ན། ཡིད་དུ་འོང་བར་ཟ་བ་པོའི་དབང་པོ་ཚིམ་པར་བྱེད་པ་དེ་ནི་ད་དུང་མ་ཞུ་བས་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་། རྒྱས་པར་མི་བྱེད་པའི་ཕྱིར་ཁམ་གྱི་ཟས་ཞེས་བརྗོད་པར་ནི་མི་བྱ་མོད་ཀྱི། འོན་ཀྱང་དེའི་རེག་པའི་སྐྱེ་མཆེད་དྲུག་ཅར་ནས་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་རྒྱས་པར་བྱེད་པས་རེག་པའི་ཟས་ཞེས་བརྗོད་པར་བྱའོ། ། ཁམ་དེ་འཕྲོད་པས་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ། རྒྱས་པར་འགྱུར་བར་འཇུ་བ་ནི་དེ་འཇུ་བའི་ཚེ་ན་ཁམ་གྱི་ཟས་ཡིན་པར་བརྗོད་པར་བྱའོ། ། གལ་ཏེ་ཁམ་དེ་ཞུ་ཡང་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་། རྒྱས་པར་མི་འགྱུར་ན་ནི་དེ་ཞུར་ཟིན་ཀྱང་ཁམ་གྱི་ཟས་མ་ཡིན་པར་བརྗོད་པར་བྱའོ། ། ཁམ་གང་ཟ་བའི་ཚེ་ན་ཁ་བ་དང་། ཚ་བ་ལ་སོགས་པས་གནོད་པ་བྱེད་པ་དང་། འདུ་བའི་ཚེ་ཕན་འདོགས་པར་བྱེད་པ་དེ་ནི་ཁམ་གྱི་ཟས་ཡིན་པར་བརྗོད་པར་བྱའོ། ། ཁམ་གང་ཟ་བའི་ཚེ་ན་ཞིམ་ལ་འཇུ་བའི་ཚེ་ན་མི་འཕྲོད་པ་དེ་ནི་ཁམ་གྱི་ཟས་མ་ཡིན་པར་བརྗོད་པར་བྱའོ། ། ཁམ་གང་དྲི་དང་རོ་དང་རེག་བྱའི་སྐྱེ་མཆེད་ཀྱིས་བསྡུས་པ་ནི་ལེགས་པར་ཞུ་བས་ཕན་འདོགས་པ་ཁམ་གྱི་ཟས་ཡིན་ཀྱི། གཟུགས་དང་སྒྲའི་སྐྱེ་མཆེད་ནི་ཕན་པར་ཡང་མི་འཇུ་གནོད་པར་ཡང་མི་འཇུ་བའི་ཁམ་གྱི་ཟས་ཡིན་པར་བརྗོད་པར་མི་བྱའོ། ། རེག་པ་དང་། ཡིད་ལ་སེམས་པ་དང་། རྣམ་པར་ཤེས་པའི་ཟས་ནི་སྔར་སོ་སོའི་ངོ་བོ་ཉིད་ཇི་སྐད་བསྟན་པ་དེ་དག་ནི་དབང་པོ་དང་། འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་། རྒྱས་པར་གྱུར་པར་ཟས་ཡིན་པར་བརྗོད་པར་བྱའོ། ། སྡུག་བསྔལ་དང་ཡིད་མི་བདེ་བའི་ཚོར་བ་སྐྱེད་པར་བྱེད་པའི་རེག་པ་དང་། ཡུལ་འདོད་པ་ཐོབ་ཏུ་མི་རེ་བ་དང་། ཡུལ་མི་འདོད་པ་ཐོབ་ཏུ་དོགས་པའི་ཡིད་ལ་སེམས་པ་དང་། ཟས་གསུམ་དང་བྲལ་ཞིང་ཟས་གསུམ་གྱི་མི་མཐུན་པའི་ཕྱོགས་དང་ཕྲད་པའི་རྣམ་པར་ཤེས་པ་གནོད་པས་ཉམ་ཐག་པ་དང་། འཆི་ཁའི་རྣམ་པར་ཤེས་པ་ལ་སོགས་པ་ནི་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་། རྒྱས་པར་མི་འགྱུར་བས་ཟས་མ་ཡིན་པར་བརྗོད་པར་བྱའོ། ། 6. བྱ་བ་བྱེད་པའི་རབ་ཏུ་དབྱེ་བ་ནི། ཁམ་གྱི་ཟས་ཀྱིས་ནི་ཡོངས་སུ་འཇུ་བའི་ཚེ་དྲི་དང་རོ་དང་རེག་བྱའི་མཐུ་དང་། རྣམ་པར་སྨིན་པ་ལ་སོགས་པའི་སྟོབས་ཀྱིས་རྣམ་པར་ཤེས་པ་ལ་ཕན་འདོགས་པར་བྱེད་ཅིང་ཕན་བཏགས་པའི་རྣམ་པར་ཤེས་པ་སྟོབས་དང་ལྡན་པ་དེས་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་། རྒྱས་པར་བྱེད་པས་ཟས་ཀྱི་བྱ་བ་བྱེད་དོ། ། རེག་པ་དང་ཡིད་ལ་སེམས་པ་དང་། རྣམ་པར་ཤེས་པའི་ཟས་ཀྱིས་ནི་སོ་སོའི་སྟོབས་ཀྱིས་རྣམ་པར་ཤེས་པ་ལ་ཕན་འདོགས་པར་བྱེད་ཅིང་ཕན་བཏགས་པའི་རྣམ་པར་ཤེས་པ་སྟོབས་དང་ལྡན་པ་དེས་དབང་པོ་དང་འབྱུང་བ་ཆེན་པོ་རྣམས་འཕེལ་ཞིང་ཡངས་པ་དང་། རྒྱས་པར་བྱེད་པས་ཟས་ཀྱི་བྱ་བ་བྱེད་དོ། ། དེ་ལ་རྣམ་པར་ཤེས་པ་ཇི་ལྟར་ན་ཡིད་ཀྱི་དབང་པོའི་ཟས་ཡིན་ཞེ་ན། དེ་ལྟར་ཟས་རྣམ་པ་གསུམ་གྱིས་ཉེ་བར་བརྟགས་པའི་རྣམ་པར་ཤེས་པ་དེ་ཡིད་ཀྱི་དབང་པོ་གོང་ནས་གོང་དུ་ཆེས་བརྟས་པ་དང་། ཆེས་སྟོབས་དང་ལྡན་པར་སྐྱེ་བའི་རྒྱུར་གྱུར་པའི་ཕྱིར་རོ། ། 7. མུ་བཞིར་བཅད་པའི་རབ་ཏུ་དབྱེ་བ་ནི། ཁམ་གང་ཡིན་པ་དེ་ཟས་ཀྱང་ཡིན་ལ། ཟས་གང་ཡིན་པ་དེ་ཡང་ཁམ་ཡིན་ནམ་ཞེ་ན། མུ་བཞི་སྟེ། ཁམ་ཡིན་ལ་ཟས་མ་ཡིན་པ་ནི། ཁམ་གང་དབང་པོ་དང་འབྱུང་བ་ཆེན་པོ་འཕེལ་བར་མི་འགྱུར་བའོ། ། ཟས་ཡིན་ལ་ཁམ་མ་ཡིན་པ་ནི་རེག་པ་དང་། ཡིད་ལ་སེམས་པ་དང་། རྣམ་པར་ཤེས་པ་གང་དབང་པོ་དང་འབྱུང་བ་ཆེན་པོ་འཕེལ་བར་མི་འགྱུར་བའོ། ། ཟས་ཀྱང་ཡིན་ལ་ཁམ་གང་ཡིན་པ་ནི་ཁམ་གང་དབང་པོ་དང་འབྱུང་བ་ཆེན་པོ་འཕེལ་བར་འགྱུར་བའོ། ། ཁམ་ཡང་མ་ཡིན་ཟས་ཀྱང་མ་ཡིན་པ་ནི་རེག་པ་དང་། ཡིད་ལ་སེམས་པ་དང་། རྣམ་པར་ཤེས་པ་གང་དབང་པོ་དང་འབྱུང་བ་ཆེན་པོ་འཕེལ་བར་མི་འགྱུར་བའོ། ། རེག་པ་ལ་སོགས་པ་ལྷག་མ་རྣམས་ལ་ཡང་མུ་བཞི་དེ་བཞིན་དུ་ཅི་རིགས་པར་བརྗོད་པར་བྱ་སྟེ། དེ་ནི་ཟས་རྣམས་ཀྱི་རབ་ཏུ་དབྱེ་བ་རྣམ་པར་གཞག་པ་ཡིན་ནོ། །
Tibetan Source	《བསྟན་འགྱུར་སྣ་ཚོགས་ཇོ་པ་》ཤ་52ན་7ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number