Prajnaparamita in Eight Thousand Verses Tibetan Translation Chapter 21

//shes rab kyi pha rol tu phyin pa brgyad stong pa/ bam po nyi shu gcig pa/ de nas lha rnams kyi dbang po brgya byin 'di snyam du sems te byang chub sems dpa' sems dpa' chen po'i spyod pa nyid kyis kyang re zhig sems

@235a */ /can thams cad 'di ltar zil gyis gnon na gang gi tshe bla na med pa yang dag par rdzogs pa'i byang chub mngon par rdzogs par sangs rgyas par gyur pas lta ci smos/ sems can gang dag thams cad mkhyen pa nyid du sems 'jug pa de dag ni rnyed pa legs

bar rnyed pa yin sems can de dag ni 'tsho ba yang legs par 'tsho bA yin na/ yang gang gis bla na med pa yang dag par rdzogs pa'i byang chub tu sems bkyed pa lta ci smos/ sems can dam pa gang bla na med pa yang dag par rdzogs pa'i byang chub tu mngon par rdzogs par 'tshang

rgya bar 'gyur ba'i sems can de dag ni 'dod par bya bya'o/ /de nas lha rnams kyi dbang po brgya byin gyis me tog man d'a ra bdag mngon par sprul nas me tog snyim par thogs te de bzhin gshegs pa dgra bcom pa yang dag par rdzogs pa'i sangs rgyas la gtor nas tshig tu yang

'di skad ces smras so/ /byang chub sems dpa'i theg pa pa'i gang zag gang dag gis bla na med pa yang dag par rdzogs pa'i byang chub mngon par rdzogs par sangs rgyas te mngon par rdzogs par sangs rgyas nas 'khor ba'i rgya mtsho chen pos khyer par gyur pa'i sems can thams cad

pha rol gyi 'gram rdzogs pa'i sangs rgyas kyi sa la mnyam par gzhag par bgyi'o zhes bla na med pa yang dag par rdzogs pa'i byang chub tu sems bskyed pa de dag gis 'tshal ba dang yongs su bsams pa dang yongs su bzung ba'i sems bskyed pa de rnams 'byor bar gyur cig /de dag

gi sangs rgyas kyi chos de dag nyid yongs su rdzogs par gyur cig /thams cad mkhyen pa nyid dang ldan pa'i chos de dag nyid yongs su rdzogs par gyur cig rang byung gi chos de dag nyid yongs su rdzogs par gyur cig mi 'phrogs pa'i chos de dag nyid yongs su rdzogs par gyur cig /

bcom ldan 'das bdag ni byang chub sems dpa' sems dpa' chen po snying rje chen po dang ldan pa gang yin pa de dag bla na med pa yang dag par rdzogs pa'i byang chub las slar ldog pa'i sems bskyed pa gcig kyang mi skye'o/ /bcom ldan 'das bdag ni byang chub sems dpa'i theg pa

@235b pa'i gang zag bla na med pa yang dag par rdzogs pa'i byang chub mngon bar rdzogs par 'tshang rgya bar yang dag par zhugs pa gang yin pa de dag de las slar ldog bar sems bskyed pa gcig kyang mi skye ste/ sems can rnams kyi 'khor ba na spyod pa'i sdug bsngal rnams yang dag

par mthong bas bla na med pa yang dag par rdzogs pa'i byang chub tu smon lam rgya cher skyed par 'gyur ro/ /de ci'i slad du zhe na/ gang dag sems bskyed pa 'di lta bu 'di dag dang ldan te ci ltar bdag rgal bas sems can rnams bsgral bar bgyi grol bas grol bar bgyi dbugs

phyung bas dbugs dbyung bar bgyi yongs su mya ngan las 'das pas yongs su mya ngan las bzla bar bgyi'o zhes de lta bu'i sems bskyed pa de dag gis gnas pa de dag ni/ snying rje chen po de don du 'tshal ba dang sman par 'tshal ba dang lha dang mi dang lha ma yin du bcas pa'i 'jig

rten la snying brtse bas snying brtse bar bgyid pa lags so/ /bcom ldan 'das gang byang chub sems dpa' sems dpa' chen po theg pa la dang por zhugs pa de dag gi sems bskyed pa de dag la rjes su yi rang ba dang byang chub sems dpa'i spyad pa spyod pa rnams kyi sems bskyed pa de

dag la yang rjes su yi rang ba dang phyir mi ldog pa'i byang chub sems dpa' sems dpa' chen po rnams kyi phyir mi ldog pa'i chos nyid la yang rjes su yi rang ba dang skye ba gcig gis thogs pa'i byang chub sems dpa' sems dpa' chen po rnams kyi skye ba gcig gis thogs pa'i chos nyid la

yang rjes su yi rang bar bgyid na/ bcom ldan 'das rigs kyi bu 'am rigs kyi bu mo de bsod nams ci tsam zhig skyed par 'gyur/ de skad ces gsol pa dang / bcom ldan 'das kyis lha rnams kyi dbang po brgya byin la 'di skad ces bka' stsal to/ /kO shi ka yang ri rab

ri'i rgyal po srang grangs su bcal ba'i tshad ni gzung bar nus kyi/ kO shi ka rigs kyi bu 'am 'gis ? kyi bu mo byang chub sems dpa' sems dpa' chen po'i rjes su yi rang ba dang ldan pa'i sems bskyed pa de'i bsod nams kyi tshad ni gzung bar mi nus so/ /kO shi ka yang gling chen po

@236a */ /bzhi pa'i 'jig rten gyi khams srang grangs su bcal ba'i tshad ni gzung bar nus kyi/ kO shi ka rjes su yi rang ba dang ldan pa'i sems bskyed pa de'i bsod nams kyi tshad ni gzung bar mi nus so/ /kO shi ka yang stong sbyi phud kyi 'jig rten gyi khams srang grangs su

bcal ba'i tshad ni gzung bar nus kyi/ kO shi ka rjes su yi rang ba dang ldan ba'i sems bskyed pa de'i bsod nams kyi tshad ni gzung bar mi nus so/ /kO shi ka yang stod gnyis pa par ma'i 'jig rten gyi khams srang grangs su bcal ba'i tshad ni gzung bar nus kyi/ kO shi ka rjes su yi rang

ba dang ldan ba'i sems bskyed pa de'i bsod nams kyi tshad ni gzung bar mi nus so/ /kO shi ka yang stong gsum gyi stong chen po'i 'jig rten gyi khams srang grangs su bcal ba'i tshad ni gzung bar nus kyi/ kO shi ka rigs kyi bu 'am rigs kyi bu mo byang chub sems dpa' sems dpa' chen

po'i rjes su yi rang ba dang ldan pa'i sems bskyed pa de'i bsod nams kyi tshad ni gzung bar mi nus so/ /de skad ces bka' stsal pa dang / bcom ldan 'das la lha rnams kyi dbang po brgya byin gyis 'di skad ces gsol to/ /bcom ldan 'das sems can gang dag byang chub

sems dpa' sems dpa' chen po sems dang po bskyed pa nas bzung ste bla na med pa yang dag par rdzogs pa'i byang chub mngon par rdzogs par sangs rgyas pa'i bar rnams kyi rjes su yi rang ba dang ldan pa'i sems bskyed pa'i bsod nams de ltar gzhal du ma mchis pa lags bar mi nyan ma

'tshal ma mthong rjes su yi rang bar mi sems pa de dag ni bdud kyis byin gyis brlabs par rig bar bgyi'o/ /bcom ldan 'das sems can gang byang chub sems dpa' sems dpa' chen po rnams kyi sems bskyed pa 'di la rjes su yi rang bar mi bgyid pa de dag ni bdud kyi phyogs su gyur pa

lags so/ /bcom ldan 'das sems can gang byang chub sems dpa' sems dpa' chen po rnams kyi sems bskyed pa 'di la rjes su yi rang bar mi bgyid pa de dag ni bdud kyi gnas nas shi 'phos pa lags so/ /de ci'i slad du zhe na/ bcom ldan 'das gang gis sems bskyed pa

@236b 'di dag mngon par bsgrubs pa dang / sems bskyed pa 'di dag bla na med pa yang dag par rdzogs pa'i byang chub tu yongs su bsngos pa 'am sems bskyed pa 'di dag la rjes su yi rang bar bgyis pa de dag gis ni bdud kyi gnas rnam par 'jig par bgyid pa lags so/ /bcom

ldan 'das byang chub sems dpa' sems dpa' chen po gang dag gis bla na med pa yang dag par rdzogs pa'i byang chub tu sems bskyed pa'i byang chub sems dpa' sems dpa' chen po de dag gis sems bskyed pa de dag ni rjes su yi rang bar bgyi ba lags so/ /bcom ldan 'das

gang gis de bzhin gshegs pa yongs su ma btang ba dang / chos yongs su ma btang ba dang dge 'dun yongs su ma btang pa'i rigs kyi bu 'am rigs kyi bu mo de dag gis sems bskyed pa 'di la rjes su yi rang bar bgyi'o/ /de skad ces gsol pa dang / bcom ldan 'das kyis

lha rnams kyi dbang po brgya byin la 'di skad ces bka' stsal to/ /kO shi ka de de bzhin no de de bzhin te/ kO shi ka rigs kyi bu'am rigs kyi bu mo gang dag gis de bzhin gshegs pa yongs su ma btang ba dang chos yongs su ma btang ba dang dge 'dun yongs su ma btang ba de dag gis

sems bskyed pa 'di dag la rjes su yi rang bar bya'o/ /kO shi ka rigs kyi bu 'am rigs kyi bu mo byang chub sems dpa'i theg pa pa 'am rang sangs rgyas kyi theg pa 'am nyan thos kyi theg pa pa gang dag gis sems bskyed pa 'di la rjes su yi rang bar byas na de dag myur du de bzhin

gshegs pa dgra bcom pa yang dag par rdzogs pa'i sangs rgyas rnams mnyes par byed par 'gyur gyi mi mnyes par byed par mi 'gyur ro/ /de skad cis bka' stsal pa dang / bcom ldan 'das la lha rnams kyi dbang po brgya byin gyis 'di skad ces gsol to/ /bcom

ldan 'das de de bzhin no bde bar gshegs pa de de bzhin te/ rigs kyi bu 'am rigs kyi bu mo byang chub sems dpa'i theg pa pa 'am rang sangs rgyas kyi theg pa pa 'am nyan thos kyi theg pa pa gang dag gis sems bskyed pa'i da dag la rjes su yi rang ba de dag ni shin tu myur bar de

@237a */ /bzhin gshegs pa dgra bcom pa yang dag par rdzogs pa'i sangs rgyas rnams mnyes par bgyid par 'gyur gyi mi mnyes par bgyid par mi 'gyur ro/ /de ltar rjes su yi rang ba dang ldan ba'i sems bskyed pa'i dge ba'i rtsa ba de dag gis gang dang gang du skye bar

gyur pa de dang der bkur stir bgyis par 'gyur bla mar bgyis par 'gyur rjed par bgyis par 'gyur mchod par bgyis par 'gyur ri mor bgyis par 'gyur bsnyen bkur bgyis par 'gyur te/ de dag yid du mi 'ong ba'i gzugs mthong bar mi 'gyur de dag yid du mi 'ong ba'i sgra thos

par mi 'gyur de dag yid du mi 'ong ba'i dri snom par mi 'gyur de dag yid du mi 'ong ba'i ro yongs su myong bar mi 'gyur de dag yid du mi 'ong ba'i reg bya la rig par mi 'gyur ro/ /de dag ngan song du mi skye bar rig par bgyi ste de dag mtho ris su skye bar rig par bgyi'o/ /de ci'i

slad du zhe na/ 'di ltar rigs kyi bu 'am rigs kyi bu mo de dag gis sems can gzhal du med pa dang grangs med pa'i dge ba'i rtsa ba sems can thams cad bde bar byed pa la rjes su yi rang ba'i slad du'o/ /bcom ldan 'das gang gis 'dun pa bskyed de gang zag byang

chub sems dpa'i theg pa can rnams kyi sems bskyed pa de dag la rjes su yi rang bar bgyis pa de dag gi sems bskyed pa de dag kyang rnam par 'phel bas bla na med pa yang dag par rdzogs pa'i byang chub thob par bgyid par 'gyur ro/ /de dag kyang bla na med pa yang dag par rdzogs pa'i

byang chub mngon par rdzogs par sangs rgyas nas sems can gzhal du ma mchis grangs ma mchis pa rnams songs su mya ngan las 'da' bar bgyid par 'gyur ro/ /bcom ldan 'das kyis bka' stsal pa/kO shi ka de bzhin gshegs pa'i mthus khyod kyis tshig ci skad smras pa de de

bzhin no de de bzhin te/ kO shi ka rigs kyi bu 'am rigs kyi bu mo gang gis gang zag byang chub sems dpa'i theg pa rnams kyi sems bskyed pa de dag la rjes su yi rang ba byas na/ kO shi ka rnam grangs 'dis rigs kyi bu 'am rigs kyi bu mo des gang zag byang chub sems

@237b dpa'i theg pa brnams kyi sems bskyed pa de dag la rjes su yi rang bar byas pas sems can gzhal du med bgrang du med pa dag gi dge ba'i rtsa ba la rjes su yi rang bar 'gyur bskyed pa dang mngon par bsgrubs par 'gyur ro/ /rab 'byor gyis gsol ba/ bcom ldan 'das

sems sgyu ma lta bu ci ltar bla na med pa yang dag par rdzogs pa'i byang chub mngon par rdzogs par 'tshang rgya bar 'gyur/ de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor 'di ci snyam du sems khyod

kyis sems sgyu ma lta bur yang dag par rjes su mthong dam/ rab 'byor gyis gsol pa/ bcom ldan 'das de ni ma lags so/ /bcom ldan 'das kyis bka' stsal pa/ rab 'byor 'di ci snyam du sems khyod kyis sgyu ma yang dag par rjes su mthong ngam/ rab 'byor

gyis gsol pa/ bcom ldan 'das de ni ma lags te bcom ldan 'das bdag gis sems sgyu ma lta bu dang sgyu ma yang yang dag par rjes su ma mthong ngo/ /bcom ldan 'das kyis bka' stsal pa/ rab 'byor 'di ce snyam du sems sgyu ma dang sems sgyu ma lta bu yang yang dag

par rjes su ma mthong ba gang yin pa khyod kyis ci sgyu ma 'am sems sgyu ma lta bu las gzhan na chos gang bla na med pa yang dag par rdzogs pa'i byang chub mngon par rdzogs par 'tshang rgya ba'i chos de yang dag par rjes su mthong ngam/ /rab 'byor gyis gsol pa/ bcom ldan

'das de ni ma lags te bcom ldan 'das bdag gis sgyu ma 'am sems sgyu ma lta bu las gzhan na chos gang bla na med pa yang dag par rdzogs pa'i byang chub mngon par rdzogs par 'tshang rgya ba'i chos de yang dag par rjes su ma mthong ngo/ /bcom ldan 'das bdag gis

sgyu ma 'am sems sgyu ma lta bu las gzhan du chos de yang dag par rjes su ma mthong na mchis pa'o zhe 'am ma mchis pa'o zhes chos gang zhig brjod par bgyi/ chos shin tu dben pa de ni mchis pa'o zhe 'am ma mchis pa 'o zhes rtogs su ma mchis te/ chos gang shin tu

@238a */ /dben pa de ni bla na med pa yang dag par rdzogs pa'i byang chub mngon par rdzogs par 'tshang mi rgya'o/ /de ci'i slad du zhe na/ bcom ldan 'das chos ma mchis pa ni bla na med pa yang dag par rdzogs pa'i byang chub mngon par rdzogs par 'tshang mi rgya'o/ /

bcom ldan 'das de lta bas na shes rab kyi pha rol tu phyin pa ni shin tu dben pa lags la/ chos gang shin tu dben pa'i chos de ni bsgom par bgyi ba ma lags te des ni chos gang yang thob par bgyid pa'am spong par bgyid pa ma lags na/ bcom ldan 'das ci ltar shes

kyi pha rol tu phyin pa shin tu dben pa la brten nas byang chub sems dpa' sems dpa' chen po bla na med pa yang dag par rdzogs pa'i byang chub mngon par rdzogs par 'tshang rgya bar 'gyur/ bcom ldan 'das bla na med pa yang dag par rdzogs pa'i byang chub kyang shin tu dben pa lags

te; bcom ldan 'das gang gi tshe shes rab kyi pha rol tu phyin pa shin tu dben pa lags la bla na med pa yang dag par rdzogs pa'i byang chub kyang shin tu dben pa lags na/ bcom ldan 'das de'i tshe ci ltar dben pas dben pa mngon par rdzogs par 'tshang rgya bar 'gyur/ de skad

ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor legs so legs so/ /rab 'byor de de zhin no de de bzhin te/ rab 'byor shes rab kyi pha rol tu phyin pa ni shin tu dben pa'o/ /bla na med pa yang dag

par rdzogs pa'i byang chub kyang shin tu dben pa yin te/ rab 'byor gang gi phyir shes rab kyi pha rol tu phyin pa shin tu dben pa de nyid kyi phyir bla na med pa yang dag par rdzogs pa'i byang chub shin tu dben pa mngon par rdzogs par 'chang rgya'o/ /rab 'byor gal te byang chub sems dpa'

sems dpa' chen pos shes rab kyi pha rol tu phyin pa shin tu dben pa'o zhes yang dag par shes na de shes rab kyi pha rol tu phyin pa ma yin no/ /rab 'byor de ltar byang chub sems dpa' sems dpa' chen po shes rab kyi pha rol tu phyin pa la brten nas bla na med pa yang dag par rdzogs pa'i

@238b byang chub mngon par rdzogs par 'tshang rgya ste/ rab 'byor shes rab kyi pha rol tu phyin pa la brten nas bla na med pa yang dag par rdzogs pa'i byang chub mngon par rdzogs par 'tshang rgya ba yang med do/ /dben pas dben pa mngon par rdzogs par 'tshang mi rgya mod kyi/

byang chub sems dpa' sems dpa' chen po bla na med pa yang dag par rdzogs pa'i byang chub mngon par rdzogs par 'tshang yang rgya ste shes rab kyi pha rol tu phyin pa lam brten par yang mngon par rdzogs par 'tshang mi rgya'o/ /rab 'byor gyis gsol pa/ bcom ldan 'das ci ltar

bdag gis bcom ldan 'das kyis bka' stsal pa'i don 'tshal pa de ltar na/ bcom ldan 'das byang chub sems dpa' sems dpa' chen po ni don zab mo la spyod do/ /bcom ldan 'das kyis bka' stsal pa/ rab 'byor de de bzhin no de de bzhin te/ rab 'gyor byang chub

sems dpa' sems dpa' chen po don zab mo la spyod do/ /rab 'byor byang chub sems dpa' sems dpa' chen po gang don zab mo la yang spyod la/ 'di lta ste nyan thos kyis 'am rang sangs rgyas kyi sar don de mngon sum du mi byed pa ni dka' ba byed pa yin no/ /rab 'byor

gyis gsol ba/ bcom ldan 'das ci ltar bdag gis bcom ldan 'das kyis bka' stsal pa'i don 'tshal ba de ltar na byang chub sems dpa' sems dpa' chen po dka' ba bgyid pa cang ma lags so/ /de ci'i slad du zhe na/ bcom ldan 'das 'di ltar gang zhig mngon sum

du bgyid ba'i chos de nyid kyang mi dmigs gang mngon du bgyi ba'i chos de yang mi dmigs gang gis mngon sum du bgyi pa'i chos de yang mi dmigs pa'i slad du'o/ /bcom ldan 'das gal te 'di skad bshad pa la byang chub sems dpa' sems dpa' chen po mi zhum mi 'gong

kun tu mi zhum yid phyir phyogs par mi 'gyur mi dngang kun tu mi skrag kun tu skrag pa dang ldan par mi 'gyur na shes rab kyi pha rol tu phyin pa la spyod do/ /gal te spyod do snyam du yang dag par rjes su mi mthong na shes rab kyi pha rol tu phyin pa la spyod do/ /gal te bdag bla na med pa

@239a */ /yang dag par rdzogs pa'i byang chub tu nyen bar gyur to snyam du de ltar yang dag par rjes su mi mthong na shes rab kyi pha rol tu phyin pa la spyod do/ /gal te bdag gis nyan thos dang rangs sangs rgyas kyi sa rgyang ring du bsrings so snyam du de ltar yang de mi sems na shes rab kyi

pha rol tu phyin pa la spyod do/ /bcom ldan 'das 'di lta ste dper na nam mkha' ni 'di snyam du bdag kha cig dang ni nye'o kha cig dang ni ring ngo zhes snyam du mi sems so/ /de ci'i slad du zhes na/ bcom ldan 'das nam mkha' la rnam par rtog pa ma mchis pa'i slad du ste/

bcom ldan 'das de bzhin du byang chub sems dpa' sems dpa' chen po shes rab kyi pha rol tu phyin pa la spyod pa yag bdag ni bla na med pa yag dag par rdzogs pa'i byang chub dang nye bar gyur te nyan thos kyi sa dang rang sangs rgyas kyis ni bdag dang rgyang ring ngo snyam du mi sems/ /

de ci'i slad du zhe na/ bcom ldan 'das shes rab kyi pha rol tu phyin pa la rnam par rtog pa ma mchis pa'i slad du'o/ /bcom ldan 'das 'di lta ste dper na sgyu ma'i skyes bu ni 'di snyam du sgyu ma byed pa ni bdag dang nye'i yang skye po'i tshogs gzhan 'dus pa 'di ni bdag dang rgyang ring

ngo zhes mi sems so/ /de ci'i slad du zhe na/ bcom ldan 'das sgyu ma'i skyes bu la rnam par rtog pa ma mchis pa'i slad du ste/ bcom ldan 'das de bzhin du byang chub sems dpa' sems dpa' chen po shes rab kyi pha rol tu phyin pa la spyod pa yang 'di snyam du bdag gi bla na med pa

yang dag par rdzogs pa'i byang chub dang nye bar byur te nyan thos kyi sa dang rang sangs rgyas kyi sa ni bdag dang rgyang ring ngo zhes mi sems so/ /de ci'i slad du zhe na/ bcom ldan 'das shes rab kyi pha rol tu phyin pa la rnam par rtog pa ma mchis pa'i slad du'i/ /bcom lda 'das 'di lta

ste dper na gzugs brnyan ni 'di snyam du dmigs pa gang gis gzugs brnyan 'byung ba de ni bdag dang nye ba yin gyi yang gang dag me long dam snod chus bkang pa de'i drung du nye bar ma 'ongs pa de dag ni bdag dang rgyad ring ngo zhes mi sems so/ /de ci'i slad du zhe na/ bcom ldan

@239b [*LINE OUT THIS PAGE?] 'das gzugs brnyan la rnam par rtog pa ma mchis pa'i slad du ste/ bcom ldan 'das de bzhin du byang chub sems dpa' sems dpa' chen po shes rab kyi pha rol tu phyin pa la spyod pa yang 'di snyam du bdag ni bla na med pa yang dag par rdzogs pa'i byang chub dang nye bar gyur te nyan

thos kyis dang rang sangs rgyas kyis ni bdag dan rgyang ring po zhes mi sems so/ /de ci'i slad du zhes na/ bcom ldan 'das shes rab kyi pha rol tu phyin pa la rnalm par rtog pa ma mchis pa'i slad du 'o/ /bcom ldan 'das 'di lta ste dper na de bzhin gshegs pa ni su la yang sdug pa'am mi

sdug pa mi mnga'o/ /de ci'i slad du zhes na/ bcom dan 'das shes rab kyi pha rol tu phyin pa la rnam par tog pa ma mchis pa nyed kyi slad du 'o/ /bcom ldan 'das ci ltar de bzhin gshegs pas rtog pa dang rnam par rtog pa thams cad spangs pa de bzhin du/ bcom ldan

'das shes rab kyi pha rol tu phyin pa yang rtog pa dang rnam par rtog pa thams cad spang pa lags so/ /bcom ldan 'das 'di lta ste dper na de bzhin gshegs pa dgra bcom pa yang dag par rdzogs pa'i sangs rgyas kyis sprul pa pang mngon par sprul ba de 'di snyam du bdag ni bla na

med pa yang rag par rdzogs pa'i byang chub dang nye bar gyur te nyan thos dang rang sangs rgyas kyis ni bdag dan rgyang ring do zhes mi sems so/ /de ce'i slad du zhe na/ bcom ldan 'das sprul pa la rnam par rtog pa ma mchis pa'i slad du ste/ bcom ldan das de bzhin du byang chub

sems dpa' sems dpa' chen po shes rab kyi pha rol tu phyin pa la spyod pa yang 'di snyam du bdag ni bla na med pa yang dag par rdzogs pa'i yang chub dang nye bar gyur te nyan thos kyi sa dang rang sangs rgyas kyi sa ni bdag dang rgyad ring do zhes mi sems so/ /de ci'i slad du zhe na/ bcom ldan

@240a */ /'das shes rab kyi pha rol tu phyin pa la rnam par rtog pa ma mchis pa'i slad du'o/ /bcom dan 'das 'di lta ste dper na sprul pa de bgyi ba gang bgyi ba'i slad du sprul pa'i bgyi pa de yang bgyid la sprul pa de yang rnam par rtog pa ma mchis so/ /de ci'i slad du zhes na/

sprul pa de la rnam par rtog pa ma mchis pa'i slad du ste/ bcom ldan 'das de bzhin du byang chub sems dpa' sems dpa' chen po yang bgyi ba gang bgyi ba'i slad du shes rab kyi pha rol tu phyin pa 'di bsgom par bgyi ba de yang bgyid la shes rab kyi pha rol tu phyin pa de yang rnam par rtog pa ma

mchis so/ /de ci'i slad du zhe na/ bcom ldan 'das shes rab kyi pha rol tu phyin pa la rnam par rtog pa ma mchis pa'i slad du'o/ /bcom ldan 'das 'di lta ste dper na sheng mkhan mkhas pa 'am shing mkhan gyi slob mas shing las bgyis ba'i skyes pa 'am bud med kyi 'khrul 'khor

sbyar ba bgyis na/ de bgyi ba gang bgyi ba'i slad du bgyis pa'i bgyi bde bgyid kyang shing gi tshogs de ni rnam par rtog pa ma mchis so/ /de ci'i slad du zhe na/ bcom ldan 'das shing gi tshogs de la rnam par rtog pa ma mchis pa'i slad du ste/ bcom ldan 'das de bzhin du byang chub

sems dpa' sems dpa' chen po yang bgyi ba gang bgyi ba'i slad du shes rab kyi pha rol tu phyin pa 'di bsgom pa bgyi bde yang bgyid la shes rab kyi pha rol tu phyin pa de yang rnam par rtog pa ma mchis so/ /de ci'i slad du zhe na/ bcom ldan 'das shes rab kyi pha rol tu phyin pa la

rnam par rtog pa ma mchis pa'i slad du'o/ /'phags pa shes rab kyi pha rol tu phyin pa brgyad stong pa las sgyu ma lta bu'i le'u zhes bya ste nye shu drug pa'o// //de nas tshe dang ldan pa sh'a ri'i bus tshe dang ldan pa rab 'byor la 'di skad ces smras so/ /tshe dang ldan pa rab

'byor kye ma byang chub sems dpa' sems dpa' chen po gang shes rab kyi pha rol tu phyin pa la spyod pa ni snying po la spyod do/ /de skad ces smras pa dang/ tshe dang ldan pa sh'a ri'i bu la 'di skad cis smras so/ /tshe dang ldan pa sh'a ri'i bu kyi ma byang chub sems dpa'

@240b sems dpa' chen po gang shes rab kyi pha rol tu phyin pa la spyod pa ni snying pa ma yin pa la spyod pa'o/ /de nas 'dod pan spyod pa'i lha'i bu stong phrag mang po rnams 'di snyam du sems te gang dag bla na med pa yang dag par rdzogs pa'i byang chub tu sems bskyed nas mngon par bsgrub

pa'i sems can de dag ni phyag phya pa yin no/ /gang dag shes rab kyi pha rol phyin pa zab mo 'di la spyod cing de ltar sbyod kyang 'di lta ste nyan thos kyis 'am rang sangs rgyas kyi sar yang dag pa'i mtha' mngon sum du mi byed pa dang gang chos rnams kyi chos nyid spyod kyang chos nyid mngon sum

du mi byed pa'i rnam grangs 'dis kyang byang chub sems dpa' sems dpa' chen po rnams dka' ba byed pa yin par rig par bya'o/ /de nas tshe dang ldan par rab 'byor gyis 'dod ba na sbyod pa'i lha'i bu stong phrag mang po de dag gi sems kyi rtog pa sems kyis shes nas 'dod pa nan spyod pa'i lha'i

bu stong phrag mang po de dag la smras pa/ lha'i bu dag gang dag yang dag pa'i mtha' de mngon sum du mi byed pa'i byang chub sems dpa' sems dpa' chen po de dag ni dka' ba byed ba ma yin gyi/ /lha'i bu rnams gang gi tshe sems can gzhal tu med grangs med pa rnams yongs su mya ngan

las bzla bar bya'o/ /snyam du go cha bgos pa'i byang chub sems dpa' sems dpa' chen po de dag ni dka' ba byed pa yin mchog tu dka' byed pa yin te/ sems can rnams ni dben pa'i phyir sems can de dag kyang shin tu yang dag par med de yang dag par med pas dmigs su

med do/ /de bzhin du gdul bar bya ba rnams shin tu yang dag par med de yang dag par med pas de dag dmigs su med do/ /de ltar na byang chub sems dpa' sems dpa' chen po rnams sems can rnams gdul bar bya'o snyam nas bla na med pa yag dag par rdzogs pa'i byang chub

tu mngon par rdzogs par 'tshang rgya bar yang dag par zhugs pa'o/ /lha'i bu dag gang sems can rnams gdul bar bya'o snyam du sems pa de ni nam mkha' gdul bar bya'o snyam du sems pa'o/ /de ci'i phyir zhe na/ lha'i bu dag nam mkha' dben pa'i phyir sems can

@241a */ /rnams dben par rig par bya'o/ /lha'i bu dag byang chub sems dpa' sems dpa' chen po gang sems can rnams yang dag par med cing dmigs su med pa rnams kyi phyir go cha bgos na rnam grangs 'dis dka' ba byed pa yin no/ /lha'i bu dag gang sems

can rnams kyi phyir go cha bgo bar bya'o snyam du sems pa de ni nam mkha' dang lhan cig rtsod par ba'o snyam du sems pa'o/ /byang chub sems dpa' sems dpa' chen pos sems can rnams kyi phyir go cha 'di bgos pa yin no/ /de yang sems can de dag kyang shin tu dmigs pa med

par de bzhin gshegs pa dgra bcom pa yang dag par rdzogs pa'i sangs rgyas kyis gsungs te de yang sems can dben pa'i phyir de ltar rig par bya'o/ /de ltar gdul bar bya ba dben pa'i phyir byang chub sems dpa' dben par rig par bya'o/ /gal te 'di ltar bshad

pa 'di la byang chub sems dpa' sems dpa' chen po zhum par ma gyur na lha'i bu dag byang chub sems dpa' sems dpa' chen po de ni shes rab kyi pha rol tu phyin pa la spyod pa yin par rig par bya'o/ /de ci'i phyir zhe na/ sems can dben pa'i phyir gzugs dben par rig par bya'o//

de bzhin du sems can dben pa'i phyir tshor ba dang 'du shes dang 'du byed rnams dben pa dang sems can dben pa'i phyir rnam par shes pa dben par rig par bya'o/ /de bzhin du sems can dben pa'i phyir chos thams cad kyi bar du dben par rig par bya'o; ? /lha'i bu dag de ltar na chos

thams cad dben pa nyid du blta'o/ /lha'i bu dag de ltar chos thams cad dben pa nyid du bshad ba la byang chub sems dpa' sems dpa' chen po zhum par mi byed na/ 'di ltar zhum par mi byed pa de'i phyir shes rab kyi pha rol tu phyin pa la spyod pa'o/ /de nas bcom ldan 'das kyis

mkhyen bzhin du tshe dang ldan pa rab ? 'byor la bka' stsal pa/ rab 'byor ci'i phyir de ltar chos thams cad dben pa nying du bshad pa la byang chub sems dpa' sems dpa' chen po zhum par mi byed/ rab 'byor gyis gsol ba/ bcom ldan 'das dben ba'i slad du zhum par mi bgyid do/ /

@241b bcom ldan 'das rgyu 'dis byang chub sems dpa' sems dpa' chen po chos thams cad dben pa nying du bshad pa la zhum par mi bgyid do/ /bcom ldan 'das chos gang la yang zhum par 'gyur ba ma mchis so/ /de ci'i slad du zhe na/ bcom ldan 'das gang zhum par 'gyur ba'i

chos de dag ni gang yang dmigs su ma mchis te/ bcom ldan 'das chos gang gis chos gang zhum par 'gyur ba'i chos de yang dmigs su ma mchis so/ /bcom ldan 'das kyis bka' stsal pa/ rab 'byor de de bzhin no de de bzhin te/ rab 'byor 'on kyang gal te de skad

du brjod pa dang bshad pa dang bstan pa dang de ltar nye bar bstan pa la byang chub sems dpa' sems dpa' chen po zhum par mi 'gyur/ bag mi cha bag tsha ba dang mi ldan kun tu mi zhum yang dag par mi zhum yid phyir phyogs par mi byed bcom zhing phyir phyogs par mi byed/ mi dang nga kun tu

mi skrag kun tu skrag pa dang mi ldan na/ shes rab kyi pha rol tu phyin pa la spyod ba'o/ /rab 'byor gyis gsol pa/ bcom ldan 'das de de bzhin no/ /bde bar gshegs pa de de bzhin te/ bcom ldan 'das gal te byang chub sems dpa' sems dpa' chen po de ltar spyod na

shes rab kyi pha rol tu phyin pa la spyod do/ /de ltar spyod pa'i byang chub sems dpa' sems dpa' chen po la dbang po dang bcas pa'i lha rnams dang tshangs pa dang bcas pa dang skye dgu'i bdag po dang bcas pa dang dbang ldan dang bcas pa dang drang sreng dang bcas pa dang skyes pa dang bud med kyi

tshogs rnams kyis rgyang ma nas thal mo sbyar te phyag 'tshal par 'gyur ro/ /bcom ldan 'das kyis bka' stsal pa/ rab 'byor de ltar spyod pa'i byang chub sems dpa' sems dpa' chen po la dbang po dang bcas pa'i lha rnams dang tshangs pa dang bcas pa dang skye dgu'i bdag po dang

bcas pa dang dbang ldan dang bcas pa dang drang srong dang bcas pa dang skyes pa dang bud med kyi tshogs rnams 'ba' zhig rgyang ma nas thal mo sbyar te phyag 'tshal bar 'gyur bar ma zad kyi/ rab 'byor tshangs ris kyi lha rnams dang tshangs pa mdun na 'don dang / tshangs pa kun 'khor dang

@242a */ /tshangs pa chen po dang / 'od chung dang tshad med 'od dang 'od gsal dang / dge chung dang tshad med dge dang dge rgyas dang / sprin med dang bsod nams 'phel dang 'bras bu che ba dang / 'du shes med pa'i sems can rnams dang / mi che ba dang mi gdung ba dang gya nom

snang dang shin tu mthong dang 'og min gyi lha gang nga g.yod ba de dag kyang rab 'byor byang chub sems dpa' sems dpa' chen po shes rab kyi pha rol tu phyin pa nyid la spyod pa la phyag 'tshal bar 'gyur ro/ /rab 'byor yang 'jig rten gyi khams gzhal du med grangs med pa dag na de bzhin

gshegs pa dgra bcom pa yang dag par rdzogs pa'i sangs rgyas gang dag da ltar bzhugs te 'tsho zhing gzhes pa'i sangs rgyas bcom ldan 'das de dag kyang shes rab kyi pha rol tu phyin pa la de ltar spyod pa'i byang chub sems dpa' sems dpa' chen po la sangs rgyas kyi sbyan gyis

gzigs te/ rab 'byor de dag gis byang chub sems dpa' sems dpa' chen po shes rab kyi pha rol tu phyin pa la spyod pa de la phan 'dogs shing dgongs par mdzad do/ /rab 'byor yang byang chub sems dpa' sems dpa' chen po gang dag shes rab kyi pha rol tu phyin pa la spyod pa

de dag la de bzhin gshegs pa dgra bcom pa yang dag par rdzogs pa'i sangs rgyas rnams phan 'dogs shing dgongs par mdzad de/ rab 'byor byang chub sems dpa' sems dpa' chen po de dang de dag ni bla na med pa yang dag par rdzogs pa'i byang chub las phyir mi ldog par gzung bar

bya'o/ /de dag la bdud ngam gzhan dag gi bar chad 'byung bar mi 'gyur ro/ /de ci'i phyir zhe na/ rab 'byor snyong gsum gyi stong chen po'i 'jig rten gyi khams na sems can ci snyed yod pa de dag thams cad bdud sdig can du gyur la bdud sdig can de dag re res kyang de snyed kyi bdud kyi

sde mngon par sprul kyang rab 'byor bdud sdig can de dag gis byang chub sems dpa' sems dpa' chen po sangs rgyas kyis dgongs shing shes rab kyi pha rol tu phyin pa la spyod pa de la bla na med pa yang dag par rdzogs ba'i byang chub las bar chad bya bar mi nus so/ /rab 'byor yang stong

@242b gsum gyi stong chen po'i 'jig rten gyi khams kyi sems can thams cad bdud sdig can du gyur pa lta zhog /rab 'byor stong gsum gyi stong chen po'i 'jig rten gyi khams gang g'a'i klung gi bye ma snyed dag na sems can ci snyed yod pa de dag thams cad kyang bdud sdig can du gyur

bdud sdig can de dag re res kyang bdud kyi sde de snyed mngon par sbrul kyang rab 'byor bdud sdig can de dag gis byang chub sems dpa' sems dpa' chen po sangs rgyas kyis dgongs shing shes rab kyi pha rol tu phyin pa la spyod pa de la bla na med pa yang dag par rdzogs pa'i byang chub las bar

chad bya bar mi nus so/ /rab 'byor byang chub sems dpa' sems dpa' chen po chos gnyis dang ldan na/ bdud sdig can rnams sam 'dud kyi ris kyi lha rnams kyis de'i tshe thub par dka' ba yin te/ gnyis po gang zhen/ 'di lta ste des sems can thams cad yongs su

ma btang ba yin/ nges chos thams cad stong pa nyid du rtogs pa yin te/ rab 'byor chos de gnyis dang ldan pa'i byang chub sems dpa' sems dpa' chen po ni bdud sdig can rnams sam bdud kyi ris kyi lha rnams kyis thub par dka' ba yin no/ /rab 'byor byang chub sems

dpa' sems dpa' chen po chos gnyis po gzhan dang ldan na bdud sdig can rnams sam bdud kyi ris kyi lha rnams kyis thub par dka' ba yin te/ gnyis po gang zhe na/ 'di lta ste/ ci skad du smras pa de bzhin byed pa yin/ sangs rgyas bcom ldan 'das rnams kyis dgongs

pa yin te/ /rab 'byor byang chub sems dpa' sems dpa' chen po chos de gnyis dang ldan pa ni bdud sdig can rnams sam bdud kyi ris kyi lha rnams kyis thub par dka' ba yin no/ /rab 'byor de ltar spyod pa'i byang chub sems dpa' sems dpa' chen po la lha rnams kyang nye bar 'ong

bar sems par 'gyur/ nye bar 'ongs nas kyang yongs su 'dri bar sems/ yongs su dri bar bya bar sems/ bsnyen bkur bya bar sems so/ /de la spro ba yang skyed par byed de/ rigs kyi bu khyod myur du bla na med pa yang dag par rdzogs pa'i byang chub mngon par rdzogs par

@243a */ /'tshang rgya bar 'gyur gyis/ rigs kyi bu khyod de lta bas na 'di lta ste/ shes rab kyi pha rol tu phyin pa'i gnas pa'i gnas ba 'di nyid kyis gnas par bya'o/ /de ci'i phyir zhe na/ rigs kyi bu khyod da ltar gnas pa de nyid kyis gnas shing de ltar spyod na sems

can mgon med pa rnams kyi mgon du 'gyur/ sems can skyob pa med pa rnams kyi skyob bar 'gyur/ sems can skyabs med pa rnams kyi skyabs su 'gyur/ sems can gnas med pa rnams kyi gnas su 'gyur/ sems can dpung gnyen med pa rnams kyi dpung gnyen du 'gyur/

sems can gling med pa rnams kyi gling du 'gyur/ sems can ldongs pa rnams kyi snang bar 'gyur/ sems can yongs su 'dren pa med pa rnams kyi yongs su 'dren par 'gyur/ sems can rten med pa rnams kyi rten du 'gyur/ sems can lam las rab tu nyams pa rnams dang

nges par 'byung ba med pa rnams kyi lam gyi dam pa dang nges par 'byung bar 'gyur ro zhes/ lha'i bu de dag de ltar byang chub sems dpa' sems dpa' chen po de la spro ba skyed do/ /de ci'i phyir zhe na/ rab 'byor 'jig rten gyi khams gzhal du med pa bgrang du med pa dag na sangs

rgyas bcom ldan 'das gang dag nyan thos kyi dge 'dun gyis yongs su bskor cing byang chub sems dpa'i dge 'dun gyis mdun du byas nas bzhugs te 'tsho zhing gzhes pa'i sangs rgyas bcom ldan 'das de dag kyang shes rab kyi pha rol tu phyin pa'i gnas pa 'dis gnas pa'i byang

chub sems dpa' sems dpa' chen po shes rab kyi pha rol tu phyin pa la spyod cing 'di lta bu'i rang bzhin gyi yon tan 'di dag dang ldan pa ste 'di lta ste shes rab kyi pha rol tu phyin pa la gnas pa'i yon tan dang ldan pa'i ming dang rus dang stobs dang kha dog dang gzugs yongs su sgrogs

pa'i tshul gyis chos ston cing byang chub sems dpa' sems dpa' chen po de la ched du brjod pa yang ched du rjod ba mdzad do/ /rab 'byor 'di lta ste dper na da ltar nga nyid byang chub sems dpa' sems dpa' chen po rin po che'i tog dang byang chub sems dpa' sems dpa' chen po gtsug

@243b phud can dang byang chub sems dpa' sems dpa' chen po gzhan gang dag da ltar de bzhin gshegs pa dgra bcom pa yang dag par rdzogs pa'i sangs rgyas mi bskyod pa'i drung na tshangs par spyad ba spyod pa dag gi ming dang rus dang stobs dang kha dog dang gzugs yongs su sgrogs pa'i tshul

gyis chos ston cing ched du brjod pa yang ched du rjod pa dang de bzhin du rab 'byor sangs rgyas bcom ldan 'das de dag kyang da ltar nga'i sangs rgyas kyi zhing na byang chub sems dpa' sems dpa' chen po gang dag changs par spyad pa spyod cing shes rab kyi pha rol tu phyin pa'i gnas pa 'dis gnas

ba'i byang chub sems dpa' sems dpa' chen po de dag gi ming dang rus dang stogs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod do/ /rab 'byor gyis gsol pa/ bcom ldan 'das ci sangs rgyas bcom ldan 'das de

dag byang chub sems dpa' sems dpa' chen po thams cad kyi ming dang rus dang stobs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod dam/ bcom ldan 'das kyis bka' stsal pa/ rab 'byor de ni ma yin te/ rab

'byor sangs rgyas bcom ldan 'das de dag byang chub sems dpa' sems dpa' chen po thams cad kyi ming dang rus dang stobs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod pa ma yin no/ /rab 'byor 'on kyang sangs rgyas

bcom ldan 'das de dag ni gang dag phyir mi ldog pa'i byang chub sems dpa' sems dpa' chen po chags pa thams cad dang bral ba de dag gi ming dang rus dang stobs dang kha dog dang bzugs yongs su sgrogs pa'i tshul gyis chos ston cing ched du brjod pa yang ched du rjod do/ /rab 'byor

gyis gsol pa/ bcom ldan 'das sangs rgyas bcom ldan 'das kyis byang chub sems dpa' sems dpa' chen po phyir mi ldog pa rnams ma gtogs par de ma lags pa'i byang chub sems dpa' sems dpa' chen po gzhan gyi ming dang rus dang stobs dang kha dog dang gzugs yongs

@244a */ /su sgrogs ba'i tshul gyis chos ston cing ched du brjod pa yang ched du rjod par mdzad pa mchis sam/ bcom ldan 'das kyis bka' stsal pa/ rab 'byor byang chub sems dpa' sems dpa' chen po phyir mi ldog pa rnams ma gtogs par sangs rgyas bcom ldan

'das de dag gang gi ming dang rus dang stobs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod pa'i gang zag byang chub sems dpa'i theg pa pa gnyen po'i stobs can de dag ni yod do/ /de dag kyang gang zhe na/ gang da ltar de bzhin

gshegs pa dgra bcom pa yang dag par rdzogs pa'i sangs rgyas mi bskyod pa'i byang chub sems dpa' spyod ba'i rjes su slob pa'i tshul du byang chub sems dpa'i spyad pa spyod cing rjes su slob pa'i tshul du gnas pa rnams te/ rab 'byor 'di dag ni byang chub sems dpa' sems dpa' chen po phyir

mi ldog pa rnams ma gtogs par sangs rgyas bcom ldan 'das de dag gis gang gi ming dang rus dang stobs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod pa'i byang chub sems dpa'i theg pa pa'i gang zag yin no/ /rab 'byor

yang gang dag byang chub sems dpa' sems dpa' chen po rin po che'i tog gi byang chub sems dpa'i spyod ba'i rjes su slob ba'i tshul du byang chub sems dpa'i spyad pa spyod cing de rjes su slob ba'i tshul du gnas pa rnams te/ rab 'byor 'di dag kyang byang chub sems dpa' sems

dpa' chen po phyir mi ldog pa rnams ma gtogs par sangs rgyas bcom ldan 'das de dag gang gi ming dang rus dang stobs dang kha dog dang gzugs yongs su sgrogs ba'i tshul gyis chos ston cing ched du brjod pa yang ched du rjod pa yin no/ /rab 'byor gzhan yang byang chub sems

dpa' sems dpa' chen po gang dag shes rab kyi pha rol tu phyin pa la spyod cing chos thams cad mi skye ba'o zhes de ltar mos lad dung mi skye ba'i chos la bzod bam thob par gyur pa dang / chos thams cad zhi ba'o zhes mos la chos thams cad la phyir mi ldog pa'i dbang thob cing non par

@244b ma gyur ba ste sangs rgyas bcom ldan 'das de dag gis ni gnas pa 'dis gnas pa'i byang chub sems dpa' sems dpa' chen po de dag gi yang ming dang rus dang stobs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod do/ /rab

'byor gzhan yang sangs rgyas bcom ldan 'das de dag gis byang chub sems dpa' sems dpa' chen po gang dag gi ming dang rus dang stobs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod pa de dag na nyin thos kyis dang rang sangs

rgyas kyis spangs pa yin zhing / de dag gis ni sangs rgyas kyis nyid la re bar bya ste/ de dag kyang bla na med pa yang dag par rdzogs pa'i byang chub tu lung ston par 'gyur ro/ /de ci'i phyir zhen/ rab 'byor sangs rgyas bcom ldan 'das de dag gis byang chub sems dpa' sems

dpa' chen po gang dag de ltar shes rab kyi pha rol tu phyin pa la spyod pa de dag gi ming dang rus dang stobs dang kha dog dang gzugs yongs su sgrogs pa'i tshul gyis chos ston cing ched du brjod pa yang ched du rjod pa de dag kyang phyir mi ldog pa nyid la gnas par 'gyur ro/ /rab 'byor gzhan

yang byang chub sems dpa' sems dpa' chen po gang dag shes rab kyi pha rol tu phyin pa zab mo 'di bshad pa thos nas mos par byed cing rmongs par mi 'gyur nem nur mi byed the tshom ma zi ste/ ci ltar de bzhin gshegs pa dgra bcom pa yang dag par rdzogs pa'i sangs rgyas kyis bshad

ba de bzhin no zhes mos nas rgyas par mnyan cing 'di snyam du bdag gis shes rab kyi pha rol tu phyin pa 'di de bzhin gshegs pa dgra bcom pa yang dag par rdzogs pa'i sangs rgyas mi bskyod pa dang gang dag de'i sangs rgyas kyi zhing na tshangs par spyad pa spyod pa'i gang zag byang chub sems

dpa'i theg pa ba de dag gi thad nas rgyas par nyan te snyam du sems skyed par 'gyur ro/ /de dag gi thad nas kyang shes rab kyi pha rol tu phyin pa 'di nyid mnyan nas mos par 'gyur te de dag kyang shes rab kyi pha rol tu phyin pa 'di la mos pa na ji ltar de bzhin gshegs pas gsungs pa de

@245a */ /bzhin du mos te de ltar mos pas phyir mi ldog pa nyid la gnas par 'gyur ro/ /rab 'byor de ltar shes rab kyi pha rol tu phyin pa'i tshul 'di thos pa yang byed pa mang ba yin par bstan na/ gang dag mos par byed cing mos nas kyang de bzhin nyid kyi don du gnas shing de bzhin

nyid kyi don du sgrub pa dang de bzhin nyid kyi don du gnas shing de bzhin nyid kyi don du bsgrubs nas kyang/ de bzhin nyid la gnas par gyur pa dang thams cad mkhyen pa nyid la gnas par gyur nas chos ston pa lta smos kyang ci dgos/ rab 'byor gyis gsol pa/ bcom ldan 'das

gang gi tshe de bzhin nyid ma gtogs par chos gzhan dmigs sum mchis na bcom ldan 'das de'i tshe chos gang zhig de bzhin nyid la gnas par 'gyur/ gang zhig bla na med pa yang dag par rdzogs pa'i byang chub mngon par rdzogs par 'tshang rgya bar 'gyur gang zhig chos 'di

ston par 'gyur/ de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor gang 'di skad du gang gi tshe de bzhin nyid ma gtogs par chos gzhan gang yang dmigs su med na de'i tshe chos gang zhig de bzhin nyid

la gnas par 'gyur gang zhig bla na med pa yang dag par rdzogs pa'i byang chub mngon par rdzogs par 'tshang rgya bar 'gyur gang zhig chos 'di ston par 'gyur zhes smras pa ni/ rab 'byor de bzhin nyid ma gtogs par chos gzhan gang de bzhin nyid la gnas par 'gyur ba'i chos gang

yang dmigs su med do/ /rab 'byor re zhig de bzhin nyid de nyid dmigs su med na gang de bzhin nyid la gnas bar 'gyur ba lta ci smos/ rab 'byor de bzhin nyid bla na med pa yang dag par rdzogs pa'i byang chub mngon par rdzogs par 'tshang mi rgya ste/ rab 'byor gang bla na med pa

yang dag par rdzogs pa'i byang chub mngon par rdzogs par sangs rgyas pa'am mngon par rdzogs par 'tshang rgya bar 'gyur ba'am mngon par rdzogs par 'tshang rgya ba'i chos de ni gang yang dmigs su med do/ /rab 'byor de bzhin nyid ni chos mi ston to/ /rab 'byor chos gang bstan

@245b par bya ba'i chos de yang dmigs su med do/ /de nas bcom ldan 'das la lha rnams kyi dbang po brgya byin gyis 'di skad ces gsol to/ /bcom ldan 'das shes rab kyi pha rol tu phyin pa ni zab po/ /bcom ldan 'das gang dag bla na med pa yang dag par rdzogs pa'i byang chub mngon par

rdzogs par 'tshang rgya bar 'tshal pa'i byang chub sems dpa' sems dpa' chen po dag ni dka' ba bgyid pa lags so/ /de ci'i slad du zhe na/ bcom ldan 'das de bzhin nyid la chos gang yang gnas pa ma mchis la bla na med pa yang dag par rdzogs pa'i byang chub mngon par rdzogs par

'tshang rgya ba'i chos kyang gang yang ma mchis chos ston pa yang gang yang ma mchis ba dang 'di la de zhum par mi 'gyur nem nur mi bgyid rmongs par yang mi 'gyur ba'i slad du'o/ /de nas tshe dang ldan pa rab 'byor gyis lha rnams kyi dbang po brgya byin la 'di skad ces smras so/ /kO shi ka gang

'di skad du gang dag chos zab mo 'di lta bu bshad pa la nem nur mi byed pa dang rmongs par mi 'gyur ba'i byang chub sems dpa' sems dpa' chen po dag ni dka' ba byed pa'o zhes zer ba/ kO shi ka chos thams cad stong pa na 'di la su zhig nem nur byed cing rmongs par 'gyur/ brgya byin gyis

smras pa/ 'phags pa rab 'byor gyis gang dang gang bshad pa de dang de ni stong pa nyid las brtsam te gshad pas ci la yang thogs pa med do/ /'di lta ste dper na bar snang la mda' 'phags na ci la yang thogs pa med do/ /de bzhin du 'phags pa rab 'byor gyis chos bstan

pa yang ci la yang thogs pa med do/ /de nas bcom ldan 'das la lha rnams kyi dbang po brgya byin gyis 'di skad ces gsol to/ /bcom ldan 'das gang yang bdag gis gnas brtan rab 'byor las brtsam te 'di skad du bshad cing 'di skad cu bstan pa de bzhin gshegs pas

gsungs pa bzhin smras ba lags sam chos smra ba 'am mchos dang rjes su mthun pa'i chos lung bstan pas lung ston pa lags sam/ de skad ces gsol pa dang / bcom ldan 'das kyis lha rnams kyi dbang po brgya byin la 'di skad ces bka' stsal to/ /kO shi ka gang khyod kyis de ltar

@246a */ /bshad pa de de bzhin no/ /kO shi ka de de bzhin te/ 'di skad du bshad cing 'di skad du bstan pa de ni de bzhin gshegs pas gsungs pa bzhin smra ba yin no/ /chos smra ba yin no/ /chos kyi rjes su mthun pa'i chos lung bstan pas lung ston pa yin no/ /

de ci'i phyir zhe na/ kO shi ka gnas brtan rab 'byor gang dang gang spobs par 'gyur pa de dang de ni kO shi ka stong pa nyid las brtsams te spobs so/ /de ci'i phyir zhe na/ kO shi ka gnas brtan rab 'byor ni shes rab kyi pha rol tu phyin pa yang re zhig yang dag par rjes su mi mthong zhing

mi dmigs na gang shes rab kyi pha rol tu phyin pa la spyod pa lta ga la yod/ byang chub nyid kyang re zhig mi dmigs na gang byang chub mngon par rdzogs par 'tshang rgya bar 'gyur ba lta ci smos/ thams cad mkhyen pa nyid kyang re zhig mi dmigs na yang gang thams cad mkhyen pa nyid

thob par 'gyur ba ltag la yod/ de bzhin nyid kyang re zhig mi dmigs na yang gang de bzhin gshegs par 'gyur ba lta ga la yod/ mi skye ba nyid kyang re zhig mi dmigs na yang gang mi skye ba mngon sum du byed par 'gyur ba ltag la yod/ byang chub sems dpa' nyid

kyang re zhig mi dmigs na yang gang byang chub mngon par rdzogs par 'tshang rgya bar 'gyur ba lta ga la yod/ stobs nyid kyang re zhig mi dmigs na yang gang stobs dang ldan par 'gyur ba ltag la yod/ mi 'jigs pa nyid kyang re zhig mi dmigs na yang gang mi 'jigs

par 'gyur ba lta ga la yod/ chos kho na re zhig mi dmigs na yang gang chos ston par 'gyur ba lta ga la yod/ kO shi ka gnas brtan rab 'byor ni chos thams cad dben par gnas pa dang chos thams cad mi dmigs par gnas pas gnas so/ /kO shi ka yang gnas brtan

rab 'byor gyi chos thams cad dben par gnas pa dang chos thams cad dmigs su med par gnas pa'i gnas pa gang yin pa 'dis ni/ kO shi ka byang chub sems dpa' sems dpa' chen po shes rab kyi pha rol tu phyin pa la spyod cing gnas pa'i brgya'i char yang nye bar mi 'gro'o/ /stong

@246b gi char yang brgya stong gi char yang bye ba'i char yang bye ba brgya'i char yang bye ba stong gi char yang bye ba brgya stong gi char yang nye bar mi 'phro'o/ /bye ba khrag khrig brgya stong gi char yang nye bar mi 'gro'o/ /grangs su yang nye bar mi 'gro'o/ /bgrang bar yang dper yang dbes bstan pa nye

bar yang rten du yang rgyur yang mi bzod do/ /kO shi ka byang chub sems dpa' sems dpa' chan po shes rab kyi pha rol tu phyin pa la spyod pa'i gnas pa'i gnas pa gang yin pa'i gnas pa 'di ni/ de bzhin gshegs pa'i gnas pa ma gtags par de ma yin pa'i gnas pa gzhan thams cad zil

gyis gnon to/ /kO shi ka 'di ni gnas pa de dag thams cad pas mchog ces bya'o dam pa zhes bya'o gtso ? bo zhes bya'o rab ces bya'o mchog rab ces bya'o gya nom pa zhes bya'o bla ma zhes bya'o bla na med pa zhes bya'o gong na med pa zhes bya'o mnyam pa med pa zhes bya'o me mnyam pa dang mnyam pa zhes

bya'o/ /byang chub sems dpa' sems dpa' chen po shes rab kyi pha rol tu phyin pa la spyod cing gnas pa'i gnas pa gang yin pa 'dis ni nyan thos dang rang sangs rgyas kyi gnas pa thams cad zil gyis gnon to/ /kO shi ka de lta bas na sems can thams cad kyi mchog tu phyin par 'dod pa dang

dam par phyin par 'dod pa dang gtso bor phyin par 'dod pa dang rab tu phyin par 'dod pa dang mchog rab tu phyin par 'dod pa dang gya nom par phyin par 'dod pa dang bla mar phyin par 'dod pa dang bla na med par phyin par 'dod pa dang/ gong na med par phyin par 'dod pa dang mnyam pa med par phyin par 'dod pa dang mi

mnyam ba dang mnyam par phyin par 'dod pa'i rigs kyi bu'am rigs kyi bu mos byang chub sems dpa' sems dpa' chen po gang dag shes rab kyi pha rol tu phyin pa la spyod cing gnas pa'i gnas 'dis gnas par bya'o/ /'phags pa shes rab kyi pha rol tu phyin pa brgyad stong pa las snying po'i le'u zhes bya ste nyi

shu rtsa bdun pa'o//