From Rangjung Yeshe Wiki - Dharma Dictionary
Jump to navigation
Jump to search
གཞོན་ནུ་ཤེས་རབ་ (1)
| Part of speech
|
མིང་ཚིག
|
| Definition
|
ཕྱི་ལོའི་དུས་རབས་བཅུ་གཅིག་པའི་སྟོད་དུ་སྐུ་འཁྲུངས། ཐོག་མར་བོད་ཡུལ་ནས་སློབ་གཉེར་མཛད། བསྟན་པའི་ཆོས་སྒོར་ཞུགས། རབ་བྱུང་དང་། དགེ་ཚུལ་སློང་གི་སྡོམ་པ་རྣམས་རིམ་གྱིས་བཞེས། འདུལ་བའི་ཆོས་གཞུང་བཅས་ལ་སྦྱང་བརྩོན་མཛད། ཁ་ཆེ་དང་། བལ་ཡུལ། རྒྱ་གར་སོགས་སུ་ཕེབས། པཎ་གྲུབ་མང་པོའི་ཞབས་ལ་གཏུགས། རྒྱ་གཞུང་དང་ལེགས་སྦྱར་གྱི་སྐད་ལ་ཕུལ་དུ་ཕྱིན་པའི་ལོ་ཙཱ་བ་ཞིག་ཡིན། བསྒྱུར་རྩོམ་ནི་བསྟན་འགྱུར་ལས་རལ་བ་གཅིག་མ་དམར་མོའི་བྱིན་བརླབས་ཀྱི་ཆོ་ག་དང་། ཡི་གེ་བརྒྱ་བ། ཡི་གེ་བརྒྱ་པའི་འགྲེལ་བ་བཅས་བཞུགས།
|
གཞོན་ནུ་ཤེས་རབ་ (2)
| Part of speech
|
མིང་ཚིག
|
| Definition
|
ཨ་དར་གྱི་བཙུན་མོ་ཆུང་བའི་སྲས་འབྲིང་པོ་ལུ་གུ་དང་ཡུམ་ལོ་མོ་གསལ་མོ་གཉིས་ཀྱི་སྲས་སུ། རབ་བྱུང་བཞི་པའི་ཆུ་མོ་ཡོས་ཕྱི་ལོ་ ༡༢༤༣ ལོར་སྐུ་འཁྲུངས། དགུང་ལོ་བཅུ་གསུམ་ལ་མཁན་པོ་གདན་སར་བཞུགས་པའི་མདུན་དུ་རབ་ཏུ་བྱུང་། མཚན་གཞོན་ནུ་ཤེས་རབ་བྱ་བ་བཏགས། དེ་ཉིད་ལས་འདུལ་བ་སོགས་མདོ་སྔགས་ཀྱི་ཆོས་མང་དུ་གསན། འབྲི་གུང་གཅུང་རིན་པོ་ཆེ་ལས་སེམས་བསྐྱེད་ཆོ་ག་སོགས་གསན། དེ་ནས་དགུང་ལོ་ཉི་ཤུ་ལ་གྲོ་སར་བྱོན་ནས་མཁན་པོ་རྣལ་འབྱོར་བྱང་སེམས་དྲུང་དུ་བསྙེན་པར་རྫོགས་པར་མཛད་ནས་སྡོམ་པ་གསུམ་གྱི་བླང་དོར་ལ་མཁས་པར་མཛད། བླ་མ་འཕགས་པ་ལས་ཀྱཻ་རྡོར་སོགས་གསང་སྔགས་ཀྱི་ཆོས་མང་དུ་གསན་ཞིང་། གཞན་ཡང་ཐོས་བསམ་ལ་ནན་ཏན་བརྩོན་པར་མཛད་ནས་རིག་པའི་གནས་ལྔ་ལ་མཁས་པའི་པཎྜི་ཏ་ཆེན་པོར་གྱུར། དེ་ནས་དགུང་ལོ་ཉེར་བརྒྱད་ལྕགས་ཕོ་རྟའི་ལོ་ལ་བྱང་འབའ་རོམ་གྱི་གདན་སར་བཞུགས། ཚོགས་མཆོད་ལ་སོགས་པའི་བསྟན་བཅོས་མང་དུ་བརྩམས། ཁམས་སུ་བྱོན་ནས་སྐུ་འབུམ་རྩར་ལོ་གསུམ་བཞུགས། སེམས་ཅན་མང་པོ་སྨིན་གྲོལ་ལ་བཀོད། ཡར་ཕྱག་ཕེབས་ནས་བྲག་གི་ལྷ་ཁང་སོགས་མཁར་ལེན་མང་དུ་མཛད་ཅིང་། ཆུ་སྐོར་བཙུགས། ཇོ་བོ་རིན་པོ་ཆེའི་སྐུ་ཚད་རང་བྱོན་མར་གྲགས་པ་དེ་བཞེངས་པའི་ནང་རྫོང་ལ་སངས་རྒྱས་ཀྱི་འཕེལ་གདུང་། ནཱ་རོ་པའི་ཕྱག་འཕྲེང་པདྨ་དམར་པོའི་ཕྲེང་བ་སོགས་རྟེན་ངོ་མཚར་ཅན་མང་དུ་བཞུགས། གཞན་ཡང་སྐུ་གསུངས་ཐུགས་ཀྱི་རྟེན་དང་གདན་ས་རིན་པོ་ཆེའི་ཆ་རྐྱེན་ནམ་མཁའ་མཛོད་ལ་མངའ་བརྙེས་པ་ལྟ་བུ་མཛད་པ་ཡིན། མངོན་པར་མཁྱེན་པ་ལ་ཡང་། ལྷ་ས་བཏབ་ནས་ལོ་བརྒྱ་དང་སྟོང་སོང་། བསམ་ཡས་བཏབ་ནས་ལོ་སྟོང་སོང་། འབའ་རོམ་བཏབ་ནས་ལོ་བརྒྱ་དང་སུམ་བཅུ་སོ་བདུན། སྟག་ལུང་བཏབ་ནས་ལོ་བརྒྱ་དང་བཅུ་སོང་། འབྲི་གུང་བཏབ་ནས་ལོ་བརྒྱ་དང་བཅུ་གསུམ་སོང་བ་ན། འབྲི་གུང་ཆོས་རྗེ་མེད་ལ་འགྲོ། དེའི་རྐྱེན་གྱིས་མི་མང་པོ་ཞིག་དམྱལ་བར་འགྲོ་བ་ཞིག་མཁྱེན། དེ་ལྟར་ལུང་བསྟན། དེ་ནས་ལོ་གཉིས་སོང་བ་ལྕགས་ཕོ་སྟག་གི་ལོ་ལ་འབྲི་གུང་མཐིལ་བསྲེགས། དབུས་གཙང་ཐམས་ཅད་མ་བདེ། དེའི་དུས་སུ་འབའ་རོམ་ལ་ཉེ་གྱོད་གང་ཡང་མ་བྱུང་། སླར་རྒྱལ་པོའི་བློན་པོ་འཇོལ་ཆེན་སོགས་མི་ཆེན་མང་པོ་ཡོན་བདག་ཏུ་གྱུར། འབུལ་བ་ཆེན་པོ་བྱུང་། གདན་ས་ལ་ལོ་བཞི་བཅུ་རྩ་གཅིག་བཞུགས་རིང་ལ་ཆོས་འཆད་རྩོད་རྩོམ་གསུམ་ལ་དུས་འདའ་བར་བསྟན་པ་རིན་པོ་ཆེ་དར་རྒྱས་མཛད་པ་ཡིན་ནོ། །དེ་ནས་དགུང་ལོ་དྲུག་བཅུ་རྩ་དགུ་པ་རབ་བྱུང་ལྔ་པའི་ལྕགས་ཕོ་ཕག་ཕྱི་ལོ་ ༡༣༡༡ ལོའི་ཟླ་བ་དང་པོའི་ཚེས་བཅུ་བདུན་ལ་ངོ་མཚར་གྱི་ལྟས་དང་བཅས་སྟེ་རིགས་པ་འཛིན་པའི་གནས་སུ་གཤེགས་སོ། །
|