mngon pa sde bdun

mngon pa sde bdun

bye brag smra ba rnams kyis sangs rgyas kyis gsungs pa'i bka' yin par 'dod pa dang/mdo sde pa yan chad kyis dgra bcom pa bdun gyis rang dbang du brtsams pa'i bstan bcos yin par 'dod pa'i gzhung bdun te/ji skad du/chos kyi phung po shA ri'i bus/_/gdags pa'i bstan bcos mo'u 'gal bus/_/khams kyis tshogs ni gang pos byas/_/rnam shes tshogs ni lha skyid kyis/_/ye shes la 'jug ka t+ya'i bus/_/rab tu dbye ba dbyig bshes kyis/_/yang dag 'gro ba'i rnam grangs ni/_/gsum po che yis byas zhes grags/_/zhes so/_/bye brag smra ba rnams kyis bdun po 'di dag bka' yin par 'dod de/bcom ldan 'das kyis chos rnams kyi rang dang spyi'i mtshan nyid 'thor bu'i tshul du gsungs pa rnams 'a ri'i bu sogs dgra bcom pa bdun gyis phyogs gcig tu bsdus pa'i phyir/dper na mdo sde dang/'dul ba lta bu'o/_/gal te de ltar ma yin na mdo las sde snod gsum zhes pa'i sde snod gsum mngon pa'i sde snod ma tshang bar 'gyur ba'i skyon yod zer/mdo sde pa yan chad kyis/mngon pa sde bdun po 'di dag bstan bcos las bka' yin par mi 'dod de/de'i nang 'dus ma byas dngos por bshad pas/'phags pa dag ni de ltar mi bzhed pa'i phyir dang/bcom ldan 'das kyi bka' la mngon pa'i sde snod ma tshang ba'i skyon yang yod pas ma yin te/mngon pa'i sde snod zur du med pa bden yang/mdo sde dang 'dul ba gnyis kyi nang na chos rnams kyi rang spyi'i mtshan nyid spyi khyab tu bstan pa'am gseb tshags rnams nas bstan pa'i phyir/'di dag dgra bcom pa de dag so sos rang dbang du brtsams pas bstan bcos yin par 'dod do/_/mngon pa sde bdun po de dag gi dgongs pa 'grel bar byed pa'i bstan bcos ni bye brag smra ba'i gzhung gi gtso bo (bye brag bshad mdzod chen mo )zhes bya ba de yin zhing/phyis slob dpon dbyig gnyen kyis gsan nas/bstan bcos de dag thams cad kyi brjod par bya ba'i snying po ma lus pa bsdus nas/theg pa dman pa'i lugs su (chos mngon pa mdzod kyi tshig le'ur byas pa )zhes bya ba gnas brgyad dang ldan pa'i bdag nyid can gyi bstan bcos chen po de mdzad do/_

{{#arraymap:mngon pa sde bdun

|; |@@@ | | }}