sku 'bum dgon

sku 'bum dgon

yongs grags su sku 'bum byams pa gling zhes 'bod pa de yin/deng sang mtsho sngon zhing chen mi dmangs srid gzhung gnas yul zi ling grong khyer gyi lho nub phyogs spyi la nyer lnga'i sar yod/dgos pa 'di nyid thog mar rje tsong kha pa dgu lo nyi shu rtsa gnyis la phabs skabs rab byung drug pa'i sa rta (1378)lor ma yum gyis rang nyid sku na bgres pa dang bcas rang yul du mjal phrad la phebs dgos pa'i zhu yig dang dbu skra dkar por song ba'i lan bu bcas bskur gnang mdzad par/rang yul phyogs su phebs rgyu dgos pa chung bar gzigs te yum dang gcen mo gnyis la 'dra thang re dang/phyag bris re/rgyal ba seng ge nga ro'i sku dpar gcig /bde mchog gi bum sku bcas bskur gnang mdzad pa bzhin de'i phyi lo yum gyis thugs khur bzhes shing dad ldan mang pos rogs ram byas te/rje tsong pa kha chen po sku 'khrungs nas lte khrag bor ba'i sa gnas der shing tsan+da gyi sdom pa zhig skyes pa de nyid snying por bzhugs shing/rgyal ba seng ge nga ro'i sku brnyan 'bum gcig dpar du btab pa gzungs su phul ba'i mchod rten pad+ma spungs pa zhig bzhengs pa'i mtha' bskor du rdo rtsig gi rab bas bskor ba bcas yod pa'i steng du lha khang rdza g.yam gyi thog bkab pa gsar bzhengs gnang/rab byung bcu pa'i me glang (1577)lor sgom rin chen chen brtson 'grus rgyal mtshan gyis thugs khur bzhes te rgyal ba byams pa'i sku brnyan chen po zhig bzhugs pa'i byams khang gsar bzhengs gnang bcas lha khang snga rjes gnyis kyi gnas gzhi la brten nas sku 'bum byams pa gling zhes mtshan du grags/rab byung bcu pa'i chu lug (1583)lor tA la'i bla ma sku phreng gsum pa bsod nams rgya mtsho sog yul du phebs thengs rjes ma'i skabs zhing skyong nang sos gnas 'dir gdan drangs pa bzhin phebs te nyin shas ring sku mtshams su bzhugs pa'i gzims khang zhig kyang bzhengs shing/sgom rin chen chen brtson 'grub rgyal mtshan dang/tsho pa lnga'i nang sos gtsos pa'i sbyin bdag rnams la tshong kha'i yul gyi lte gnas 'dir dgon sde zhig tshugs na 'phral phugs legs tshul gyi bka' slob gnang ba ltar dang len zhus shing/rgyal ba rang nyid kyi 'dra thang/lha mo dmag zor ma'i rten thang/gnas chung chos skyong gi rten thang bcas gnang nas rab gnas stsal/zi na klu rgya'i sde pa'i khyim rgyud la gnas chung chos skyong khog phebs dgos pa'i dam bsgrags mdzad pa bzhin de nas mi rabs bcu gsum kyi bar du khog phebs byung/rab byung bcu pa'i sa byi (1588)lor rgyal dbang mchog gi bka' bzhin gser sdong byang chub mchod rten gyi dbyibs su bsgyur ba sogs skabs babs kyi dgos pa dmigs bsal can la brten bzo dbyibs 'gyur ba btang zhing/phyogs mtha'i nye skor dang/thag ring sog yul bcas nas slob gnyer phebs mi je mang du song ste grwa tshogs 'phel rgyan chen po byung bar brten ring bzhin mtshan nyid grwa tshang dpal ldan bshad sgrub gling dang/rgyud pa grwa tshang gsang sngags bde chen gling/gso rig grwa tshang gzhan phan nor bu'i gling/dus 'khor grwa tshang rigs ldan blo gsal gling/'chams pa grwa tshang bcas grwa tshang lnga byung/tshogs chen 'du khang yang khri thog bcu drug pa a kya shes rab bzang po'i skabs rab byung bcu gnyis pa'i sa sbrul (1689)lor ka ba brgyad cu'i bar rgya skyed btang zhing/de nas rab byung bcu gsum pa'i me sprel (1776)lor a kya rin po che blo bzang chos kyi nyi ma /sA sar tA la'i bla ma blo bzang chos dar bcas kyis mthun rkyen sbyong gnang gis p+sangar yod tshogs chen 'du khang la ka ba bdun cu don bzhi gsar du kha snon mdzad de ka ba brgya dang lnga bcu nga bzhi yod pa zhig tu rgya skyed gnang zhing/g.yas g.yon rgyab mdun rnams kyi lha khang dang/gzims khangs gong 'og /grwa tsang khag gi 'du khang/btsan khang/spyi so khang/dpar khang bcas rgya khyon spyi khre gru bzhi ma stong phrag 'ga' zhig yod/1 mtshan nyid grwa tshang dpal ldan bshad sgrub gling rab byung bcu pa'i chu yos (1603)lor tA la'i bla ma sku phreng bzhi pa yon tan rgya mtsho sog yul nas dbus su phebs pa'i lam bar dgon pa 'dir phebs skabs 'dul ba chos rje 'od zer rgya mtsho gdan sa'i khrir bskor gzhag thog /mtshan nyid grwa tshang zhig 'dzugs gos pa'i bka' phebs pa ltar rab byung bcu pa'i chu byi (1612)lor 'dul ba chos rjes thog mar bsdus chung/bsdus 'bring/bsdus chen/blo rigs/rtags rigs bcas rnam 'grel 'dzin grwa lnga dang/phar phyin 'dzin grwa gnyis yod pa'i mtshan nyid grwa tshang gsar du btsugs/de nas khri thog nyi shu rtsa gnyis pa stag 'tsher blo bzang rdo rje'i skabs dbu ma'i 'dzin grwa gsar 'dzugs gnang zhing/khri thog nyer brgyad pa chu bzang rin po che ngag dbang thub bat+na dbang phyug skabs phar phyin skabs bzhi pa'i 'dzin grwa gsar du btsugs pas phar phyin 'dzin grwa bzhi dang/dus tshon zhib khra ma gsal yang snga rjes su 'dul ba'i 'dzin grwa dang/mdzod kyi 'dzin grwa/dkar rabs 'dzin grwa bcas 'dzin grwa bcu gsum btsugs/lo gcig gi chos thog la dpyid chos sngon rjes gnyis la zla ba re re/dbyar chos zla ba gcig /dbyar nags chos thog zla ba gcig dang zla phyed/ston chos zla ba gcig /bar chos zhag bco lnga/dgun chos zla ba gcig bcas yod pa dang/slob khrid kyi yig cha thun mong ma yin pa rje btsun chos kyi rgyal mtshan dang 'jam dbyangs bzhad pa rnam gnyis kyi gsung rtsom spyi don dang mtha' dpyod rnams yin/khri thog nyi shu pa mkhan po no min han blo bzang don grub skabs rab byung bcu gnyis pa'i sa khyi (1718)lor lha sa smon lam chen mo'i phyag srol ltar smon lam rab 'byams pa'i dge bshes dam bca' 'jog srol btsugs yod/2 rgyud pa grwa tshang gsang sngags bde chen gling ni rab byung bcu gcig pa'i sa glang (1649)lor ki na chos rje legs pa rgya mtshos grwa pa sum cu so gnyis la slob khrid dang sbyong brdar mdzad de gsar 'dzugs gnang zhing/rjes su 'phel rgyas 'gro rgyur dgongs te rab byung bcu gnyis pa'i sa stag (1798)lor ka ba bzhi bcu zhe brgyad yod pa'i 'du khang gsar bzhengs thog /dbus kyi rgyud smad pa'i phyag srol ltar gyi 'don chog dang/chos 'chad nyan sogs kyi sgrig srol cha tshang ba'i steng du lcags mkhar zur dgu pa'i cho ga yang 'dzugs par mdzad pa dang/mkhan thog nyer drug pa mgon gya grags pa rgyal mtshan skabs sngar yod 'du khang ka ba zhe brgyad kyi steng du ka ba bcu gnyis gsar du bsnan nas ka drug cu bar rgya skyed mdzad/rab byung bcu bzhi pa'i me bya (1837)lor rgyud pa'i mkhan rabs zhe bdun pa ser sa mkhan chen dgon ma chog bstan 'dzin rgya mtsho'i skabs/rgyud smad grwa tshang gi phyag bzhes ltar gyi rab gnas dge legs char 'bebs kyi chog tshogs 'don du 'dzugs par mdzad yod/3 gso rig grwa tshang gzhan phan nor bu'i gling ni thog mar rab byung bcu gnyis pa'i lcags yos (1711)lor chu bzang rin po che blo bzang bstan pa'i rgyal mtshan gyis sngags pa grwa tshang zhig 'dzugs gnang mdzad kyang de nas lo bcu gnyis song ba'i chu yos (1723)lor mtsho sngon ching wang blo bzang bstan 'dzin gyis man ching gong ma'i srid gzhung la ngo log gi dus zing bslangs pa lhing 'jags gtong skabs sku 'bum gdon par gtor bshig chen po byung ba'i rkyen gyis grwa tshang rtse med du song rjes sku 'bum khri thog nyer gcig pa ser dris tshul khrims rin chen gyis rab byung bcu gnyis pa'i shing sbrul (1725)lor sngags pa grwa tshang de sman pa grwa tshang du bsgyur nas rtsa rgyud sogs rgyud bzhi la 'dzin grwa bzhi dang/lam rim 'dzin grwa gcig bcas khag lngar phye ste bod sman gyi rig pa'i gzhung lugs dang/lag len sbyor brdar/rgyugs sprod bcas kyi phyag srol cha tshang gsar 'dzugs gnang yod/4 dus 'khor grwa tshang rigs ldan blo gsal gling ni rab byung bcu bzhi pa'i me glang (1817)lor khri thog zhe lnga pa che shes rin po che ga dbang bshad sgrub bstan pa'i nyi ma'i skabs gra grangs nyi shu lhag tsam zhig la slob khrid sbyong brdar dang/'du khang gsar bzhengs bcas lo ngo gsum gyi ring legs par grub ste/khri thog zhe bdun pa gser tog rin po che ye shes thub bstan rgya mtsho'i skabs dus 'khor grwa tshang dngos su 'dzugs gnang mdzad pa yin/5 'chams pa grwa tshang ni khri thog nyi shu pa mkhan po no min han blo bzang don grub skabs rab byung bcu gnyis pa'i sa khyi (1718)lor tA la'i bla ma sku phreng bdun pa bskal bzang rgya mtsho sku 'bum du bzhugs pa'i go skabs dang bstun nas rtse rnam rgyal grwa tshang gi 'chams dpon zhig las 'chams khag 'ga' zhig bslab sbyangs byed du bcug ste 'chams pa grwa tshang gsar 'dzugs gnang ba zhig yin/dgon pa 'dir lha khang dang/gtsug lag khang/grwa shag bcas bsdoms pa'i khang mig dgu stong lhag tsam dang/lha khang gcig pu yang brgyad brgya lhag yod cing/dge 'dun zhal grangs mang ba'i dus su sum stong drug brgya tsam yod/dgon pa 'di nas bstan 'dzin gyi skyes chen grangs las 'das pa byon pa so so'i mdzad rnam da nga/lha khang khag gi nang sku gsung thugs rje gang dang gang yod/hos hos dang za lar gyi dmag 'khrug snga rjes skabs nyams rgud ji byung sogs zhib par gser tog rin po che blo bzang tshul khrims rgya mtshos mdzad pa'i (sku 'bum byams pa gling gi gdan rabs don ldan tshangs pa'i dbyangs snyan )mtsho sngon mi rigs dpe skrun khang gi lcags dkar ma der gzigs

{{#arraymap:sku 'bum dgon

|; |@@@ | | }}