Choying Dzo - Chapter 3

_ch 3_
//thams cad kun 'dus byang chub sems su 'dus/_
/byang chub sems las ma gtogs chos med pas/_
/chos kun byang chub sems kyi rang bzhin no/_
/byang chub sems kyi mtshon dpe nam mkha' 'dra/_
/sems la rgyu med skye ba'i yul med pas/_
/mi gnas brjod 'das bsam yul 'das pa nyid/_
/nam mkha'i dbyings zhes dpe ru mtshon pa tsam/_
/mtshon dpe nyid kyang 'di zhes byar med na/_
/mtshon dpe'i don la bsam brjod ga la srid/_
/'di ni rang bzhin dag pa'i dper shes bya/_
/don ni rang rig mkha' mnyam byang chub sems/_
/bsam pa'i yul min mtshon brjod 'das pa ste/_
/rang gsal mi g.yo 'od gsal yangs pa'i klong /_
/ma byas lhun grub yangs dog mtho dman med/_
/chos sku byang chub snying po'i dkyil yangs so/_
/rtags ni rtsal las cir yang 'char ba ste/_
/shar ba'i dus na shar sa shar mkhan med/_
/shar zhes ming tsam dpyad na nam mkha' 'dra/_
/ris med mnyam pa chen por 'ub chub pas/_
/phyam gdal gzung 'dzin med pa'i klong nyid do/_
/rang byung ye shes chos nyid phyogs yan la/_
/dpe don rtags kyi nges pa'i mtshon dpe bstan/_
/mkha' mnyam gzer chen gsum gyi bdag nyid du/_
/thams cad kun 'dus rang bzhin dbye bsal med/_
/phyam mnyam yangs pa chen po'i dbyings rum na/_
/thams cad ye mnyam snga phyi bar bsam med/_
/kun bzang rdo rje sems dpa'i dgongs pa'o/_
/byang chub sems ni nyi ma'i snying po 'dra/_
/ngang gis 'od gsal ye nas 'dus ma byas/_
/sgrib pa'i chos med zang thal lhun gyis grub/_
/spros pa'i tshogs med mi rtog chos nyid ngang /_
/stong pas choos sku gsal bas longs spyod rdzogs/_
/zer ldan sprul pa sku gsum 'du 'bral med/_
/ye nas yon tan lhun gyis grub zin pas/_
/skyon dang nyes cha'i mun pas bsgribs pa med/_
/snga phyi dus gsum 'pho 'gyur med par gcig_
/sangs rgyas sems can kun la khyab par gcig_
/'di ni rang byung byang chub sems zhes bya/_
/de yi rtsal ni cir yang 'char ba ste/_
/rtog dang mi rtog snang srid snod bcud dang /_
/skye 'gro'i snang ba sna tshogs ji snyed do/_
/'di kun shar yang rang bzhin 'ga' med de/_
/smig rgyu'i chu dang rmi lam sgra brnyan bzhin/_
/sprul pa gzugs brnyan dri za'i grong khyer dang /_
/mig yor ji bzhin med pa gsal snang du/_
/gzhi med rten med glo bur snang ba tsam/_
/bar skabs re 'ga'i chos su rtogs par bya/_
/lhun grub byang chub sems kyi rang bzhin las/_
/rol pa ma 'gags 'khor 'das cho 'phrul 'byung /_
/cho 'phrul de kun dbyings su 'ub chub pas/_
/gdod ma'i ngang las g.yos pa med shes bya/_
/'dir ni thams cad byang chub sems kyi ngang /_
/gcig rdzogs kun rdzogs ma byas don kun rdzogs/_
/rang bzhin lhun rdzogs rang byung ye shes so/_
/byang chub sems ni snang dang mi snang las/_
/'khor 'das phyi nang chos su med na yang /_
/de yi rtsal las g.yos pa'i rang bzhin gyis/_
/snang srid 'khor 'das sna tshogs rol par shar/_
/shar tsam nyid nas rang bzhin stong pa'i gzugs/_
/skye ba med las skye bar snang ba ste/_
/snang dus nyid nas skyes pa 'ga' yang med/_
/'gag pa med pa 'gag par snang na yang /_
/'gag pa med de sgyu ma stong pa'i gzugs/_
/gnas pa nyid nas gnas pa'i chos med de/_
/gnas mkhan gzhi med 'gro 'ong med pa'i ngang /_
/ji ltar snang ba de ltar ma grub pas/_
/rang bzhin med ces btags pa tsam du zad/_
/snang ba de yang rtsal las rang shar bas/_
/rten 'brel nyid ces rang bzhin brda tsam brdzod/_
/rtsal las shar bar snang ba'i rang dus nas/_
/shar dang ma shar phyogs dang ris med pas/_
/rtsal yang brda tsam ngo bo 'ga' med pas/_
/thams cad rtag tu 'pho 'gyur med pa'i ngang /_
/byang chub sems las g.yos pa rdul tsam med/_
/chos dbyings rin po che'i mdzod las/_
byang chub sems kyi mtshon dpe bstan pa'i le'u ste gsum pa'o//

back to Choying Dzo