བསྐལ་པ་བཟང་པོའི་སངས་རྒྱས་སྟོང།

_ch 8_
//thams cad dbyings gcig rang byung ye shes la/_
/gnyis su med pa ngo bo'i 'dug tshul te/_
/gnyis snang ma 'gags rtsal las rol par shar/_
/snang btags gnyis med byang chub sems zhes bya/_
/'pho 'gyur med pa'i rig pa byang chub la/_
/spangs thob med pa'i snang srid 'khor 'das shar/_
/gzung 'dzin med pa'i rnal 'byor ngo kha la/_
/med la snang 'di ya mtshan dgod po 'chor/_
/snang bar med la sna tshogs snang bar shar/_
/stong par med la mtha' dbus khyab par gdal/_
/gzung 'dzin med la nga bdag so sor zhen/_
/gzhi rtsa med la tshe rabs brgyud mar snang /_
/dgag sgrub med la bde sdug blang dor byed/_
/phar bltas skye 'gro'i snang ba mtshang re che/_
/mi bden bden par zhen pas bden bden 'dra/_
/ma 'khrul 'khrul par zhen pas 'khrul 'khrul 'dra/_
/nges med nges par bzung bas nges nges 'dra/_
/yin min yin par bzung bas yin yin 'dra/_
/mi 'thad 'thad par bzung bas 'thad 'thad 'dra/_
/sna tshogs col chung yul gyis sems khrid nas/_
/don med rig pa skad cig brgyud mar mthud/_
/nyin zhag zla ba lo dang mi tshe 'das/_
/gnyis med gnyis su bzung bas 'gro ba bslus/_
/rnal 'byor dag pa'i sems la tshur bltas pas/_
/rten gzhi med pa'i rig pa ming dang bral/_
/mtshon brjod ma mthong lta sgom khrigs chags bud/_
/phyal ba lhug pa yangs pa phyam gdal bas/_
/nyams len ma shes thun mtshams phyogs ris med/_
/thams cad rgya yan phyam phyam bar mtshams bral/_
/lus dang yul dang snang ba'i gtad med par/_
/nam mkha'i klong mnyam yangs par phyam gdal bas/_
/nang gi chos zhes bdag tu 'dzin pa med/_
/phyi rol snang ba'i yul la phar bltas pas/_
/thams cad sang seng 'al 'ol zang ma thal/_
/ra ri zab zeb bza' gtad chos dang bral/_
/snang grags dran rig myong tshor sngar bzhin med/_
/'di ci rang bzhin smyon pa'i snang ba'am/_
/rmi lam nang bzhin rang la dgod po 'chor/_
/dgra gnyen chags sdang nye ring 'du shes bral/
_/nyin mtshan ris med mnyam par phyam gcig pas/_
/dmigs gtad mtshan mar 'dzin pa'i 'khor ba sangs/_
/rang byung ye shes ngang zhes mi rtog pas/_
/blang dor spang gnyen gzeb las 'das pa yin/_
/'di ltar rtogs na gnyis med ye shes te/_
/rang byung kun tu bzang po'i dgongs par phyin/_
/ldog pa'i gnas med zad pa'i sar phyin te/_
/rang byung ngang las mnyam nyid ma rtogs par/_
/gnyis med nyid ces tshig la mngon zhen nas/_
/ci yang mi dmigs yid dpyod gdeng 'cha' ba/_
/log rtogs nyid de ma rig mun pa'i klong /_
/de phyir rang byung 'pho 'gyur med pa la/_
/bsam rdzogs rgyal po gnyis su med par sbyang /_
/khams gsum yongs grol 'khor 'das gnyis med don/_
/rang bzhin khong nas rang shar chos sku'i rdzong /_
/mkha' ltar rnam dag dpe las 'das pa 'byung /_
/'di dang 'di zhes so sor zhen pa'i bar/_
/gnyis su gnas par rang gzhan 'khrul pa'i gzeb/_
/gang tshe 'di zhes tha dad ris med cing /_
/thams cad phyam mnyam dmigs gtad med pa na/_
/gnyis med rtogs zhes rdo rje sems dpas gsungs/_
/chos dbyings rin po che'i mdzod las/_
byang chub kyi sems la gnyis su med par bstan pa'i le'u ste brgyad pa'o//

back to Choying Dzo