Clarifying the Natural State in Wylie

@@, phyag rgya chen po'i khrid yig chen mo gnyug ma'i de nyid gsal ba zhes bya ba bzhugs so,,


nges don phyag rgya chen po'i sgom khrid kyi rim pa gnyug ma'i de nyid gsal ba zhes bya ba,

bla ma dang dpal rdo rje 'chang la gus pas phyag 'tshal lo,

,chos dbyings stong nyid spros bral rang bzhin las,
,snang srid sgyu ma'i bkod pa zab gsal can,
,gdod nas lhun grub bde stong zung 'jug bdag
,kun khyab rnal ma'i sems la gus pas 'dud,

,lam gzhan dag gis yun ring rtogs dka' ba'i,
,nges [2] gsang khyab bdag sems kyi mngon rtogs gang,
,tshegs med mdzub tshugs lta bur ston mdzad pa,
,sgam po par grags sgrub brgyud bcas la 'dud,

,de yi lam la phyag rgya chen po zhes,
,nyi zla ltar grags gangs can gsal byas mod,
,'on kyang nyams myong man ngag gis brgyan te,
,rtog ge spangs nas slar yang gsal brjod bya,

,de la 'dir 'khor ba'i sdug bsngal mtha' dag gis yid rab tu skyo nas myur du sangs rgyas sgrub pa'i nges 'byung drag po dang ldan zhing,
rtogs ldan gyi bla ma dang byin rlabs kyi lam la dad cing yid ches pa'i skal pa can dag bde blag nyid du gnas lugs kyi don la 'god par bya ba nges don phyag rgya chen po'i khrid kyi rim pa la bzhi,
khrid rim gyi sngon 'gro,
sgom rim gyi dngos gzhi,
rjes nyams len skyong tshul,
sgom sbyangs pas sa lam bgrod tshul lo,
,dang po la gnyis,
thun mong gi sngon 'gro dang,
thun mong ma yin pa'i sngon 'gro'o,
,dang po ni,
zur du bshad pa ltar dal 'byor rnyed dka' ba dang mi rtag pa bsam pa sogs skyes bu gsum gyi lam rim ci rigs pa bsgom du bcug la nges 'byung [3] gi blo brtan po bskyed pa gal che ste,
'dir nan tan ma byas par sla chos su byas na,
lan re tsam gyis go yul du lus nas sgrub pa brtson pa mi skye zhing chos brgyad kyi dbang du 'gro ba yin no,
,gnyis pa ni,
gsang sngags bla med kyi dkyil 'khor du smin byed kyi dbang bskur rgyas par bya ba'am byin rlabs brda'i dbang la sogs pas smin par byas la,
de nas zur du bshad pa ltar,
le lo bzlog phyir mi rtag pa bsam pa,
bar chad sel phyir skyabs 'gro sems bskyed,
tshogs bsags phyir maNDal dbul ba,
sgrib pa sbyang phyir rdor sems kyi sgom bzlas,
byin rlabs 'jug phyir bla ma'i rnal 'byor sgom pa rnams rim pas khrid de,
de dag re re la zhag lnga'am bdun la sogs pa ci rigs par 'bad du bcug cing rnal 'byor re'i mjug tu sems lhod de ba 'bol le ba la ci gnas 'jog tu bcug la nyams tshad bya'o,

,gnyis pa sgom rim gyi dngos gzhi la gnyis,
khrid pa'i rim pa dang,
ngo sprod pa'i rim pa'o,
,dang po la gnyis,
zhi gnas kyi sgo nas khrid pa dang,
lhag mthong gi sgo nas khrid pa'o,
,dang po la gnyis,
mtshan bcas dang,
mtshan med do,
,dang po la gnyis,
rten can dang,
rten med do,
,dang po ni,
thun bzhi la sogs par sngon 'gro'i [4] rnal 'byor rnams sngar bas thun chung ba ma chags tsam re bya zhing,
bla ma'i rnal 'byor gyi skabs su khyad par ting nge 'dzin skye bar gsol ba drag tu btab,
de nas rkang pa rdo rje skyil krung ngam ma nus na sems dpa'i skyil krung bya,
lag pa mnyam bzhag gi phyag rgya lte 'og sor bzhi'i thad du bsdam,
sgal pa bsrang zhing lus kun bsgrim,
dpung pa dang gru mo ma gug par brgyang,
mgrin par cung zad bkug
,lce rtse ya rkan la gtad de so la bar bag tsam yod pa byas la mchu btsum,
mig sna rtse'i thad kar zhi ba'i lta stangs bya ba ste lus rnams snang gi chos bdun dang ldan par 'dug go,
,spyir bsam gtan mtha' dag la lus kyi 'khrul 'khor gnad che zhing,
khyad par sems gnas pa la lus gnad shin tu gal che bas nan tan cher byed du bcug na 'ga' zhig la 'dir rang gis gnas cha rnyed pa 'ong zhing,
lus gnad nyin zhag 'ga' skyong ba byung yang legs so,
,de nas nyin mo lta stangs kyi thad kar rde'u 'am shing bu sogs kyi rten dkar mdangs can min pa zhig bzhag ste,
de la sems lhod kyis gtad pa tsam bya zhing de nyid la tsir 'dzin dang brtag dpyad kyang mi bya,
sems gzhan du nam yang ma 'phros ma yengs tsam byas la gnas su 'jug pa dang,
yang nyi grib kyi mtshams su rdzas chung ngu zhig la gong ltar sems gzung ba rnams bya,
mtshan [5] mo rang gi smin mtshams su thig le dkar po sran ma tsam la sems 'dzin pa dang,
res rang gi 'og tu thig le nag po sran ma tsam la sems gzung ba gong bzhin bya,
gnas cha rnyed dka' ba'i rigs sems 'dzin pa de dag gis dub pa la,
mdun gyi nam mkhar de bzhin gshegs pa'i sku tshon gang ba bsgoms pa'i sku'i cha la sems gzung ba sogs sna tshogs pa bya bar bshad kyang phal cher la 'di tsam gyis chog go
,gnas cha rnyed na gnas rang bzhin gyi ngang las shigs bshigs la cung zad tsam ngal gso,
thun chung la grangs mang du bya,
thun bar du ltad mo lta ba dang spyod lam drag po dang smra ba mang po rnams spang zhing lus sems dal du bcug go,
,gnyis pa rten med la gnyis,
rlung can dang,
rlung med do,
,dang po ni,
thog mar rlung bgrang ba la brten nas sems gzung ba ni,
rlung phyir 'gro ba dang nang du 'ong ba gnyis dran tsam bya zhing gzhan du sems ma yengs par byas te,
rlung khug pa dang por gsum de nas bdun sogs ci rigs la sems bzung zhing,
sems 'tshubs na skabs su cung zad re ngal gsos la sbyang du bcug ste nyams blta,
de nas rlung dgang ba la brten nas sems gzung ba ni,
rlung re gsum mam dgu bus la sna gnyis nas dal bus rngub te mchil ma zhig mid pa dang bcas pas ha cang mnan drag po min par gsus par chil gyis mnan,
de ci thub kyi bar sems ma 'phros [6] tsam had de sems mi 'dug
,mi thub na sna nas dal bus btang zhing phyir 'gro ba dang nang du 'ong ba'i tshe sngar bzhin 'gro 'ong dran sems tsam las sems gzhan du ma 'phros pa bya,
ngal na rlung sna bug nas ci bder 'gro 'ong byed du bcug cing sems gzhan du ma yengs par lhod de sang nge bar dran pas zin tsam bya,
chung zad re ngal gso zhing slar yang de ltar sbyang du bcug la nyams blta,
de ltar byas pas sems rgod du song na ha cang bsgrims pa'i skyon yin pas khong glod,
sems pa na sun mang zhing shin tu 'tshub na dub pa yin pas zhag re tsam khams gseng bya,
mgo 'khor ba dang sems yer na rlung gis bskyod pas bza' btung bcud che ba la bsten zhing bsku mnye byed du bcug
,'di yan chad la sems ma zin pa zin par byed pa zhes bya ste sems kyi gnas cha rnyed pa bya dgos so,
,gal te 'di dag gi tshe sems 'gyu ba mang du song ba ltar gyur nas gnas cha chung na,
sngar rnam rtog lu gu rgyud du 'phros pa thams cad ma rig pa la 'dir rnam rtog gcig skyes gnyis skyes rig pas 'phrig tshud cing gnas cha cung zad rnyed pa yin pas skyon du mi gzung zhing,
rtog pa'i sna mi bskyil rjes mi 'brang bar lhod de bzhag pa la 'bad du bcug pas gnas pa 'char ro,
,gal te sems 'phros pa dang gnas pa'i dbyibs gang yang ma rig par khu 'phrig ma byung na,
phaT ces pa'i sgra drag po'i rjes sam 'bod skad drag po lta bu'i dus rtog pa snga ma rgyun chad phyi ma ma skyes pa'i bar gyi [7] sems lta bu rtog med kyi gnas cha yin pa dang,
de nas 'di bya 'di byed kyi blo skyes pa sogs rnam rtog 'phros pa yin pa'i brda don sprad la,
res bsgrim res glod pa sogs thabs sna tshogs pa'i sgo nas khrid mkhas byas la 'phrig tshud du bcug ste nan gyis sbyangs pas gnas cha rnyed par 'gyur ro,
,gnyis pa rlung med ni,
de ltar sems kyi gnas cha ci rigs rnyed nas,
lus gnad sngar ltar byas la phyi'i gzugs sgra sogs dang nang gi rlung 'gro 'ong sogs gang la yang sems rten mi bya zhing,
sngar 'di byas 'di byung sogs 'das pa yang mi sems,
phyin chad 'di byed 'di byung na sogs ma 'ongs pa yang mi spro,
'phral 'di snang 'di 'dug sogs,
da lta'i rtog pa yang yid la mi byed par,
lhod de lam me wal le 'bol le gnas su bcug
,gnas bzhin las shigs bshigs la slar gong bzhin bya,
yun mi ring tsam la grangs mang du bya'o,
,gnas cha tshol ba'i rigs thams cad la ha cang sgrim pa dang hur phyungs drag na sems lam mer gnas pa'i gegs su 'gyur bas phal cher la khong glod pa bde'o,
,de ltar bzhag pas sems rgod pa'am yer na,
dro sar bsdad bza' btung bcud can bsten bsku mnye bya lta stangs smad,
sems lte ba'i 'og tu gtad la pho rlung drag po mnan no,
,sems bying ba'am nyog na,
bsil sar bsdad gdong la chu zil btab rlung ro bsal lta stangs dpangs bstod,
sems ngar bskyed la hur phyung,
da dung bying na 'gro 'chag bya zhing khams bseng ngo ,
rmugs shing gti mug na,
yul khyad par can la phyag dang skor ba bya,
mchod sbyin dang sdig bshags sogs drag tu bya,
ting nge 'dzin [8] skye bar gsol ba dung dung btab ste nyams bskyang du bcug
,'di la sems zin pa brtan par byed pa zhes bya ste,
gnas cha rnyed pa de rten gtad med du 'jog pa la bde bar ma byang na mtshan med la bogs mi 'byung bas byang ba gal che,
de yang dran med du song ba'i gnas pa ltems po shar na skyon can yin pas hur phyung la yun thung ngu re yang yang bskyar,
bying ba'am ldob be ba dran rig yod pa tsam byung na skyon shugs kyis dag 'gro bas re zhig de nyid rang sbyang ba'am,
sems chung zad ngar bskyed la sbyang ba gang 'phrod byed du bcug go,
,gnyis pa mtshan med la gnyis,
sgrim pa dang,
glod pa'o,
,dang po ni,
lus gnad sngar ltar las lta stangs mig rang gi thad kar gtad,
sems ngar bskyed nas skad cig kyang ma yengs par bsgrims te,
'di sgom gyi dmigs gtad med par rtse gcig tu sing nge ye re bzhag
,yun mi ring tsam la bshig nas yang grim gyis bsgrims la skad cig kyang ma yengs par tsen ne 'jog pa la sbyang du bcug la nyams lta byas pas,
sngar gyi gnas pa snyom me ba las sems drung song nge nas gsal le sing nge gnas shing dran rig ye re 'dug na bogs thon pa yin la,
blo rgod pa'i rigs 'ga' la drung cha thon yang gnas yun thung ngu song na skyon du mi bzung bar yun thung grangs mang byas pas gnas pa drung po 'phel nas 'ong ngo ,
,gnyis pa ni,
lus gnad dang lta stangs gong bzhin bya 'di sgom 'di mi sgom [9] dang gnas na dga' 'phro na mi dga' ba la sogs pa'i zhe 'dod ma byas par sems lhod glod la,
dgag sgrub dang bcas bcos ma byas par sems rang babs su 'bol le cham me bzhag cing,
de'i ngang nas ma yengs tsam gyi dran pa pur pur min pa'i rlabs che ba sa le ba byas la gu yangs sang nge bskyang ngo ,
de ltar bskyangs pas rnam rtog rags pa til gyis 'char na dgag kyang mi dgag rjes su yang mi 'brang bar ma yengs pa'i dran pa rang tsho bzung,
'gyu ba san bun phra sem me ba rnams la'ang dgag sgrub mi bya,
dvang ma sing nge lhan ne gnas pa dang shigs bshigs la cung zad re ngal gso,
yang sngar bzhin bskyang du bcug la nyams blta,
de la sngar rnam rtog phra rags rnams bkag pa ltar byas te rig pa sing nge yo re bar bcos nas sems rtse gcig tu bsgrim dgos pa lta bus cung zad mi bde la,
'dir ma yengs tsam gyi ngang nas rang lugs su bskyang bas chog pa dang rnam rtog phra rags 'char na yang dran pa'i tshe bzung bas rnam rtog gis don byed mi nus par lhan gyis zhi nas gnas pa'i steng du ' gro ba dang,
dran pas khyab na gzhan zhe 'dod mi dgos pas gu yangs pa lta bu zhig 'byung ba dang,
shigs bshig lhod glod dus sems kyang shig ge lhod de gnas pa'i mtshang rig nas skyong bde na bogs thon pa yin zhing,
gal te 'og 'gyu lta bur shor nas yengs pa'am,
ci 'gyus 'di 'gyus med par dran med du yengs pa sogs byung na dran pa stobs chung ba yin la,
gnas pa san ne ba brang [10] nge ba 'tshub be ba byung na glod zhan pa dang dran rig pur ba yin pas skyong lugs kyis skyon bsal te skyong du bcug
,blo rigs bying na dran rig gi ngar dang stobs bskyed,
rgod na sems ngar cung zad smad de glod cha cher btang la bskyangs bas sems gsal sing nge gnas shing,
gzugs sgra sogs kyi snang ba yang wa le ba cham me ba song nge ba bun ne ba lta bur 'char na zhi gnas skyes pa yin pas,
nyams kyi bye brag ci 'char na'ang de'i dbang du mi 'brang bar gsal sing nge ba la mi rtog pa'i ngang du re zhig bsgom du bcug
,'dir rkang ma tshugs na sgom nyin srib can 'ong bas rkang tshugs par bya ste,
dang por rnam rtog phra rags mang po 'khrugs pa'i bar na mi rtog par gnas pa'i cha cung zad tsam re rnyed pa de gcong rong gi 'bab chu 'dra ba'i zhi gnas dang po yin,
de nas rnam rtog phal cher phra nyal gyis song zhi gnas bde cham me gnas zhing,
'on kyang rnam rtog gi g.yo ba drag po byung na mi non par skabs skabs 'phro rgod 'byung ba de chu bo dal zhing g.yo ba lta bu'i zhi gnas bar pa yin,
de nas rnam rtog phra rags mi ldang bar mi rtog pa'i ngang du bde me re ci tsam bzhag gi bar gnas pa'am,
rnam rtog phra mo cung zad re ldang na yang des rtog pa'i bya ba mi nus par mi rtog pa'i ngang du rang sar dag pa de chu ma bu 'phrad pa rgya mtsho lta bu'i zhi gnas mthar thug yin pas,
zhi gnas 'dis phyag rgya chen po'i sgom ngo bo'i go mi chod na yang sgom gyi gzhi la yod pa shin tu gal che zhing,
rnam dkar gyi las [11] gsog pa'i bsam gtan tshad med pa zhig yin pas zhi gnas skyon med brtan po bsgrub par bya'o,

@, gnyis pa lhag mthong gi sgo nas khrid pas gnyis,
sems snang sna tshogs kyi ngo bo gtan la dbab pa dang,
gzhi rtsal sgro 'dogs bcad pa'o,
,dang po la gnyis,
rtsa ba sems kyi ngo bo gtan la dbab pa dang,
rtsal rnam rtog dang snang ba'i ngo bo gtan la dbab pa'o,
,dang po ni,
lus gnad sngar bzhin las mig tsham tshum dang 'gyur ba med par har re gtad,
shes pa gsal sing nge ba la mi rtog pa'i zhi gnas kyi steng du lhang nge bzhag la,
de'i ngang la sems de nyid la rjen lhang gis bltas te dbyibs dang kha dog la sogs pa ji lta bu zhig 'dug
,gnas dang rten gang la gnas,
ngos bzung rnam 'gyur ji ltar 'dug rnams rim pas brtags shing dpyad,
de yang zlum po gru bzhi sogs dang sa rdo ri brag rtsi zhing sogs dang mi dang dud 'gro sogs kyi dbyibs su 'dug gam,
dkar po dang nag po sogs kyi kha dog tu 'dug gam,
re re zhing rdo rus 'phrod par brtag
,de bzhin du sems phyi rol snod bcud kyi dngos po la gnas sam nang rnam smin gyi lus la gnas,
lus la gnas na spyi gtsug nas rkang mthil gyi bar lhu dang dum bu la gnas sam spyi khyab tu gnas,
spyi khyab tu gnas na phyi nang gi tshul du gnas sam 'dres pa'i tshul du gnas,
'dres na sems phyi'i yul dang rdzas la 'phros pa'i tshe ji ltar song la sogs pa brtag
,de bzhin du [12] sems kyi ngo bo de stong pa'i ngos bzung du 'dug gam gsal ba'i ngos bzung du 'dug
,stong pa la cang med kyi stong pa'am nam mkha' lta bu'i stong par 'dug dang,
gsal rig can la nyi zla'i 'od dam mar me lta bu sogs ji ltar gsal brtag tu bcug
,'di la rdo rus thug pa kho thag ma chod kyi bar brtag dpyad bya,
thos lo dang go ba tsam zhe la bzhag nas ma brtags na phug thag mi chod pas phugs gtug la brtag tu bcug
,log shes bzung na gnod byed btang la slar gzhig tu bcug pas dbyibs dang kha dog dang gnas dang rten dang rdzas su ma grub par thag chod pa ni sla la,
ngo bo ngos bzung gsal stong gi ngang du lhan ne gnas pa zhig tu go na gnas pa'i nyams yin pa'i 'phrig ma tshud pas,
maNDal dang gsol ba drag tu 'debs shing gsal lugs dang stong lugs gnas lugs rnams re re zhing brtag tu bcug pas,
dngos po dang rdzas su ma grub pas dbyibs dang kha dog med cing gnas dang rten yang med la,
'di 'dra 'di yin gyi ngos bzung med par gsal stong lta bu'i brjod mi tshugs pa cig la myong rgyu yod pa cig tu go na,
mgo g.yogs la gcun pas go ba'am rna thos yin na mi mtshungs pa mang po 'byung zhing rtag mi thub,
myong ba yin na zer lugs mi shes na'ang go don thag gcig tu 'ong,
de byung na myong ba skyes pa yin no,
,'on kyang smra mkhas shing tshig legs kyang myong ba med pa dang,
smra mi shes bshad mi tshugs kyang myong ba skyes pa yong [13] bas bla mas myong thog nas gdar sha legs par bcad la phu thag chod pa dang,
sngar gyi zhi gnas gsal sing nge ba la mi rtog pa'i ngang nas sems la rjen lhag gis bltas pas tshig gi brjod pas mi mtshon pa'i shes pa,
ngos bzung med bzhin tu rang rig pa'i gsal stong sing nge ba ye re ba hrig ge ba lta bu de ma yengs par skyong du bcug go,
,gnyis pa ni,
lus gnad sogs gong ltar byas te ngos bzung med pa'i sems gsal stong gi ngang nas zhe sdang lta bu'i rnam rtog rags shing ngar che ba zhig 'gyur bcug la,
de lhang gis skyes pa dang de la rjen char gyis bltas nas dbyibs dang kha dog gnas dang rten ngos bzung dang rnam 'gyur sogs ji ltar 'dug sngar ltar brtag dpyad bya,
de bzhin du rnam rtog phra mo shar ba'am spros te de'i ngo bo la blta zhing brtag dpyad bya,
de bzhin snod bcud dang dgra gnyen dang skyid sdug la sogs pa'i snang ba'i 'char sgo phra rags ci rigs pa shar ba'am 'char du bcug la de'i ngo bo la brtag cing dpyad,
sngar bltas pas ngos bzung ma byung ba'i rigs 'gre byed nas ma brtag na myong ba phra zhib can mi 'byung zhing,
rnam rtog dang snang ba phra rags la ngos bzung med pa'i go ba tsam las thug 'phrad du ngo shes 'phrad pa lta bu 'am,
rdzun phugs rdib pa lta bur grol ba'i myong ba rgyun brtan po mi 'ong bas snying rus bskyed nas kho thag ma chod kyi bar brtag dpyad byed du bcug go,
,'dis blo gcod khams bzang ngan su la yang don gyi thob pa chen po 'byung bas [14] 'ol gsal spyi tsam la mi bzhag go,
,de nas nyams bltas pas,
rnam rtog gang snang ba'i 'char sgo rnams brtags pa'i tshe dbyibs kha dog dang ngos bzung mi 'dug cing,
sems kyi ngo bo gsal stong de kar song zhes pa la sogs pa'i go yul tsam zer na,
gsal stong zer ba'i tshigs rigs la nges pa med pas rnam rtog la sogs pa'i 'char sgo de 'gag pa'am zhig pa lta bu med par gsal stong du song ngam,
yod bzhin du ni gsal ba yin du chug kyang stong pa'i don med do zhes gcun la brtag dpyad byed du bcug
,rnam rtog gang shar de'i 'char sgo de nyid ma 'gags par gsal bzhin du rtog pa'i bya ba mi byed pa'i ngos bzung rgyu med pa zhig dang,
snang ba yang snang cha ma 'gag par snang tsam las a 'thas kyi bden 'dzin med pa bkrag med lta bu 'di 'dra zhes brjod par dka' ba zhig 'dug par go na myong ba skyes pa yin pas,
gsal la ngos bzung med pa gsal stong ngam snang la rang bzhin med pa snang stong de nyid rang ma yengs par skyong du bcug
,kha cig rnam rtog gam snang ba la cer bltas pas de zhig nas gsal stong du 'gro zer ba ni rtog pa dang snang ba nyid gtan la ma phebs par de'i gnyen por gsal stong gi blo btang ba'o,
,gnyis pa la bzhi,
rnam rtog sems su thag bcad pa,
snang ba sems su thag bcad pa,
sems gnas 'gyu'i rtsa ba bcad pa,
gang shar skye med du thag bcad pa'o,
,dang po ni,
lus gnad sogs sngar ltar byas la sems gsal stong du mnyam par [15] bzhag pa'i ngang nas zhe sdang la sogs pa'i rnam rtog cig lam gyis spros te,
de la cer gyis bltas la de rgyu'am gzhi ci la brten nas byung legs par brtag
,sems gsal stong gi ngang de nyid las byung snyam na,
ma las bu skyes pa ltar byung ngam nyi ma las 'od shar ba ltar ram sems de rnam rtog der song la sogs pa brtag
,tshul ji lta bur gnas bltas la zhe sdang gi rnam par snang na,
zhe sdang de nyid kun dkris drag po'i bden 'dzin dang bcas par snang ngam,
zhe sdang lta bu'i rnam pa tsam la ngo bo ngos bzung rgyu med pa'i phyal le ba lta bu zhig 'dug brtag
,mthar ji ltar song bltas la rtog pa de bkag gam sangs,
bkag na sus bkag rkyen cis dgags,
sangs na rkyen gyis sangs sam rang sangs la song ba brtag
,de bzhin du rnam rtog phra rags sna tshogs pa la gong bzhin brtag dpyad byed du bcug la nyams blta,
log shes 'dug na gnod byed btang zhing phyogs tsam bstan la slar brtag du bcug
,'di na 'di bzhin byung dang dbyibs rnam 'gyur 'dir gnas dang tha ma 'dir song mi rnyed kyang rnam rtog dang sems tha dad dang phyi nang lta bu dang lus dang yan lag lta bu'i blo zhig nas,
rnam rtog sna tshogs pa rnam pa cir snang yang ngo bo ngos bzung med pa snang stong du myong zhing rang shar rang grol du rig ste,
sems kyi go ma 'gag pas sems rnam rtog du shar ba'am der snang ba tsam du nges nas rnam rtog [16] dang sems nyid dbyer med du thag chod dgos la,
dper na chu'i rlabs lta bu ste,
rlabs ni chu las ma 'das shing chu nyid kyang rlabs su shar la,
shar yang chu'i rang bzhin las ma g.yos pa ltar,
rnam rtog sna tshogs pa shar tsam nyid nas ngos bzung med pa'i sems gsal stong las ma 'das shing,
sems kyang 'char sgo ma 'gag pas rnam rtog sna tshogs pa shar la,
der shar yang ngo bo ngos bzung med pa'i sems gsal stong las ma g.yos par kho thag chod nas rnam rtog sna tshogs pa sems su nges pa'i myong ba thon dgos shing,
de bzhin tu skyid pa'i rtog pa zhig dang sdug pa'i rtog pa zhig spros la de gnyis kyi ngo bo la khyad ci 'dug blta ba sogs rgyab bsnol gyi rtog pa yang thag chod par bya'o,
,gnyis pa ni,
lus gnad sogs sngar ltar byas te sems gsal stong gi ngang nas gzugs snang gang yang rung ba zhig rnam pa gsal lam gyis 'char du bcug la,
de'i byung gnas 'gro gsum gong bzhin brtag
,gzugs snang dang sems gnyis tha dad du 'dug gam gcig tu 'dug
,tha dad na phan tshun nam phyi nang ngam steng 'og lta bur 'dug gam,
de ltar 'dug na rang tshugs thub pa'i ngo bo so sor grub pa 'dug gam sems der snang ba tsam du 'dug
,sems der snang ba tsam la sems gcig las med pa tha dad du 'gal bar brtag
,gzugs snang dang sems gcig na sems gzugs snang du song nas gcig gam gzugs snang sems su song nas gcig la sogs [17] pa brtag tu bcug la nyams blta,
log shes 'dug na gnod byed gtong zhing phyogs bstan te,
gzugs kyi snang ba gang snang sems kyi snang cha tsam du nges nas gzugs kyi rnam pa sna tshogs par snang yang ngo bo ngos bzung du grub pa med pa snang stong du myong zhing,
sems kyi rtsal ma 'gags pas gzugs la sogs pa'i rnam par snang ba tsam du rig nas,
gzugs snang phyir ma lus sems nang du ma lus par snang sems dbyer med du thag chod dgos la,
dpe don gong du bshad pa ltar ram rmi lam na phyi rol gyi gzugs sna tshogs pa shar yang rmi lam gyi shes pa las ma 'das shing rmi lam gyi gzugs dang rmi lam gyi shes pa dbyer med pa lta bu'o,
,gnas skabs spyi mthun gyi las kyis snang ba'i yul rkyen gyis so so sna tshogs par snang ba ni,
dper na shel dvangs pa zhig yul rkyen sngon po sogs dang 'phrad na sngon po sogs su snang tsam las ngo bo shel dvangs pa de nyid las gzhan du ma song ba ltar,
sgo ma 'gag pa'i sems las ma dag bar du yul rkyen sna tshogs dang 'phrad na sna tshogs su snang tsam las ngo bo sems las gzhan du ma song bar thag chod nas snang ba sna tshogs sems su nges pa'i myong ba thon dgos,
de bzhin du mdzes mi mdzes sogs rgyab 'gal gyi snang ba gong ltar brtag
,gzugs kyis mtshon nas sgra dri ro reg bya la sogs pa thams cad brtags nas nges pa rnyed par bya'o,
,gsum pa ni,
lus gnad sngar ltar byas la [18] sems gsal stong gi ngang du lhan ne gnas su bcug ste de la cer gyis bltas nas brtag
,yang lhan gnas pa'i ngang nas 'gyu ba zhig yer gyis 'gyur bcug ste de la bltas nas brtag
,de nas gnas pa dang 'gyu ba gnyis kyi byung gnas 'gro gsum dang ngo bo ngos bzung gi khyad par ci 'dug brtag
,lhan gnas pa dang yer shar ba'i khyad par 'dug na,
de gnyis rang la bzang ngan dang stong ma stong dang ngo bo grub ma grub dang ngos bzung yod med kyi khyad par ci 'dug la sogs pa brtag
,khyad par med na gcig nas khyad par med dam tha dad kyang mtshungs nas khyad par med brtag
,gcig na thog mtha' bar gsum gang du gcig brtag
,mtshungs na ji ltar mtshungs la sogs pa brtag dpyad byed du bcug la nyams blta,
log shes 'dug na mtha' bkag cing phyogs bstan la slar brtag tu bcug
,lhan ner gnas pa dang yer gyis 'gyus pa gnyis rgyud tha dad du 'dzin pa las log ste,
gnyis ka sems nyid gcig pu rtsa bral ngos bzung med pa rang rig rang dag gsal stong du ngo bo gcig pa myong nas,
de gnyis gang byung yang dgag sgrub spang blang mi dgos par gnas na gnas thog 'gyu na 'gyu thog de gsal stong rang grol du nges shes skye dgos pa yin no,
,bzhi pa ni,
sngar bzhin sems gsal stong gi ngang na rnam rtog dang snang ba sna tshogs ni sems 'di ka ma 'gags pa'i rtsal snang du 'dug
,da ni sems [19] 'di ka'i rang babs 'di ci lta bu snyam du cer gyis bltas la 'di'i rgyu gang las byung tshul ji ltar gnas mthar ji 'drar song legs par brtag tu bcug
,log shes 'dug na mtha' dgag cing phyogs bstan la slar yang brtag tu bcug nas,
sems dang por rgyu rkyen las ma byung gzhi gang las kyang ma skyes pa ye nas kyi rtsa bral,
'phral kyi dbyibs rnam 'gyur sogs gang du mi gnas shing ngos bzung rgyu med pa,
mthar sus kyang bkag pa med par rang sangs rang dag rang grol lta bur 'dug pa myong ste,
gdod ma nas skye 'gag gnas gsum gyi ngos bzung med par rang rig stong pa nyid yin pa'i yin lugs ltar gang shar gyi sems la bzang pos brgyan mi tshugs ngan pas sbags mi tshugs pas bcos bslad dang 'phri bsnan mi dgos par rang dag rang rig rang grol nyid du thag chod dgos so,
,de ltar lhag mthong gi lta rtog dang gzhig 'grel thams cad lus gnad dang sems gsal stong mnyam bzhag gi steng nas brtags shing dpyad na lhag mthong gi shes rab kyis myong la,
rtog btags kyi blo kho nas dpyad na don spyi tsam 'char srid kyang myong ba mi thon no,
,'di la nges shes thag chod pa ma skyes na ngo sprad kyang phyis de la blo mi khel bar gzhan la 'jug pa'am,
snying rus bskyed nas bsgoms na'ang zhi gnas tsam po ba'i steng du 'khor te de'i nyams snang la zhen pas lo mang po 'bad kyang byang chub tu bgrod pa'i sa mi chod pa yin no,
,[20] de la blo rab kyis rtogs pa thob pa 'bring gis myong ba thob pa tha mas go ba brtan po thob pa dgos zer yang go bas cung mi 'ong ngo ,
'di dag la bshad mkhas kyang myong ba ma thon pa dang myong yang bshad mi shes pa yong bas bla mas mtha' gcun zhing phyogs ston pa'i sgo nas khrid mkhas dang mgo g.yogs la 'dri mkhas bya,
myong ba dga' mo skyes 'dug na'ang kha yang gis ngo sprod bya shor du song ba ye mi bya bar som mo,
,re zhig myong du bcug go,
,kha cig lhag mthong gi khrid dang ngo sprod spel mar byed pa dang ngo sprod kyi skabs su blta nyul byed pa sna tshogs snang yang,
'di dag gi skabs su dpyad gzhig gis thag bcad la myong ba bskyed de ngo sprod kyi skabs su myong ba ngo sprad la sgom du gzhug pa de ka legs pa yin la,
'di ci nas kyang myong ba skye ma tshugs na re zhig zhi gnas de nyid gsal rig thon pa skyong du bcug la ci zhig na khrid pas don grub nas myong ba brtan pa 'ong ngo ,
gnyis pa ngo sprod pa'i rim pa la gnyis,
lhan skyes ngo sprod pa la dngos dang,
skyon sel zhing sgom pa ngos bzung ba'o,
,dang po la gsum,
sems nyid lhan skyes ngo sprad pa,
rnam tog lhan skyes ngo sprad pa,
snang ba lhan skyes ngo sprad pa'o,
,dang po ni,
ngo sprod byed pa'i tshe bla ma dang slob ma min par gzhan phag tu rang mi bzhag par spro na lus gnad sngar ltar byed du bcug ste,
khyod kyis sems ma bcos par rang [21] lugs su bzhag pa'i dus na rnam par rtog pa phra rags thams cad rang sar zhi nas sems nyid rang lugs su gnas pa zhig 'dug gam mnyam par zhog la ltos dang zhes bltar bcug
,de la zhi gnas zer pa yin,
de'i ngang nas rmugs pa'am lung ma bstan nam phyal bar ma song bar sems kyi ngo bo de 'di 'dra zhes ngag tu smrar ma tshugs sems kyis bsam du med pa ngos bzung thams cad dang bral ba gsal la ma 'gags pa rang gis rang rig pa'i shes pa sing nge ba lta bu,
myong rgyu med pa'i myong rgyu 'dra ba zhig 'dug gam mnyam bzhag gi ngang nas ltos dang zhes bltar bcug
,de la lhag mthong zer pa yin,
de gnyis 'dir brjod pa snga phyi yod kyang don la zhi gnas de dang lhag mthong de tha dad du med par zhi gnas de yang ngos bzung med pa'i rang rig rang gsal gyi lhag mthong der 'dug gam,
lhag mthong de yang rang lugs su gnas shing rnam rtog gi mtshan mas ma gos pa'i zhi gnas der 'dug gam,
mnyam bzhag gi ngang nas ltos dang zhes bltar bcug
,de la zhi lhag zung 'jug zer,
gnyis ka sems skad cig ma'i thog du tshang ba yin,
'di myong nas ngo shes pa la sgom skyes pa zer pa yin,
'de ni sangs rgyas kyi dgongs pa sems can gyi sems nyid skye med chos sku gshis kyi gnas lugs lhan skyes kyi sems gnyug ma'i shes pa phyag rgya chen po sogs ming gi rnam grangs mang zhing,
mdo rgyud bstan bcos man [22] ngag rnam dag thams cad 'di'i thog tu 'bab cing gzhol ba yin no,
,zhes dang spro na thog tu phog pa'i lung 'dren yang byas la nges shes bskyed,
gzhan ni re zhig bshad pa mang na blo chung mgo 'khor srid pas mi dgos so,
,don dril ba la sems rang babs su bzhag pas rtog pa rang sar grol nas ngos bzung med pa'i rang rig rang gsal gyi sems lhan skyes de'i ngang du rtse gcig tu zhog la ma yengs pa gyis,
thun mtshams kyi spyod lam rnams su yang de'i dran pa ma yengs pa ci thub gyis la zhag 'gar 'jur thon par sgom pa gal che,
de min thabs sna tshogs kyis btsal ba'i sems ngo mthong ba 'di shor dogs yod ces gcun la zhag 'ga' sgom du bcug
,gnyis pa ni,
sngar bzhin mdun du lus gnad byed du bcug
,khyod rang sems rang lugs su bzhag ste rnam rtog zhi nas ngos bzung med pa'i sems gsal stong rjen ne gnas dus kyi ngo bo la ma yengs pa'i ngang nas cer gyis ltos,
yang dga' skyid lta bu'i rnam rtog ngar dang bcas pa zhig 'gyur chugs la de lam ste skyes pa dang de'i ngo bo la gsal stong gi ngang nas cer ltos la,
rnam rtog de yang ngos bzung med pa'i gsal stong du rjen ne 'dug gam,
sems nyid lhan skyes kyi ngo bo dang khyad med pa de kar 'dug gam ltos dang zhes dar cig bltar bcug
,gsal stong du 'dug khyad mi snang zer yang,
rnam rtog de sangs nas gsal stong du 'dug gam rnam rtog de tshur sgom [23] la bzhag pas gsal stong du 'dug gam rnam rtog lam me ba de ka gsal stong du 'dug dris pas,
snga ma gnyis ltar 'dug zer na sngar sgro 'dogs ma chod pa yin pas zhag 'ga' thag bcad du 'jug
,dang po gnyis ma dgos par phyi ma ltar 'dug pa myong na rnam rtog gi ngo bo mthong ba yin pas ngo sprod pa ni,
khyod kyis rnam rtog gi ngo bo la bltas pas rnam rtog sangs ma dgos tshur sgom la gcur ma dgos par rnam rtog lam me ba de ka ngos bzung med pa gsal stong du rjen ne 'dug pa de la rnam rtog lhan skyes kyi rang ngo mthong ba'am rnam rtog chos skur shar ba zer,
sngar rnam rtog gi ngo bo gtan la phab dus dang gnas 'gyu'i rtsa ba bcad dus ltar ngos bzung med pa'i sems rang rig rang gsal gcig pu de min pa mang po med,
chu dang rlabs kyi dpe lta bu yin,
des na gnas pa dang 'gyu ba la khyad 'dug gam rtog pa dang ma rtog pa la khyad 'dug gam,
mi rtog par lhan gnas pa la bzang rgyu'am dga' rgyu dang rnam rtog yer 'phros pa la ngan rgyu'am mi dga' ba dgos pa 'dug gam,
'di'i mtshangs ma rig na sgom gyi mu ge phog pa yin pas da phyin chad rtog pa ma skyes nas skyes pa'i ngang du skyongs ched du skyed mi dgos,
skyes na skyes pa'i ngang du skyongs ched du dgag mi dgos pas gnas 'gyu gnyis la nye ring ma byed,
rnam rtog 'dis rnam rtog thams cad la 'gre ba yin,
'on kyang re zhig la rnam rtog nyid lam du khyer zhing [24] rnam rtog ma skyes na'ang ched du spros la de'i ngo bo skyongs,
de min rnam rtog gi ngo bo mthong ba shor dogs yod pas 'bungs la skyongs zhes gcun la zhag 'ga' sgom du bcug
,spro na lung 'dren yang byas la nges shes bskyed do,
,gsum pa ni,
sngar bzhin lus gnad dang lta stangs sogs ngo bo'i mnyam bzhag gi ngang nas ri'am khang khyim lta bu'i gzugs gyi snang ba bkra lam gyis 'char du bcug la,
shar ba de la cer bltas pa'i tshe snang ba ngos bzung med par gsal stong du 'dug gam,
sems nyid kyi ngo bo gsal stong du 'dug
,de gnyis khyad ci 'dug re zhig ltos dang zhes bltar bcug
,khyad med par ngos bzung med pa'i gsal stong du 'dug zer yang,
snang ba shar ba'i rnam pa de 'gags nas gsal stong du dug gam,
rnam pa de gsal stong du bsgoms pas gsal stong du 'dug gam,
rnam pa snang ba de ka gsal stong du 'dug dris pas sngas ma gnyis ltar zer na sngar gdar sha ma chod pa yin pas slar sgom du bcug la thag bcad,
gzugs kyi rnam pa lam snang ba de ka snang cha ma 'gags par snang tsam las ngos bzung med par gsal stong du 'dug pa myong na,
ngo sprad pa ni,
khyod kyis ri dang khang khyim lta bu'i snang ba bkra lam gyis shar ba'i tshe ji ltar snang ba'i snang cha de nyid yal ba'am bkag ma dgos par snang ba de nyid snang bzhin du ngos bzung med pa gsal stong du 'dug pa [25] de snang ba'i ngo bo mthong ba yin,
sngar snang ba'i ngo bo blta dus dang snang ba sems su thag bcad dus sgro 'dogs bcad pa ltar,
snang ba phyi na med sems nyid nang na med sems gsal stong de nyid snang bar shar ba ma gtogs gzhan med,
rmi lam gyi yul dang rmi lam gyi shes pa'i dpe lta bu yin,
snang ba shar tsam nyid nas ngos bzung med pa'i snang stong rang grol nyid yin,
snang la ngos bzung med pa'i snang stong du rjen ne ba 'di la snang ba lhan skyes rang ngo mthong ba'am snang ba chos skur shar ba zer,
des na stong pa bzang rgyu med snang ba ngan rgyu med snang stong tha dad du med pas,
snang na snang thog du skyongs ched du snang cha ma bkag
,stong na stong thog du skyongs ched du stong cha ma bsgrub par gang shar sgom du khyer,
spang blang dang bcas bcos bya mi dgos nyams len gyi dran pas sleb na snang srid thams cad chos kyi sku phyag rgya chen po yin pas da phyin chad snang stong la dgag sgrub dang nye ring ma byed par skyongs,
'on kyang re zhig snang ba'i 'char sgo mi 'dra ba sna tshogs 'char du bcug la snang la ngos bzung med pa'i ngo bo skyong ba la ma yengs pa gal che,
zhes zhag 'ga' sgom du bcug cing spro na lung 'dren yang byas la nges shes bskyed do,
@, gnyis pa skyon sel zhing sgom pa ngos bzung ba la gnyis,
nor dang sgom skyon bshad pa dang,
sgom skyon med bstan pa'o,
,dang po ni,
dvags po bka' brgyud la sgom phyag rgya chen po zhes nyi zla ltar grags kyang,
so so'i [26] go lugs kyi khyad par la brten nas blo'i 'dzin stangs mi 'dra ba sna tshogs 'ong bar snang bas,
gzhan dag la dgag pa bya ba min kyang rang la yid gtod pa dag la go ba bskyed pa'i phyir cung zad brjod par bya ste,
de yang sems kyi gnas cha kho na gtso bor bzung nas sems gnas mtsho la dar chags pa ltar gyur te tshogs drug gi snang ba phra rags 'gags pa'am,
ma 'gags kyang mi gsal ba wal po lta bur song ba la sgom du bzung na,
snga ma ni shin tu skyon che la phyi ma'ang ltem po zhes bya ba skyon can yin no,
,yang snang ba gsal mi gsal kyi tshor ba med pa'i dran med du 'dug pa la sgom du bzung na lung ma bstan na yengs pa ste 'di yin med do,
,yang na rnam rtog snga ma 'gags phyi ma ma skyes pa'i bar gyi shes pa had po la sgom du bzung na,
de ni lhag mthong gis ma zin pas skyon che la zin yang phyag chen skyong ba de las ma g.yos par 'dod dgos pas sgom gyi mu ge 'byung ngo ,
yang sems bde lham me gnas pa tsam la sgom du ngos bzung na,
de yang lhag mthong gis ma zin 'dug gam sgom min la zin yang 'char sgo thams cad dgag dgos shing ma bkag kyang dgrar ldang bas cung zad min no,
,yang dus gsum gyi rtog pa gang yang yid la mi byed par stong sang nge ba la sgom du bzung na,
de yang lhag mthong gis ma zin zhing snang cha bkag pa'i skyon chen po yin la zin yang 'char sgo dang snang [27] cha mi 'dod pas cung zad min no,
,yang gang snang ci shar ci shar thams cad la bden med kyi 'dzin stangs dang ma bral bar skyong ba la sgom du bzung na,
dngos med du 'dzin pa zhes skyon can no,
,yang dran pa med par snang ba mtha' dag la dgag sgrub mi bya ba sgom du bzung na,
btang snyoms su gnas pa ste gyi na tsam mo,
,'di rnams ni phyag chen gyi sgom du bdag gis ma mthong la so so'i las gsog tshul re yang yod do,
,yang sems gsal sing nge ba la mi rtog pa kho na sgom du bzung na rtog pa rang sar zhi nas rig pa gsal la ngos bzung med pa sgom yin du chug kyang mi rtog pa ci nas kyang dgos par 'dod snang bas phyogs re ba'o,
,de bzhin du rnam rtog 'phros pa'i tshe de'i 'phro bcad nas gsal la mi rtog par 'jog dgos pa'ang phyogs re ste,
gnyis ka 'gyu ba dang snang cha gtan la ma phebs pa'o,
,yang dran rig tur re byas nas sems gsal stong hrig ge ba kho na sgom du bzung na,
de nyid sgom yin yang dran pa rlabs che ba'i rang babs lhug par mi 'dod par snang bas lhod cha ma rnyed par ha chang sgrim pa'i phyogs re ba'o,
,des bsgom min min pa 'chugs pa ni shin tu gal che la,
sgom phyogs re ba la yar 'phel du 'gro ba'i yon tan yod kyang,
skyong ma bde nas sgom dang sna sun dogs yod pas snang thog stong thog gnas thog 'gyu thog thams cad du grims lhod sna tshogs pa'i sgo nas gdar sha chod cing ngo 'phrod pa skyong bde ba zhig dgos pa yin no,
,[28] gnyis pa ni,
tha mal gyi shes pa ma yengs pa la sgom zhes bya ba las,
tha mal gyi shes pa ni sems kyi rang babs ci 'dug de ka yin te,
de la spang blang dang dgag sgrub kyi bcas bcos byas na tha mal gyi shes par mi 'gro'o,
,des na sems kyi rang babs ci 'dug ci snang ci shar de rang rig gi dran pas ma yengs par skyong ba la sgom skyong ba zhes ming tsam 'dogs kyi,
blos bcos nas sgom rgyu spu rtse tsam yang med do,
,de la sgom rgyu rdul tsam med pa la yengs su skad cig tsam yang med zer ba dang,
tha mal shes pa yengs med 'di zhes pa'ang ma yengs par sems rang babs skyong ba la zer ro,
,des na rang rig gi dran pa ma yengs na sems stong sang nge ba'am bde lam me bar gnas pa'am,
rnam rtog 'tshub zing nge 'phro ba'am snang ba sna tshogs bkra lam gyis 'char yang sgom yin pas gnas lugs kyi rtsal la khu 'phrig mi bya bar lhug par skyong ba yin gyi rtog pa 'phro ba dang snang ba bkug pa'am bkag nas mi rtog par 'jog pa don min no,
,de'i rgyu mtshan yang sngar sgro 'dogs bcad cing ngo sprad pa ltar sems nyid kyi ngo bo dang rnam rtog dang snang ba'i 'char sgo sogs tha dad pa mang po med par sems nyid gcig pu ma 'gags pa'i rtsal rgya mtsho nyid rlabs su shar ba lta bu yin pas sems kyi rang babs ci shar de la bzang ngan med do,
,des na sems gnas na gnas thog 'gyu na 'gyu thog snang na snang thog de dran pas skyong ba yin te,
gnas na ched du mi spro 'gyu na mi dgag par gsal [29] sang nge ba'am,
stong cham me ba'am bde lham me ba'am 'tshub zing ba ci 'dug na'ang ma yengs pa las bsgyur dgod bcas bcos bya mi dgos so,
,mdor na rang rig gi dran pa dang ldan na thams cad sgom yin la yengs na gang yang sgom min pas re zhig la dran pa rtsis su bya zhing,
ci zhig na dran pa dang sems kyi ngo bo tha mi dad pas thams cad dran pa'i rang bzhin du gyur nas bde ba zhig 'ong ngo ,
'o na khrid rim ltar mi dgos par dang po nyid nas sems ci shar dran pas bzung bas chog gam snyam na cig char ba'i las can kha cig tsam de lta bus chog pa srid kyang,
gzhan du khrid rim ltar 'khrid par snang sems kyi rtsa ba sgro 'dogs mi chod cing,
ngo bo mthong ba'i myong ba dang bcas pa'i nges shes mi 'byung bas dran pa gzhan yod kyang rang rig gi dran pa med pas mi 'ong ngo ,
des na tha mal gyi sems,
ma bcos pa gnyug ma'i sems zhes pa'i tshig don yang 'dir gnas la lta ba rnam dag ston pa'i mdo rgyud dang rgya bod kyi grub chen rnams kyi gsung rnams kyang 'dir gzhol ba yin no,
@, gsum pa rjes nyams len skyong tshul la drug
,spyir skyong dgos tshul,
khyad par mnyam rjes mi bcad sgom skyong tshul,
gegs shor sa dang gol sa bcad pa,
skye med du la bzlas te bogs dbyung ba,
lam khyer spyod pa'i sgo nas rtsal sbyong ba,
rtogs pa 'char tshul bogs 'don dang bcas pa'o,
,dang po ni,
sgom skyes pas mi chog legs par skyong dgos te,
sgom skyes nas ma bskyang bar tha mal du lus pa'am [30] dmigs bcas kyi bsags sbyang gzhan la 'bad pa ni rgyal pos 'bangs kyi bya ba byed pa'am seng ge khyi'i zla la song ba ltar don las log pa'o,
,de la zhen log sgom gyi rkang pa'am,
bdag po lta bu yin pas 'khor ba'i sdug bsngal bsam,
tshe 'di mi rtag cing snying po med pa zhe phugs su bcug ste 'jig rten gyi 'khri ba blos btang la tshe dang sgrub pa snyom par bya ba'i blo bskyed,
mos gus sgom kyi mgo bo'am bogs 'don lta bu yin pas bla ma dang bka' brgyud la sangs rgyas dngos kyi 'du shes dang ma bral bar re ltos bcas nas gsol ba snying nas 'debs,
dran pa sgom gyi bya ra ba'am dngos gzhi yin pas thun gyi dus min pa gzhan blos btang mi bya bar dus dang gnas skabs thams cad du gnas lugs kyi dran pa dang ma bral ba la bslab,
sgom gyi phrin las snying rje la bya ste sems can thams cad la byams snying rje byang chub kyi sems sgom zhing bsngo ba smon lam kyi skyabs 'og tu bcug
,rang sgom mthar ma phyin par gzhan la ston pa dang spel ba'i gzhan don ltar snang bdud kyi bar char du bzung la dben pa bsten,
sgom gyi go cha khrel dang ngo tsha la bya ste nang rang sems dpang por bzhag cing phyi nas bla ma dkon mchog dang mched grogs kyis mi khrel bar yid ches pa'i ri mtshams dang 'dag sbyar dang smra bcad sogs kyi sgo nas bsgom pa la nan tan bya'o,
,gnyis pa khyad par mnyam rjes su sgom skyong tshul ni,
sgom sna zin tsam nas rtse gcig chen po'i bar du [31] rang kha'i mnyam rjes tsam las mnyam rjes mtshan nyid pa med par bshad cing,
'on kyang sgom skyong ba la spyir rang rig gi dran pa ma yengs na thams cad sgom yin pas spang blang med kyang rtogs pa'i mnyam rjes ma 'dres kyi bar du thun gyi dngos gzhi mnyam bzhag tu byas la ngo bo rtse gcig tu skyong ba dang,
thun mtshams su rjes thob tu byas la rtog pa dang snang ba lam du 'khyer ba sgrub brgyud phal cher gyi dgongs par go zhig
,gang zag shas che ba la re zhig sgom skyed kyang 'di che snang bas de ltar bshad par bya ste de la,
ngo bo'i skyong thabs so ma rang thang lhug pa gsum tu bzhag par bshad pa las,
so ma la lus gnad khong glod ngag gnad rlung mi btsing sems gnad gang la yang rten mi bca' bar rtsis gdab med par bzhag
,rang thang la sems rang lugs su bzhag ngos bzung med par bzhag ma yengs par bzhag
,lhug pa la dgag sgrub med par bzhag 'bad rtsol med par bzhag tshogs drug rang babs su bzhag pa ste gnad dgur phye ba'am,
rtsis gdab med par rang lugs so mar bzhag
,dgag sgrub kyis ma bcos par rang gar bzhag
,rtsol sgrub mi bya bar lhug par bzhag pa ste gnad gsum dang ldan par bya'o,
,de dag dper na,
nam mkha' ltar dpangs bstod de snang ba gu yangs sang nge bzhag
,sa gzhi ltar rgya bskyed de dran pa khyab cher bzhag
,ri bo ltar lhun phab la sems g.yo 'gul med par bzhag
,mar me ltar gsal ba stong la rig pa gsal [32] sing nge bzhag
,man shel ltar dri ma spangs la shes pa rtog med du dvangs sang nge bzhag pa ste lnga'am,
sprin med pa'i nam mkha' sgrib g.yogs dang bral ba ltar ngos bzung med par gu yangs sang nge bzhag
,rlabs dang bral ba'i rgya mtsho mi g.yo ba ltar rtog med du ma yengs par lham me bzhag
,rlung gis ma bskyod pa'i mar me gsal 'grib med pa ltar gsal sing nge ye re bzhag pa ste dpe gsum ltar mnyam par bzhag go,
,de yang dang por rtsol sgrub dang bral bas lus sems khong glod,
bar du tshom tshom mi bya bar so ma ma bcos par bzhag
,tha mar byung tshor thams cad skye med rang grol du thag bcad de skyong bar bshad la,
lus khong glod pa ni lus shin tu sgrim zhing gcun pa'i rtsol ba glod pa yin gyi,
lus gnad kyi tshul thams cad 'dor ba min pas lus gnad rang babs ni shin tu gal che'o,
,ma bcos pa lhug par 'jog pa yang dmigs bcas kyi dgag sgrub dang zhe 'dod mi bya ba yin gyi,
lung ma bstan tu song ba dang nyams 'al 'ol gyis g.yogs pa'i lar gtong ba min pas dran rig sa le ba'i sems rjen par bskyang ngo ,
byung tshor skye med du thag bcad pa yang rang rig gi dran pas bzung ma thag gang snang skye 'gag gnas gsum gyi ngo bor ma grub par grol ba de nyid yin gyi,
skye med rang grol du kun tu rtog pas rgyas 'debs pa min pas ngos bzung med par bskyang ngo ,
shes pa la bying rgod kyis mnyam par [32] bzhag ma bde na so so'i gnad bcos la re shig mdung byi khung du btsug pa ltar rtse gcig tu skyong dgos pa yin no,
,des skyo na thun mtshams sogs rjes thob thams cad du rang rig gi dran pa rgyun chags su byas te rnam rtog dang snang ba'i 'char sgo ci snang ci shar de ma yengs par skyong la,
dper na rdzi bo mkhas pas phyugs skyong ba lta bu ste,
phyugs rnams ci bder yan yang bsdu ba sogs mi dgos par mig lam nas ma bor bas chog pa ltar,
rnam rtog dang tshogs drug gi snang ba ci shar ci snang thams cad dgag pa'am bkug mi dgos par,
rang rig gi dran pa gzhung bslangs te gang shar ngos bzung med par lhug par skyang ba,
de yang spyod lam rnam bzhi la sogs par ma yengs pa'i dran pa sa le ba rgyun chags su brten pas,
dang por yengs pa shas che na'ang rim pas shugs 'byung gi dran pa 'phel te rtog pa dang snang ba phal cher gsal stong du lhang lhang 'char la,
ci nas kyang skyong dka' na mnyam bzhag gi ngang nas rtog snang gang yang rung ba 'char du bcug la de'i ngo bo blta ba sogs byas te gtan la phab nas gong ltar skyong,
mnyam rjes skyong tshul de ltar 'bad pas ci zhig na thams cad rang rig gi dran pas khyab ste rtog snang ci shar ci snang thams cad shar tsam snang tsam nyid nas gsal stong ngos bzung med pa 'char zhing,
mnyam bzhag tu ngo bo rtse gcig tu skyong ba dang rjes thob tu rtog snang dran pas skyong ba gnyis ngo bo khyad med [34] pa 'byung la,
bde gsal mi rtog pa'i nyams srab mthug sna tshogs kyang 'byung ngo ,
nyams dang 'grogs na gnas lugs la sgrib pas dran rig ngar bskyed hur phyung la yang dang yang du shes pa nyams kyi rlan dang phral te so ma rjen pa skyong bar bya'o,
,gsum pa gegs shor sa dang gol sa bcad pa ni,
thos pa dman zhing bla ma bsten yun thung ba dag la go ba dang nyams la brten nas shor gol 'byung nyen che ste,
de yang stong nyid la shor sa bzhir bshad pa'i shes bya'i gshis la shor ba la,
sgom snang stong dbyer med rnam kun mchog ldan gyi gnad ma rig par skyon yon gang gis kyang mi dgos shing bden par ma grub pa'i stong pa yin snyam du dge sdig khyad du gsod pa ye shor dang,
sgom gyi ngo bo'i don ji ltar bar go zhing de'i tshul bshad shes kyang rang gi myong thog tu ma khel ba'i 'phral shor gnyis,
lam tu shor ba la sgom lam 'bras dbyer med 'bras bu rang chas su yod par ma rig par sgom la lam byas nas 'bras bu gzhan zhig thob par 'dod pa ye shor dang,
sgom ji ltar bar rang la yod kyang de la blo ma khel bar de bas lhag pa yod du re nas gzhan du tshol ba'am sgom de nyid la lhag pa bsnan nas bsgom pa 'phral shor gnyis,
gnyen por shor ba la sgom spang gnyen dbyer med rang ngo rang rig pas spang bya nyid gnyen por 'char ba ma rig par spang bya nyon mongs dang sgom so sor bzung ste nyon mongs kyi gnyen por sgom byed pa ye shor dang,
rnam rtog 'phro ba'am gzhan yang rkyen dang 'phrad pa'i tshe de [35] nyid bshig nas sgom du 'jog pa 'phral shor gnyis,
rgyas 'debs su shor ba la,
sgom thabs shes dbyer med chos thams cad ngo bo nyid du gnas pa ma rig par dmigs bcas la rang bzhin ma grub par rgyas 'debs pa ye shor dang,
sgom lam du ma bslangs par phyi snyags byas la sgom yin snyam du rgyas 'debs pa'am snga ma ma nyan slar sgom snyam du rnam rtog sgom gyis bcad pa lta bu'i 'phral shor gnyis te,
'dis mtshon pa mtha' dag sgom gyi shor sa yin la,
shor ba 'ga' zhig gis ngan song du ltung ba yod cing gzhan yang sgom la myong ba rus mi thon pa'i blo dred can du 'gyur bas ma shor ba gal che'o,
,gol sa ni,
spyir sgom bskyangs pas bde bsal mi rtog pa'i nyams kyi bye brag mtha' yas pa 'char zhing,
khyad par sgrub pa po rtsa thig rlung gsum bzang ba dang rnam g.yeng dang le los bar ma bcad par sgom la 'jur ba dag la nyams kyi rigs ngo mtshar zhing brjod kyis mi lang ba skye la,
sgom dang bya ba gzhan bsres nas bsgom pa la nyams bag re las mi 'byung ngo ,
gang ltar na'ang bde nyams la lus bde bas khyab pa dang,
tsha grang gi reg pa yang bde bar 'char ba dang lus yod med mi tshor bar bde ba dang dga' zhing rgod 'dod pa sogs dang sems spro ba dang skyid snang 'char ba dang blo bde zhing 'bol ba dang nyin mtshan ngo mi shes pa tsam gyi bde ba sna tshogs pa 'byung,
gsal nyams la sems dvangs ba dang snang ba thams cad gsal ba dang [36] mtshan mo yang nye ring gi dngos po thams cad rig pa dang 'od gsal ba'i snang ba sogs dang gzhan sems shes pa snyam byed pa sogs sna tshogs 'byung,
mi rtog pa'i nyams la stong gzugs kyi rtags sna tshogs 'char ba dang thams cad la stong pa'i 'dzin stangs skye ba dang,
snang ba bkrag med du rang bzhin med par snang ba dang rang dang snang ba stong par 'char ba dang stong pa'i nges shes skye ba sogs sna tshogs 'byung ngo ,
bde gsal mi rtog pa gsum ga'i nyams sam nyams phyogs re ba gang yin yang 'dra ste,
nyams de dag la mchog tu bzung nas nyams kyis dkris pa'i sgom de byung na dga' mi dga' bar ched du bskyang na,
bde bas 'dod khams gsal bas gzugs khams mi rtog pas gzugs med khams su skye ba'i rgyu byed la,
zhen 'dzin med kyang nyams kyis dkris pa'i sgom des nyan rang gi go 'phang sgrub cing ngan 'gro'i sdug bsngal las ngal gso tsam 'thob kyi rdzogs pa'i sangs rgyas thob pa la cung zad kyang nud thub pa dka'o,
,gzhan yang shes rab dman zhing thos pa chung na,
ngo bo gnyug ma skyong ba las log nas sgom phyogs re ba dang gnas pa 'thug po dang nyams 'al 'ol dang gnyug ma rab rib can gyi khar 'khor ba 'ong ngo ,
des na gol sa 'ga' zhig gis ngan 'gror skye dogs yod la gzhan dag kyang srid pa'i bde ba sgrub nus pa tsam las med de,
dper na shar du 'gro bar 'dod pa la nub dang byang du song ba ltar don 'chugs [37] pa yin no,
,nyams la zhi gnas kyi nyams dang lhag mthong gi nyams dang rtogs pa'i rang nyams gsum yod pa'i phyi ma gol sar mi 'dzin zhing bar pa yang zhen med du sgom thad kar bskyangs pas nyams rang sar dag nas bogs thon la,
'on kyang nyams byings can phal cher dge sbyor na 'phar ba'i gegs su 'gyur zhing gnas lugs la sgrib pas,
thabs sna tshogs pas nyams bshig nas bsgom pa chod che ba yin no,
@, bzhi pa skye med du la bzlas te bogs 'byung ba la lnga,
la bzla ba'i dus tshod,
rtog pa dang snang ba rtsad gcod pa,
sgom dang sgom mkhan gyi sems rtsad gcod pa,
skye med zang thal du la bzla ba dngos,
mnyam rjes nyin mtshan rnams bsre ba'o,
,dang po ni,
sgrub pa po bde gsal mi rtog pa'i nyams 'thug po dag nas sems gsal dvangs thon te gsal stong nam mkha' lta bu'i sgom 'khor yug tu song ba'am,
nyin snang shas che ba khor yug tu 'gro zhing rtog pa 'gyu thog tu dran pas nam zin gsal stong sang nge tshogs drug gi snang thog tu dran pas nam zin snang stong lhang nge 'char zhing rtog snang gi thog tu nges shes thag chod skyes pa'i tshe la bzla'o,
,la bzla sngas na myong ba mi thon par go yul la brten pa'i dred po kha'i lta ba mtho ba zhig 'byung la,
ha cang 'phyis na skal ba can dag nyams myong gi zhen 'dzin rang dag la song nas rtogs pa 'khor yug du grol ba mang yang,
'ga' [38] zhig la bzang rtog nges shes kyi 'dzin pa cher song nas dge sbyor la mtho dman sna tshogs 'ong ba yin no,
,gnyis pa ni,
sngon 'gro spyi dang khyad par bla ma'i rnal 'byor gyi tshe mos gus kyi gdung shugs drag pos snang srid chos skur 'char bar gsol ba 'debs pa la 'bad cing ngo bo'i bzhag thabs sngar bshad pa ltar rtse gcig tu bskyangs te sems dvangs snyigs phyed pa dang,
sems ma yengs shing gu yangs sang nge ba'i ngang nas rnam rtog phra rags du ma spros te de la 'dzin med du blta zhing phra rags de la khyad par ci 'dug blta,
de dang sems gnas pa'i ngo bo la khyad par ci 'dug blta,
de bzhin du bde sdug dang nyon mongs pa dug gsum gyi rtog pa sogs rtog pa sna mang po zhig la blta,
res rtog pa dgag res mang du spro res rkyang 'ded bya ba sogs sna tshogs pa byas la blta,
phyi rol gyi snang ba mdzes mi mdzes snyan mi snyan phra rags sna tshogs la blta,
lus kyi rnam 'gyur sna tshogs dang mig 'byed 'dzum g.yas lta g.yon lta la sogs pa'i sgo nas snang ba'i 'char lugs mi 'dra ba sna tshogs 'char du bcug la de dag la khyad par ci 'dug blta,
de dag dang sems kyi ngo bo la khyad par ci 'dug blta ba zhag 'ga' byed du bcug la thag chod kyi myong ba skyes pa dang,
sngar bshad pa ltar rnam rtog dang snang ba'i ngo sprod gsal 'debs byas te nges shes bskyed do,
,gsum pa ni,
sgom gyi ngo bo de skye 'gag ngos bzung med pa [39] blo 'das yin snyam pas mi chog pas sems ma yengs shing gu yangs sang nge ba'i ngang nas sgom gyi ngo bo la 'dzin med du lhang bltas la ci 'dra 'dug yang yang blta,
de bzhin du sgom mkhan gyi shes pa dang nga dang bdag tu 'dzin mkhan gyi shes pa la yang yang blta,
gzhan yang 'das pa dang ma 'ongs pa dang da lta'i sems gsum la khyad par ci 'dug
,'das pa'i sems gar song ma 'ongs pa'i sems gang las byung da lta'i sems ji lta bu 'dug blta zhing zhag 'ga' sgro 'dogs gcod du bcug la thag chod kyi myong ba skyes pa dang,
bsgom par bya ba'i yul dang sgom par byed pa'i mkhan po dang dus gsum gyi sems thams cad kyang rgyud tha mi dad par cir yang 'char gang du'ang ma grub pa'i sems 'de nyid yin la,
'de yang ngo bo ngos bzung bzhag sa rten gnas skye 'gag gnas gsum dus gsum gyi dbye ba sogs sgro btags thams cad kyis ma gos pa,
gdod ma nas gzhi med rtsal bral 'khrul ma myong grol ma myong skyon gyis bslad mi tshugs yon tan gyis brgyan mi tshugs rang byung rang dag zla med zang thal phyal ba nyid du ngo sprad la,
zhag 'ga' ched 'dzin med par rang babs lhug par skyong du bcug ste nges shes thag chod bskyed,
gal te sgrub pa po blo rtsal zhan na gong du bshad pa'i rtog pa dang snang ba dang sgom gyi ngo bo dang sgom mkhan dang dus gsum gyi shes pa rnams so sor phral la zhag mang du blta zhing thag chod pa'i nges shes [40] thob nges bya ba gal che'o,
,bzhi pa ni,
de nas bsgom bya sgom byed myong bya myong byed rtogs bya rtogs byed kyi blo rnams bor,
yin min gyi yid byed dang bsgom 'dod dran 'dod sogs zhe 'dod thams cad btang,
ci yang yid la mi byed snyam pa'i 'dun pa yang med par tha mal gyi sems bcos med rang kha ma de kar sdod lugs ci bde byas la 'dug
,rang kha ma'i rnam rtog dang snang ba ci shar yang blos bcos bsgyur mi bya bar gang dgar btang,
yid byed kyi rjes su yang mi 'brang,
sems dum re yengs pa la skyon du mi bzung zhing brtag dpyad mi bya,
nam dran gyi tshe bsgom rgyu myong rgyu byed rgyu gang yang med pa'i tha mal bcos med de kar bskyur,
za nyal 'chag gsum yang blo bral gyi ngang nas bya zhing gzhan bya ba gang yang mi bya,
gtor ma dang gsol 'debs nyung zad tsam re ma gtogs de min dge sbyor thams cad bzhag la smra ba bcad,
nyal ba'i tshe yang tha mal bcos med zang mar nyal,
de ltar zhag 'ga'i bar du yid byed thams cad bor la rang khar 'dug tu bcug ste nyams blta,
bzang zhen gyi 'dzin pa grol ngan rtog gi 'khrul pa zad nas thams cad sgom gyi rang bzhin du nges shes thag chod pa skyes na,
tha mal gyi sems gang 'dug ci shar skye 'gag med pa spang blang med pa bral thob med pa,
yengs ma yengs dran ma dran myong ma myong rtogs ma rtogs med par rang byung rang dag rang grol zang [41] thal thams cad sgom gyi rang bzhin sgom gyi khor yug tu ngo sprad la zhag lnga tsam 'byams su bcug cing skabs re tsam sgom min pa'i sems btsal tu 'jug go,
,lnga pa ni,
de ltar sgom 'khor yug des mnyam gzhag dang rjes thob bsre zhing,
rjes thob tu dum re yengs na yang rjes shes dran pas nam zin gnas lugs de rig pas chog
,de bzhin du nyin mo'i khor yug de mtshan mor bsre zhing gnyid dang rmi lam du bslangs na mchog yin,
de min 'khrul yang sad ma thag rjes la gnas lugs rig pas chog
,gzhan mtshan bcas dang yid byed gang yang mi bya bar zhag lnga re tsam bzhag
,yang zhag re tsam gang bder ngal gso,
yang zhag bdun re bcu re tsam du la bzla re dang ngal gso re spel la gnas lugs kyi rtogs pa des nyin par khor yug tu ma song bar du la bzla,
nyin par khor yug tu song nas mtshan mo rim gyis 'char ba yin no,
,la bzla 'di la sgom khor yug gi man ngag kyang zer,
mnyam med dvags po'i gab pa mngon phyung gi dgongs pa gnas lugs rjen pa gtan la dbab pa'i bogs 'don yin pas man ngag 'di gnad 'tshams zos na,
gnyug ma bzang zhen can gyis lo mang du bgrod dgos pa'i rtogs pa zhag 'ga' la bgrod nus pa yin no,
,ci kyang bogs ma thon na re zhig mnyam rjes kyi dge sbyor skyong lugs sngar bzhin bya'o,
@, lnga pa lam khyer spyod pa'i sgo nas rtsal sbyong ba la bdun,
lam khyer gyi dus dang spyod pa, [42]
rnam rtog lam khyer,
nyon mongs lam khyer,
lha 'dre lam khyer,
sdug bsngal lam khyer,
na tsha lam khyer,
'chi ba lam khyer ro,
,dang po ni,
sgom ngo mthong gi rtogs pa shar nas tshe 'di'i snang shas la song ba dang rkyen drag po dang 'phrad pa dang rnam rtog bag la nyal ngo ma shes 'ong ba'i dus dang,
mdor na dge sbyor gyi rang shugs su lam du slong dka' ba'i 'khu 'phrig gi 'dzin pa nam byung gi dus dang,
dben pa'i gnas su sgom khor yug shar na de brtan zhing bogs dbyung ba la spyod pa bya ba'i tshe gong gi rkyen dang 'khu 'phrig byung ba'i dus rnams su lam khyer bya ste,
gzhan du na snang srid lam khyer gyi rgyal po blo bral gnas lugs skyong ba dor nas gnyen po can gyi lam khyer bsgom pa don min no,
,de la spyod pa bya ba'i dus ni mnyam rjes khor yug tu gyur nas bya la,
spyod pa ni gsang sngags kyi lam nas spros bcas spros med shin tu spros med gsum mam,
kun tu bzang po'i spyod pa gsang spyod rig pa brtul zhugs kyi spyod pa tshogs spyod phyogs las rnam rgyal gyi spyod pa sogs mang du gsungs kyang,
'dir sgom bogs 'don gyi spyod pa la rab byung gi bslab pa dang mi 'gal bar kun bzang dang,
spros med dang shin tu spros med dang phyogs las rnam rgyal gyi spyod pa dang don mthun par,
ri bo'i rtse dang gnyan sa dang dur khrod dang shing gcig gi mdun dang bzhi mdo la sogs pa'i gnas rnams su smra ba bcad de ku su lu'i mchod sbyin bya zhing,
'jig rten la blo mi [43] 'jug pa ri dvags rmras ma lta bu'i spyod pa,
ci byung yang nyam nga med pa seng+ge lta bu'i spyod pa,
gang la yang chags zhen med pa bar snang gi rlung lta bu'i spyod pa,
ci la'ang blo rten mi bca' ba nam mkha' lta bu'i spyod pa,
dgag sgrub dang gza' gtad med pa smyon pa lta bu'i spyod pa ste lnga'i sgo nas rkyen mtha' dag lam du slong zhing gnas lugs la bogs dbyung bar bya'o,
,gnyis pa ni,
dge mi dge la sogs pa'i rnam par rtog pa shar nas 'khu 'phrig byung ba'i tshe,
rnam rtog de ngos bzung nas gang shar de ma bcos lhug par skyong ste,
de yang rtog pa de yid la mi byed par sems bkug nas gnyen po ye shes bsgom pa yang min,
rtog pa de'i ngo bo la brtag dpyad byas te rang bzhin ma grub par gtan la 'bebs pa yang min,
rtog pa de'i rjes su 'brang zhing dran pas skyong ba yang min par,
rtog pa de ngo shes tsam nas rtog pa de ka la sgom gyi ngo bor byas te ci ltar 'dug pa de la skyon du mi bzung ched du mi dgag rjes su'ang mi 'brang bar de ga la blos ma bcos par gsal le ye re lhod de gu yangs sang nge bzhag pas,
rtog pa gang shar de nyid spang blang dgag sgrub bcos bsgyur mi dgos par sgom du lhangs kyis 'char te,
de la rnam rtog lam du slong ba zhes bya'o,
,klong du ma gyur pas rnam rtog gi g.yo ba drag po rnams dang por mi bde khar re ba 'dra ba zhig ngang ngam shugs kyis lam du longs la,
rim gyis klong du gyur nas mthar ngos zin pa tsam gyis lam du [44] bslang ba yin no,
,gsum pa ni,
nyon mongs pa 'dod chags zhe sdang gti mug nga rgyal phrag dog lnga gang yang rung ba skyes pa'i tshe de ngos bzung ste de dgag kyang mi dgag rjes su yang mi 'brang bar nyon mongs pa de ka blos ma bcos par gsal sing nge bar gu yangs sang nge bzhag pas sgom du 'char ro,
,skabs re nyon mongs pa'i dmigs rkyen phyi rdzas nang sems can gang yin pa'i chags yul sdang yul la sogs sngar las mngon tshan che ba yid la byas te nyon mongs pa ches cher bskyed la,
skyes pa dang sngar bzhin bskyang ngo ,
,gti mug la gnyid bro ba'i sems de ngos bzung la gnyid thibs thibs yong ba'i tshe de ka'i steng du blos ma bcos par bskyang bas gnyid 'od gsal du 'char ba'i thabs su 'gyur zhing,
klong du gyur ma gyur sngar ltar 'byung ngo ,
,bzhi pa ni,
lha 'dre'i cho 'phrul la sogs pas 'jigs shing bag tsha zing ste byung ba'i tshe,
'jigs pa'i rtog pa ngos bzung la mi dgag rjes mi 'brang bar 'jigs rtog de ka blos ma bcos par gsal rjen lhang nge bskyangs pas sgom du 'char,
cho 'phrul sma dbab na de las 'jigs pa'i cho 'phrul blor mi shong ba byung bar bsams te 'jigs snang yang cher bskyed la gong bzhin nyams su blang ngo ,
,lnga pa ni,
spyir 'khor bar sdug bsngal ba dang khyad par yul sems can zhig sdug bsngal ba mthong na,
de la snying rje med par rang de 'drar gyur dogs nas sgom la sems spro ba theg [45] dman gyi blo dang,
de la snying brtse skyes shing des mtshon pa'i sems can thams cad la snying brtse skye ba theg chen gyi blo gang skyes kyang,
blo de ngos bzung la de la blos ma bcos par gsal lhang nge bzhag la lam du slong nyams de'i ngang ma shor bar sems can kun la byams snying rje byang chub kyi sems bskyed de smon lam gdab bo,
,drug pa ni,
rang nad kyi rigs gang yang rung bas na ba'i tshe rgyu rkyen sogs kyi brtag dpyad mi bsam zhing dgag sgrub ma shor bar byas te,
na tsha zug gzer lhang nge ba de nyid sgom gyi ngo bor byas la blos ma bcos par gsal sing nge bzhag
,de yun bsrings pas na tsha spong mi dgos par sgom du 'char zhing bogs thon no,
,nad sma dbab na sngar dang 'dra,
gzhan yang na mkhan gzer mkhan myong mkhan gyi bdag 'dzin rtsad gcod pa dang ngo bo ngos bzung med pa'i ngang la ma bcos par 'jog pa sogs kyang bya'o,
,'dir ro snyoms pas sman dpyad spang bar bzhed kyang rang gi nad dge sbyor du 'khyer ba yin gyi,
byang chub sgrub pa'i rten la shi ma shi med par blun 'chos mi bya'o,
,bdun pa ni,
de ltar mi tshe gang byung la rkyen ci byung lam du 'khyer nas goms par byas la,
'chi ba'i tshe thim rim rim can la sogs pa ci shar yang ngo shes pa tsam byas la re dogs dang dgag sgrub kyi khu 'phrig mi bya bar gang shar shar de ka la blos ma bcos par gsal rjen lhang nge bskyangs pas,
thim rim rdzogs pa'i rjes la rang bzhin gyi 'od gsal [46] 'char ba dang lam du bskyangs pa'i 'od gsal de ma bu 'dres pas chu la chu bzhag pa'am nam mkha' dang nam mkha' 'dres pa ltar gyur te sangs rgya bar bshad cing,
gal te goms pa chung bas sangs ma rgyas kyang bar do dang skye ba'i lam khyer sngar gyi shugs kyis rang dbang thob par bshad do,
,lam khyer 'di dag mnyam med dvags po'i gsung rab las 'thor bur gsungs shing rkyen snang ci byung ci shar phyag rgya chen por 'khyer nas ro snyoms pa la don tshang yang,
phyis sgrub brgyud pa rnams kyis lam khyer drug dmigs bsal du phye ba rtsal sbyong du legs pa 'dug cing blo rigs phal cher la khyad che bar snang bas de ltar du byas pa ste ming gzhan ro snyoms zhes kyang grags so,
,drug pa rtogs pa 'char tshul bogs 'don dang bcas pa la lnga,
'char tshul mi 'dra ba'i khyad par,
rtse gcig bogs 'don dang bcas pa,
spros bral bogs 'don dang bcas pa,
ro gcig bogs 'don dang bcas pa,
sgom med bogs 'don dang bcas pa'o,
,dang po ni,
gang zag cig char ba'i rigs la dang por gnas pa'i dus sam ngo sprad dus nas rtse gcig tsam dang spros bral man dang ro gcig man dang sgom med phyin cig char du skye ba sogs sna tshogs pa yod la skyes pa de yang brtan no,
,thod rgal ba la rnal 'byor bzhi snga ma ma brtan par phyi ma thol gyis skye la skyes pa mi brtan par 'phel 'grib che bas mtshams la rgyun du gnas shing rtse gcig tu bsgoms [47] na rtogs pa brtan po thob la,
tshe 'dir sgom yun thung na rtogs pa gsha' ma bar dor 'char bar bshad do,
,rim gyis pa la rnal 'byor bzhi rim pas 'char zhing snga ma brtan nas phyi ma rim gyis skye la skyes pa yang brtan te snying rus bskyed pa gal che'o,
,thod rgal ba dang rim gyis pa gnyis kyang bla ma la mos gus dang sgom la snying rus bskyed na cig char ba dang 'dra bar 'gyur ba la tshegs med par bshad cing,
rigs gsum po so so la'ang blo rtsal che chung gi dbye bas skye lugs ma nges pa sna tshogs 'ong bar 'dug pas,
rnal 'byor bzhi rim gyi bshad tshod thams cad khrigs kyis 'grigs pa rang gi nges bzung mi snang la,
'on kyang rim gyis pa la rim can nges bzung du 'char ba'i tshul bshad na ma nges pa'i 'char tshul la'ang dge sbyor gyi gnas skabs dang blang dor phyed pas de ltar du bshad par bya'o,
,bnyis pa ni,
rtse gcig gi rnal 'byor la goms pa chung 'bring che gsum gyi dbye bas gsum du yod de,
gsal stong bde nyams dang bcas pa'i ting nge 'dzin skyong dka' ba tsam nas nam sgom sgom 'ong ba'i bar rtse gcig chung ngu ,
res ma bsgoms kyang ting nge 'dzin der 'gro zhing bsgoms pa'i tshe brtan po 'ong ba rtse gcig 'bring,
mnyam rjes dang spyod lam bzhi dang nyin mtshan khor yug tu rgyun chad med par gsal stong gi ngang du cham gyis 'gro ba rtse gcig chen po'o,
,de yang mthar [48] phyin ma phyin dbye ba drug gis byed de,
sems gsal stong de nyid la rang rig yid ches kyi nges shes rnyed na rtse gcig gi ngo bo mthong,
bde gsal mi rtog pa'i ngang du gnas kyang nges shes kyi 'phrig ma tshud na ngo bo ma mthong,
gsal stong de'i ngang la nyin mtshan khor yug tu 'gro na rtsal rdzogs,
res 'jog 'ong na rtsal ma rdzogs,
rtog snang shar tshad dran pas zin tsam nas spang ma dgos par sgom du 'gro na rnam rtog sgom du shar,
rnam rtog bkug nas bsgom dgos na ma shar,
chos brgyad las blo log pa sogs kyi drod rtags thob na yon tan skyes,
blo las su mi rung ba sogs 'dug na ma skyes,
rjes shes su sems can la snying rje skye zhing gzhan phan gyi smon lam btab na gzugs sku'i sa bon thebs,
snying rje skye dka' na ma thebs,
rjes shes su rgyu 'bras phra rags la mi slu ba'i 'phrig tshud na kun rdzob la rang byan tshud,
rgyu 'bras kyi rten 'brel la nges pa ma rnyed na ma tshud pa'o,
,de la rtse gcig chung ngu'i dus,
sems gsal stong bde nyams dang bcas pa'i mnyam bzhag nges bzung can yod cing nyams de'i ngang nas rtog snang 'char ba'i tshe rang dvangs rang grol du 'gro zhing sgom yin snyam du blos byas kyi nges shes kyang 'ong,
rjes snang du dga' spro dang bcas pa'i snang ba phal cher a 'thas su 'char,
rjes shes su dran pas nam zin gsal stong gi nyams dang bcas te stong pa dang sems [49] snang yin snyam pa'i 'dzin stangs 'byung,
rmi lam gsal dvangs thon tsam las khyad cher mi 'ong,
'ga' zhig la rmi grangs mang la nges bzung chung ba'o,
,res mnyam par 'jog dka' zhing sgom mi 'ong ba 'dra snyam pa'ang 'byung,
'phel 'grib che mos gus dag snang snying rje rnams skye'o,
,rtse gcig 'bring gi dus gsal stong bde nyams dang bcas pa'i sgom de nam sgom sgom brtan po 'byung zhing res ma bsgoms kyang de'i ngang du cham gyis 'gro,
nyams de'i ngang nas rtog snang 'char ba sngar bas nyung zhing gang shar rang dvangs su 'gro,
rjes snang du gsal stong gi nyams dang bcas ba'i snang ba gu yangs sang nge ba 'byung,
res a 'thas su'ang 'char,
rjes shes su nam dran sgom du cham gyis 'gro,
rmi lam du nyams des res sleb res mi sleb 'ga' zhig la rmi grangs nyung du 'gro ba 'ong,
sgom la spro ba skye'o,
,rtse gcig chen po'i dus gsal stong bde nyams dang bcas pa rgyun chad med par 'char zhing
,rnam rtog thams cad de'i ngang du thim rjes snang thams cad de'i ngang du song rmi lam phal cher yang de'i ngang chud de,
bzang zhen gyi 'dzin pa dang bcas pa'i nges shes la sems bde stong rig stong rnam rtog gsal stong snang ba snang stong sogs kyi stong nyams dang thams cad rmi lam sgyu ma lta bu sogs kyi myong ba mang po 'char,
zag bcas kyi yon tan 'ga' re'ang skye,
sgom 'di bas bzang ba med snyam pa 'ong zhing mos [50] gus sogs skye'o,
,de yang rtse gcig gsum gyi dus su ri mtshams dang 'dag sbyar dang smra bcad la brtson par bya grib la 'dzem zhing grib phog na grib sel bya,
bying rgod byung na skyon bsal ba dang ngo lta bya,
rmugs na sdig bshags bya zhing bla ma la dbang zhu,
ting nge 'dzin gyi dbang mang du blang,
tshogs 'khor dang mchod 'bul dang sbyin gtong bya zhing bla ma dang mched grogs la zhus te bcos,
ha cang skyon che zhing bla ma dang mched grogs la zhu mi 'dod pa dang log lta skyes pa byung na bdud kyi bar chad yin pas skyabs 'gro bya,
skyo shas nges byung mos gus dag snang snying rje rnams rtsal phyung ste bsgom,
zhag 'ga' zung dub bsang byas la skyon bcos shing bskyang ba dang lus sbyong ci rigs bya'o,
,de ltar ting nge 'dzin de sngar bshad pa'i skyong thabs ltar 'jur dran nam bzung dran gyis rtse gcig tu skyong,
rtog dpyod kyi go yul dang mi rtog pa'i gnas pa dang myong ba'i nyams dang rjes shes kyi snang shas rnams su ma shor bar bya,
nyams bzang ba la dga' tshor gyi zhen 'dzin dang ngan pa la mi dga' ba'i skyon bltas mi bya,
gang shar yang spang blang med par 'dzin med bcos med du skyong,
nyams 'thug na nyams dang phral te ngar bskyed la shes pa so ma yang yang skyong,
skabs su sgrub brgyud gong mas sgrub tshugs bzung ba'i rnam thar dang rdo rje'i mgur la sogs pa yang bltas te rang yang de lta bu'i snying stobs bskyed pa sogs bya'o,
,[51] de ltar bskyangs pas bde gsal mi rtog pa gsum dbyer med pa sems kyi rang bzhin gsal stong du 'jug pa myong zhing rtogs te,
rnam rtog gsal stong dang snang ba snang stong du rtogs shing thams cad sems su thag chod pa dang,
sems skye med rang rig dang rang grol du rtogs te rtse gcig gi rtogs pa mthar phyin par 'gyur ro,
,cis kyang bogs ma byung na zhen pa gsum btang bar bya ste,
bdag du zhen pa btang ba ni,
tshe 'di'i ltos thag bcad mi khyu nas bud 'jig rten gyi 'khri ba btang,
dgra gnyen gyi chags sdang dang lus bla ma la dbul phung po'i gces 'dzin spang ku su lu'i mchod sbyin bya,
longs spyod la zhen pa btang ba ni,
nor rdzas ci yod pa bla ma mnyes pa'i 'bul ba,
yi dam la sogs mnyes pa'i mchod gtor dang tshogs 'khor,
rdo rjes spun mnyes pa'i spong dag byas la,
skyid 'dod za 'dod 'byor 'dod kyi 'dzom sha blos btang,
lto gos gtam gsum khyad du bsad,
sngar bshad pa'i ri dvags lta bu'i spyod pa la sogs bya zhing chags sdang dang g.yeng ba can gyi gnas pha yul sogs spang,
cis kyang spang ma tshugs na lo shas smra bcad bya,
ting nge 'dzin la zhen pa btang ba ni,
dga' zhing spro la yid ches pa'i bzang nyams thams cad gtong,
gnas lugs gang shar la bzang ngan med par thag bcad de la bzla,
shes pa nyams dang phral ba'i rjen pa rnal ma bskyang bas rim gyis bogs [52] thon te ci zhig na nyams myong de dag nas yul dang yul can gyi gnyis 'dzin zhig ste,
sems kyi ngo bo skye 'gag gi spros pa dang bral bar rtogs te spros bral gyi rtogs pa 'char ro,
,gsum pa ni,
spros bral la yang gsum ste,
rtog snang sems kyi ngo bo skye 'gag gi spros pa dang bral bar rtogs kyang stong par 'dzin pa'i nges shes kyi myong 'khris dang ma bral zhing 'khor 'das la re dogs yod pa spros bral chung ngu ,
stong 'dzin nges shes kyi myong 'khris dag kyang snang thog tu re dogs 'ong zhing sgro 'dogs ma chod pa spros bral 'bring po,
snang srid 'khor 'das thams cad la stong 'dzin nges shes kyi 'dzin pa grol nas re dogs dang bral zhing sgro 'dogs chod pa spros bral chen po'o,
,spros bral mthar phyin ma phyin gyi dbye ba ni,
de la sems kyi ngo bo spros bral tu mthong ba la nges shes kyi 'dzin pa grol,
myong tshor mkhan po'i rtsa ba chod nas spros pa thams cad dag pa'i ngang du phyal gyis song na spros bral gyi ngo bo mthong,
stong 'dzin nyams kyi dri ma nges shes kyi cha ma dag na ngo bo ma mthong,
re dogs dang stong 'dzin gyi cha tsam yang med par tha mal shes pa spros bral du sgro 'dogs chod na rtsal rdzogs,
rang bzhin skye med du shes kyang snang thog tu re dogs 'ong zhing stong 'dzin gyi 'khris ma sangs na rtsal ma rdzogs,
rtog snang thams cad stong 'gyu stong snang du rang ngo shes nas rjes snang du mnyam gzhag gi rtogs pa lta bur 'char na rnam rtog [53] sgom du shar,
de mi 'char na ma shar,
thabs lam la gnad du bsnun te grub pa'i rtags dang rtogs pa 'brel na yon tan skyes,
grub rtags kyi snang cha ma thon na ma skyes,
stong nyid kyi ma 'gags pa'i rtsal la dmigs med kyi snying rjes skyes nas sems bskyed dang smon lam gyi rten 'brel rjes shes su sgrig na gzugs sku'i sa bon thebs,
snying rje skye dka' zhing thabs rten 'brel mi sgrig na sa bon ma thebs,
stong nyid rgyu 'bras su shar nas ngo bo spros pa dang bral yang rkyen gyis cir yang sgyur bar go na kun rdzob la rang byan tshud,
rgyu 'bras kyi rten 'brel ma go bar stong 'dzin gyi khyad du gsod na rang byan ma tshud do,
,de la spros bral chung ngu'i dus chos thams cad kyi ngo bo skye 'gag gnas gsum gyi spros pa dang bral bar rtogs kyang thams cad la stong par 'dzin pa'i 'dzin pa cung zad yod la,
rjes shes su dran pas ma zin pa'i dus dgra gnyen chags sdang gi 'dzin pa a 'thas 'byung zhing gnyid dang rmi lam phal cher yang 'khrul pa 'byung,
dge sbyor mtho dman che zhing bla ma mched grogs dang dge sbyor la res dad pa dang nges shes skye res the tshom skye ba srid do,
,spros bral 'bring gi dus stong 'dzin nyams kyi dri ma de dag nas gang la yang zhen pa dang bral,
rnam rtog gi rtsa ba chod pas 'gyu thog tu sgro 'dogs chod kyang snang thog tu a 'thas kyi re dogs dum re 'ong,
rjes shes dang rmi lam gyi tshe 'khrul ma 'khrul sna tshogs 'byung,
dge sbyor dang bla ma [54] mched grogs la yang dad pa dang the tshom la sogs mtho dman dum re 'byung,
res sangs rgyas thob rgyu med dmyal bar skye rgyu med dam snyam pa'ang 'ong ngo ,
spros bral chen po'i dus 'khor 'das kyi chos thams cad kyi rtsa ba chod pas thams cad la re dogs med cing sgro 'dogs chod de phyi nang gi chos thams cad la stong mi stong sogs kyi bde mi bde med par phyal gyis 'gro,
snang ba thams cad stong zhing bdag med par 'char,
rjes shes su snang ba thams cad rtog par dag pa'i shes pa dvangs seng nge ba 'ba' zhig cung mi 'ong yang rig stong snang stong gi nyams bzang po dang bcas pa'i nyin bar gyi sgom la rgyun chad med,
'on kyang dran pas rgyun chad med par zin pa cung mi 'ong bas bzung dran re la ltos dgos shing,
rmi lam du 'khrul pa rang mtshan pa dum re 'ong,
res sangs rgyas thob rgyu med dmyal bar 'gro rgyu med gnas lugs kyi don rtogs snyam pa'ang 'ong,
gting zab pa'i chos rnams kyang go zhing sems nyid bla mar 'char snang ba dge sbyor gyi grogs su 'gro,
gang la yang zhen pa chung chos brgyad las blo ldog
,'on kyang da ni bla ma mi dgos snyam pa dang nga rgyal dang rlom sems dang gzhan la khyad du gsod pa sogs 'byung dogs yod do,
,spros bral gsum gyi tshe,
zhen pa gsum btang ri khrod shin tu dben pa brten zhing smra bcad dang 'dag sbyar la nan tan bya,
gtor ma dang bla ma'i gsol 'debs tsam ma [55] gtogs mtshan bcas kyi dge sbyor rnams re zhig dor nas dran pa la rtsis su bya zhing yengs med du bsgom pa gal che,
skabs su mchod sbyin sogs 'dus byas kyi dge ba bsags pa dang,
bla ma la mos gus mched grogs la dag snang sems can la snying rje bsgom zhing rgyu 'bras kyi rten 'brel rnams bsam,
bla ma dang mched grogs rtogs don la zab mo'i gleng mo bya ba dang grub thob brgyud pa'i rdo rje'i mgur blta ba dang dbyangs su blang ba sogs bya,
phal cher du dran pa rgyun chags kyis ma yengs pa nyid gal che zhing dmigs bcas mang na mi dag',
yang bde shes chung zhing 'gro 'dod dang za 'dod dang snying mi dga' ba sogs byung na thabs lam 'bar 'dzag dang mchog gi gtum mo dang lus sbyong sogs ci rigs bya'o,
,spros bral chen por lor bskyangs kyang bogs ma thon na zhen pa gsum gtong ba dbang zhu ba nyams chags bshags pa sogs bya zhing rtogs pa 'phel bar gsol ba gdab,
rang yi dam du bsgoms la dmyal ba'i sdug bsngal bsam zhing de sems su thag bcad la spros bral du mnyam par bzhag
,de bzhin du lha'i bde skyid dang 'khor ba'i gnas tshul dang myang 'das kyi gnas tshul rnams bsam zhing spros bral du mnyam par bzhag
,res ri bo'i rtser phyin la spros bral du glod,
res mang po'i 'dun sar song la spros bral du glod,
rlung thun re bzung la snang ba la mig ha re blta zhing spros bral du [56] glod de bskyang bas bogs 'byung bar bshad do,
,de nas ci zhig na 'khor 'das kyi chos thams cad la skye 'gag gi spros pa dang bral ma bral stong mi stong spang blang sogs kyi dgag sgrub med par gra ma chag zur ma mnyams par phyag rgya chen por ro gcig tu rtogs pa'i rnal 'byor 'char ro,
,bzhi pa ni,
ro gcig la'ang gsum ste,
dran snang thams cad sems nyid phyag rgya chen por ro gcig tu rtogs kyang der myong zhing 'dzin pa'i nges shes kyi 'khris yod pa ro gcig chung ngu ,
du ma ro gcig tu myong zhing 'dzin pa'i nges shes kyi dri ma dag nas snang ba phyir ma lus sems nang du ma lus par snang sems dbyer med lam me ba mngon du gyur pa ro gcig 'bring po,
du ma ro gcig tu rtogs ro gcig du mar shar te thams cad mnyam nyid gnyug ma'i ngang du zhi ba ro gcig chen po'o,
,ro gcig mthar phyin ma phyin gyi dbye ba ni,
gang shar gyi snang ba la spang blang dgag sgrub med par mnyam nyid gnyug ma yul med rang gsal du rang ngo shes na ro gcig gi ngo bo mthong,
mnyam nyid du 'dres rgyu dang 'dres pa'i myong 'dzin nges shes kyi 'dzin pa 'dug na ngo bo ma mthong,
gang shar thams cad mnyam nyid gnyug ma de'i rtsal du 'char na rtsal rdzogs,
gnyen po'i 'khris dang bcas pas ro gcig du mar mi 'char na rtsal ma rdzogs,
snang sems sogs gnyis snang gi 'dzin pa dag ste tshogs drug gi 'char sgo la 'ching grol med par [57] gang shar gyis chog na rnam rtog sgom du shar,
'char sgo rnams ngo shes kyi dran pas grol dgos na ma shar,
snang sems 'dres nas sprul bsgyur la sogs pa'i rdzu 'phrul thob na yon tan skyes,
sad byed lam gyi rkyen zhan nas rtags ma thon na yon tan ma skyes,
kun khyab kyi snying rje rtsol med du 'byung zhing gzhan don gyi gter kha bye na gzugs sku'i sa bon thebs,
snying rje sogs thabs kyi nus pa chung zhing gzhan don mi 'grub na sa bon ma thebs,
rgyu 'bras kyi rten 'brel gsal bar rtogs pas rig pa skad cig ma'i 'char sgos 'khor 'das kyi gyes so byed par shes te rgyu 'bras la mkhas na kun rdzob rang byan tshud,
ro gcig du ma'i rgyu 'bras su ma 'char na rang byan ma tshud pa'o,
,de la ro gcig chung ngu'i dus thams cad gnyug ma'i ngo bor rtogs kyang der myong rgyu dang der 'dzin pa'i cha cung zad yod la,
rjes shes su yul rkyen drag pos dkrugs pa'i tshogs drug gi snang ba la dge sbyor du mi bde ba 'ong zhing rang khar yang gzung 'dzin a 'thas kyi snang ba dum re 'byung,
rmi lam na yang 'khrul pa dang 'dzin pa dum re 'ong,
res lus snang sems gsum dbyer med pa'i nyams skye,
'on kyang rgyu 'bras la rtsi 'jog dang mos gus dang snying rje chung du 'gro ba srid do,
,ro gcig 'bring gi dus rtogs bya rtogs byed myong bya myong byed kyi 'dzin pa grol snang sems gnyis 'dzin gyi rtsa ba chod,
rjes shes dang rmi lam yang sngar bas 'khrul pa chung [58] zhing a 'thas kyi 'dzin pa yang cher mi 'ong,
ro gcig chen po'i dus mnyam nyid gnyug ma ma 'gags pa'i rtsal sna tshogs la bden 'dzin dang bral ba'i gnyis med kyi rtogs pa de nyid nyin mtshan 'khor mor 'byung,
mi rtog pa'i 'char sgo snang la ma nges pa'i gsal tsam gyi myong tshor cung zad re 'byung,
rjes shes su snang ba 'dzin med gsal stong sgyu ma lta bur snang zhing shes bzhin gnyis snang phra mo 'char,
'dzin med kyi rmi lam 'al 'ol 'gag med du 'byung,
res rmi lam med pa yang 'ong bar bshad do,
,ro gcig gsum gyi tshe gnas phal cher dben pa bsten,
res 'ga' tsam tshogs su yang bsdad la bogs dbyung,
bsgom ma bsgom khyad med snyam yang dben pa bsten zhing yang dag gi dran pa sgom pa nyid du gnad che'o,
,ro gcig chen po'i rtogs pa thob kyang,
mngon shes phra mo dang mkha' 'gro'i mtshan ma ma byung na nyams grib phog pa yin pas tsha tsha stong rtsa sogs btab cing de re re la me tog re phul la,
bdag gi grib nye bar zhi bar mdzad du gsol zhes gsol ba btab,
gzhan yang grib sel gyi gzungs chog dang dge ba'i sna ci rigs bya,
mtshan ma byung nas dga' mi dga' 'dug na bdud zhugs pa yin pas phan 'dogs pa dang gnod pa skyel ba dang bdud la sogs pa thams cad rang gi sems yin sems nam mkha' ltar mtha' dbus med snyam du bsam,
lar ro gcig [59] skyes nas rtogs pa la mi 'jigs yon tan la mi dga' skyon gyis kha brid kyang mi nus pa yin,
slar la phrag dog che nyon mongs mang rnam rtog rags zur mgo rno dga' mi dga' 'dug na bdud sems la zhugs pa yin pas de ngo shes par byas la dge sbyor la rem par bya,
lar sgom dang mi mthun pa thams cad bdud rang du shes par bya zhes gsungs pa ltar go bar bya zhing,
sems can yang rang sems bla ma yang rang sems su 'dug pas snying rje dang mos gus mi dgos snyam nas thabs khyad du gsod srid pas snying rje dang mos gus sogs kyi stobs bskyed,
rten 'brel bzang po thams cad bsgrig pa dang ngan pa thams cad spang pa dang rgyu 'bras kyi go cha dang du blangs te dge sdig gi blang dor zhib tu bya,
gzhan la phan gnod 'byung zhing lha'i bu'i bdud kyis zin dogs yod pas gzhan don ltar snang spang,
'khor dang longs spyod dang snyan grags la ma chags pa gal che'o,
,de ltar bskyangs pas nyams dang myong ba'i dri ma thams cad dag lam gyi rtogs pa dang rang bzhin gyi gnas lugs 'dres nas mnyam rjes dang dran pas zin ma zin med pa'i sgom med kyi rtogs pa 'char ro,
,lnga pa ni,
sgom med la yang gsum ste,
dran pas bzung ma dgos ched du mnyam par bzhag ma dgos par snang ba thams cad sgom du 'char zhing sgyu ma lta bu'i 'dzin pa cung zad tsam skye ba yod kyi bar sgom med chung ngu ,
[60] sgyu ma lta bu'i 'dzin pa de dang yang bral te nyin mtshan thams cad sgom med khor yug tu song zhing rjes snang du rnam shes kyi rgyun phra mo rang gsal du 'char ba sgom med 'bring po,
rnam shes phra mo de yang ye shes su gnas gyur nas thams cad ye shes kyi khor yug tu gyur pa sgom med chen po'o,
,sgom med mthar phyin ma phyin gyi dbye ba ni,
sgom med kyi rtogs pa de la dran rgyu'am goms rgyu med par myong ba dag na sgom med kyi ngo bo mthong,
de la dran rgyu'am goms rgyu 'dug na ngo bo ma mthong,
gnyis snang phra mo dag cing chos thams cad zad sar 'khyol nas dus kun tu ye shes dang dbyer med na rtsal rdzogs,
gnyis snang phra mo snang zhing shes bya'i chos ma zad na rtsal ma rdzogs,
kun gzhi'i rnam shes thams cad ma spangs par chos dbyings ye shes su dag na rnam rtog sgom du shar,
rnam rtog gi 'dzin pa bag la nyal phra mo dang nyams myong gi dri ma phra mo zhig 'dug na yang rnam rtog sgom du ma shar,
lus 'ja' lus ye shes kyi gzugs sku dang sems 'od gsal chos skur shar nas zhing khams dag pa rab 'byams su snang na yon tan skyes,
lus sems dang snod bcud la ma dag pa'i snang ba cung zad 'dug kyang ma skyes,
dbyings dang ye shes dbyer med pa'i chos kyi skur byang chub nas sku gsung thugs mi zad rgyan gyi 'khor los sems can gyi don lhun grub tu rgyun mi chad pa 'byung na gzugs sku'i phrin las grub,
de ltar ma gyur par [61] zhing khams dag pa la ltos dgos na phrin las ma grub,
sangs rgyas kyi yon tan thams cad rdzogs na kun rdzob dag cing byan tshud,
rnam smin gyi lus rgya bag chags snang rgya rnam shes sems rgya ste rgya gsum gyis sangs rgyas kyi yon tan bsgribs nas kun rdzob ma dag cing byan ma tshud pa yin no,
,de la sgom med chung ngu'i dus gnyis snang phal cher dag nas ched du sgom ma dgos dran pas bzung ma dgos par snang ba thams cad sgom du shar te sgom las g.yo ba med pa 'byung la,
rjes snang du mi rtog ngo ma shes zhes bya ba ma rig pa'i lhag ma kun gzhi'i rnam shes rtog bral lung ma bstan du gnas pa zhig yong ba la gnas ngan len gyi dri ma zer,
las mi gsog kyang ye shes su ma dag pa'i 'dzin pa sgyu ma lta bu yad yud skye ba dang,
rmi lam du yang ngo ma shes kyi bden 'dzin cung zad 'byung bar bshad do,
,sgom med 'bring gi dus sgyu ma lta bu'i gnyis snang phra mo de yang dag nas nyin mtshan thams cad sgom med kyi 'khor yug tu 'gyur zhing,
rjes snang mi rtog ngo ma shes kyi cha phra zhing phra ba rang gsal du shar ba zhes bya ba gshis babs dang mthun par rdzogs pa la zer te gnas ngan len gyi dri ma phra zhing phra ba yin la mtshan mo la yang de'i cha yod par bshad do,
,sgom med chen po'i dus mi rtog ngo ma shes kyi cha phra zhing phra ba de yang ye shes su dag nas 'od gsal ma bu 'dres pas thams cad [62] ye shes kyi klong 'byams su gyur te rang don du chos sku rdzogs par thob,
de'i rang rtsal phyogs med du 'byongs pas gzhan don du gzugs sku'i snang brnyan gyis 'khor ba ji srid par 'gro ba'i don lhun grub tu 'byung bar bshad do,
,de la tshe 'dir 'char ba'i sgom med ni,
spang bya spang du med gnyen po bsten du med dag bya rgyu dang bral dag byed sems dang bral shi ma shi med pa'i nges pa gting nas thob ste mnyam rjes med pa'i sgom med chung 'bring ci rigs las 'char bar dka' la,
spyir sgom mkhan bsgom bya sgom byed dang bral ba'i sgom med tsam spros bral du yang 'ong zhing,
snang ba dang rtog pa so ma sgom du shar nas mnyam rjes med pa'i sgom med tsam ro gcig tu yang 'byung bas de dag nyams kyi sgom med yin gyi sgom med dngos min no,
,de la sgom med dngos mi rtog ngo ma shes kyi cha phra mo rang gsal du ma shar bar du dran pa ye shes kyi 'khor los ma bcos mi bsgom pa'i tha mal gyi shes pa rgyun bsring ba gal che bar bshad cing,
gnas gang du gnas grogs su dang 'grogs spyod pa ci byas na'ang las mi gsog kyang,
sgom chen chos pa'i ya tshul bskyang ste ri khrod bzung sgrub pa'i rgyal mtshan btsug cing tshul min gyi spyod pa spang ba dang kun rdzob kyi blang dor tshul bzhin bya ba gal che'o,
,mnyam bzhag rjes thob rjes shes snang ba rmi lam gyi 'char tshul rnams rim gyis pa'i dbang du byas pa yin kyang [63] dben par sgom nyag gcig skyong ba la bshad tshod ltar 'byung mod rjes thob tu tshe 'di'i snang shas kyi dbang du btang ba sogs la bshad tshod dang khrigs 'grigs pa'i 'char tshul thams cad cung mi 'ong yang rtogs pa'i ngo bo ji lta ba 'char ro,
,de ltar rnal 'byor bcu gnyis kyi nyams dang rtogs pa 'char tshul la rnal 'byor tha ma rnams shin tu gting rtogs par dka' zhing blos dpyad pa'i yul min kyang,
rje sgom tshul gyi gsung dang bsgrub brgyud gong ma 'ga'i gsung la brten pas yid ches par bya'o,
,rgyas par bsgrub pa mthar bskyal te nang rang sems gyi bla ma dang phyi grub thob rtogs ldan gyi bla ma'i gsung dang man ngag las shes par bya zhing lar blo zad chos zad la skyel dgos kyi,
rang cag sngon sbyangs kyi las 'phro cha ma rdzogs par skyid chos kyis sgom sgrub lo 'ga' re byas nas,
rtogs pa mngon du gyur par rloms te don gnyis ltar snang gi rang gzhan mgo g.yogs par byed pa rnams blo gtan la dbab cing gzu bor gnas pa gal che bar snang ngo ,
@ bzhi pa sgom bskyangs pas sa lam bgrod tshul ni,
spyir mtshan nyid theg pa nas bshad pa'i lam rim can du sbyangs pa snang tshul yon tan gyi khyad par du byas pa dang,
'dir sgom gnyug ma'i lam gcig chod du sbyangs pa rang bzhin gyi ngo bos khyad par du byas pa gnyis mthar thug tu 'dra yang gnas skabs [64] su rnam pa mi mthun la,
'on kyang sa tshod lam tshod bgrod pa'i tshul ni,
dang por byin rlabs kyi lam la zhugs pa nas sgom rtse gcig gi ngo bo mthong zhing rtsal rdzogs pa'i bar las dang po pa'i sa tshogs lam gyi skabs dang,
sgom spros bral gsum gyi bar ni mos pas spyod pa'i sa sbyor lam gyi skabs dang,
sgom ro gcig gsum dang sgom med chung 'bring ni sa dang po mthong ba'i lam dang sa gnyis pa nas bcu pa'i bar gyi sgom lam gyi skabs ci rigs dang,
sgom med chen po ni sangs rgyas kyi sa mthar phyin pa'i lam dang 'byor ro,
,'phral du gnas lugs kyi rang 'gros skyongs pa las rgyu'i theg pa nas bshad pa'i lam ma bsgoms shing,
de la brten nas de la bshad pa'i lam rtags kyang mi 'ong ste,
sgom med chen po'i rtsal rdzogs dus snang tshul gyi yon tan thams cad cig char lhun grub tu 'byung bar bzhed pa yin la,
'on kyang gsang sngags thabs kyi lam dang bsres nas bsgoms na sngags kyi lam rtags kyi rim pa 'char ba bshad do,
,sgom rnal 'byor bzhi gsum bcu gnyis dang mtshan nyid theg pa'i sa lam zhib char sbyar ba 'ga' re snang yang zhib char gungs 'grigs pa dka' ba yin no,
,de ltar byin rlabs kyi lam nges don phyag rgya chen po'i khrid chen 'di phal cher myong thog nas drangs shing myong ba ma thob pa la dag kyang sgrub [65] brgyud gong ma rnams kyi man ngag la brten nas rtog ge'i brda dang sdeb sbyor gyis ma bcings par go bder bshad cing,
rgyab rten gyi lung sbyor la sogs pa'ang mang ba'i 'jigs pas 'dir ma bris la rgyas par gzhan du shes par bya'o,
,nyams su len pa'i tshe rang rang gi blo tshod dang bstun pa'i sgom lugs gzu bor gnas pa rang la drin che ba zhig bya ste,
'dir bshad pa'i tshig ris kyi go ba khyer nas dred po kha'i lta ba mthon po chos rgyus mkhan nyams len la myong ba ma thon pa gtan mi bya ba gal che'o,
,'dir smras pa,
grub pa'i skyes mchog rnams kyi rdo rje'i gsung,
snyigs dus byis pa'i blo la 'khrugs par gyur,
phyogs tsam gsal ba'i khrid gzhung nyung zab rnams,
myong ba skyes tshe 'di bya'i phugs thebs bral,
thos stobs sngon sbyangs ldan pa ma rtogs pas,
man ngag 'thor ba bsgrig par shes pa nyung,
de phyir lam rim gsal ba'i khrid gzhung 'di,
rnal 'byor bdag gi bla med mchod sbyin yin,
sgrub brgyud 'dzin pa'i rtsa brgyud bla ma la,
byin rlabs rtogs pa stsol ba'i maNDal mdzod,
rtogs pa mngon du gyur pa'i sgom chen la,
gsal 'debs yid ches bskyed pa'i mchod pa mdzod,
nyams rtogs myu gu rgyas pa'i sgom chung la,
the tshom gcod pa'i nges shes dga' ston mdzod,
myong zhen can [66] gyi brtson ldan sgom phrug la,
lta log sgom skyon sel ba'i sbyin gtong mdzod,
myong bral thos lo bsags pa'i bya bral la,
gnas lugs yon tan thob pa'i pha 'babs mdzod,
ma rtogs log lta'i skyon gyi nyes tshogs rnams,
dam pa rnams la kun tu bshags par bgyi,
'di yi dge bas bdag dang 'gro ba kun,
phyag chen rtogs pa myur tu mthar phyin shog
,ces pa yang slob bu sgom chen 'ga' zhig gis phyag chen khrid yig phugs thebs che ba zhig byas na zhes bskul ba la brten nas sgam po pa mangga la'i ming can gyis lug lo zla ba bzhi pa'i dkar phyogs la gdan sa chen po dpal dvags la sgom po'i sgrub sder sbyar ba'i yi ge pa ni bkra shis don grub ces bya bas bgyis pa ste,
'dis kyang 'gro ba mtha' dag la dge legs su gyur cig
,sarba dA mangga lam,
dge'o,,