3240

ཁ་རག་པ་འདུལ་བ་འོད་ (1)

Part of speech

མིང་ཚིག

Definition

དུས་རབས་བཅུ་གཉིས་པའི་དུས་དཀྱིལ་ཙམ་དུ་གྲ་ཡུལ་ལ་འཁྲུངས། ཁོང་རབ་བྱུང་གསུམ་པའི་ཤིང་བྱ་ཕྱི་ལོ་ ༡༡༦༥ ལོར་གུང་ཐང་བླ་མ་ཞང་གི་སྤྱན་སྔར་ཚལ་དགོན་ཁྲ་མོར་བྱོན། ཆོས་ཐམས་ཅད་ཞུས་ཤིང་ཡུང་བུ་གད་པར་འདག་སྦྱར་ལོ་གསུམ་མཛད། སྒྲུབ་པ་ཉམས་ལེན་མཛད། རིའུ་ཆུང་གི་རྩེར་བླ་མ་ཞང་དང་། མཁན་པོ་འབན་ཐང་པ། དད་པའི་དགེ་འདུན་བཅུ་གསུམ་གྱི་སར་རབ་ཏུ་བྱུང་། མཚན་ལ་དགེ་སློང་དངོས་གྲུབ་བླ་མ་ཞེས་གསོོལ། ཕྱིས་སུ་ཞང་རིན་པོ་ཆེས་འདུལ་བ་འོད་དུ་གསོལ། རྟོགས་ལྡན་ཉག་པོ་སེང་གེ་ཡང་གྲགས། རབ་བྱུང་གསུམ་པའི་ལྕགས་གླང་ཕྱི་ལོ་ ༡༡༨༡ ལོར་ཁ་རག་གི་རི་དགོན་གསར་འདེབས་མཛད། གུང་ཐང་བླ་མ་ཞང་དང་མཐའ་བཞི་དོལ་དུ་འཁྲུག་པ་ཆེན་པོ་བྱུང་བའི་དུས། གཡུལ་དུ་ཕེབས་ནས་བླ་མའི་ཐུགས་དགོངས་རྫོགས་པར་མཛད། ཁ་རག་གི་ཤར་དུ་བཀྲ་ཤིས་ཀུན་དགའ་དང་། ནུབ་ཏུ་གསལ་སྟེང་། ཕུ་སྟོད་དུ་དོ་བོ་རི། བྱང་དུ་ཁ་ལུང་བཅས་གསར་འདེབས་མཛད། བཤས་སྒྲུབ་ཀྱི་བསྟན་པ་སྤེལ། བཀྲ་ཤིས་ཀུན་དགར་བཞུགས་སྐབས་བདེ་མཆོག་དྲུག་ཅུ་རྩ་གཉིས་ཀྱི་ཞལ་གཟིགས། དོ་བོ་རིར་བཞུགས་དུས་ཐོག་བབས་བྱུང་བ་ཆོས་གོས་ཀྱི་མཐུ་བར་བཅུག་སྟེ། བྲག་ཁར་བསྐྱུར་བ་སོགས་གྲུབ་རྟགས་བསམ་གྱིས་མི་ཁྱབ་པ་མཛད། གདུང་བཞུ་བའི་སྐབས་ཆོས་གོས་དང་། ཐུགས་ལྗགས་མ་ཚིག་པ་སོགས་ངོ་མཚར་བའི་རྣམ་ཐར་མང་། མཚན་གཞན། དགེ་སློང་དངོས་གྲུབ་བླ་མ། ཞང་རིན་པོ་ཆེས་འདུལ་བ་འོད། རྟོགས་ལྡན་ཉག་པོ་སེང་གེ།