3935

ཁྱབ་འཇུག་པ་ (1)

Part of speech

མིང་ཚིག

Definition

ཕྱི་རོལ་པ། ཁྱབ་འཇུག་པ། ཁྱབ་འཇུག་པ་ནི་རྟོག་གེ་སྡེ་ལྔའམ་རྟག་ལྟ་སྡེ་བཞིའི་ཡ་གྱལ་ལས་གསུམ་པ་སྟེ། ཡིད་ཀྱི་མུན་སེལ་ལས། གསུམ་པ་ཁྱབ་འཇུག་པ་ནི། ཁྱབ་འཇུག་གིས་རིག་བྱེད་ཀྱི་བསྟན་བཅོས་འབུམ་སྡེ་བརྩམས་ཤིང་། ལྟེ་བ་པདྨོའི་སྐྱེ་གནས་ལས་ཚངས་པ་གདོང་བཞི་པ་བྱུང་སྟེ། དེས་སྣོད་བཅུད་ཐམས་ཅད་སྤྲུལ་ནས་སྙན་ངག ངེས་བརྗོད། སྲིད་སྲུང་། མཆོད་སྦྱིན་ཏེ་རིག་བྱེད་ཆེན་པོ་བཞི་དྲན་ནས་བཤད་པ་ཕྱིས་དྲང་སྲོང་རྣམས་ཀྱིས་བསྡུས་ཏེ། ཁྱབ་འཇུག་གི་བསྟན་བཅོས་བརྡ་སྤྲོད་ངག་གི་འོད་ཟེར་ལ་བརྟེན་ནས་བརྡ་སྤྲོད་པ་དང་། དྲང་སྲོང་ཨགྞེའི་སྨྲ་བའི་མཚོན་ཆ་ལ་བརྟེན་པའི་ཚད་མ་ལ་རྣམ་ཕུག་པ་དང་། དྲང་སྲོང་བདེན་སྨྲས་ཀྱི་བསྒོམ་རིམ་སྐོར་དགུ་ལ་བརྟེན་པའི་བསྒོམ་སྒྲུབ་པ་ལ་གསང་བ་པ་དང་། དྲང་སྲོང་ངན་སྤོང་གི་རྣམ་དཔྱོད་གསལ་བ་ལ་བརྟེན་པའི་གཞུང་བཤད་པ་ལ་སྤྱོད་པ་བ་དང་། དྲང་སྲོང་རྒྱུན་ཤེས་ཀྱི་བུ་ལ་སོགས་པའི་ཙ་ར་ཀ་འབུམ་སྡེ་ལ་བརྟེན་པའི་གསོ་དཔྱད་པ་ལ་ཙ་ར་ཀ་པ་ཞེས་བྱ་སྟེ་ལྔའོ། །འདི་དག་གིས་རིག་བྱེད་བཞི་ཚད་མར་འདོད་དེ། དབྱེ་ན་ཁྱབ་འཇུག་པ། ཚངས་པ་བ། རིག་བྱེད་པ་ཞེས་གྲགས་སོ། །ཞེས་གསུངས།

{{#arraymap:ཁྱབ་འཇུག་པ་

|; |@@@ | | }}

ཁྱབ་འཇུག་པ་ (2)

Part of speech

མིང་ཚིག

Definition

མུ་སྟེགས་ཀྱི་གྲུབ་མཐའ་སྨྲ་བ་ཞིག་གི་མིང་སྟེ། ལྷ་ཆེན་པོ་ཁྱབ་འཇུག་སྟོན་པར་ཁས་ལེན་པས་ན་ཁྱབ་འཇུག་པ་ཞེས་ཐོགས་པ་དང༌། མིང་གཞན་ཟླ་བ་པ་དང་ཀླུའི་ཆོས་སྨྲ་བ་ཞེས་ཟེར། གྲུབ་མཐའ་འདི་འཛིན་མཁན་གྱི་བླ་མ་ཟླ་བ་དང༌། སློབ་དཔོན་ཆོས་གྲགས་དང་རྩོད་པ་བྱེད་མཁན་གྱི་སྟོན་པ་གཞོན་ནུ་མ་ལེན་ལ་སོགས་པ་ཡོད། གྲུབ་མཐའ་འདིའི་འདོད་ཚུལ་ལ། ཁྱབ་འཇུག་ནི་གྲོང་ཁྱེར་སྒོ་ལྡན་ཞེས་བྱ་བ་ན་དཔལ་མོ་ལ་སོགས་པའི་ཆུང་མ་ཁྲི་དྲུག་སྟོང་གིས་བསྐོར་ནས་གནས་པ་དང༌། ཚངས་པ་དང༌། བརྒྱ་བྱིན། ཉི་མ། ཟླ་བ། རིག་བྱེད་བཞི། འབྱུང་བ་བཞི། བྲམ་ཟེ་ལ་སོགས་པ་འཇིག་རྟེན་ན་གྲགས་ཆེ་བ་ཐམས་ཅད་ཁྱབ་འཇུག་རང་ཉིད་ཡིན་སྙམ་པའི་སྤོབས་པ་དང་ལྡན་ཞིང༌། དེ་ལ་ཞི་དང་མ་ཞི་གཉིས་ཡོད་པའི་ཞི་བ་ནི། ལྷ་རྫས་ཀྱི་ངོ་བོ། ཡོད་མིན་མེད་མིན་གྱི་བདག་ཉིད། འཆི་བ་མེད་པའི་ངོ་བོ་ཡིན་ཞིང༌། དེ་བསྒོམས་པས་ཐར་པ་ཐོབ་པ་ཡིན་ལ། མ་ཞི་བ་ནི་ཉ་དང་རུས་སྦལ་ལ་སོགས་པའི་སྤྲུལ་པ་བཅུ་ལ་ཁྱབ་འཇུག་གི་འཇུག་པ་བཅུ་ཞེས་པའི་རིག་བྱེད་ཀྱི་གཏམ་རྒྱུད་བཤད་སྲོལ་ཡོད་པ་རྣམས་ཡིན་པར་ཁས་ལེན། གཞན་ཡང་རྟག་པ་ཆ་མེད་ཀྱི་བདག་ཁས་ལེན་ཅིང༌། གྲོལ་བྱེད་ཀྱི་ལམ་ནི་ཡི་གེ་ཨོཾབསྒོམས་པ་དང་རླུང་བུམ་པ་ཅན་བསྒོམས་པ་སོགས་ཡོད་པ་དང་འཁོར་བ་ལས་ཐར་རྒྱུ་ཡོད་པར་ཁས་ལེན་པས་ཐར་པ་ཁས་ལེན་མཁན་གྱི་གྲས་ཡིན། སྤྱིར་བཏང་མུ་སྟེགས་ཁྱབ་འཇུག་པ་ལ་ལྷ་ཁྱབ་འཇུག་འཇིག་རྟེན་ཀྱི་བྱེད་པ་པོར་ཁས་ལེན་པ་ཞིག་ཡོད་པར་སློབ་དཔོན་སྤྱན་རས་གཟིགས་བརྟུལ་ཞུགས་ཀྱིས་མཛད་པའི་དབུ་མ་རྩ་བའི་འགྲེལ་པ་ཤེས་རབ་སྒྲོན་མེའི་རྒྱ་ཆེར་འགྲེལ་པ་ལས་གསུངས་ཤིང༌། རིག་ལྡན་པདྨ་དཀར་པོས་མཛད་པའི་དུས་འཁོར་འགྲེལ་ཆེན་དྲི་མེད་འོད་ལས་མུ་སྟེགས་ཁྱབ་འཇུག་པ་ལ་རྡུལ་ཕྲན་ཆ་མེད་འཇིག་རྟེན་གྱི་བྱེད་པ་པོར་འདོད་པ་ཞིག་ཀྱང་ཡོད་པར་དམ་པ་འགའ་ཞིག་གིས་གསུངས་པ་ནི། དུས་འཁོར་འགྲེལ་ཆེན་གྱི་ཚིག་གོང་འོག་བསྡུར་ནས་ཞིབ་ཏུ་མ་གཟིགས་པའི་སྐྱོན་ཡིན་པར་མཁས་གྲུབ་རིན་པོ་ཆེ་དགེ་ལེགས་དཔལ་བཟང་གིས་མཛད་པའི་དུས་འཁོར་ཊིཀ་ཆེན་ལས་གསུངས་ཡོད། མུ་སྟེགས་ཁྱབ་འཇུག་པའི་འདོད་ཚུལ་ཞིབ་པར་སློབ་དཔོན་སྤྱན་རས་གཟིགས་བརྟུལ་ཞུགས་ཀྱིས་མཛད་པའི་དབུ་མའི་འགྲེལ་ཆེན་དང་བོད་ཀྱི་མཁས་པ་རྣམས་ཀྱི་མཛད་པའི་གྲུབ་མཐའི་སྐོར་རྣམས་ན་གསལ།

{{#arraymap:ཁྱབ་འཇུག་པ་

|; |@@@ | | }}