5893

གང་ཟག་གི་བདག་འགོག་པའི་རིགས་པའི་རྣམ་གྲངས་ (1)

Part of speech	མིང་ཚིག
Definition	མདོ། དབུ་མ། རྣམ་པ་བདུན་དང་ལྔ་དང་བཞི་དང་གཉིས་སུ་དཔྱད་ནས་དགག་པ་རྣམས་སུ་ཡོད་ལ། བདུན་དུ་དཔྱད་ནས་དགག་པ་ནི། ཕུང་པོ་དང་དེ་ཉིད་དང་། གཞན་ཉིད་དང་། རྟེན་དང་། བརྟེན་པ་དང་། ལྡན་པ། ཕུང་པོ་ཚོགས་ཙམ་དང་། ཕུང་པོའི་བཀོད་པ་དབྱིབས་ཏེ། རྣམ་པ་བདུན་དུ་དཔྱད་ནས་དགག་པར་མཛད་པའོ། །ལྔར་བསྡུ་པ་ནི། རྩ་བར། མེ་དང་བུད་ཤིང་བརྟག་པའི་སྐབས་སུ། ཤིང་ཉིད་མེ་ནི་མ་ཡིན་ཏེ། །ཤིང་ལས་གཞན་ལ་མེ་ཡང་མེད། །མེ་ནི་ཤིང་དང་ལྡན་མ་ཡིན། །མེ་ལ་ཤིང་མེད་དེར་དེ་མེད། །ཞེས་རྣམ་པར་ལྔའི་སྒོ་ནས་དཔྱད་ཅིང་། མེ་དང་ཤིང་གིས་བདག་དང་ནི། །ཉེ་བར་ལེན་པའི་ཤེས་པ་ཀུན། །བུམ་སྣམ་སོགས་དང་ལྷན་ཅིག་ཏུ། །མ་ལུས་པར་ནི་རྣམ་པར་བཤད། །ཅེས་ཆོས་དང་གང་ཟག་ཐམས་ཅད་ལ་སྦྱར་བར་གསུངས་སོ། །དེ་ཉིད་བཞིར་བསྡུ་བ་ལ། འཇིག་ལྟ་ཉི་ཤུ་འགོག་པའི་སྐབས་སུ། བདག་ཕུང་གཞན་དུ་ལྟ་བའི་ཕྱོགས་སྔ་པ། བདག་འཇིག་ཚོགས་ལ་མ་ལྟོས་པར་གཟུང་བས་འཇིག་ལྟའི་གྲངས་སུ་མི་བགྲངས་པར་འཇུག་འགྲེལ་ལས་གསུངས་པས་ཕུང་པོ་རེ་རེའི་སྟེང་དུའང་དེ་ཉིད་དང་རྟེན་དང་བརྟེན་པ་ལྡན་པ་བཞི་བཞིར་དཔྱད་དེར་དགག་པར་གསུངས། ཡང་བྱང་ཆུབ་སེམས་འགྲེལ་ལས། ཕུང་རྣམས་ཡོད་དེ་དེ་རྟག་མིན། །དེ་ཡང་བདག་གི་ངོ་བོ་མིན། །གང་ཡང་རྟག་དང་མི་རྟག་གཉིས། །རྟེན་དང་བརྟེན་པའི་དངོས་པོར་མེད། །ཅེས་ལྡན་པའི་ཕྱོགས། གཞན་ན་གནག་ལྡན་གཞན་མིན་གཟུགས་ལྡན་ན། །ཞེས་པའི་ཚུལ་གྱིས་དེ་ཉིད་དང་གཞན་ཉིད་གང་རུང་དུ་འདུས་པ་ལ་དགོངས་ནས་དེ་ཉིད་དང་གཞན་ཉིད་དང་། རྟེན་དང་བརྟེན་པ་རྣམ་པ་བཞིར་དཔྱད་ནས་དགག་པ་མཛད་དོ། །དེའང་གཉིས་སུ་བསྡུ་བ་ནི། བདག་བརྟག་པའི་སྐབས་སུ། གལ་ཏེ་ཕུང་པོ་བདག་ཡིན་ན། །སྐྱེ་དང་འཇིག་པ་ཅན་དུ་འགྱུར། །གལ་ཏེ་ཕུང་པོ་རྣམས་ལས་གཞན། །ཕུང་པོའི་མཚན་ཉིད་མེད་པར་འགྱུར། །ཞེས་དེ་ཉིད་དང་གཞན་ཉིད་དུ་དཔྱད་པ་གཉིས་སུ་བརྟགས་ནས་དགག་པར་མཛད་དོ། །ཞེས་ཀུན་མཁྱེན་གོ་རམས་པས་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།