11804

གྲོལ་བྱེད་ཀྱི་དབང་ (1)

Part of speech	མིང་ཚིག
Definition	དབང་བསྐུར་ཆོས་སྒོ་ཙམ་མ་ཡིན། །གསང་སྔགས་རྟེན་འབྲེལ་ལམ་བྱེད་པས། །རྟེན་འབྲེལ་བསྒྲིགས་པའི་གདམས་ངག་ཡིན། །ཕུང་པོ་ཁམས་དང་སྐྱེ་མཆེད་ལ། །སངས་རྒྱས་ས་བོན་བཏབ་ནས་ནི། །ཚེ་འདིར་སངས་རྒྱས་བྱེད་པ་ཡི། །ཐབས་ལ་དབང་བསྐུར་ཞེས་སུ་བཏགས། །དེས་ན་གང་ཟག་དབང་པོ་རབ། དབང་བསྐུར་ཉིད་ཀྱིས་གྲོལ་བར་གསུངས། །དབང་གིས་གྲོལ་བ་མ་ནུས་པའི། །གང་ཟག་གཞན་ལ་བསྒོམ་དགོས་སོ། །དེས་ན་དབང་བསྐུར་ཐོབ་པ་དེ། །བསྲུང་ཞིང་འཕེལ་བར་བྱེད་པ་ལ། །བསྒོམ་པ་ཞེས་སུ་བཏགས་པ་ཡིན། །ཞེས་ས་པཎ་གྱི་སྡོམ་གསུམ་རབ་དབྱེ་ལས་སོ། ། ཀུན་མཁྱེན་གོ་རམས་པའི་སྡོམ་གསུམ་རྣམ་བཤད་གསུང་རབ་དགོངས་གསལ་ལས། རྟེན་འབྲེལ་བསྒྲིག་པའི་ཚུལ་ཇི་ལྟར་ཡིན་སྙམ་ན། སྦྱང་གཞི་སློབ་མའི་ཕུང་ཁམས་སྐྱེ་མཆེད་རྣམས་ལ། རྡོ་རྗེ་སློབ་དཔོན་དག་བྱ་དག་བྱེད་ངོ་སྤྲོད་ཤེས་པས་གདན་གསུམ་ཚང་བའི་སངས་རྒྱས་ཀྱི་ས་བོན་བཏབ་ནས། ཚེ་འདིར་སངས་རྒྱས་བྱེད་པའི་ཐབས་ལ་དབང་བསྐུར་ཞེས་སུ་བཏགས་པ་ཡིན་ནོ། །དེས་ན་གང་ཟག་དབང་པོ་རབ་ཨིནྡྲ་བྷཱུ་ཏི་ལྟ་བུ་དབང་བསྐུར་ཉིད་ཀྱིས་གྲོལ་བར་གསུངས་པ་ཡང། དབང་བསྐུར་གསང་སྔགས་ཀྱི་ལམ་གྱི་གཙོ་བོ་ཡིན་པའི་རྒྱུ་མཚན་གྱིས་གྲོལ་བ་ཡིན་གྱི། དབང་བསྐུར་ཆོས་སྒོ་ཙམ་དུ་བྱས་ནས་གསང་སྔགས་ལོགས་ན་བསྒོམ་རྒྱུ་ཡོད་ན། དབང་བསྐུར་ཁོ་ནས་ཇི་ལྟར་གྲོལ་ལེགས་པར་སོམས་ལ་སྨྲོས་ཤིག། དབང་གིས་གྲོོལ་བར་མི་ནུས་པའི་གང་ཟག་གཞན་འབྲིང་དང་ཐ་མ་དག་ལ་བསྒོམ་དགོས་ཀྱང། སྔར་དབང་བསྐུར་ཐོབ་པ་དེ་བསྲུང་ཞིང་འཕེལ་བར་བྱེད་པ་ལ་བསྒོམ་པ་ཞེས་སུ་བཏགས་པ་ཡིན་ཏེ། བསྐྱེད་རིམ་བསྒོམ་པ་ནི་བུམ་དབང་གི་དུས་སུ་ཕུང་ཁམས་སྐྱེ་མཆེད་ལྷར་བསྐྱེད་པ་དེ་བསྒོམ་པ་ཡིན་ཅིང། རྫོགས་རིམ་བསྒོམ་པ་ནི་དབང་གོང་མ་གསུམ་གྱི་དུས་སུ་ངག་ལ་ལོངས་སྤྱོད་རྫོགས་སྐུ་དང། ཡིད་ལ་ཆོས་སྐུ་དང། གསུམ་ཀ་ལ་ངོ་བོ་ཉིད་སྐུའི་ས་བོན་བཏབ་པ་དེ་བསྲུང་ཞིང་འཕེལ་བར་བྱེད་པ་ཡིན་པའི་ཕྱིར་རོ་ཞེས་གསུངས་སོ། །
Domain	ཆོས་ལུགས།