15960

ཅོག་རོ་ཀླུའི་རྒྱལ་མཚན་ (1)

Part of speech

མིང་ཚིག

Definition

བོད་རྒྱལ་ཁྲི་སྲོང་ལྡེའུ་བཙན་གྱི་སྐུ་དུས་སུ་སྙན་གྲགས་ཆེ་བའི་ལོ་ཙཱ་བ་སྐ་ཅོག་ཞང་གསུམ་ཞེས་གྲགས་པའི་ཡ་གྱལ་ཅོག་རོ་ཀླུའི་རྒྱལ་མཚན་ཏེ། ཕྱི་ལོའི་དུས་རབས་བརྒྱད་པའི་དུས་དཀྱིལ་ཙམ་དུ་སྐུ་འཁྲུངས་ཤིང་རྟེན་རབ་བྱུང་ཡིན ། རྔོག་བློ་ལྡན་ཤེས་རབ་ཀྱིས་བཻ་རོ་ཙ་ན་ནམ་མཁའི་མཐའ་དང་མཉམ། སྐ་ཅོག་རྣམ་གཉིས་ཉི་ཟླ་ཟུང་ཞིག་འདྲ། རིན་ཆེན་བཟང་པོ་ཐོ་རངས་སྐར་ཆེན་ཙམ། ཁོ་བོ་ཅག་ནི་སྲིན་བུ་མེ་ཁྱེར་མཚུངས། ཞེས་བསྔགས་བརྗོད་མཛད་ཅིང་། ཁོང་གི་བསྒྱུར་རྩོམ་ནི་བཀའ་འགྱུར་ལས་དགེ་སློང་ཕའི་སོ་ཐར་གྱི་མདོ་ཤོ་ལོ་ཀ་བདུན་བརྒྱ་དང་། དེའི་དོན་རྒྱ་ཆེར་བཤད་པ་ཕའི་རྣམ་འབྱེད་ཤོ་ལོ་ཀ་ཉིས་ཁྲི་བཞི་སྟོང་དགུ་བཅུ། དགེ་སློང་མའི་སོ་ཐར་གྱི་མདོ་ཤོ་ལོ་ཀ་བརྒྱད་བརྒྱ། འདུལ་གཞུང་ཕྱི་མ་ཤོ་ལོ་ཀ་སུམ་སྟོང་དྲུག་བརྒྱ། འདུལ་གཞུང་ཕྱི་མ་ཞུ་བ་རྫོགས་པ་ཤོ་ལོ་ཀ་ཆིག་ཁྲི་ལྔ་སྟོང་དགུ་བརྒྱ། འཕགས་པ་ཆོས་ཀྱི་ཕྱག་རྒྱའི་མདོ་ཤོ་ལོ་ཀ་བརྒྱད་ཅུ་བ། འཕགས་པ་གྲོང་ཁྱེར་གྱིས་འཚོ་བའི་མདོ་ཤོ་ལོ་ཀ་བརྒྱ་བ། བྱ་རྒྱུད་ཤེས་རབ་བསྐྱེད་པའི་གཟུངས་བཅས་དང་། བསྟན་འགྱུར་ལས་མི་འཁྲུགས་པའི་སྒྲུབ་ཐབས་དང་། སྦྱིན་སྲེག་གི་ཆོ་ག། དབུ་མ་རྩ་བའི་ཚིག་ལེའུར་བྱས་པ་ཤེས་རབ། དབུ་མ་རྩ་བའི་འགྲེལ་བ་ག་ལས་འཇིགས་མེད། དབུ་མ་རྩ་བའི་འགྲེལ་བ་བུདྡྷ་པཱ་ལི་ཏ། དབུ་མ་རྩ་བའི་འགྲེལ་བ་ཤེས་རབ་སྒྲོན་མ། དབུ་མ་རྩ་བའི་འགྲེལ་བ་ཤེས་རབ་སྒྲོལ་མའི་རྒྱ་ཆེར་འགྲེལ་བ། སོ་ཐར་མདོའི་རྒྱ་ཆེར་འགྲེལ་བ་ཀུན་ལས་བཏུས་པ། སོ་སོར་ཐར་བའི་ཚིག་གི་བརྗེད་བྱང་། འདུལ་བ་ལུང་རྣམ་པར་འབྱེད་པའི་ཚིག་རྣམ་པར་བཤད་པ། འདུལ་བ་མདོ་རྩ་ཤོ་ལོ་ཀ་ཉིས་སྟོང་བདུན་བརྒྱ། ཆོ་ག་ལག་ལེན་བརྒྱ་རྩ་གཅིག་ཤོ་ལོ་ཀ་ཉིས་ཁྲི་ཆིག་སྟོང་བཅས་མང་དུ་བཞུགས།