22521

ཐེག་ཆེན་གྱི་ཆོས་འཆད་པ་པོ་ (1)

Part of speech

མིང་ཚིག

Definition

མདོ། དབུ་མ། འཆད་པ་པོ་རབ་ཏུ་གྱུར་པ་ནི། རྫོགས་པའི་སངས་རྒྱས་ཡིན་ཏེ། རྟེན་འབྲེལ་སྨྲ་བ་རྣམས་ཀྱི་དམ་པ་གཞན་དང་མཚུངས་པ་མེད་པའི་ཕྱིར། རྩོད་ཟློག་ལས། གང་ཞིག་སྟོང་དང་རྟེན་འབྱུང་དག ། དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །སངས་རྒྱས་དེ་ལ་ཕྱག་འཚལ་ལོ། །ཞེས་གསུངས་སོ། །འཆད་པ་པོ་འབྲིང་དུ་གྱུར་པ་ནི། ཆོས་ཉིད་དོན་དམ་པའི་བདེན་པ་མངོན་སུམ་དུ་རྟོགས་ནས་གཞན་ལ་ཕྱིན་ཅི་མ་ལོག་པར་སྟོན་པ་མགོན་པོ་ཀླུ་སྒྲུབ་ལྟ་བུ་སྟེ། འཇུག་པ་ལས། ཇི་ལྟར་དེ་ཡིས་ཆེས་ཟབ་ཆོས་རྟོགས་པ། །ལུང་དང་གཞན་ཡང་རིགས་པས་ཡིན་པས་ན། །དེ་ལྟར་འཕགས་པ་ཀླུ་སྒྲུབ་གཞུང་ལུགས་ལས། །ཇི་ལྟར་གནས་པའི་ལུགས་བཞིན་བརྗོད་པར་བྱ། །ཞེས་དང། དེའི་འགྲེལ་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔས་ཆོས་རྣམས་ཀྱི་བདག་ཉིད་ཇི་ལྟ་བ་ཉིད་ཇི་ལྟར་མཐོང་བ་དེ་ལྟར་འཕགས་པ་ཀླུ་སྒྲུབ་ཀྱིས་ལུང་ཕྱིན་ཅི་མ་ལོག་པར་མཁྱེན་ནས། དབུ་མའི་བསྟན་བཅོས་ལས་རིགས་པ་དང་ལུང་དག་གིས་ཆོས་རྣམས་ཀྱི་ཡང་དག་པ་ཇི་ལྟ་བ་ཉིད་རང་བཞིན་མེད་པའི་མཚན་ཉིད་ཅན་ཆེས་གསལ་བར་བསྟན་ཏོ། །ཞེས་གསུངས་སོ། །འཆད་པ་པོ་ཐ་མ་ནི། སོ་སོ་སྐྱེ་བོའི་མཁས་པ་སྟེ། དེའི་མཚན་ཉིད་ནི་རིན་ཆེན་ཕྲེང་བར། དགེ་བའི་བཤེས་གཉེན་དེ་དག་གི ། མཚན་ཉིད་མདོར་བསྡུས་མཁྱེན་པར་མཛོད། །ཆོས་ཤེས་སྙིང་རྗེ་ཚུལ་ཁྲིམས་ལྡན། །ཉོན་མོངས་སེལ་བའི་ཤེས་རབ་ཅན། །དེ་དག་གིས་ནི་ཁྱོད་བསྟེན་ན། །ཁྱོད་ཀྱིས་མཁྱེན་གྱིས་གུས་པར་མཛོད། །ཅེས་མཚན་ཉིད་བཞི་ལྡན་དུ་གསུངས་ཤིང། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག། །སྲོག་གི་ཕྱིར་ཡང་མི་གཏོང་ངོ་། །ཞེས་མཚན་ཉིད་གཉིས་ལྡན་དུ་གསུངས་སོ། །ཞེས་ཀུན་མཁྱེན་གོ་རམས་པའི་དབུ་མའི་སྤྱི་དོན་ལས་གསུངས་སོ། །

{{#arraymap:ཐེག་ཆེན་གྱི་ཆོས་འཆད་པ་པོ་

|; |@@@ | | }}

ཐེག་ཆེན་གྱི་ཆོས་འཆད་པ་པོ་ (2)

Part of speech

མིང་ཚིག

Definition

དབུ་མ། འཆད་པ་པོ་རབ་ཀྱིས་འཆད་ཚུལ་ནི། གདུལ་བྱའི་བསམ་པ་དང་། དབང་པོ་དང་། བག་ལ་ཉལ་བ་དང་འཚམ་པར་རིམ་གྱིས་ཁྲིད་ནས་མཐར་ཐམས་ཅད་ཀྱང་སྟོང་ཉིད་ལ་སྦྱོར་བ་སྟེ། ལང་ཀར་གཤེགས་པའི་མདོ་ལས། ཇི་ལྟར་ནད་པ་ན་བ་ལ། །སྨན་པས་སྨན་རྣམས་གཏོང་བ་ལྟར། །དེ་བཞིན་སངས་རྒྱས་སེམས་ཅན་ལ། །ཇི་ཙམ་བཟོད་པའི་ཆོས་སྟོན་ཏོ། །ཞེས་དང་། རྩ་བ་ལས། གང་གིས་ཐུགས་བརྩེས་ཉེར་བཟུང་ནས། །ལྟ་བ་ཐམས་ཅད་སྤང་པའི་ཕྱིར། །དམ་པའི་ཆོས་ནི་སྟོན་མཛད་པ། །གཽ་ཏམ་དེ་ལ་ཕྱག་འཚལ་ལོ། །ཞེས་སོ། །འཆད་པ་པོ་འབྲིང་པོས་འཆད་ཚུལ་ནི། གཞན་གྱིས་བྱས་པའི་བསྟན་བཅོས་ལ་རག་མ་ལས་པར། རང་ཉིད་ཀྱིས་གནས་ལུགས་མངོན་སུམ་དུ་མཐོང་བས་བཀའི་དགོངས་པ་རང་དབང་དུ་འགྲེལ་བའི་སྒོ་ནས་སྟོན་པ་སྟེ། འདི་ལ་དགོངས་ནས་རྒྱུད་བླར། གང་ཞིག་རྒྱལ་བའི་བསྟན་པ་འབའ་ཞིག་གི ། དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་ལོངས། །ཞེས་གསུངས་པ་སྟེ། བྱམས་པའི་ཆོས་ལྔ་དང། ཀླུ་སྒྲུབ་ཀྱི་རིགས་ཚོགས་ལ་སོགས་པ་ལྟ་བུའོ། །འཆད་པ་པོ་ཐ་མས་འཆད་ཚུལ་ནི། ངེས་ཤེས་སྐྱེད་ཚུལ་གྱི་དབང་དུ་བྱས་ནས་འགལ་འབྲེལ་གྱི་རིགས་པ། ཡིད་ཆེས་པའི་ལུང་། བླ་མའི་མན་ངག་གསུམ་གྱི་སྒོ་ནས་འཆད། གདུལ་བྱ་ཐོས་བསམ་དང་སྒོམ་པ་ལ་དགའ་བའི་དབང་དུ་བྱས་ནས། མཚན་ཉིད་གཏན་འབེབས་དང་། སྒྲུབ་པ་ཉམས་ལེན་གྱི་ཚུལ་གྱིས་འཆད། གདུལ་བྱ་དབང་པོ་རྣོ་འབྲིང་རྟུལ་གསུམ་གྱི་དབང་དུ་བྱས་ནས་མདོར་བསྡུས་པ་དང། བར་མ་དང་། རྒྱས་པར་འཆད་པའི་ཚུལ་གྱིས་འཆད། རང་ཉིད་འཇུག་པའི་དབང་དུ་བྱས་ནས་སྦྱོར་བ་དང་། དངོས་གཞི་དང་། རྗེས་གསུམ་གྱི་སྒོ་ནས་འཆད་པའོ། །ཞེས་ཀུན་མཁྱེན་གོ་རམས་པའི་དབུ་མའི་སྤྱི་དོན་ལས་གསུངས་སོ། །

{{#arraymap:ཐེག་ཆེན་གྱི་ཆོས་འཆད་པ་པོ་

|; |@@@ | | }}