25621

དངོས་པོའི་གནས་ཚུལ་ (1)

Part of speech	མིང་ཚིག
Definition	ཡུལ་གྱི་གནས་ལུགས་ནི། བྱེ་བྲག་ཏུ་སྨྲ་བས་སྔོན་པོ་དང་། དེའི་མི་རྟག་པ་རྫས་ཐ་དད་དུ་འདོད་དེ། སྔོན་པོ་དེ་གཟུགས་ཀྱི་ཕུང་པོ་དང་། དེའི་མི་རྟག་པ་དེ་ལྡན་མིན་འདུ་བྱེད་གང་ཞིག ཕུང་པོ་ལྔ་པོ་དེ་རྫས་ཐ་དད་ཡིན་པའི་ཕྱིར། མངོན་པ་ཀུན་ལས་བཏུས་ལས། སྔོན་པོ་རྫས་ཡོད་དང་། དེའི་མི་རྟག་པ་བཏགས་ཡོད་དུ་འདོད་ཀྱང་། འདིར་ནི་བཻ་ཌཱུརྱ་ལ་སོགས་པའི་སྔོན་པོ་གཅིག་གི་སྟེང་གི་བྱས་པ་དང་མི་རྟག་པ་ལ་སོགས་པ་དོན་ལ་རྫས་གཞན་ལྟ་ཞོག ལྡོག་པའང་ཐ་དད་དུ་མེད་དེ། དེ་གསུམ་ཐ་དད་དུ་སྣང་བ་ནི་རྟོག་པ་ཁོ་ན་ལ་སྣང་བ་ཡིན་གྱི། རྟོག་མེད་ཀྱི་ཤེས་པ་ལ་གཅིག་ཏུ་སྣང་བའི་ཕྱིར། ཤ་པ་དང་ཤུག་པ་གཉིས་ལ་དོན་ལ་ཐུན་མོང་གི་ཆོས་ཅུང་ཟད་མེད་དེ། ཤ་པའི་རྫས་ཡིན་ན། ཤུག་པའི་རྫས་མ་ཡིན་དགོས། ཤུག་པའི་རྫས་ཡིན་ན། ཤ་པའི་རྫས་མ་ཡིན་དགོས་པའི་ཕྱིར། ཞེས་ཀུན་མཁྱེན་གོ་རམས་པའི་རིགས་གཏེར་གསལ་བྱེད་ལས་སོ། ། ཕྱི་རོལ་དོན་གྱི་གནས་ཚུལ་ནི། ཕྱི་རོལ་གྱི་དོན་རྣམས་ནི་སྣང་ཚུལ་ལ་རགས་པར་སྣང་ཡང་གནས་ཚུལ་ལ་རྡུལ་ཕྲན་དུ་གནས་ཤིང་། རྩོམ་བྱེད་གྱི་རྡུལ་ཕྲན་ཀྱང་འབྱུང་བ་བཞིའི་རྡུལ་རྣམས་ནི་རྫས་ཐ་དད་ཁོ་ནར་གནས་ཤིང་། དེས་བརྩམས་པའི་འབྱུང་བ་ལས་གྱུར་པའི་རྡུལ་རྣམས་ནི་མ་དཔྱད་ན་རྫས་ཐ་དད་ཡིན་ཀྱང། དཔྱད་ན་བཏགས་ཡོད་ཡིན་པའི་ཕྱིར། དངོས་པོའམ། ངོ་བོ་ཐ་དད་དུ་བཞག་གོ ། ཡན་ལག་རྡུལ་རྫས་བརྒྱད་དུ་གྲགས་པ་དེ་དང་། དེའི་ཡན་ལག་ཅན་གཉིས་ཀྱང་བདག་ཉིད་གཅིག་པ་ཡིན་མོད། ནམ་ཡང་རྫས་གཅིག་པ་མིན་ཞིང་། དཔྱད་པའི་ཚེ་ན་དངོས་པོ་གཅིག་པ་ཡང་མིན་ཏེ། གལ་ཏེ་ཡིན་ན་ལྷན་ཅིག་དམིགས་ངེས་སུ་ཐལ་བའི་ཕྱིར་རོ། །འོ་ན་ཕྱི་རོལ་དོན་གྱི་གནས་ཚུལ་དང་། སྣང་ཚུལ་མི་མཐུན་ན། དོན་རིག་མངོན་སུམ་འཁྲུལ་ཤེས་སུ་ཐལ་བ་མིན་ནམ་ཞེ་ན། འདི་ནི་གྲུབ་མཐའི་སྐྱོན་ཡིན་པས་གྲུབ་མཐའ་གོང་མས་གཞལ་བའི་ཚེ་དེ་ལྟར་ཐལ་བ་འཕེན་ནུས་ཀྱང། རང་གི་གྲུབ་པའི་མཐའ་ལ་གནས་ནས་ནི་མིན་ཏེ། སྐྱེས་བུ་གཅིག་གི་གཟུགས་ལ་ལྟ་བའི་དགྲ་གཉེན་གྱི་མིག་ཤེས་གཉིས་ཀ་མ་འཁྲུལ་བ་བཞིན་ནོ། །ཞེས་པཎ་ཆེན་ཤཱཀ་མཆོག་གི་རྟོག་གེ་འཁྲུལ་འཇོམས་ལས་སོ། །
Domain	ཚད་མ།

{{#arraymap:དངོས་པོའི་གནས་ཚུལ་

|; |@@@ | | }}