27492
< Dictionaries | Monlam Grand
Jump to navigation
Jump to search
| Part of speech | མིང་ཚིག |
|---|---|
| Definition | ཐུན་མོང་བ་འདུ་ཤེས་དང་ཚོར་བ་འགོག་པའི་སྙོམས་འཇུག་གི་མཚན་ཉིད། ཟག་བཅས་ཀྱི་ཚོར་འདུ་གཉིས་ཀ་དགག་བྱའི་གཙོ་བོར་བྱས་ནས་བཀག་པའི་རིགས་སུ་གནས་པའི་མཐར་གནས་ཀྱི་སྙོམས་འཇུག་གོ ། གང་ཟག་གི་སྒོ་ནས་དབྱེ་ན་ཉན་ཐོས་སློབ་མི་སློབ་གཉིས། རང་རྒྱལ་མི་སློབ་པ། ཐེག་ཆེན་སློབ་པ་དང་མི་སློབ་པའི་རྒྱུད་ཀྱི་འགོག་པའི་སྙོམས་འཇུག་དང་ལྔའོ། །རྟེན་གྱི་སྒོ་ནས་དབྱེ་ན། ཁམས་གསུམ་གྱི་རྟེན་ཅན་གསུམ་མོ། །སྙོམས་པར་འཇུག་སེམས་ཀྱི་སྒོ་ནས་དབྱེ་ན་ཁམས་གསུམ་ས་དགུའི་མཇུག་ཐོག་ཏུ་བྱུང་བའི་འགོག་པའི་སྙོམས་འཇུག་དགུའོ། །རྟེན་ནི། བྱང་སེམས་འཕགས་པས་འདོད་གཟུགས་གཉིས་སུ་མངོན་དུ་བྱས་ཚུལ་ནི་སེམས་ཙམ་པའི་སྐབས་སུ་བཤད་པ་ལྟར་ཡིན་ལ་ཉན་རང་གིས་གསར་དུ་ཐོབ་ཚུལ་ནི་དབུ་མ་པའི་གཞུང་ལས་གསལ་བར་མ་བཤད་པས། སེམས་ཙམ་པ་ལྟར་ཁས་ལེན་དགོས་ཤིང་། ཕྱིས་ནི་གཟུགས་མེད་ཀྱི་རྟེན་ལ་ཡང་མངོན་དུ་བྱེད་པ་ཡོད་དེ། དེར་མངོན་དུ་བྱེད་པའི་དགོས་ནུས་གཉིས་ཚང་བའི་ཕྱིར་ཏེ། བདག་ཏུ་འཛིན་པའི་འདུ་ཤེས་དང་། དེའི་རྒྱུར་གྱུར་པའི་ཚོར་བ་འགོག་དགོས་པས་དགོས་པ་ཡོད་ཅིང་། དེའི་ཚེ་ཟག་མེད་ཀྱི་ཤེས་པ་ཡོད་པས་ནུས་པ་ཡང་ཡོད་པའི་ཕྱིར། དགག་གཞི། དེ་བཞིན་ཉིད་འཐད་དེ། དབུ་མ་པས་ཆོས་ཐམས་ཅད་དེ་བཞིན་ཉིད་ལ་བརྟེན་པར་ཁས་ལེན་པའི་ཕྱིར། དགག་བྱ་ནི། དབང་ཤེས་དགག་དགོས་ཏེ། དེ་མ་བཀག་ན་བདག་མེད་པའི་དོན་ལ་རྩེ་གཅིག་ཏུ་མཉམ་པར་གཞག་མི་ནུས་པའི་ཕྱིར། ཡིད་ཀྱི་རྣམ་ཤེས་ཟག་བཅས་རྣམས་ཀྱང་མཐའ་གཅིག་ཏུ་དགག་དགོས་ཏེ། ཐེག་དམན་སློབ་པ་རྣམས་ནི་ཉོན་མོངས་ཀྱི་རྒྱུར་གྱུར་པའི་ཚོར་འདུ་དགག་དགོས། བྱང་སེམས་འཕགས་པ་རྣམས་ནི་ཆོས་ཀྱི་བདག་ཏུ་འཛིན་པའི་རྒྱུར་གྱུར་པའི་ཚོར་འདུ་དགག་དགོས་པའི་ཕྱིར་རོ། །ཡིད་ཀྱི་རྣམ་ཤེས་ཟག་མེད་ནི་མི་འགོག་སྟེ། འགོག་སྙོམས་ཉིད་ཟག་མེད་ཀྱི་ཤེས་པ་ཡིན་པའི་ཕྱིར། ཉོན་ཡིད་ཁས་ལེན་ན་དེ་ཡང་དགག་དགོས་ཏེ། དེ་ནི་ངར་འཛིན་ཡིན་པས་འདིར་དགག་བྱའི་གཙོ་བོ་ཡིན་པའི་ཕྱིར་རོ། །འགོག་བྱེད་ནི། ཟག་མེད་ཀྱི་ཤེས་པར་ངེས་ཏེ། འདིར་ནི་བདག་འཛིན་དགག་བྱའི་གཙོ་བོར་བྱས་ནས་འགོག་དགོས་པས་དེ་ལ་བདག་མེད་རྟོགས་པའི་ཤེས་རབ་དགོས་ཤིང་། འཕགས་རྒྱུད་ཀྱི་བདག་མེད་རྟོགས་པའི་ཤེས་རབ་ལ་ཟག་མེད་ཀྱིས་ཁྱབ་པའི་ཕྱིར་རོ། །རྫས་ཡོད་བཏགས་ཡོད་གཉིས་ཀྱི་ནང་ནས་བཏགས་ཡོད་ཡིན་ཏེ། རྫས་ཡོད་ཀྱི་ཆོས་མེད་པའི་ཕྱིར་རོ། །ཟག་བཅས་ཟག་མེད་གཉིས་ཀྱི་ནང་ནས་ཟག་མེད་ཡིན་ཏེ། འཕགས་རྒྱུད་ཀྱི་བདག་མེད་རྟོགས་པའི་མཉམ་བཞག་ཡིན་པའི་ཕྱིར། སེམས་བཅས་སེམས་མེད་གཉིས་ཀྱི་ནང་ནས་སེམས་བཅས་ཡིན་ཏེ། དེའི་གནས་སྐབས་ན་ཟག་མེད་ཀྱི་ཤེས་པ་ཡོད་པའི་ཕྱིར། ཕུང་པོ་ལྔའི་ནང་ནས་གཟུགས་ཕུང་མ་གཏོགས་པའི་གཞན་བཞི་ཀ་ཡོད་དེ། གཙོ་བོ་ཡིད་ཀྱི་རྣམ་ཤེས་འགོག་སྙོམས་སུ་སོང་བའི་ཚེ། དེའི་འཁོར་དུ་བྱུང་བའི་ཚོར་བ་དང་། འདུ་ཤེས་དང་། མཚུངས་ལྡན་གྱི་འདུ་བྱེད་གསུམ་པོ་དེ་ཡང་འགོག་སྙོམས་སུ་འགྱུར་བའི་ཕྱིར་རོ། ། |
| Domain | ཆོས་ལུགས། |