39307

བཀའ་ཆེམས་ཀ་ཁོལ་མ་ (1)

Part of speech

མིང་ཚིག

Definition

རྒྱལ་པོ་སྲོང་བཙན་གྱི་བཀའ་རྩོམ་ཀ་ཁོལ་མའི་མཚན་གཞན་ཞིག བོད་ཀྱི་ལོ་རྒྱུས་ཐོག་སྐད་གྲགས་ཡོད་པའི་ལོ་རྒྱུས་དཔེ་ཆ་ཞིག་ཡིན། འདི་ལ་ཡོངས་གྲགས་ཀྱི་བཤད་སྲོལ་ནི། རྒྱལ་པོ་སྲོང་བཙན་སྒམ་པོ་མྱ་ངན་ལས་འདའ་ཁར་དབོན་སྲས་མང་སྲོང་མང་བཙན་དང་བོད་འབངས་སྤྱི་བཅས་ལ་ཞལ་ཆེམས་སུ་གསུངས་པ་རྣམས་ལྷ་ས་གཙུག་ལག་ཁང་གི་ཀ་བ་ཤིང་ལོ་ཅན་གྱི་གསེབ་ཏུ་སྦས་ནས་བཞག་པ། དུས་རབས་བཅུ་གཅིག་པའི་མགོར་ཇོ་བོ་རྗེ་ཨ་ཏི་ཤ་བོད་དུ་ཕེབས་ནས་ལྷ་སར་བཞུགས་པའི་སྐབས་ཤིག་ལ་སྤྲང་མོ་སྨྱོན་མ་ཞིག་གིས་ལུང་བསྟན་པ་ལྟར། དེའི་ནང་ནས་བཏོན་ཏེ། རྣལ་འབྱོར་པ་སོགས་སློབ་མ་བཞི་ལ་ལས་བགོས་ཀྱིས་ཉིན་གཅིག་ལ་བཤུ་གང་ཐུབ་མཛད་རུང་མཇུག་ཅུང་ཟད་བཤུ་མ་ཐུབ་པར་ལུས་ཤིང༌། སླར་ཡང་སྔར་གྱི་རང་གནས་སུ་འཇོག་པ་གནང་བ་དེ་ལས་དཔེ་རྒྱུན་རིམ་པར་འཕེལ་བས་བཀའ་ཆེམས་ཀ་ཁོལ་མ་ཞེས་གྲགས་པ་ཡིན་ཟེར། ཡང་དཔའ་བོ་གཙུག་ལག་ཕྲེང་བ་སོགས་མཁས་པ་འགའ་ཞིག་གི་གསུང་རྒྱུན་ལ་སྐབས་དེའི་མ་དཔེ་མང་པོ་འཕེལ་རྒྱས་མ་བྱུང་བའི་ཐོག་ཉུང་ཤས་ཡོད་པ་དེ་ཚོ་བརླག་སྟོར་སོང་སྟེ་དེང་སང་མཐོང་རྒྱུ་ཡོད་པའི་བཀའ་ཆེམས་འདི་གཙུག་ལག་ཁང་གི་དཀོན་གཉེར་ཞིག་གི་ངག་རྒྱུན་ལྟར་བྲིས་པ་ཡིན་སྟབས་ཁུངས་མ་དག་པ༌དང་ཡི་གེ་ནོར་བ་མང་པོ་ཡོད་པའི་རྒྱུ་མཚན་དེ་ཡིན་གསུངས། གང་ལྟར་དེའི་ནང་གལ་ཆེའི་ལོ་རྒྱུས་མང་པོ་གསལ་ཞིང་། རྒྱལ་པོ་སྲོང་བཙན་སྒམ་པོ་དགུང་ལོ༌ཞེ་བཞི་ལས་མ་བཞུགས་པ་དང༌བཙུན་མོ་བགྲེས་ཤོས༌མོང་བཟའ་ཡིན་པ་དེ་ལ་གུང་རི་གུང་བཙན་འཁྲུངས་པ། བལ་བཟའ་བཙུན་མོ་ལྔ་པ་དང་རྒྱ་བཟའ་བཙུན་མོ་དྲུག་པ༌ཡིན་པ། གཙུག་ལག་ཁང་གི་ཀ་གདུང་ངོས་སུ་བྲིས་པའི༌གབ་ཚིག་གི་ནང་དོན་དང་རི་མོའི་འགྲེལ་བཤད་གསལ༌པོར་བྲིས་པ་སོགས་རེད། འོན་ཀྱང་དེའི་ནང་དུ་དམངས༌ཁྲོད་ཀྱི་ངག་རྒྱུན་ཁུངས་མེད་འགའ་ཞིག་བྲིས་ཡོད་པ་དེ་ཚོར་ཞིབ་ཏུ་དཔྱད་དགོས་སོ། །

{{#arraymap:བཀའ་ཆེམས་ཀ་ཁོལ་མ་

|; |@@@ | | }}