43570

བསམ་གཏན་དང་པོའི་དངོས་གཞི་ (1)

Part of speech	མིང་ཚིག
Definition	བསམ་གཏན་དང་པོའི་དངོས་གཞིའི་མཚན་ཉིད། རྟོག་དཔྱོད་གང་རུང་གཉེན་པོའི་ཡན་ལག་གིས་འདོད་པ་ལ་འདོད་ཆགས་དང་བྲལ་བས་རབ་ཏུ་ཕྱེ་བའི་སེམས་རྩེ་གཅིག་པ་མཚུངས་ལྡན་དང་བཅས་པ་གང་ཞིག དབེན་པ་ལས་སྐྱེས་པའི་དགའ་བདེ་ཕན་ཡོན་གྱི་ཡན་ལག་ཏུ་ལྡན་པའོ། །སངས་རྒྱས་ཀྱི་ས་ལ་མ་ཁྱབ་པ་སྤང་བའི་ཆེད་དུ་དེའི་རིགས་སུ་གནས་པའི་དངོས་གཞིའི་སྙོམས་འཇུག་ཅེས་སྦྱར་ཞིང་། འོག་མ་རྣམས་ལ་ཡང་དེ་བཞིན་དུ་ཤེས་པར་བྱའོ། །རྟོག་དཔྱོད་གང་རུང་ཞེས་པའི་དོན་ནི་བསམ་གཏན་དང་པོའི་དངོས་གཞི་ལ་རང་གི་ཡན་ལག་རགས་པ་སྤངས་མ་སྤངས་ཀྱི་ཁྱད་པར་གྱིས་དངོས་གཞི་ཙམ་པོ་དང་། ཁྱད་པར་ཅན་གཉིས་ཡོད་པ་ལས་དངོས་གཞི་ཙམ་པོའི་སྐབས་སུ་རྟོག་དཔྱོད་གཉིས་ཀ་ལྡན་ཡང་དངོས་གཞི་ཁྱད་པར་ཅན་གྱི་སྐབས་སུ་རྟོག་པ་མེད་ཅིང་དཔྱོད་པ་ཙམ་དང་ལྡན་པས་དེ་སྐད་དུ་སྨོས་སོ་ཞེས་ཀུན་མཁྱེན་གོ་རམས་པའི་སྙོམས་འཇུག་རབ་གསལ་ལས་སོ། །
Domain	ཆོས་ལུགས།