44818

བསྟན་འཛིན་ཕུན་ཚོགས་ (1)

Part of speech

མིང་ཚིག

Definition

ཨ་བསྟན་ཕུན་ཚོགས་སྐུ་ཕྲེང་དང་པོ་ཡིན། སྐྱོ་བྲག་དགོན་གྱི་ཐོག་མའི་གདན་ས་བ་རླངས་རས་གྲགས་པ་རྒྱལ་མཚན་གྱི་དབོན་རིགས་སུ་དུས་རབས་བཅུ་བཞི་པའི་དཀྱིལ་སྨད་དེ་རབ་བྱུང་བརྒྱད་པའི་ལྕགས་སྦྲུལ་ཕྱི་ལོ ༡༤༦༡ ལོར་སྐུ་འཁྲུངས། ཁུ་བོ་སྐྱོ་བྲག་བསྟན་འཛིན་བཟང་པོའི་སྐུ་མདུན་ནས་འབའ་རོམ་རང་ལུགས་ཀྱི་ཆོས་སྐོར་མཐའ་དག་རྫོགས་པར་གསན། གནས་མཆོག་སྐྱོ་ཉིན་ཕུག་སོགས་སུ་སྒྲུབ་པ་མཛད་པས་རྟོགས་པ་ཀློང་དུ་གྱུར། འཁོར་སློབ་དུ་མ་འདུས་པ་ལ་སྨིན་གྲོལ་གདམས་པའི་བདུད་རྩི་བར་མེད་དུ་བསྩལ་ཞིང་སྒྲུབ་པ་ལ་བསྐུལ་བས་རྟོགས་ལྡན་རྣལ་འབྱོར་པའི་ཁྱུ་བརྡོལ། ཕྱིས་སུ་འཁོར་སློབ་རྒྱ་ཆེར་འདུས་པས་སྐྱོ་བྲག་གནས་རྒན་མའི་ཤར་ངོགས་སུ་སྤྱི་ལོ་ ༡༥༠༥ ལོར་དགོན་པ་ཕྱག་བཏབ་པས་མཛད་ཕྲིན་བླ་ལྷག་ཏུ་རྒྱས། བགྲང་བྱ་དོན་དྲུག་ཏུ་ཕེབས་པ་རབ་བྱུང་དགུ་པའི་མེ་སྤྲེལ་ཏེ་ཕྱི་ལོ་ ༡༥༣༦ ལ་ངོ་མཚར་བའི་ལྟས་དུ་མ་དང་བཅས་གཟུགས་སྐུའི་བཀོད་པ་བསྡུ་བའི་ཚུལ་བསྟན་ཏོ། །