53503

མདོ་ཡི་དངོས་བསྟན་རྟེན་འབྲེལ་ཡན་ལག་བཅུ་གཉིས་ (1)

Part of speech	མིང་ཚིག
Definition	མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་ལ་འཕེན་འགྲུབ་དངོས་བསྟན་བཞི་དང་། ཤུགས་བསྟན་བཞི་ཡོད་པ་ལས། དངོས་བསྟན་བཞི་པོ་ཕྱོགས་གཅིག་ཏུ་བསྒྲིགས་ནས་ཡན་ལག་བཅུ་གཉིས་སུ་བཞག་གོ །དེ་ལ་དགོས་པ་ཅི་ཡོད་ཅེ་ན། འདི་ལ་དགོས་པ་གཉིས་ལས། དང་པོ་ནི། རྒྱུ་ལ་རིང་རྒྱུ་དང་། ཉེ་རྒྱུ་གཉིས་ཡོད་པ་དང་། འབྲས་བུ་ལ་རིང་བའི་འབྲས་བུ་དང་། ཉེ་བའི་འབྲས་བུ་གཉིས་ཡོད་པ་རྟོགས་པའི་ཆེད་དུ་ཡིན་ཏེ། འཕེན་བྱེད་རྒྱུ་འབྲས་ཀྱི་སྐབས་སུ་རིང་བའི་རྒྱུ་འབྲས་བསྟན་ནས། འགྲུབ་བྱེད་རྒྱུ་འབྲས་ཀྱི་སྐབས་སུ་ཉེ་བའི་རྒྱུ་འབྲས་བསྟན་པའི་ཕྱིར། དེ་ལྟར་རྟོགས་པ་ལ་དགོས་པ་ཅི་ཡོད་སྙམ་ན་རྒྱུ་ལ་གཉིས་ཡོད་པ་རྟོགས་པའི་དགོས་པ་ནི་རིང་བའི་རྒྱུ་བསགས་ཀྱང་ཉེ་བའི་རྒྱུས་གསོས་མ་བཏབ་ན་འབྲས་བུ་མི་བསྐྱེད་པར་ཤེས་ནས་སྲེད་པ་སྤོང་བའི་ཆེད་ཡིན་ལ། འབྲས་བུ་ལ་གཉིས་ཡོད་པ་རྟོགས་པའི་དགོས་པ་ནི་རྣམ་སྨིན་གྱི་ངོ་བོ་དང་། དེའི་ཉེས་དམིགས་རྟོགས་པའི་ཆེད་ཡིན་ནོ། །དགོས་པ་གཉིས་པ་ནི། ཡན་ལག་བཅུ་གཉིས་སྔ་མ་སྔ་མའི་རྐྱེན་གྱིས་ཕྱི་མ་ཕྱི་མ་འབྱུང་བ་དང་། སྔ་མ་སྔ་མ་འགགས་པས་ཕྱི་མ་ཕྱི་མ་འགག་པར་རྟོགས་པའི་ཆེད་ཡིན་ཏེ། རྒྱུ་འབྲས་ཆ་གཉིས་ཀྱི་དངོས་བསྟན་བཞི་ཕྱོགས་གཅིག་ཏུ་མ་བསྒྲིགས་ན་དགོས་པ་དེ་གཉིས་མི་འགྲུབ་པའི་ཕྱིར་རོ་ཞེས་ཀུན་མཁྱེན་གོ་རམས་པའི་རྟེན་འབྲེལ་རབ་གསལ་ལས་སོ། །
Domain	ཆོས་ལུགས།