53514

མདོ་ལས་གསུངས་པའི་ཡན་ལག་བཅུ་གཉིས་ཚེ་དུ་ལ་རྫོགས་པ་ (1)

Part of speech	མིང་ཚིག
Definition	མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་མྱུར་ན་ཚེ་གསུམ་གྱིས་རྫོགས་ཏེ། ཚེ་སྔ་མ་ལ་འཕེན་བྱེད་དངོས་བསྟན་གསུམ། འགྲུབ་བྱེད་ཤུགས་བསྟན་གསུམ་སྟེ་དྲུག་རྫོགས་ཤིང་། ཚེ་བར་པ་ལ་འཕངས་པའི་འབྲས་བུ་དངོས་བསྟན་བཞི། འགྲུབ་པའི་འབྲས་བུ་ཤུགས་བསྟན་གཉིས་ཏེ་དྲུག་རྫོགས། དེ་ཉིད་ཀྱི་ཚེ་འགྲུབ་བྱེད་དངོས་བསྟན་གསུམ་དང་། འཕེན་བྱེད་ཤུགས་བསྟན་གསུམ་སྟེ་དྲུག་འབྱུང་བས་བཅུ་གཉིས་སུ་འགྱུར་ལ། ཚེ་ཕྱི་མ་ལ་གྲུབ་པའི་འབྲས་བུ་དངོས་བསྟན་གཉིས། འཕངས་པའི་འབྲས་བུ་ཤུགས་བསྟན་གཉིས་རྫོགས། དངོས་ཤུགས་ཉི་ཤུ་རྩ་བཞི་པོ་དེ་ཉིད་ཀྱི་མདོ་ལས་འབྱུང་བའི་ཡན་ལག་བཅུ་གཉིས་པོ་ཆ་གཅིག་རྫོགས་པའི་ཕྱིར་རོ། །རིང་ན་ཚེ་བཞི་ལ་རྫོགས་ཏེ། ཚེ་སྔ་མ་ལ་འཕེན་བྱེད་དངོས་བསྟན་གསུམ། ཚེ་གཉིས་པ་ལ་འགྲུབ་བྱེད་ཤུགས་བསྟན་གསུམ། ཚེ་གསུམ་པ་ལ་འཕངས་པའི་འབྲས་བུ་དངོས་བསྟན་བཞི། གྲུབ་པའི་འབྲས་བུ་ཤུགས་བསྟན་གཉིས་ཏེ་དྲུག་རྫོགས་ཤིང་། དེ་ཉིད་ཀྱི་ཚེ་འགྲུབ་བྱེད་དངོས་བསྟན་གསུམ་འཕེན་བྱེད་ཤུགས་བསྟན་གསུམ་སྟེ་དྲུག་འབྱུང་བས་བཅུ་གཉིས་སུ་འགྱུར་ལ། ཚེ་བཞི་པ་ལ་གྲུབ་པའི་འབྲས་བུ་དངོས་བསྟན་གཉིས་དང་། འཕངས་པའི་འབྲས་བུ་ཤུགས་བསྟན་བཞི་སྟེ་དྲུག་འབྱུང་བས་དངོས་ཤུགས་ཉི་ཤུ་རྩ་བཞི་པོ་དེ་ཉིད་ཀྱིས་མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་རྫོགས་པའི་ཕྱིར། འདིའི་ཚེ་དང་པོ་དང་གཉིས་པ་བར་མ་ཆད་དུ་འབྱུང་བ་ངེས་པ་མེད་པ་ནི་སྔར་དང་འདྲ་ལ། ཚེ་ཕྱི་མ་གསུམ་པོ་བར་མ་ཆད་དུ་འབྱུང་སྟེ། ཚོར་བའི་རྐྱེན་གྱིས་སྲེད་པ་འབྱུང་དགོས་པའི་ཕྱིར་དང་། འགྲུབ་བྱེད་ཀྱི་གསོས་བཏབ་པའི་སྐྱེ་བ་དང་། འབྲས་བུ་འགྲུབ་པའི་སྐྱེ་བ་གཉིས་ལ་སྐྱེ་བ་གཞན་གྱིས་བར་ཆོད་པ་མི་སྲིད་པའི་ཕྱིར། མདོར་ན་རྒྱུ་འབྲས་སྔ་མའི་ཚོར་བ་རྒྱུར་བྱས་ནས་རྒྱུ་འབྲས་ཕྱི་མའི་སྲེད་པ་འབྲས་བུར་བྱས་པ་ལ་སྔ་མའི་འབྲས་བུ་དང་། ཕྱི་མའི་རྒྱུ་གཉིས་པོ་ཚེ་གཅིག་ལ་འབྱུང་དགོས་ཤིང་། དེ་ཡང་མདོ་ལས་འབྱུང་བའི་ཡན་ལག་བཅུ་གཉིས་ཆ་གཅིག་གིས་བསྡུས་པ་ནི་གནད་ཀྱི་དོན་ནོ། །འདིར་རྣམ་ཤེས་འཕེན་བྱེད་ཀྱི་ཡན་ལག་ཏུ་བྱས་པ་ནི་ཀུན་ལས་བཏུས་ལས་གསུངས་པའི་དབང་དུ་བྱས་ལ། རྣམ་ཤེས་འབྲས་བུའི་ཆ་བཟུང་བ་ལྟར་ན་འཕངས་པའི་འབྲས་བུའི་ཁོངས་སུ་བསྡུ་བར་བྱའོ་ཞེས་ཀུན་མཁྱེན་གོ་རམས་པའི་རྟེན་འབྲེལ་རབ་གསལ་ལས་སོ། །
Domain	ཆོས་ལུགས།