65717

འདུལ་ཁྲིམས་ (1)

Part of speech

མིང་ཚིག

Definition

འདུལ་བའི་བཅས་ཁྲིམས་ཏེ་དམ་ཆོས་འདུལ་བ་ལས་གསུངས་པའི་སྤང་བླང་གི་ཁྲིམས། སངས་རྒྱས་ཤཱཀྱ་ཐུབ་པས་གསུངས་པའི་འདུལ་བའི་གཞུང་སྡེ་བཞི་ཡོད་པ་དེ་ནས་བཤད་པ་ལྟར་གྱི་གྲྭ་པའི་སྒྲིགས་ཁྲིམས་དེ་ལ་འདུལ་ཁྲིམས་ཟེར། དེ་ལ་ཐོག་མར་བྱིས་པ་ལོ་བདུན་ལ་རབ་ཏུ་བྱུང་ནས་དགེ་ཚུལ་མ་བྱས་བར་དེར་ཁྲིམས་གསུམ་ཡོད་པ་དང༌། དེ་ནས་དགེ་ཚུལ་གྱི་སྡོམ་པ་ཞུས་རྗེས་བླངས་འདས་སུམ་ཅུ་སོ་དྲུག དེ་ནས་ལོ་ཉི་ཤུ་ལ་སླེབས་ནས་དགེ་སློང་གི་སྡོམ་པ་ཞུས་རྗེས་རྩ་བ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་བཅས་བསྡོམས་ཉིས་བརྒྱ་ལྔ་བཅུ་ང་གསུམ་ཡོད།