65723

འདུལ་བ་ (1)

Part of speech	མིང་ཚིག
Definition	བཏུལ་བའི་ད་ལྟ་བའི་བྱ་བའི་མིང་།

འདུལ་བ་ (2)

Part of speech	མིང་ཚིག
Definition	མདོ། འདུལ་བ། སྡེ་སྣོད་གསུམ་གྱི་ནང་ཚན་འདུལ་བའི་སྡེ་སྣོད་དེ། ལྟུང་བ་སྡེ་ལྔ་དང༌། ལྟུང་བ་འབྱུང་བའི་རྒྱུ་དང༌། ལྟུང་བ་ལས་ལྡང་བ་དང༌། ལྟུང་བ་ལས་ངེས་པར་འབྱུང་བ་དང༌། གང་ལ་བརྟེན་ནས་བསླབ་པ་བཅའ་བ་གང་ཟག་བསླབ་པ་བཅས་པ་དངོས། དེའི་རབ་ཏུ་དབྱེ་བ། ལྟུང་བ་དང་ལྟུང་མེད་རྣམ་པར་ངེས་པ་བཅས་དོན་རྣམ་པ་བརྒྱད་སྟོན་པས་ན་འདུལ་བ་སྟེ། རྣམ་སྨིན་འདུལ་ཞིང་མྱང་འདས་སུ་འཁྲིད་པས་ན་འདུལ་བའོ། །ལུང་གཞི་ལས་ནི། དུག་གསུམ་འདུལ་བས་ན་འདུལ་བ་ཞེས་བཤད་དོ། །ལྔ་མཚན་ལས་ནི། ཀུན་ནས་དཀྲིས་པ་དང་རྣམ་སྨིན་གྱི་དྲི་མ་གཉིས་འདུལ་བས་འདུལ་བ་ཞེས་བཤད་དོ། །ཞེས་ཀུན་མཁྱེན་རོང་སྟོན་གྱི་འདུལ་བ་མེ་ཏོག་ཕྲེང་རྒྱུད་ཀྱི་རྣམ་འགྲེལ་ལས་སོ། ། ཆོས་འདུལ་བ་ནི་གཉིས་ཏེ། ཐེག་པ་ཐུན་མོང་གི་དང། ཐུན་མོང་མ་ཡིན་པའི་འོ། །དང་པོ་ལ་བརྗོད་བྱ་དོན་གྱི་དང། རྗོད་བྱེད་ཚིག་གིའོ། །དང་པོ་ནི། བྱུང་བ་དང། བཅས་པ་དང། རྗེས་སུ་བཅས་པ་དང། གནང་བ་དང། བཀག་པ་རྣམས་སོ། །གཉིས་པ་ནི། རྩ་བའི་ལུང་སོ་སོར་ཐར་པ་གཉིས་དང་། བཤད་པའི་ལུང་སྡེ་བཞིའོ། །དེ་ལས་ཀྱང་ལུང་རྣམ་འབྱེད་ནི། སོ་སོར་ཐར་པ་གཉིས་ཀྱི་ཚིག་གི་འགྲེལ་པའོ། །དེ་ལའང་དགེ་སློང་ཕ་མའི་དབྱེ་བས་གཉིས་སུ་ཡོད་ལ། དང་པོ་ལ་བམ་པོ་བརྒྱད་ཅུ་གྱ་གསུམ་མོ། །ལུང་གཞི་ནི། སོ་སོར་ཐར་པ་རྣམ་པ་གཉིས་ཀྱི་མ་ཚང་བ་ཁ་བསྐང་བའི་འགྲེལ་པ་ཡིན་ལ། བམ་པོ་ནི་བརྒྱ་དང་བཅུའོ། །ལུང་ཕྲན་ཚེགས་ནི། བསླབ་པའི་གནས་ཕྲ་མོ་རྣམས་རྒྱས་པར་གཏན་ལ་ཕབ་པའི་སྒོ་ནས། སོ་སོར་ཐར་པ་རྣམ་གཉིས་ཀྱི་སྤྱི་དོན་ལྟ་བུར་གྱུར་པའི་འགྲེལ་པ་ཡིན་ལ། བམ་པོ་ནི་ལྔ་བཅུ་རྩ་དགུའོ། །གཞུང་དམ་པ་ནི། དེ་གཉིས་ཀྱི་དཀའ་བའི་གནས་རྣམས་གཏན་ལ་འབེབས་པ་ལ་ཤིན་ཏུ་གཅེས་པའི་འགྲེལ་པ་ཡིན་ལ། བམ་པོ་ནི་ལྔ་བཅུ་རྩ་ལྔའོ། །ཞེས་པཎ་ཆེན་ཤཱཀ་མཆོག་གི་འདུལ་མདོའི་སྣང་བྱེད་ཉི་མའི་ཤིང་རྟ་ལས་སོ། ། བྱ་བ་དང་བྱ་བ་མ་ཡིན་པ་ཉེ་བར་སྟོན་པས་སློབ་མ་རྣམས་འདུལ་ཞིང་རྗེས་སུ་སྟོན་པར་བྱེད་པས་འདུལ་བའོ། །ཞེས་པཎ་ཆེན་ངག་ཆོས་ཀྱི་འདུལ་བའི་སྤྱི་དོན་ཐུབ་བསྟན་ཉིན་རྒྱས་ལས་སོ། །
Domain	ཆོས་ལུགས།

འདུལ་བ་ (2)

Part of speech	མིང་ཚིག
Definition	སྔགས། མ་ཧཱ་ཡོ་ག འདུལ་བ་ནི། བྱ་རྒྱུད་ལ་བྱ་སྟེ། མན་ངག་ལྟ་ཕྲེང་གི་འགྲེལ་པ་ལས། འདུལ་བ་ནི་བྱ་བའི་རྒྱུད་དེ། དེར་གསང་སྔགས་ཀྱི་འདུལ་བའི་གཞི་བཅས་པའི་ཕྱིར་རོ། །ཞེས་གསུངས།