65740

འདུལ་བ་དུས་ཆེན་དུས་བརྩན་སྡོམ་བྱེད་རྒྱུད་ (1)

Part of speech

མིང་ཚིག

Definition

བོན། འདུལ་བ་རྒྱུད་དྲུག་གི་ནང་གསེས་(འདུལ་བ་དུས་ཆེན་དུས་བརྩན་སྡོམ་བྱེད་རྒྱུད་) ཅེས་པའི་གཞུང་འདི། མཛད་པ་པོ། གཡུང་དྲུང་བོན་གྱི་བསྟན་པའི་སྲོལ་འབྱེད་རྣམ་མཁྱེན་སྟོན་པ་གཤེན་རབ་མི་བོ་དེ་ཉིད་ཡིན། མཛད་པའི་དུས། ཕྱི་ལོའི་སྔོན་གཤེན་ལོ་སུམ་ཅུ་སོ་གཅིག་སྟེ་སྟོན་པ་རབ་ཏུ་བྱུང་བའི་དུས་སུ་གསུངས་པའོ། །གཞུང་འདིའི་བརྗོད་བྱ་ནི། སྡེ་སྣོད་གསུམ་གྱི་ནང་ཚན་འདུལ་བའི་སྡེ་སྣོད་དེ། ལྷག་པ་ཚུལ་ཁྲིམས་ཀྱི་བསླབ་པའི་ཁོངས་གཏོགས་སོ་ཐར་རིགས་བཞི་ལ་སོགས་པའི་རྩ་བའི་སྡོམ་པ་སྟེ་ལུས་ཀྱིས་སྲོག་འདོན་པ་ལ་སོགས་རྩ་བའི་ཁྲིམས་སྤྱི་བསྟན་པ་དང་། བྱེ་བྲག་ཏུ་གཞུང་འདིར་སྡེ་ཚན་སོགས་མི་འདྲ་བའི་ལེའུ་གྲངས་སུ་བགྲང་ན་ལེའུ་ཉེར་གསུམ་ཡོད་དེ། འདུལ་བ་དུས་ཆེན་དུས་བརྩན་སྡོམ་བྱེད་རྒྱུད་ལས། དང་པོའི་ལེའུ་སྟེ་གཅིག་པའོ། །འདུལ་བ་དུས་བརྩན་སྡོམ་བྱེད་ལས། སྦྱོར་ཚུལ་དཔེ་དོན་སྤྲད་པའི་ལེའུ་སྟེ་གཉིས་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། ཕུན་སུམ་ཚོགས་པ་གཡུང་དྲུང་བོན། ཚད་གསུམ་ཟུང་དུ་འབྲེལ་བ་དག་པ་དྲང་སྲོང་གཡུང་དྲུང་དོན་ལྡན་ལེའུ་སྟེ་གསུམ་པའོ། །འཕོ་འགྱུར་མི་རྟག་དཔེ་དོན་ལེའུ་སྟེ་བཞི་པའོ། །ལས་མཐའ་དཀར་ནག་གཏམ་རྒྱུད་ཀྱི་ལེའུ་སྟེ་ལྔ་པའོ། །རྟེན་སྡོམ་པ་བཟུང་ནས་བསྐྱབས་པའི་ལེའུ་སྟེ་དྲུག་པའོ། །ཚུལ་ཁྲིམས་དོན་ཆེན་བསྐོར་བའི་ལེའུ་སྟེ་བདུན་པའོ། །རྟེན་གསུམ་བསྐོར་ཕྱག་འཚལ་བའི་ལེའུ་སྟེ་བརྒྱད་པའོ། །སྲོག་བཏོན་བྱང་ཆུབ་སེམས་དཔའི་ལེའུ་སྟེ་དགུ་པའོ། །སྦྱིན་པ་མཐར་ཕྱིན་བྱང་ཆུབ་ཚོགས་རྫོགས་ལེའུ་སྟེ་བཅུ་པའོ། །དཀའ་ཐུབ་ལམ་འཛུད་དམ་པའི་ལེའུ་སྟེ་བཅུ་གཅིག་པའོ། །དགེ་བ་བདེན་གཅོད་བྱང་ཆུབ་ལེའུ་སྟེ་བཅུ་གཉིས་པའོ། །གཉན་མཐའ་ཡུལ་འདེབས་ཞུ་རྒྱུད་ལས། ཉེས་པ་རབ་སེལ་གྱི་ལེའུ་སྟེ་བཅུ་གསུམ་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། སྨྲ་བཅད་གཉེན་པོའི་ཚིགས་རྩུབ་བསྒྱུར་བའི་ལེའུ་སྟེ་བཅུ་བཞི་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། ངག་འཁྱལ་མདོ་དང་སྦྱོར་བས་སེལ་བའི་ལེའུ་སྟེ་བཅོ་ལྔ་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། བརྣབ་སེམས་ཚད་མེད་བཞི་བསྲང་དུ་འཇུག་པའི་ལེའུ་སྟེ་བཅུ་དྲུག་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། བྱམས་ལྡན་གནོད་སེལ་གནོད་སེམས་སྤང་པའི་ལེའུ་སྟེ་བཅུ་བདུན་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། དགེ་བའི་ལོག་ལྟ་རྣམ་པར་སྤང་པའི་ལེའུ་སྟེ་བཅོ་བརྒྱད་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། སེར་སྣ་གཏང་བཟུངས་ལེའུ་སྟེ་བཅུ་དགུ་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། ཆགས་འཁོར་མུ་བཞིའི་མཐའ་སྤངས་ལེའུ་སྟེ་ཉི་ཤུ་ཐམ་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། མི་འགྱོད་བསྐྱལ་དོན་བོན་པའི་ལེའུ་སྟེ་ཉེར་གཅིག་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། གསང་བར་འོས་པར་བསྟན་པའི་ལེའུ་སྟེ་ཉེར་གཉིས་པའོ། །འདུལ་བ་དུས་བརྩན་སྡོམ་བྱེད་རྒྱུད་ལས། དགེ་བཅུ་དང་ལེན་འདུལ་བར་གཏད་པའི་ལེའུ་སྟེ་ཉེར་གསུམ་པའོ། །ཞེས་གསུངས་སོ། །