65844

འདུལ་འཛིན་གྲགས་པ་རྒྱལ་མཚན་ (1)

Part of speech

མིང་ཚིག

Definition

རབ་བྱུང་དྲུག་པའི་ཤིང་སྟག་ཕྱི་ལོ་ ༡༣༧༤ ལོར་དབུས་སྟོད་སྦྲང་ཡུལ་དུ་འཁྲུངས། འབྲི་གུང་ཆོས་རྗེ་ལས་རབ་ཏུ་བྱུང་། འབྲི་གུང་པ་སྐུ་ཐོག་ཉེར་གཉིས་པ་ལས་ཟབ་ཆོས་མང་དུ་གསན། བྲག་ཚན་དུ་འདུལ་བའི་སྐོར་སྦྱངས། སྔགས་ཀྱི་བླ་མ་ཡང་མང་ཙམ་བསྟེན། བུ་སྟོན་གྱི་གསུང་ཀུན་མཁྱེན་པ་གནང། རྗེ་ཙོང་ཁ་པ་ལས་མདོ་སྔགས་ཀྱི་ཆོས་མང་དུ་གསན། ལྷག་ཏུ་འདུལ་བའི་གཞུང་ཀུན་གསན། བྱང་ཆུབ་ཀྱི་སེམས་ཐུགས་དམ་གྱི་མཐིལ་དུ་མཛད། ལུང་དང་་མངོན་རྟོགས་མངའ་བར་གནང་། རྗེ་ཙོང་ཁ་པས་འདུལ་འཛིན་འདི་བཞིན་རྒྱ་གར་ནའང་དཀོན་ཞེས་བསྔགས། བཙུན་མོ་ཚལ་དུ་དགོན་པ་བཏབ། དགེ་འདུན་བརྒྱད་བརྒྱ་ལྷག་ཙམ་འདུས། མལ་གྲོ་ཁུལ་གྱི་སྤངས་དགོན་དང་། ཚལ་གུང་ཐང་སོགས་སུ་བཤད་སྒྲུབ་ཀྱི་བསྟན་པ་སྤེལ། འཆད་ཉན་དང་ཉམས་ལེན་གྱི་བྱ་བ་ཁོ་ནས་དུས་འདས། རྗེ་ཙོང་ཁ་པའི་སློབ་མ་མང་པོ་ཞིག་གིས་ཀྱང་འདི་ལས་འདུལ་བ་སོགས་མདོ་སྔགས་ཀྱི་ཆོས་ཕོན་ཆེ་གསན། རབ་བྱུང་བདུན་པའི་ཤིང་སྟག་ཕྱི་ལོ་ ༡༤༣༤ ལོར་བཙུན་མོ་ཚལ་གྱི་དགོན་པར་སྐུ་གཤེགས། སློབ་མ་ནི་རྒྱུད་སྨད་བླ་མ་ཤེས་རབ་སེང་གེ་སོགས་རྗེ་ཙོང་ཁ་པའི་སྲས་ཀྱི་ཐུ་བོ་གཉིས་ལས་གཅིག་ཡིན། གསུང་རྩོམ་ནི་དགེ་སློང་གི་བསླབ་བྱ་ཆེན་མོ། དགེ་ཚུལ་གྱི་བསླབ་བྱ། གླེང་འབུམ་སོགས་མདོའི་སྐོར། རབ་གནས་ཆོ་ག དྲིལ་བུ་ལྷ་ལྔའི་སྒྲུབ་ཐབས། ཀུན་རིག་རྣམ་པར་སྣང་མཛད་ཀྱི་ཆོ་ག་སོགས་སྔགས་ཀྱི་སྐོར་བཅས་པོད་ཆེན་ཞིག་བཞུགས།