65845

འདུལ་འཛིན་ངག་དབང་བསྟན་འཛིན་ (1)

Part of speech

མིང་ཚིག

Definition

རབ་བྱུང་བཅུ་གཉིས་པའི་མེ་བྱི་ཕྱི་ལོ་ ༡༦༩༦ ལོར་མདོ་སྨད་རྔ་ཡུལ་དུ་འཁྲུངས། གདུང་རུས་སྤྲོ་ཚིགས་ཡིན། ཆུང་དུས་ནས་ཁ་གྱའི་འགྱད་རོའི་བླ་མ་གུར་དམར་གསེར་ཏོག་ཅན་གྱི་ཡང་སྲིད་དུ་བཟུང་། མ་ཎི་ཤེས་རབ་བཀྲ་ཤིས་ལས་དགེ་ཚུལ་བསྒྲུབས། བླ་བྲང་བཀྲ་ཤིས་འཁྱིལ་གྱི་ཚོགས་གྲལ་ཞུགས། ཞེ་གསུམ་བར་དུ་གཞུང་ཆེན་ལྔ་ལ་མཁས་པར་བྱས། པོད་སོ་སོ་ལའང་ཟིན་བྲིས་བཀོད། གསང་སྔགས་བསྐྱེད་རྫོགས་དང་ཆོ་ག་ཕྱག་ལེན་དང་བཅས་པར་ཞིབ་པར་མཁྱེན། ཀུན་མཁྱེན་འཇམ་དབྱངས་བཞད་པ་ལས་བསྙེན་པར་རྫོགས། དབང་ལུང་མན་ངག་མ་ལུས་གསན། དགེ་བཤེས་ལྷ་རམས་པའི་མཚན་བཏགས་བཞེས། ཚོགས་ཆེན་ཞལ་ངོ་དང་རྒྱུད་པའི་བླ་མ་དབུས་བཅས་གནང་། སྡེ་ཁྲི་བློ་བཟང་དོན་གྲུབ་དགུང་ལོ་བདུན་ཅུར་ཕེབས་སྐབས་སློབ་ཆུང་བ་མཛད། ལོ་གཉིས་རིང་མཚན་ཉིད་གྲྭ་ཚང་ལ་བརྩི་བཞག་གནང་། སྐྱབས་མགོན་མཆོག་གི་ཡོངས་འཛིན་དུ་བཞུགས། རབ་བྱུང་བཅུ་གཉིས་པའི་ཤིང་གླང་ཕྱི་ལོ་ ༡༧༤༥ ལོར་བླ་བྲང་བཀྲ་ཤིས་འཁྱིལ་གྱི་གནད་ཁྲིར་ཕེབས། གདན་ས་ལོ་གསུམ་རིང་བསྐྱངས། ཁྲི་ཟུར་རྗེས་སྒོམ་སྒྲུབ་ཉམས་ལེན་མཛད། རེ་བདུན་པ་རབ་བྱུང་བཅུ་གསུམ་པའི་ཆུ་རྟ་ཕྱི་ལོ་ ༡༧༦༢ ལོར་སྐུ་གཤེགས། བླ་བྲང་བཀྲ་ཤིས་འཁྱིལ་གྱི་གདན་སའི་ཁྲི་རབས་བཞི་བ་ཡིན།