67976

འབའ་རོམ་པ་དར་མ་དབང་ཕྱུག་ (1)

Part of speech

མིང་ཚིག

Definition

འབའ་རོམ་བཀའ་བརྒྱུད་ཀྱི་སྲོལ་གཏོད་པ་པོ། རྗེ་འདི་ཉིད་ཡབ་སྟོན་པ་འབྱུང་གནས་བློ་གྲོས་དང་ཡུམ་ཇོ་མོ་ལོ་ཆུང་མ་གཉིས་ཀྱི་སྲས་སུ་རབ་བྱུང་གཉིས་པའི་མེ་ལུག་ཕྱི་ལོ ༡༡༢༧ ལོར་འཕན་ཡུལ་གྱི་དཀའ་བ་ཡུལ་སྣ་ཞེས་པར་སྐུ་འཁྲུངས། མཚན་འབུམ་སྐྱབས་གསོལ། དགུང་ལོ་བརྒྱད་ལ་ཕེབས་སྐབས་མཁན་པོ་ཀ་བ་དར་མ་སེང་གེ་དང༌། སློབ་དཔོན་དབང་ཕྱུག་གཞོན་ནུ་གཉིས་ལས་རབ་ཏུ་བྱུང༌། མཚན་དར་མ་དབང་ཕྱུག་གསོལ། དགེ་བཤེས་བྱ་ཡུལ་བ་དང༌། པོ་ཏོ་བའི་བུ་ཆེན་གྲུ་འབུ་ལུང་པ་ལ་བཀའ་གདམས་ཀྱི་ཆོས་སྐོར་རྣམས་གསན། དགུང་ལོ་ཉི་ཤུ་རྩ་གཅིག་ལ་ཕེབས་སྐབས་སྒམ་པོར་ཕེབས་ཤིང༌། དེ་ནས་བཟུང་རྗེ་སྒམ་པོ་བ་དང་བླ་སློབ་ཏུ་གྱུར་ཏེ་བཀའ་བརྒྱུད་ཀྱི་ཆོས་རྣམས་བུམ་པ་གང་བྱོའི་ཚུལ་དུ་གནང༌། དཀའ་ཚེགས་མེད་པར་རྟོགས་པ་ཅིག་ཅར་དུ་འཁྲུངས། དགུང་ལོ་ཉེར་བརྒྱད་ལོར་བྱང་འབའ་རོམ་དུ་ཕེབས་ནས་ལོ་བདུན་གྱི་བར་དུ་སྒྲུབ་པ་མཛད་ཅིང༌། ཕལ་ཆེར་ཏིང་ངེ་འཛིན་གྱིས་དངོས་སུ་འཚོ་བ་བྱུང༌། དེ་སྐབས་བཀའ་བརྒྱུད་ཀྱི་བླ་མའི་གསོལ་འདེབས་སོགས་མགུར་ཆེན་ཉི་ཤུ་རྩ་དགུའི་སྐོར་རྣམས་གསུངས། ལ་སྟོད་བྱང་དུ་འབའ་རོམ་གྱི་དགོན་པ་ཕྱག་བཏབ། རབ་བྱུང་གསུམ་པའི་ལྕགས་སྦྲུལ་ཕྱི་ལོ ༡༡༦༡ ལོར་ནག་ཆུའི་ས་ཆར་རི་བོ་ཆེ་བཏབ། བདེ་སྟོང་ཕྱག་རྒྱ་ཆེན་པོ་དང་གནས་ལུགས་ཕྱག་རྒྱ་ཆེན་པོ་མདོ་སྔགས་ཟུང་འབྲེལ་གྱིས་ཉམས་བཞེས་མཛད་པས་སློབ་མ་མང་དུ་འདུས་པ་དེ་ནས་འབའ་རོམ་བཀའ་བརྒྱུད་ཅེས་པའི་གྲུབ་མཐའ་དར། མཐར་དགུང་ལོ་བདུན་ཅུ་རྩ་གསུམ་པ་རབ་བྱུང་གསུམ་པའི་ས་ལུག་ཕྱི་ལོ་༡ ༡༩༩ ལོའི་ཟླ་བ་གཉིས་པའི་ཚེས་གཉིས་ཀྱི་ནམ་ཕྱེད་ལ་ངོ་མཚར་བའི་ལྟས་དུ་མ་དང་བཅས་ཏེ་ཞི་བར་གཤེགས། འབའ་རོམ་གྱི་གདན་ས་དེ་ཁོང་གི་གདུང་རྒྱུད་རིམ་པས་བསྐྱངས་ཀྱང་མཐར་ཉམས་ཆག་ཐེབས། འདི་ཉིད་ལ་བུ་སློབ་ངོ་མཚར་ཅན་མང་དུ་ཡོད་པའི་ནང་ནས། བུ་ཆེན་བཞི་ནི། རྩེ་བྲོམ་དབང་ཕྱུག་སེང་གེ། བྲག་ཀ་ཇོ་བཙུན། བླ་མ་ཆེན་པོ་ལྷོ་པ། སྟོན་པ་རིན་ཆེན་བླ་མ་བཅས་དང༌། དེ་དང་ཉེ་བ་བཞི་ནི། བྲག་ཀ་ལྷ་སྟོན། སྒོམ་པ་གཞོན་ནུ་བུ་གྲགས། ཁྱི་མཉེས་ཨཱརྱ་དེ་ཝ། ལྷ་རྗེ་བློ་གྲོས། རྒྱུད་པ་འཛིན་པའི་སྲས་ལྔ་ནི། རས་པ་རིན་པོ་ཆེ། བླ་མ་ཉིན་དགོན་པ། བླ་མ་དཔལ་རྒྱལ། སེང་གེ་རྒྱལ་མཚན། དབོན་པོ་ཤེས་རབ་བྱུང་ཆུབ་བཅས་སོ། །