69881

འོག་མིན་མཐར་ཐུག་འགྲོའི་གོང་འཕོ་ (1)

Part of speech	མིང་ཚིག
Definition	འོག་མིན་མཐར་ཐུག་འགྲོའི་གོང་འཕོའི་མཚན་ཉིད་ནི། གཟུགས་སུ་ཉེར་འགྲོའི་གོང་འཕོ་གང་ཞིག བསམ་གཏན་སྤེལ་སྒོམ་ལས་ཉམས་ཏེ་གཟུགས་སུ་སྐྱེ་བ་བརྒྱུད་མར་བླངས་ནས་འོག་མིན་གྱི་རྟེན་ལ་མྱང་འདས་མངོན་དུ་བྱེད་པའི་རིགས་ཅན་ནོ། །དབྱེ་བ་ལ། འཕར་པ་དང་། ཕྱེད་དུ་འཕར་བ་དང་། གནས་ཐམས་ཅད་དུ་འཆི་འཕོ་བ་དང་གསུམ་ལས། མཚན་ཉིད་རིམ་བཞིན་འོག་མིན་མཐར་ཐུག་འགྲོའི་གོང་འཕོ་གང་ཞིག བསམ་གཏན་སྤེལ་སྒོམ་ལས་ཉམས་ཏེ་ཕྱི་མ་ཚངས་རིས་སུ་སྐྱེས་ནས་འཕར་ཐེབས་གཅིག་གིས་འོག་མིན་དུ་སྐྱེས་ནས་མྱང་འདས་མངོན་དུ་བྱེད་པའི་རིགས་ཅན་དང་། དེ་གང་ཞིག བསམ་གཏན་སྤེལ་སྒོམ་ལས་ཉམས་ནས་ཕྱི་མ་ཚངས་རིས་སུ་སྐྱེས་ཏེ། འཕར་ཐེབས་གཉིས་ཀྱིས་འོག་མིན་དུ་སྐྱེས་ནས་མྱང་འདས་མངོན་དུ་བྱེད་པའི་རིགས་ཅན་དང་། དེ་གང་ཞིག བསམ་གཏན་སྤེལ་སྒོམ་ལས་ཉམས་ནས་གཟུགས་ཁམས་གནས་རིས་བཅུ་བདུན་དུ་སྐྱེ་བ་རིམ་གྱིས་བླངས་ནས་འོག་མིན་གྱི་རྟེན་ལ་མྱང་འདས་མངོན་དུ་བྱེད་པའི་རིགས་ཅན་ཏེ། ཕྱི་མ་འདིའི་མཚོན་བྱ་ལ་ཡང་འོག་མིན་མཐར་ཐུག་འགྲོ་སྦྱར་དགོས་སོ། །བྱེ་བྲག་ཏུ་སྨྲ་བས་ནི་ཚངས་ཆེན་མ་གཏོགས་པའི་གནས་བཅུ་དྲུག་ཏུ་སྐྱེ་བ་རིམ་གྱིས་ལེན་པ་ཡིན་ལ། ཚངས་ཆེན་དུ་ནི་འཕགས་པ་མི་སྐྱེ་སྟེ། གཙོ་བོ་གཅིག་ཏུ་ཟད་པའི་ཕྱིར་དང་། ལྟ་བ་ངན་པའི་གནས་ཡིན་པའི་ཕྱིར་ཞེས་འདོད་པ་ལ་ནི། རིན་ཆེན་ཕྲེང་བ་ལས། ས་དགུ་པ་ལ་གནས་པའི་བྱང་སེམས་སྟོང་གཉིས་ཀྱི་བདག་པོ་ཚངས་པ་ཆེན་པོར་སྐྱེ་བ་བླངས་པར་གསུངས་པས་གནོད་དོ་ཞེས་བཞེད་དགོས་པ་འདྲའོ་ཞེས་ཀུན་མཁྱེན་གོ་རམས་པའི་སྐྱེས་བུ་མཆོག་གི་གསལ་བྱེད་ལས་སོ། །
Domain	ཆོས་ལུགས།