71935

ཡེ་ཤེས་ཀྱི་ཚོགས་བཅུ་ (1)

Part of speech	མིང་ཚིག
Definition	ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་སྟེ། ༡ འདི་ལྟར་བསམ་པ་སྒྱུ་མེད་པར་བྱ་བའི་ཕྱིར། ཡང་དག་པའི་དགེ་བའི་བཤེས་གཉེན་མང་དུ་ཐོས་པ་རྣམས་ལ་བསྟེན་པ་དང༌། བཀུར་བ་དང༌། བསྙེན་བཀུར་བྱ་བ་དང༌། རིམ་གྲོར་བྱ་བ་དང༌། བསྟི་སྟང་དུ་བྱ་བ་དང༌། བླ་མར་བྱ་བ་དང༌། གུས་པར་བྱ་བ་དང༌། བཀའ་བློ་བདེ་ཞིང་མཐུན་པར་ལེན་པའི་ཡེ་ཤེས་ཀྱི་ཚོགས། ༢ བདག་སྣོད་དུ་བྱ་བའི་ཕྱིར་ང་རྒྱལ་མེད་ཅིང༌། འདུད་པ་དང༌། ཕྱག་འཚལ་བ་དང༌། རབ་ཏུ་གུས་པ་དང༌། ལུས་དང་སེམས་ལས་སུ་རུང་བ་དང༌། ཁོང་བདེ་བ་དང༌། མི་སླུ་བ་དང༌། མི་རྩུབ་པ་དང༌། དེས་ཤིང་འཇམ་ལ་མཉེན་པ་དང༌། བཞིན་འཛུམ་ཞིང་ཁྲོ་གཉེར་མེད་པ་དང༌། འདོར་ཏེ་གསོང་པོར་སྨྲ་བ་དང༌། རབ་ཏུ་དགའ་བ་དང༌། མི་འཆོས་པ་དང༌། གཡོ་མེད་པ་དང༌། སྒྱུ་མེད་པའི་ཡེ་ཤེས་ཀྱི་ཚོགས། ༣ ཡེ་ཤེས་རྣམ་པ་བཅུ་ལ་རབ་ཏུ་སྦྱར་བའི་ཕྱིར་དྲན་པ་ཤེས་བཞིན་དང༌། རྟོགས་པ་ཁོང་དུ་ཆུད་པ་དང༌། བློ་གྲོས་མི་གཡེང་བ་དང༌། ངོ་ཚ་ཤེས་པ་དང༌། མོས་པ་ལ་རབ་ཏུ་གནས་པ་དང༌། རྗེས་སུ་དྲན་པར་བྱ་བ་དྲུག་དྲན་པ་དང༌། གུས་པ་དྲུག་ཡོངས་སུ་བསྟན་པ་དང༌། སྙིང་པོར་བྱ་བའི་ཆོས་དྲུག་གི་རྗེས་སུ་འབྲང་བའི་ཡེ་ཤེས་ཀྱི་ཚོགས་སོ། །༤ བསམ་པ་དང་ཡིད་ལ་བྱ་བ་གཞན་མེད་པར་བྱ་བའི་ཕྱིར་ཆོས་དོན་དུ་གཉེར་བ་དང༌། ཆོས་འདོད་པ་དང༌། ཆོས་ལ་མོས་ཤིང་དགའ་བ་དང༌། ཆོས་བཙལ་བ་དང༌། ཐོས་པས་མི་ངོམས་པ་དང༌། འཇིག་རྟེན་རྒྱང་འཕེན་པ་དང་མ་འདྲེས་པ་དང༌། འཇིག་རྟེན་པའི་གཏམ་ཐམས་ཅད་སྤོང་བ་དང༌། འཇིག་རྟེན་ལས་འདས་པའི་གཏམ་ལྷུར་ལེན་པ་དང༌། ཐེག་པ་དམའ་བ་སྤོང་ཞིང་བློ་གྲོས་ཡངས་པའི་ཐེག་པ་ཆེན་པོ་ལ་ཡང་དག་པར་གཞོལ་བའི་ཡེ་ཤེས་ཀྱི་ཚོགས། ༥ ནན་ཏན་ལྷུར་བླང་བའི་ཕྱིར་ཕ་རོལ་ཏུ་ཕྱིན་པ་དྲུག་ཡོངས་སུ་བཙལ་བ་ལ་མཐུན་པར་བརྩོན་པ་དང༌། ཚངས་པའི་གནས་བཞི་རབ་ཏུ་སྒྲུབ་པ་དང༌། རིག་པ་དང་མཐུན་པའི་ཆོས་དང་བསྟེན་པ་དང་། མཁས་པའི་སྐྱེ་བོ་ལ་ཡོངས་སུ་འདྲི་བ་དང༌། ལམ་ཉམ་ང་བ་དང་བྲལ་ཞིང་ཡང་དག་པའི་ལམ་ལ་མ་ནོར་བར་གཞོལ་བ་དང༌། བསྐུལ་བ་དང༌། དྲན་པར་བྱ་བ་དང༌། མོས་པར་བྱ་པས་རང་གི་སེམས་འདུལ་བ་དང༌། ཕ་རོལ་ཀྱི་སེམས་རྗེས་སུ་བསྲུང་བའི་ཡེ་ཤེས་ཀྱི་ཚོགས། ༦ བདག་དང་གཞན་གྱི་སེམས་རྣམ་པར་སྦྱང་བའི་ཕྱིར་རྟག་ཏུ་རྒྱུན་མི་འཆད་པར་འབྱུང་བའི་སེམས་དང༌། ཁམས་གསུམ་པས་དབེན་པར་དགའ་ཞིང་རང་གི་སེམས་རྟོགས་པར་བྱེད་པ་དང༌། མི་དགེ་བའི་སེམས་ཀྱི་སྐབས་མི་འབྱེད་ཅིང༌། རྣམ་པར་རྟོག་པ་གསུམ་བསལ་བས་ལུས་དང༌། ངག་དང༌། སེམས་ལས་སུ་རུང་བ་དང༌། སེམས་ཀྱི་རང་བཞིན་གཅིག་ཏུ་ངེས་པ་རབ་ཏུ་རྟོགས་པར་བྱེད་པའི་ཡེ་ཤེས་ཀྱི་ཚོགས། ༧ གཞན་ཡང་ཕུང་པོ་རྣམས་ལ་སྒྱུ་མ་ལྟ་བུར་རྟོག་པ་དང༌། ཁམས་རྣམས་ལ་སྤྲུལ་པ་ལྟ་བུའི་འདུ་ཤེས་སུ་རྟོག་པ་དང༌། ཆོས་ཐམས་ཅད་སྒྱུ་མ་དང༌། སྨིག་རྒྱུ་བ་དང༌། ཆུའི་ཟླ་བ་དང༌། རྨི་ལམ་དང༌། མིག་ཡོར་དང༌། སྒྲ་བརྙན་དང༌། གཟུགས་བརྙན་དང༌། མིག་ཡོར་དང་འདྲ་ཞིང༌། ནམ་མཁའི་རི་མེ་དང་མཉམ་པ་དང༌། མགལ་མེ་བསྐོར་བ་ལྟ་བུ་སྟེ། འཇའ་ཚོན་དང་འདྲ་བ་ཉི་མ་དང་ཟླ་བའི་འོད་ལྟ་བུ་སྟེ། ཆོས་ཐམས་ཅད་ནི་གཟུང་དུ་མེད་པ། མཚན་མ་མེད་པ། རྟག་པ་མེད་པ། ཆད་པ་མེད་པ། སོང་བ་མེད་པ། འོངས་པ་མེད་པ་སྟེ། ཆོས་ཐམས་ཅད་མི་གནས་པར་རབ་ཏུ་རྟོག་ཅིང་འཇུག་པ་དང༌། མོས་པ་དང་ཡིད་ཆེས་པ་འདི་ནི་སྐྱེ་བ་དང་འཇིག་པ་ལ་མི་གནས་པ་ཞེས་བྱ་བ་ཡེ་ཤེས་ཀྱི་ཚོགས་བདུན་པ་སྟེ། ཆོས་ཐམས་ཅད་ཁོང་དུ་ཆུད་པ་དག་པའི་རྒྱུར་འགྱུར་བའོ། །༨ ཆོས་ཐམས་ཅད་བདག་མེད་པ་དང༌། སེམས་ཅན་མེད་པ་དང༌། སྲོག་མེད་པ་དང༌། གང་ཟག་མེད་པ་དང༌། སེམས་མེད་པ་དང༌། དོན་མེད་པ་དང༌། འདོད་ཆགས་མེད་པ་དང༌། ཞེ་སྡང་མེད་པ་དང༌། གཏི་མུག་མེད་པ་དང༌། ཉོན་མོངས་པ་མེད་པ་དང༌། ལུས་མེད་པ་དང༌། རྫས་མེད་པ་དང༌། ལྟ་བ་མེད་པ་དང༌། དྲི་མ་མེད་པ་དང༌། རྗེ་བ་མེད་པ་དང༌། གོས་པ་མེད་པ་དང༌། རྒྱུ་བ་མེད་པ་དང༌། ཟང་ཟིང་མེད་པ་དང༌། མྱ་ངན་ལས་འདས་པའི་རྒྱུད་དུ་ཡང་དག་པར་གཞོལ་བ་ཐོས་ན་མོས་ཤིང་ཡིད་ཆེས་ལ། ཡིད་གཉིས་མེད་ཅིང་ཐེ་ཚོམ་མི་ཟ་བ་འདི་ནི་ཡེ་ཤེས་ཀྱི་ཚོགས་བརྒྱད་པ་སྟེ། མོས་པ་ཡོངས་སུ་རྫོགས་པར་འགྱུར་བའོ། །༩ གཞན་ཡང་བྱང་ཆུབ་སེམས་དཔའ་ཚུལ་བཞིན་གྱི་སྦྱོར་བས་ཡང་དག་པར་བྲལ་བར་བྱས་པས། དབང་པོ་བསྡམས་པ་ལྷག་མཐོང་དང༌། ཞི་གནས་ཀྱིས་ཞི་བ་དང༌། ཉེ་བར་ཞི་བ་དང༌། རབ་ཏུ་ཞི་བར་གྱུར་པ། ཡིད་ལ་བྱ་བ་ཐམས་ཅད་ཀྱིས་མ་བྱས། མ་བསྐྱེད། མངོན་པར་མ་བྱས་པའི་ངང་ཚུལ་ཅན་བདག་མེད་པ་དང༌། སེམས་ཅན་མེད་པ་དང༌། བདག་གི་འདུ་ཤེས་རྣམ་པར་རྒྱུ་བ་ནན་ཏན་དུ་བྱེད་པ་མེད་པའི་བློ་དང་ལྡན་པ། ཟད་པ་མེད་ཅིང་ཚད་མེད་ལ། མི་དམིགས་པའི་བཟོད་པ་ཅན། ལུས་དང༌། ངག་དང༌། སེམས་བླང་བ་མེད་པ་དང༌། དོར་བ་མེད་པས་སྔོན་དུ་འགྲོ་བའི་བརྩོན་འགྲུས་དང་ལྡན་པ། སེམས་ཅན་ཐམས་ཅད་དང༌། ཆོས་ཐམས་ཅད་ལ་མི་གནས་པར་བསམ་གཏན་འཆའ་བ། ཚུ་རོལ་མེད་པ། ཕ་རོལ་མེད་པ། ཚུ་རོལ་དང་ཕ་རོལ་དང་བྲལ་བ། རྒྱུ་བ་མེད་པ། རྒྱུ་བ་དང་བྲལ་བའི་ཤེས་རབ་ཀྱིས་དེ་ལྟར་ངེས་པར་རྟོག་པ་འདི་ནི་ཡེ་ཤེས་ཀྱི་ཚོགས་དགུ་པ་སྟེ། མཚན་མ་དང་ཡོངས་སུ་རྟོག་པ་ཐམས་ཅད་ཀྱི་ཕ་རོལ་ཏུ་ཕྱིན་པར་འགྱུར་བའོ། །༡༠ རྟེན་ཅིང་འབྲེལ་བར་འབྱུང་བ་མཐོང་བས་ནི། ཆོས་མཐོང་བ་ཤིན་ཏུ་རྣམ་པར་དག་པར་འགྱུར། ཆོས་མཐོང་བ་ནི་ཞིང་མཐོང་བ་ཤིན་ཏུ་རྣམ་པར་དག་པར་འགྱུར། ཞིང་མཐོང་བས་ནི་ནམ་མཁའ་མཐོང་བ་ཤིན་ཏུ་རྣམ་པར་དག་པར་འགྱུར། ནམ་མཁའ་མཐོང་བས་ནི་ཆོས་ཀྱི་དབྱིངས་མཐོང་བ་ཤིན་ཏུ་རྣམ་པར་དག་པར་འགྱུར། ཆོས་ཀྱི་དབྱིངས་མཐོང་བས་ནི་ཡེ་ཤེས་མཐོང་བ་ཤིན་ཏུ་རྣམ་པར་དག་པར་འགྱུར་བ་འདི་ནི་ཡེ་ཤེས་ཀྱི་ཚོགས་བཅུ་བ་སྟེ། ཐམས་ཅད་མཁྱེན་པའི་ཡེ་ཤེས་ཡང་དག་པར་སྒྲུབ་བའི་རྒྱུར་འགྱུར་བའོ། །
Domain	ཆོས་ལུགས།

{{#arraymap:ཡེ་ཤེས་ཀྱི་ཚོགས་བཅུ་

|; |@@@ | | }}