74521

རིགས་ནས་རིགས་སྐྱེ་ (1)

Part of speech	མིང་ཚིག
Definition	མཚན་ཉིད། འདོད་ཉོན་གསུམ་པ་སྤངས་པའི་གཉེན་པོ་ཟག་མེད་ཀྱི་དབང་པོ་དང། བཞི་པ་སྤངས་པའི་གཉེན་པོ་ཟག་མེད་ཀྱི་དབང་པོ་གང་རུང་ཐོབ་པའི་མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་གང་ཞིག འདོད་པར་རིས་མཐུན་གྱི་སྐྱེ་སྲིད་གཉིས་སམ་གསུམ་བླངས་ནས་མྱང་འདས་མངོན་དུ་བྱེད་པའོ། །དབྱེ་ན་ལྷའི་རིགས་ནས་རིགས་སྐྱེ། མིའི་རིགས་ནས་རིགས་སྐྱེ་གཉིས་སོ། །སྤངས་བའི་ཁྱད་པར། མཛོད་རྩ་འགྲེལ་ལས་བྱུང་བ་བཞིན་འདོད་པའི་སྒོམ་སྤངས་གསུམ་པ་སྤངས་པ་གཅིག་དགོས་ཏེ། དེ་མ་སྤངས་ན་སྐྱེ་སྲིད་བཞི་ལེན་སྲིད་པས་སྐྱེ་བའི་ཁྱད་པར་མི་གྲུབ་པའི་ཕྱིར་རོ། །བཞི་པ་སྤངས་མ་སྤངས་ཅི་རིགས་སུ་ཡོད་ཅིང། ལྔ་པ་སྔར་མ་སྤངས་ཤིང་ཚེ་དེ་ཉིད་ལ་ཡང་མི་སྤོང་བ་གཅིག་དགོས་ཏེ། ལྔ་པ་སྤངས་ན་དྲུག་པ་ཡང་ཚེ་དེ་ཉིད་ལ་སྤོང་པས་ཕྱིར་འོང་དུ་འགྱུར་བའི་ཕྱིར་ཏེ། འདོད་ཉོན་དྲུག་པ་སྤངས་ན་དགེ་སྦྱོང་ཚུལ་གྱི་འབྲས་བུ་གསར་ཐོབ་ཡོད་པར་ཤེས་ནས་སྤྲོ་བས་འཇུག་པར་འགྱུར་བ་གང་ཞིག འདོད་པའི་ཉོན་མོངས་པའི་རྣམ་པ་གཅིག་གིས་ཚེ་དེ་ཉིད་ལ་ཕྱིར་འོང་གི་འབྲས་བུ་ཐོབ་པའི་གེགས་བྱེད་མི་ནུས་པའི་ཕྱིར་ཏེ། ཕྱིར་འོང་གི་འབྲས་བུ་ཐོབ་པ་ལ་ཁམས་ལས་འདའ་མི་དགོས་པའི་ཕྱིར། ཕྱིར་མི་འོང་གི་འབྲས་བུ་ལ་ནི་མི་མཚུངས་ཏེ། འདི་ལ་ཁམས་ལས་འདའ་དགོས་པས་འདོད་པའི་ཉོན་མོངས་པའི་རྣམ་པ་གཅིག་གིས་ཀྱང་ཚེ་དེ་ཉིད་ལ་ཕྱིར་མི་འོང་གི་འབྲས་བུ་ཐོབ་པའི་གེགས་བྱེད་ནུས་པའི་ཕྱིར་རོ། །སྐྱེ་བ་ལེན་ཚུལ་ནི། འདོད་ཉོན་གསུམ་པ་སྤངས། བཞི་པ་མ་སྤངས་པས་དེས་འདོད་ཁམས་སུ་རིས་མཐུན་གྱི་སྐྱེ་སྲིད་གསུམ་ལེན་པར་བྱེད་དེ། བཞི་པའི་དབང་གིས་གཅིག ལྔ་པ་དྲུག་པ་བདུན་པ་གསུམ་གྱི་དབང་གིས་གཅིག བརྒྱད་པ་དགུ་པ་གཉིས་ཀྱིས་གཅིག་ལེན་པར་བྱེད་པའི་ཕྱིར་རོ། །འོ་ན་ཐ་མ་གཉིས་པོ་རེ་རེས་ཀྱང་སྐྱེ་སྲིད་རེ་རེ་ལེན་པར་འགྱུར་ཏེ། བརྒྱད་པ་སྤངས་ནས་དགུ་པ་སྤངས་པའི་བར་དུ་འཆི་འཕོ་བ་ཡོད་པའི་ཕྱིར་ཞེ་ན། སྐྱོན་མེད་དེ། དེའི་ཚེ་ཕྱིར་འོང་གི་འབྲས་བུ་ཐོབ་པའིལུས་རྟེན་ལ་བརྒྱད་པ་ངེས་པར་སྤངས་པ་གཅིག་དགོས་པས་ལྔ་པ། དྲུག་པ། བདུན་པ། བརྒྱད་པ། བཞི་ཆར་གྱིས་སྐྱེ་བ་གཅིག་ལེན་པར་སོང་བའི་ཕྱིར་རོ། །འདོད་ཉོན་བཞི་པ་སྤངས་པའི་རིགས་ནས་རིགས་སྐྱེ་དེས་འདོད་པར་སྐྱེ་བ་གཉིས་ལེན་ཏེ། ལྔ་པ་དྲུག་པ་བདུན་པ་རྣམས་ཀྱིས་སྐྱེ་བ་གཅིག། ཐ་མ་གཉིས་ཀྱིས་སྐྱེ་བ་གཅིག་ལེན་པའམ་ཡང་ན་བརྒྱད་པ་ཡན་ཆད་ཀྱི་སྐྱེ་བ་གཅིག་བླངས་ནས་དགུ་པས་སྐྱེ་བ་གཅིག་ལེན་པའི་ཕྱིར་རོ་ཞེས་ཀུན་མཁྱེན་གོ་རམས་པའི་སྐྱེས་བུ་མཆོག་གི་གསལ་བྱེད་ལས་སོ། ། རྒྱུན་ཞུགས་དེ་ཉིད་ཀྱི་སྒོམ་ལམ་ཟག་མེད་ཀྱིས་འདོད་པའི་སྒོམ་སྤང་གསུམ་མམ་བཞི་ལས་གྲོལ་ཞིང་དེའི་གཉེན་པོ་ཟག་མེད་དབང་པོ་གསུམ་མམ་བཞི་ཐོབ་ལ། འདོད་པའི་ཚེ་རིགས་མཐུན་གཉིས་སམ་གསུམ་ལེན་པར་བྱེད་ཅིང་བཞི་བ་མི་ལེན་པ་ནི་རིགས་ནས་རིགས་སྐྱེའོ། །དེ་ལ་ལྷའི་རིགས་ནས་རིགས་སྐྱེ་ནི་འདོད་ལྷའི་རྟེན་ལ་བདེན་པ་མཐོང་བས་འདོད་ལྷར་ལན་གཉིས་སམ་གསུམ་སྐྱེས་ནས་མྱ་ངན་ལས་འདའ་བའོ། །མིའི་རིགས་ནས་རིགས་སྐྱེ་ནི་མིའི་རྟེན་ལ་བདེན་པ་མཐོང་བ་མིར་ལན་གཉིས་སམ་གསུམ་སྐྱེས་ནས་མྱ་ངན་ལས་འདའ་བའོ་ཞེས་ཀུན་མཁྱེན་རོང་སྟོན་གྱི་མངོན་མཛོད་རྣམ་བཤད་ཤེས་བྱ་རབ་གསལ་ལས་སོ། །
Domain	ཆོས་ལུགས།