74545

རིགས་པའི་དགག་བྱ་ (1)

Part of speech	མིང་ཚིག
Definition	མདོ། དབུ་མ། ལུང་རིགས་ཀྱི་དགག་བྱ་ནི་ཡུལ་དང་ཡུལ་ཅན་གཉིས་ལས། དང་པོ་ལ་ཡང་ཀུན་བཏགས་ཀྱི་མ་རིག་པས་བཏགས་པ་དང། ལྷན་སྐྱེས་ཀྱི་མ་རིག་པས་བཏགས་པ་གཉིས་ལས། དང་པོ་ནི་དངོས་པོར་སྨྲ་བ་དག་གིས་ལུང་རིགས་ལྟར་སྣང་གི་འཐད་པ་ལ་བརྟེན་ནས་རྟོག་པས་སྦྱར་བ་དག་སྟེ། འདི་ལ་ཡོད་པ་སྒྲོ་འདོགས་ཀྱི་མཐའ་དང། མེད་པར་སྐུར་འདེབས་ཀྱི་མཐའ་གཉིས། དང་པོ་ལ། གང་ཟག་གི་བདག་དང་ཆོས་ཀྱི་བདག་གཉིས། དང་པོ་ནི། ཕྱི་རོལ་པས་བཏགས་པའི་ཕུང་པོ་ལས་དོན་གཞན་པའི་གང་ཟག་དང། རང་སྡེ་མང་པོས་བཀུར་བས་བཏགས་པའི་ཕུང་པོ་དང་ངོ་བོ་གཅིག་པའི་གང་ཟག་དང་བརྗོད་དུ་མེད་པའི་གང་ཟག་རྣམས་སོ། །གཉིས་པ་ནི། ཕྱི་རོལ་མུ་སྟེགས་བྱེད་ནས་སེམས་ཙམ་པའི་བར་གྱིས་གཟུགས་སོགས་ཀྱི་དངོས་པོ་བདེན་གྲུབ་ཏུ་བཏགས་པ་རྣམས་སོ། །གཉིས་པ་ནི། མུ་སྟེགས་རྒྱང་འཕེན་པས། རྒྱུ་ལས་དགེ་སྡིག་དང། འབྲས་བུ་ཚེ་ཕྱི་མའི་བདེ་སྡུག་སོགས་མེད་པར་བཏགས་པ་རྣམས་སོ། །གཉིས་པ་ལྷན་སྐྱེས་ཀྱི་མ་རིག་པས་བཏགས་པ་ནི་གྲུབ་མཐའ་ལ་ཞུགས་མ་ཞུགས་ཐམས་ཅད་ལ་ཐུན་མོང་དུ་ཡོད་པའི་གང་ཟག་ཏུ་འཛིན་པ་དང། ཆོས་སུ་འཛིན་པ་གཉིས་ཀྱི་དམིགས་ཡུལ་གང་ཟག་དང། ཆོས་སུ་འཇོག་ལ། འཛིན་སྟངས་ཀྱི་གཟུང་བྱ་བདེན་པ་ནི་གང་ཟག་གི་བདག་དང། ཆོས་ཀྱི་བདག་ཏུ་འཇོག་པའོ། །གཉིས་པ་ཡུལ་ཅན་ནི། ཡུལ་དེ་དང་དེར་རྟོག་པའི་བློ་དང་ལྟ་བ་ངན་པ་ཐམས་ཅད་ཡིན་ནོ། །འཇུག་པ་ལས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་མཐའ་དག་གཅོད་པར་བྱེད། །ཅེས་པར་ལྟར་རོ། །ཞེས་ཀུན་མཁྱེན་གོ་རམས་པའི་འཇུག་པའི་དཀའ་འགྲེལ་ལས་གསུངས་སོ། ། སྤྱི་དགག་བྱའི་ཆོས་ངོས་འཛིན་པ་ནི། ཉེར་ལེན་གྱི་ཕུང་པོ་གང་ཟག་གི་བདག་མེད་དུ་སྒྲུབ་པའི་དགག་བྱའི་ཆོས་ནི། གང་ཟག་གི་བདག་གོ ། མྱུ་གུ་བདེན་མེད་དང་རང་བཞིན་སྐྱེ་མེད་དུ་སྒྲུབ་པའི་དགག་བྱའི་ཆོས་ནི། བདེན་པར་གྲུབ་པ་དང་། རང་བཞིན་གྱིས་སྐྱེ་བའོ། །དེ་དང་དེའི་གོ་དོན་ནི་འདི་ལྟར། བདག་དང་བདེན་པ་ཞེས་བྱ་བ་ནི་རྟོག་པས་བཏགས་པ་ཡིན་ལ། འདོགས་བྱེད་ཀྱི་རྟོག་པ་ལ་གཉིས་ཏེ། ལྷན་སྐྱེས་པའི་རྟོག་པ་དང་། གྲུབ་མཐའ་ངན་པས་ཀུན་ནས་བསླང་བའི་རྟོག་པའོ། །རྟོག་པ་དང་པོས་ནི། ཉེར་ལེན་གྱི་ཕུང་པོའི་སྟེང་དུ་ངའོ་ཞེས་དང་། མྱུ་གུའི་ཡན་ལག་རྡུལ་རྫས་བརྒྱད་པོའི་སྟེང་དུ། མྱུ་གུའོ་ཞེས་ཡན་ལག་ཅན་དུ་སྒྲོ་འདོགས་པར་བྱེད་ལ། རྟོག་པ་གཉིས་པས་ནི། ཕུང་པོའི་སྟེང་དུ་རྟག་ཅིག་རང་དབང་ཅན་གྱི་བདག་དང་། མྱུ་གུའི་སྟེང་དུ་བདེན་པའི་གཅིག་དང་དུ་མ་གང་རུང་དང་། ཡང་མྱུ་གུའི་སྟེང་དུ་མཐའ་བཞི་པོ་གང་རུང་ལས་སྐྱེ་བ་ལ་སོགས་པར་སྒྲོ་འདོགས་པར་བྱེད་དོ། །ཞེས་པཎ་ཆེན་ཤཱཀ་མཆོག་གི་དབུ་མ་རྣམ་ངེས་ལེའུ་བརྒྱད་པ་ལས་གསུངས་སོ། །
Domain	[ཆོས་ལུགས།, ལྟ་གྲུབ།]