82804

རྫོགས་པ་ཆེན་པོའི་ཕ་རོལ་ཏུ་ཕྱིན་པ་བཅུ་ (1)

Part of speech	མིང་ཚིག
Definition	སྔགས། རྫོགས་ཆེན། རྙིང་མ། ཉི་ཟླ་འབར་བའི་སྒྲོན་མ་ལས། ད་རྫོགས་པ་ཆེན་པོའི་ཕ་རོལ་ཏུ་ཕྱིན་པ་སྟོན་ཏེ། ཕ་རོལ་ཕྱིན་པ་བཅུ་ལ་གནས། །ཞེས་པ། དང་པོ་ཁོ་ནར་ལུས་ངག་ཡིད་གསུམ་གྱི་བྱ་བ་བཏང་ནས་ཟབ་མོའི་ཆོས་ལ་བརྩོན་པ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དེ་ནས་ཡུལ་རྫས་དང་འཁོར་དང་ལོངས་སྤྱོད་ལ་མ་ཆགས་པས་སྦྱིན་པའི་ཕ་རོལ་ཏུ་ཕྱིན་པའོ། །བསམ་མེད་རྟོག་མེད་གཡོ་འགུལ་མེད་པས་བསམ་གཏན་གྱི་ཕ་རོལ་ཏུ་ཕྱིན་པའོ། །བག་ཆགས་དང་ཉོན་མོངས་པའི་དྲི་མ་ཀ་ནས་དག་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ཐབས་ཀྱི་རྒྱལ་པོ་བྱར་མེད་པས་ཐབས་ཀྱི་ཕ་རོལ་ཏུ་ཕྱིན་པའོ། །སྨོན་པའི་སངས་རྒྱས་རང་ལས་རྙེད་པས་སྨོན་ལམ་གྱི་ཕ་རོལ་ཏུ་ཕྱིན་པའོ། །ཟབ་མོ་དངོས་མེད་ཀྱི་དོན་ལ་བཟོད་ཚུགས་པས་ན་བཟོད་པའི་ཕ་རོལ་ཏུ་ཕྱིན་པའོ། །སྟོང་པ་ཀུན་འབྱུང་གཉིས་མེད་ཟང་ཐལ་དུ་རྟོགས་པས་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །སྐྱེ་མེད་ཀློང་དུ་མངོན་སུམ་དུ་སངས་རྒྱས་པ་ནི་སྟོབས་ཀྱི་ཕ་རོལ་ཏུ་ཕྱིན་པའོ། །ཆོས་དེ་དག་ཐམས་ཅད་ལ་རང་བྱུང་ངང་འདས། རིག་པ་ཐོལ་བྱུང་འབྱུང་སར་ཐིམ། སྣང་བ་རང་གྲོལ་ཞེན་པ་མེད། སེམས་ཅན་ཐམས་ཅད་ཡེ་སངས་རྒྱས་པར་རྟོགས་ན་འཁྲུལ་པ་དང་ནོར་བའི་ས་མེད་པས། ཤེས་རབ་རྒྱལ་པོ་འབྱེད་པ་མེད་པར་རྟོགས་པས་ན་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་དང་། ཕ་རོལ་ཏུ་ཕྱིན་པ་བཅུ་པོ་དེ་མ་བསྒྲུབས་པར་ཡེ་ནས་གྲུབ་པའོ། །སྦྱིན་པ་མ་བཏང་རང་གྲོལ་ལོ། །བརྩོན་འགྲུས་མ་བྱས་བྱ་རྩོལ་དག ། བསམ་གཏན་མ་བསྒོམས་འཛིན་རྟོག་གྲོལ། །ཚུལ་ཁྲིམས་མ་བསྲུངས་སྒྲིབ་གཉིས་དག ། སྨོན་ལམ་མ་བཏབ་རང་ལ་གྲུབ། །བཟོད་པ་མ་བསྒོམས་རང་རྒྱུད་ཐུལ། །ཐབས་ཀྱི་རྒྱལ་པོ་བྱར་མེད་ངང་ལ་གནས། །ཡེ་ཤེས་རྒྱལ་པོ་སྐྱེ་མེད་ཀ་དག་ཤེས། །ཤེས་རབ་རྒྱལ་པོ་འབྱེད་པ་མེད་པས་འཛིན། །གནས་ལུགས་དེ་ལ་གནོད་བྱེད་བདུད་མེད་པས། །རང་ས་བཅུ་རུ་ཡོངས་སུ་ཡེ་དག་གོ ། ཞེས་གསུངས་སོ། །
Domain	[ཆོས་ལུགས།, ལྟ་གྲུབ།]