83969

ལམ་ཤེས་ཀྱི་ཁྱབ་པའི་ཡན་ལག་ (1)

Part of speech	མིང་ཚིག
Definition	མདོ། ཕར་ཕྱིན། ཁམས་གསུམ་ལ་འདོད་ཆགས་དང་བྲལ་བ་དང་། གཅིག་ཤོས་མ་བྲལ་བའི་རྣལ་འབྱོར་པས་ཀྱང་མཐར་ཐུག་སངས་རྒྱས་ཉིད་ཐོབ་པར་བྱ་བའི་ཕྱིར་དུ་རྒྱུ་ལམ་ཤེས་པ་ཉིད་བསྒོམ་པས་ཁྱབ་པ་ཡིན་ཏེ། སྐྱེ་བོ་ཐམས་ཅད་མཐར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་མཐར་ཐུག་པར་འགྲོ་བ་ཅན་ཡིན་པའི་ཕྱིར། གཅིག་ཤོས་ཀྱི་སྒྲས་བྱང་སེམས་འཛིན་པ་མ་ཡིན་ཏེ། གོང་དུ་བྱང་སེམས་ཁོ་ནའི་རྟེན་ཅན་དུ་བསྟན་ཟིན་པས་བྱང་སེམས་ལ་སྐྱེ་མི་སྐྱེའི་དོགས་པ་བཅད་མི་དགོས་པའི་ཕྱིར་རོ། །ཞེས་ཀུན་མཁྱེན་རོང་སྟོན་ཆེན་པོའི་རྣམ་བཤད་ཚིག་དོན་རབ་གསལ་ལས་སོ། ། ཀུན་མཁྱེན་གོ་རམས་པས། འཇིག་རྟེན་པའི་ལམ་གྱིས་ཅི་ཡང་མེད་མན་ཆད་ལ་ཆགས་བྲལ་བྱས་པ་དང། ཉན་རང་དགྲ་བཅོམ་པའི་རྒྱུད་ལ་ལམ་ཤེས་གཏན་མི་སྐྱེའམ་སྙམ་ན་ཁྱབ་པ་དང་ཞེས་པས་དེ་གཉིས་ལ་ཡང་ལམ་ཤེས་སྐྱེ་བ་བསྟན་ཏེ། མཐར་ཐུག་ཐེག་པ་གཅིག་ཏུ་ངེས་པས་དེ་དག་གིས་ཀྱང་སྐབས་དང་པོར་བསྟན་པའི་རྣམ་མཁྱེན་དེ་ཐོབ་པར་བྱ་བའི་ཕྱིར་དུ་ལམ་ཤེས་བསྒོམ་དགོས་པའི་ཕྱིར་ཞེས་སྟོན། དེས་ན་ཁྱབ་པའི་དོན་ནི་རང་བཞིན་གནས་རིགས་ཀྱིས་ཁྱབ་པ་ལ་འཆད་པ་ནི་འཕགས་སེང་གཉིས་ཀྱི་གཞུང་དང་འགལ་ཞིང་། རྒྱུ་ལ་གསུམ་དུ་བྱས་ནས་ཉེར་ལེན་གྱི་རྒྱུ་ལ་འཆད་པ་ཡང་དེ་དང་དོན་གཅིག་པས་མི་འཐད་དེ། ཡན་ལག་སྔ་མ་གཉིས་ཀྱི་རྟེན་གྱི་གང་ཟག་དང། འདིའི་རྟེན་གྱི་གང་ཟག་རྟེན་མི་གཅིག་པའི་ཕྱིར་རོ། །དེས་ན་སྔ་མ་གཉིས་ཀྱིས་དངོས་སུ་སྐྱེ་བའི་རྒྱུ་ཚོགས་བཤད་ནས་འདིས་ནི་དེ་དག་ལ་དོགས་པ་བཅད་པའི་སྒོ་ནས་དངོས་སུ་མི་སྐྱེ་བ་རྣམས་ལ་ཡང་བརྒྱུད་ནས་སྐྱེ་བའི་ཚུལ་སྟོན་པ་ཡིན་པས་ཤེས་ལྡན་དག་དཔྱོད་མཛོད་ཅིག ། ཞེས་སྦས་དོན་ཟབ་མོ་ལས་གསུངས་སོ། ། པཎ་ཆེན་ཤཱཀ་མཆོག་གིས། མཚན་ཉིད་ནི། ཉེར་ལེན་གྱི་རྒྱུ་རིགས་ཀྱིས་ཁྱབ་པ་དེའོ། །ཞེས་རྒྱན་འགྲེལ་ལུང་དོན་རྒྱ་མཚོ་ལས་གསུངས་སོ། །
Domain	ཆོས་ལུགས།