85998

ལྕ་རྒོད་ (1)

Part of speech

མིང་ཚིག

Definition

ལོ་རེ་བཞིན་སྐྱེ་བའི་རི་སྐྱེས་ལྕ་བའི་རིགས་ཤིག་སྟེ། རྩ་བ་ཆུང་ཞིང་སྦོམ་ལ་རིང་ཐུང་མཐོ་གང་ཙམ་པའི་ཕྱི་ལྤགས་རྫ་མདོག་ཅན་དང༌། ནང་སྐྱ་ལ་སོབ་ཅིང་དྲི་ཞིམ་པ། སྡོང་པོ་ཕྲ་ཞིང་འདྲོང་བའི་སྟོད་དུ་ཡལ་ག་གྱེས་ཤིང༌། ཡལ་སྡོང་གཉིས་ཀ་ཁོག་སྟོང་ཡིན་པ། ལོ་མ་སྔོ་ལྗང་རྒྱབ་ཅུང་སྐྱ་ལ་ངར་པ་རིང་ཞིང་སྨད་ཞེང་ཆེ་བ་དང༌། སྐྱེ་རིམ་གསུམ་གྱི་སྒྲོ་དབྱིབས་མང་ལོ་ཡིན་ཞིང༌། སྡོང་པོའི་ལོགས་སུ་སྐྱེས་པའི་ལོ་མའི་ངར་པ་ཐུང་ལ། རྟིང་པས་སྡོང་པོ་བཏུམ་པའི་ཚུལ་གྱིས་རེ་མོས་སུ་སྐྱེ་བ་དང༌། མེ་ཏོག་དཀར་ཆུང་འདབ་མ་ལྔ་ལྡན་གདུགས་དབྱིབས་ཅན་སྡོང་པོ་དང་ཡལ་གའི་རྩེར་འཆར་བ། འབྲུ་གུ་སེར་ནག་འཇོང་བར་རི་མོ་དོད་པའི་དཀྱིལ་འབུར་ལ་མཐའ་སྲབ་ཅན་མགོ་སྦྲེལ་དུ་སྐྱེས་པ་སྟེ། བོད་ཡུལ་གྱི་ནགས་གསེབ་དང༌། རི་ལྡེབས། གླིང་ག ཞིང་མུ། ལམ་ཟུར་སོགས་སུ་སྐྱེ་བ་མང༌། བོད་ཟླ་བརྒྱད་པའི་ནང་རྩ་བ་བཏུས་ཏེ་ས་དྲེག་མེད་པར་གཙང་མར་བཟོས་ནས་སྐམ་པའི་རྗེས་སྨན་དུ་སྤྱོད་རྒྱུ། རོ་མངར་ལ་ཁ་བ། ཞུ་རྗེས་མངར་བ། ནུས་པ་འཇམ་ཞིང་དྲོ་བས་མཁལ་སྐེད་སོགས་སྨད་ཀྱི་དྲོད་ཉམས་པ་དང༌། ལུས་ཀྱི་ཟུངས་སྟོབས་ཤོར་བ། རུས་ཚིགས་དང་ལུས་ལ་ཆུ་སེར་རྒྱས་པ། ཕོ་བའི་ནད། སྐྱ་རྦབ། གྲང་བའི་ནད་རིགས་སོགས་ལ་ཕན་པ་ཡིན།