89869

ཤེས་བྱ་ཉན་ཐོས་ཀྱི་ལམ་ (1)

Part of speech	མིང་ཚིག
Definition	མདོ། ཕར་ཕྱིན། གང་ཟག་གི་བདག་མེད་རྟོགས་པའི་རྟོགས་རིགས་སྟེ། ཉན་ཐོས་ཀྱི་རིགས་ཅན་རྗེས་སུ་བཟུང་བའི་དོན་དུ་དེའི་ལམ་ལ་མཁས་པར་བྱ་དགོས་པས་སོ། །དེ་ལ་བྱང་སེམས་ཀྱི་རྒྱུད་ལ་བསྐྱེད་པ་དང་། ཉན་རང་གི་རྒྱུད་ལ་ཡོད་པ་གཉིས་ལས། སྔ་མ་ནི་རྒྱུད་ལ་བསྐྱེད་ནས་ཤེས་བྱ་དང་། ཕྱི་མ་ནི་རྟོགས་པའི་ཆོས་ཀྱི་སྤྱན་ལ་སོགས་པས་གཞན་རིག་གིས་རྟོགས་པར་བྱའོ། །ངོ་བོ་མཐོང་སྒོམ་གཉིས་ལས། མཐོང་ལམ་གྱི་རྟོགས་རིགས་ཡིན་གྱི་སྒོམ་ལམ་མ་ཡིན་པར་སྡུད་འགྲེལ་ལས་བཤད་དེ། གཞན་གྱི་དོན་དུ་ཤེས་པར་བྱ་བ་ཙམ་ཡིན་གྱི་སྒོམ་པས་མངོན་དུ་བྱ་བ་ནི་མ་ཡིན་ནོ་སྙམ་དུ་དགོངས་ཏེ། འཕགས་སེང་གཉིས་ཀས་གཞི་ཤེས་ཀྱི་སྐབས་སུ་སྒོམ་ལམ་མི་སྟོན་པའི་རྒྱུ་མཚན་དང་འགྲིག་གོ ། ཞེས་ཀུན་མཁྱེན་རོང་སྟོན་གྱི་རྣམ་བཤད་ཚིག་དོན་རབ་གསལ་ལས་སོ། ། ཀུན་མཁྱེན་གོ་རམས་པས། ཤེས་བྱ་ཉན་ཐོས་ཀྱི་ལམ་འདི་ལ་རང་རྒྱུད་ལ་ཉམས་སུ་མྱོང་བའི་སྒོ་ནས་ཤེས་པར་བྱ་བ་དང། གཞན་རྒྱུད་ལ་ཡོད་པ་གཞན་རིག་གི་ཚུལ་གྱིས་ཤེས་པར་བྱ་བ་གཉིས་ལས། དང་པོ་ནི། ལམ་ཐམས་ཅད་བསྐྱེད་པར་བྱ་ཞིང་ཞེས་པའི་སྐབས་ཀྱི་བསྐྱེད་བྱའི་ཉན་ཐོས་ཀྱི་ལམ་དང། ཞེས་དང། སློབ་མ་བསེ་རུ་ལམ་གང་དང་། །ཞེས་པའི་སྐབས་ཀྱི་ལམ་དང་། འདིར་ཡང་། འཕགས་པའི་བདེན་པ་བཞི་དག་གི ། རྣམ་པ་ཞེས་དང་། ཉན་ཐོས་ལམ་འདི་ཞེས་པའི་སྐབས་ཀྱི་དངོས་བསྟན་གྱི་ལམ་རྣམས་སོ། །གཉིས་པ། བྱང་འཕགས་རྒྱུད་ཀྱི་ཆོས་ཀྱི་སྤྱན་དང། གཞན་སེམས་ཤེས་པའི་མངོན་ཤེས་ཀྱིས་ཉན་ཐོས་རང་རྒྱུད་ལ་ཡོད་པ་རྟོགས་པའི་ལམ་རྣམས་དང། ལམ་ཐམས་ཅད་བསྐྱེད་པར་བྱ་ཞིང་ཞེས་བཤད་པའི་འོག་ཏུ་ལམ་ཐམས་ཅད་ཤེས་པར་བྱའོ། །ཞེས་པ་འདིས་ཀྱང་ཤེས་པར་ནུས་ཏེ། བསྐྱེད་བྱའི་ལམ་ལས་ལོགས་སུ་གྱུར་པའི་ཤེས་བྱའི་ལམ་གཅིག་ཡོད་པ་བསྟན་པའི་ཕྱིར་རོ། །ཞེས་སྦས་དོན་ཟབ་མོ་ལས་གསུངས་སོ། ། པཎ་ཆེན་ཤཱཀྱ་མཆོག་གིས། གདུལ་བྱ་ཉན་ཐོས་ཀྱི་རིགས་ཅན་རྗེས་སུ་བཟུང་བའི་ཕྱིར་དུ་བྱང་སེམས་འཕགས་པས་ཤེས་པར་བྱ་བའི་མངོན་རྟོགས་ཀྱི་རིགས་སུ་གནས་པ་དེ། ཤེས་པར་བྱ་བའི་ཉན་ཐོས་ཀྱི་ལམ་ཙམ་གྱི་མཚན་ཉིད། དབྱེ་ན། རང་རིག་གིས་ཤེས་པར་བྱ་བའི་ལམ་དང། གཞན་རིག་གིས་ཤེས་པར་བྱ་བའི་ལམ་གཉིས། དང་པོ་ནི། བྱང་སེམས་རང་རྒྱུད་ཀྱི་གང་ཟག་གི་བདག་མེེད་རྟོགས་པའི་རྟོགས་རིགས་ལྟ་བུ་ལ་བྱ། གཉིས་པ་ནི། ཉན་ཐོས་རང་རྒྱུད་ཀྱི་ལམ་རྣམས་ལ་བྱའོ། །ཞེས་རྒྱན་འགྲེལ་ལུང་དོན་རྒྱ་མཚོ་ལས་གསུངས་སོ། །
Domain	ཆོས་ལུགས།