92761

སེམས་ཀྱི་རྗེས་སུ་འཇུག་པའི་ཆོས་ (1)

Part of speech	མིང་ཚིག
Definition	མདོ། མངོན་པ། སེམས་ཀྱི་རྗེས་སུ་འཇུག་པའི་ཆོས་དེ་དག་གང་ཞེ་ན། སེམས་ལས་བྱུང་བ་རྣམས་དང་བསམ་གཏན་ཟག་མེད་ཀྱི་སྡོམ་པ་གཉིས་དང་སེམས་དང་སེམས་བྱུང་རྣམས་དང་སྡོམ་པ་གཉིས་པོ་དེ་དག་གི་སྐྱེ་བ་ལ་སོགས་པའི་མཚན་ཉིད་རྣམས་ནི་སེམས་ཀྱི་རྗེས་སུ་འཇུག་པ་ཡིན་ནོ། །ཅིའི་ཕྱིར་ཞེ་ན་སེམས་དང་དུས་གཅིག་པའི་ཕྱིར་དང་། འབྲས་བུ་གཅིག་པའི་ཕྱིར་དང་། དགེ་བ་ལ་སོགས་པ་གཅིག་པས་སོ། །ཞེས་པའི་གཏན་ཚིགས་ཀྱི་ཕྱིར་རོ། །དེ་ལ་དུས་གཅིག་པ་ནི་སྤྱིར་དུས་གཅིག་པ་དང་། ཁྱད་པར་དུ་སྐྱེ་བ་གཅིག་པ་དང་། གནས་པ་གཅིག་པ་དང་འགག་པ་གཅིག་པ་རྣམས་བསྡུས་སོ། །འབྲས་བུ་གཅིག་པ་ནི་བདག་པོའི་འབྲས་བུ་དང་སྐྱེས་བུ་བྱེད་པ་དང་བྲལ་བའི་འབྲས་བུ་རྣམས་གཅིག་པའོ། །སོགས་པའི་སྒྲས་རྒྱུ་མཐུན་དང་རྣམ་སྨིན་གྱི་འབྲས་བུ་གཉིས་གཟུང་སྟེ། དེ་འབྲས་བུ་གཅིག་པ་ནི་ངོ་བོ་གཅིག་པ་སྟེ་གང་སེམས་ཀྱི་རྣམ་སྨིན་གྱི་འབྲས་བུ་ཡིན་པ་དེ་སེམས་ཀྱི་རྗེས་འཇུག་གིའང་ཡིན་ནོ་ཞེས་བྱ་བ་ལ་སོགས་པའོ། །དུས་དང་དགེ་བར་གཅིག་པ་ནི་སེམས་དགེ་བ་ཡིན་ན་རྗེས་འཇུག་རྣམས་ཀྱང་དགེ་བ་ཡིན་པས། འདི་ནི་འདྲ་བ་ལ་གཅིག་པར་བརྗོད་པ་ཡིན་ནོ། །སོགས་པའི་སྒྲས་ནི་མི་དགེ་བ་དང་ལུང་མ་བསྟན་བཟུང་ངོ་། །དེས་ན་འགྲེལ་པ་ལས། རྒྱུ་བཅུས་སེམས་ཀྱི་རྗེས་སུ་འཇུག་པ་ཞེས་བྱའོ་ཞེས་གསུངས་པའང་ཅི་རིགས་ཀྱི་དབང་དུ་བྱས་ཀྱི་ཡང་དག་པར་ན་བརྒྱད་ཡིན་ཏེ། དགེ་བ་ལ་སོགས་པ་གསུམ་སེམས་གཅིག་ལ་འདུ་བ་མི་སྲིད་པའི་ཕྱིར་རོ། །བརྒྱད་ཀྱང་མང་བའི་མཐའ་གཟུང་བ་ཡིན་གྱི་མ་བསྒྲིབས་ལུང་མ་བསྟན་དང་ཟག་མེད་ལ་རྣམ་སྨིན་གྱི་འབྲས་བུ་མི་སྲིད་ཅིང་། མི་སྐྱེ་བའི་ཆོས་ཅན་ལ་ནི་དུས་གཅིག་པ་ཙམ་མ་གཏོགས་པ་སྐྱེ་བ་དང་། གནས་པ་དང་། འགག་པ་གཅིག་པའང་མི་སྲིད་པའི་ཕྱིར་རོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།