96575

སྒྲིབ་གཉིས་ངོས་གཟུང་བ་ (1)

Part of speech	མིང་ཚིག
Definition	མདོ། ཕར་ཕྱིན། ཉོན་སྒྲིབ་ནི། རྟོག་གེ་འབར་བ་ལས། འཁོར་བར་འཆིང་བར་བྱེད་པ་དང་། བག་ལ་ཉལ་གཉིས་སུ་བཤད་དོ། །སྔ་མ་ནི། སྡུག་བསྔལ་སྐྱེད་པར་བྱེད་པས་འཁོར་བར་འཆིང་བྱེད་ཅེས་བྱ་ལ། ཕྱི་མ་ནི། ཉོན་མོངས་པས་བཞག་པའི་གནས་ངན་ལེན་ཡིན་པས་བག་ལ་ཉལ་གྱི་ཉོན་སྒྲིབ་ཅེས་བྱའོ། །འདི་ནི་རྣམ་མཁྱེན་ཐོབ་པ་ན་ཤེས་བྱའི་སྒྲིབ་པ་དང་ལྷན་ཅིག་ཏུ་འགག་པ་སྟེ། ཀུན་ལས་བཏུས་ལས། ཅིག་ཅར་ཉོན་མོངས་པ་དང་ཤེས་བྱའི་སྒྲིབ་པ་སྤོང་ངོ་། །ཅིག་ཅར་དགྲ་བཅོམ་པ་དང་དེ་བཞིན་གཤེགས་པར་འགྱུར་རོ་ཞེས་སོ། །དེ་ལ་འཁོར་བར་འཆིང་བྱེད་ཀྱིས་ནི་ཉན་རང་གི་ཐར་པ་ཐོབ་པ་ལ་སྒྲིབ། བག་ལ་ཉལ་གྱིས་ནི་ཐེག་ཆེན་གྱི་ཐར་པ་ཐོབ་པ་ལ་སྒྲིབ་པས། ཉོན་སྒྲིབ་ལ་ཐར་པའི་གེགས་དང་། ཤེས་བྱ་ཡོངས་སུ་དཔྱོད་པའི་གེགས་སུ་གྱུར་པས། ཤེས་སྒྲིབ་ལ་ཐམས་ཅད་མཁྱེན་པ་ཐོབ་པའི་གེགས་སུ་བཤད་དོ། །རྒྱུ་ནི་བདག་ཏུ་འཛིན་པ་གཉིས་པོ་སྟེ། ཉོན་སྒྲིབ་ནི། གང་ཟག་གི་བདག་ཏུ་འཛིན་པའི་རྩ་བ་ཅན་དང་། ཤེས་སྒྲིབ་ནི། ཆོས་ཀྱི་བདག་ཏུ་འཛིན་པའི་རྩ་བ་ཅན་ཡིན་པའི་ཕྱིར། ཀླུ་སྒྲུབ་ནི་གཉིས་ཀ་ཡང་ཆོས་ཀྱི་བདག་འཛིན་གྱི་རྒྱུ་ཅན་དུ་བཞེད་དེ། རྩ་ཤེ་ལས། ལས་དང་ཉོན་མོངས་ཟད་པས་ཐར། །ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་སོ་ཞེས་ཀུན་མཁྱེན་རོང་སྟོན་གྱི་རྣམ་བཤད་ཚིག་དོན་རབ་གསལ་ལས་སོ། ། ཤེས་སྒྲིབ་ལ་རྣམ་རྟོག་མངོན་འགྱུར་བ་དང་། བག་ཆགས་གཉིས། དང་པོ་ལ་བདེན་འཛིན་ཡོད་པ་དང་མེད་པ་གཉིས། ཕྱི་མ་ལ་ཤེས་སྒྲིབ་ཀྱི་རྣམ་པར་རྟོག་པའི་བག་ཆགས་དང་། ཉོན་མོངས་པའི་བག་ཆགས་གཉིས་སོ། །ཉོན་སྒྲིབ་ནི་རྒྱུད་བླར་ངོས་འཛིན་ཚུལ་གཉིས་བྱུང་བ་ནི་དོན་གཅིག་ཏུ་སྣང་ཞིང་། ཀླུ་སྒྲུབ་ཡབ་སྲས་ཀྱི་གཞུང་རྣམས་ལས་ཀྱང་། གང་ཟག་ལ་བདེན་པར་འཛིན་པའི་བདེན་འཛིན་དང་། དེའི་འབྲས་བུར་གྱུར་པའི་རྩ་ཉོན་དང་ཉེ་ཉོན་རྣམས་ལ་གསུངས་པ་རྣམས་དོན་གཅིག་ཏུ་སྣང་བས་ཉོན་མོངས་པ་ས་བོན་དང་བཅས་པ་རྣམས་ལ་ཉོན་སྒྲིབ་ཏུ་འཇོག་པ་ལ་བྱམས་པ་དང་། ཀླུ་སྒྲུབ་གཉིས་དགོངས་པ་གཅིག་ཏུ་སྣང་ངོ་། །ཀུན་མཁྱེན་གོ་རམས་པའི་ལྟ་བའི་ཤན་འབྱེད་ལས་སོ། །
Domain	ཆོས་ལུགས།