98871

སྡུག་བསྔལ་བདེན་པ་ (1)

Part of speech	མིང་ཚིག
Definition	མདོ། ཟག་བཅས་ལས་དང་ཉོན་མོངས་གང་རུང་གིས་བསྡུས་ཤིང་འཕགས་པ་རྣམས་ཀྱིས་སྡུག་བསྔལ་གཟིགས་པ་ལྟར་བདེན་པས་ན་སྡུག་བསྔལ་བདེན་པའོ། །མཚན་ཉིད་ནི། པཎ་ཆེན་ཕར་ཕྱིན་སྤྱི་དོན་ལས། སྡུག་བསྔལ་བདེན་པའི་ངོ་བོ་ཡོད་དེ། ཟག་བཅས་འབྲས་དུས་ཀྱི་ཆར་གྱུར་པའི་ཉོན་མོངས་ཕྱོགས་ཀྱི་བདེན་པ་ཞིག་ལ་འཇོག་པའི་ཕྱིར། དབྱེ་ན་གསུམ་ཡོད་དེ། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་རྣམས་སུ་ཡོད་པའི་ཕྱིར། ཟག་བཅས་གྱི་ཚོར་བ་སྡུག་བསྔལ་མཐའ་དག་དང་། ཟག་བཅས་ཀྱི་ཚོར་བ་བདེ་བ་མཐའ་དག་དང་། དེ་གཉིས་ལས་གཞན་པའི་ལས་ཉོན་གྱིས་ལག་རྗེས་བཞག་པའི་ཟག་བཅས་ཀྱི་ཕུང་པོ་མཐའ་དག་རིམ་པ་བཞིན་དེ་གསུམ་གྱི་མཚན་གཞི་ཡིན་པའི་ཕྱིར། ཡང་རྣམ་པའི་སྒོ་ནས་དབྱེ་ན་བཞི་ཡོད་དེ། སྟོང་པ་དང། སྡུག་བསྔལ་བ་དང། མི་རྟག་པ་དང། བདག་མེད་པའི་རྣམ་པ་དང་བཞི་ཡོད་པའི་ཕྱིར་རོ། །
Domain	ཆོས་ལུགས།

{{#arraymap:སྡུག་བསྔལ་བདེན་པ་

|; |@@@ | | }}

སྡུག་བསྔལ་བདེན་པ་ (2)

Part of speech

མིང་ཚིག

Definition

གཞན་སྟོང་དབུ་མ། སྤྱིར་ཉེར་ལེན་གྱི་ཕུང་པོ་ཐམས་ཅད་སྡུག་བསྔལ་གྱི་བདེན་པ་ཡིན་ཀྱང་སྡུག་བདེན་གྱི་གཙོ་བོ་ནི་སྐྱེ་བའི་སྲིད་པ་ཡིན་ནོ། །དེའི་རྒྱུ་མཚན་ཡང་སྐྱེ་བ་ལས་ནི་འཆི་བ་དང། བར་དོའི་སྲིད་པ་སོགས་སྡུག་བསྔལ་གཞན་ཐམས་ཅད་འདི་ལས་འབྱུང་བས་སོ། །དབྱེ་ན་སྡུག་བསྔལ་གྱི་སྡུག་བསྔལ་དང་འགྱུར་བའི་སྡུག་བསྔལ་དང། འདུ་བྱེད་ཀྱི་སྡུག་བསྔལ་དང་གསུམ་མམ། ཡང་ན་སྐྱེ་བ་དང་རྒས་པ་དང་། ན་བ་དང་འཆི་བ་དང་འདོད་པ་བཙལ་གྱི་མི་རྙེད་པ་དང། དགྲ་སྡང་བ་དང་འཕྲད་པ་དང། གཉེན་བྱམས་པ་དང་བྲལ་བ་དང། མདོར་ན་ཉེ་བར་ལེན་པའི་སྡུག་བསྔལ་བ་དང་བརྒྱད་དུ་ཡང་འགྱུར་རོ། །

{{#arraymap:སྡུག་བསྔལ་བདེན་པ་

|; |@@@ | | }}

སྡུག་བསྔལ་བདེན་པ་ (3)

Part of speech

མིང་ཚིག

Definition

མཚན་གཞི་ནི། ལས་ཉོན་གྱི་རྣམ་སྨིན་གྱི་འབྲས་བུ་སེམས་ཅན་གྱི་རྒྱུད་ཀྱི་ཕུང་པོ་དང་། བདག་པོའི་འབྲས་བུ་སྣོད་ཀྱི་འཇིག་རྟེན་ནོ། །མཚན་ཉིད། མི་རྟག་ལ་སོགས་བཞི་སྟེ། འཇིག་ཅིང་རབ་ཏུ་འཇིག་པས་ན་མི་རྟག་པ་དང། གནོད་པའི་བདག་ཉིད་ཡིན་པས་ན་སྡུག་བསྔལ་དང། དོན་གཞན་གྱི་བདག་གིས་སྟོང་པས་ན་སྟོང་པ་དང། ངོ་བོར་གྱུར་པའི་བདག་མེད་པས་ན་བདག་མེད་པའོ། །དེ་ལ་སྡུག་བསྔལ་ནི། སྡུག་བདེན་ཁོ་ནའི་ཆོས་ཡིན་པས་རང་གི་མཚན་ཉིད་ཡིན་ལ། མི་རྟག་སོགས་ལྷག་མ་གསུམ་ནི། བདེན་པ་གཞན་རྣམས་ལའང་རྗེས་སུ་འགྲོ་བས་སྤྱིའི་མཚན་ཉིད་དོ། །ཅེས་ཀུན་མཁྱེན་རོང་སྟོན་ཆེན་པོའི་རྣམ་བཤད་ཚིག་དོན་རབ་གསལ་ལས་སོ། ། ཀུན་མཁྱེན་གོ་རམས་པས། རང་རྒྱུ་ལས་ཉོན་གང་རུང་གི་འབྲས་བུར་གྱུར་པའི་འཁོར་བས་བསྡུས་པའི་ཕུང་པོའོ། །མ་དག་པའི་སྣོད་ཀྱི་འཇིག་རྟེན་ནི་སྡུག་བསྔལ་བདེན་པའི་མཚན་གཞི་ཏེ། ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིག་པར་བྱའོ་ཞེས་སོ། ། ཟག་བཅས་ཉེར་ལེན་གྱི་ཕུང་པོ་ལྔ་ཡང་སྡུག་བསྔལ་བདེན་པ་ཡིན་ཏེ། རྣམ་འགྲེལ་ལས། སྡུག་བསྔལ་འཁོར་བ་ཅན་ཕུང་པོ། །ཞེས་སོ། །བདེ་བ་ཅན་ལ་སོགས་པའི་འཇིག་རྟེན་གྱི་ཁམས་རྣམས་ནི་སྡུག་བསྔལ་བདེན་པ་མིན་ཏེ། རྫོགས་པའི་སངས་རྒྱས་ཀྱི་ཐུགས་རྗེ་དང་སྨོན་ལམ་གྱི་དབང་གིས་བྱུང་བའི་དག་པའི་འཇིག་རྟེན་གྱི་ཁམས་ཡིན་པའི་ཕྱིར་རོ། །འོན་ཀྱང་དེར་གནས་པའི་སོ་སོ་སྐྱེ་བོ་རྣམས་ཀྱི་ཟག་བཅས་ཉེར་ལེན་གྱི་ཕུང་པོ་ལྔ་ནི་དེ་ཡིན་ཏེ། གང་ཟག་དེས་སྡུག་བདེན་མ་སྤངས་ཤིང། ཕུང་པོ་དེ་འཕེན་བྱེད་ཀྱི་ལས་དེ་ཟག་བཅས་ཀྱི་ལས་ཡིན་པའི་ཕྱིར་རོ། །ཞེས་རྣམ་བཤད་ཡུམ་དོན་རབ་གསལ་ལས་གསུངས་སོ། ། པཎ་ཆེན་ཤཱཀ་མཆོག་གིས། སྡུག་བསྔལ་འཕགས་པའི་བདེན་པའི་མཚན་ཉིད། རང་རྒྱུ་ཀུན་འབྱུང་གི་འབྲས་བུ་གང་ཞིག། མི་རྟག་སོགས་མཚན་ཉིད་བཞིའི་སྒོ་ནས་ཤེས་པར་བྱ་བའོ། །འོ་ན་མཚན་ཉིད་ཟུར་བཞི་པོ་འདི། ཐུན་མོང་མ་ཡིན་པར་མཚོན་པ་རང་གི་མཚན་ཉིད་དམ། གཞན་དང་ཐུན་མོང་དུ་མཚོན་པ་གཉིས་ལས་གང་བཟུང་ཞེ་ན། འགྲེལ་པ་དོན་གསལ་ལས་བཞི་པོ་རང་གི་མཚན་ཉིད་དུ་གསུངས་ལ། ཆོས་མངོན་པ་ལྟར་ན་གཅིག་ནི་རང་གི་མཚན་ཉིད་ཡིན་ལ། གསུམ་ནི་སྤྱིའི་མཚན་ཉིད་དོ། ། སྒྲ་དོན། འཕགས་པས་སྡུག་བསྔལ་དུ་གཟིགས་པ་དང་མཐུན་པར་དེར་གནས་པས་ན། སྡུག་བསྔལ་འཕགས་པའི་བདེན་པ་ཞེས་བྱའོ། །འདི་ཡང་གཙོ་བོར་འདུ་བྱེད་ཀྱི་སྡུག་བསྔལ་ལ་བསམ་པ་ཡིན་ཏེ། །ཇི་སྐད་དུ། བྱིས་པ་ལག་མཐིལ་འདྲ་བ་ཡིས། །འདུ་བྱེད་སྡུག་བསྔལ་སྤུ་མི་རྟོགས། །ཞེས་རྒྱན་འགྲེལ་ལུང་རིགས་རོལ་མཚོ་ལས་གསུངས་སོ། །

{{#arraymap:སྡུག་བསྔལ་བདེན་པ་

|; |@@@ | | }}

སྡུག་བསྔལ་བདེན་པ་ (4)

Part of speech

མིང་ཚིག

Definition

སྡུག་བསྔལ་བདེན་པ་ཞེས་པ་ནི་ཀུན་ནས་ཉོན་མོངས་ཕྱོགས་ཀྱི་བདེན་པ་གང་ཞིག མི་རྟག་པ་དང། སྡུག་བསྔལ་བ་དང། སྟོང་པ་དང། བདག་མེད་པ་བཞིས་ཁྱད་པར་དུ་བྱས་པའི་ཟག་བཅས་ཀྱི་ཆོས་ཞིག་ལ་ཟེར། དེ་ལྟར་ཡང་མཁས་མཆོག་བྱམས་པ་བཀྲ་ཤིས་ཀྱིས་མཛད་པའི་དགའ་བྱང་ཕར་ཕྱིན་མཐའ་དཔྱོད་ལས། གཉིས་པ་རང་ལུགས་ནི། ཀུན་ནས་ཉོན་མོངས་ཕྱོགས་ཀྱི་བདེན་གང་ཞིག མི་རྟག་པ་དང། ཁྱབ་པ་འདུ་བྱེད་ཀྱི་སྡུག་བསྔལ་བ་དང་དོན་གཞན་གྱི་བདག་གིས་སྟོང་བ་དང་རང་གི་ངོ་བོར་གྱུར་པའི་གང་ཟག་གི་བདག་མེད་པ་བཞིའི་ཁྱད་ཆོས་དང་ལྡན་པའི་རབ་ཏུ་ཕྱེ་བ་དེ། སྡུག་བསྔལ་བདེན་པའི་མཚན་ཉིད་ཅེས་གསུངས།

{{#arraymap:སྡུག་བསྔལ་བདེན་པ་

|; |@@@ | | }}

སྡུག་བསྔལ་བདེན་པ་ (5)

Part of speech

མིང་ཚིག

Definition

ཟག་བཅས་འབྲས་བསྡུས་ཀྱི་ཆར་གྱུར་པའི་རབ་ཏུ་ཕྱེ་བའི་ཀུན་ནས་ཉོན་མོངས་ཕྱོགས་ཀྱི་བདེན་པར་དམིགས་པ། དེ་ལ་དབྱེ་ན། སྡུག་བསྔལ་གྱི་སྡུག་བསྔལ་བདེན་པ། འགྱུར་པའི་སྡུག་བསྔལ་བདེན་པ། ཁྱབ་པ་འདུ་བྱེད་ཀྱི་སྡུག་བསྔལ་བདེན་པ་དང་གསུམ། དང་པོ་ནི། མཁལ་མའི་ཟུག་གཟེར་ན་བའི་སྡུག་བསྔལ་ལྟ་བུ། གཉིས་པ་ནི། ཟག་བཅས་ཀྱི་ཚོར་བ་བདེ་བ་ལྟ་བུ། གསུམ་པ་ནི། ཟག་བཅས་ཉེར་ལེན་གྱི་ཕུང་པོའི་སྟེང་གི་འགྱུར་བ་ཕྲ་མོ་ལྟ་བུ། ཡང་དེ་ལ་དབྱེ་ན། སྣོད་ཀྱི་སྡུག་བསྔལ་བདེན་པ་དང། བཅུད་ཀྱི་སྡུག་བསྔལ་བདེན་པ་གཉིས་སུ་ཡོད། དང་པོ་ནི། མ་དག་པའི་སྣོད་ཀྱི་འཇིག་རྟེན་ལྟ་བུ། གཉིས་པ་ནི། དེའི་བཅུད་ཀྱི་སེམས་ཅན་ལྟ་བུའོ། །དེ་ལྟར་ཡང་ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། དེ་ནི་སེམས་ཅན་སྐྱེ་བ་དང་སྐྱེ་བའི་གནས་ཀྱི་ཡང་རིག་པར་བྱའོ། །ཞེས་དང་སེམས་ཅན་གྱི་འཇིག་རྟེན་གང་ཡིན་པ་དང། སྣོད་ཀྱི་འཇིག་རྟེན་གང་ཡིན་པ་ལས་དང་པོ་ཉོན་མོངས་པས་བསྐྱེད་པ་ལས་དང་ཉོན་མོངས་པའི་དབང་གིས་བྱུང་བ་འདི་དག་ནི་སྡུག་བསྔལ་གྱི་བདེན་པའོ། །ཞེས་གསུངས་སོ། །

{{#arraymap:སྡུག་བསྔལ་བདེན་པ་

|; |@@@ | | }}