102983

སྲིད་པ་ལན་བདུན་པ་ (1)

Part of speech	མིང་ཚིག
Definition	བྱེ་བྲག་སྨྲ་བའི་ལུགས་ལ་སྲིད་པ་ལན་བདུན་པའི་མཚན་ཉིད། མཐོང་ལམ་ཐོབ་པའི་ལུས་རྟེན་དང་བཅས་པའི་རྒྱུན་ཞུགས་འབྲས་གནས་ཙམ་པོ་གང་ཞིག འདོད་པར་རིས་མཐུན་གྱི་སྐྱེ་སྲིད་བདུན་ལེན་པའི་རིགས་ཅན་ནོ། །སྤངས་བའི་ཁྱད་པར་ནི། འདོད་པའི་སྒོམ་སྤངས་སྔར་ཅུང་ཟད་ཀྱང་མ་སྤངས་ཤིང། ཚེ་དེ་ཉིད་ལ་ཡང་མི་སྤོང་བ་གཅིག་དགོས་ཏེ། གཞན་དུ་ན་སྐྱེ་བའི་ཁྱད་པར་མི་འགྲུབ་པའི་ཕྱིར་རོ། །རྟོགས་པའི་ཁྱད་པར་ནི། བཅུ་དྲུག་པའི་རྟོགས་པ་ཐོབ་ཅིང་འདོད་ཉོན་དང་པོ་སྤོང་བའི་སྦྱོར་བ་ཙམ་ཡང་མ་ཐོབ་པའོ། །སྐྱེ་བ་ལེན་ཚུལ་གྱི་ཁྱད་པར་ནི། བྱེ་བྲག་སྨྲ་བའི་ལུགས་ལ། ངེས་པའི་རིགས་ཅན་དང། མ་ངེས་པའི་རིགས་ཅན་གཉིས་ལས། དང་པོ་ནི་འདོད་པར་མིའི་སྐྱེ་སྲིད་བདུན། དེའི་བར་སྲིད་བདུན། ལྷའི་སྐྱེ་སྲིད་བདུན། དེའི་བར་སྲིད་བདུན་ཏེ། སྲིད་པ་ཉི་ཤུ་རྩ་བརྒྱད་ལེན་ཀྱང་བདུན་ཚན་དུ་འདྲ་བའི་ཕྱིར། ལན་བདུན་པ་ཞེས་བྱ་སྟེ། ཤིང་ལོ་མ་བདུན་པ་དང། གནས་བདུན་ལ་མཁས་པའི་དགེ་སློང་ཞེས་པའི་ཐ་སྙད་བཞིན་ནོ། །ཅིའི་ཕྱིར་འདོད་པའི་རྟེན་ལ་རིས་མཐུན་གྱི་སྐྱེ་སྲིད་བརྒྱད་པ་མི་ལེན་ཞེ་ན། དུས་དེ་སྲིད་ཀྱིས་གདོན་མི་ཟ་བར་རྒྱུད་ཡོངས་སུ་སྨིན་པའི་ཕྱིར་ཏེ། སྦྲུལ་གོམ་པ་བདུན་པས་ཟིན་པ་དང། རིམས་ཉིན་བཞི་པས་ཐེབས་པ་བཞིན་ནོ། །བར་སྐབས་སུ་འཕགས་པའི་ལམ་མངོན་དུ་བྱེད་ཀྱི་མྱ་ངན་ལས་ཀྱང་མི་འདའ་སྟེ། དེ་སྲིད་དུ་སྲིད་པ་མྱོང་བར་འགྱུར་བའི་ལས་ཀྱི་སྟོབས་བསྐྱེད་པའི་ཕྱིར། འདི་ནི་རེ་ལྟར་ཐོགས་ན་ལན་བདུན་པ་སྟེ། རྒྱུན་ཞུགས་ཐམས་ཅད་ཀྱི་ཐལ་ཤལ་ལན་བདུན་ལེན་པར་ངེས་པའི་དབང་དུ་བྱས་པའོ། །གཉིས་པ་མ་ངེས་པའི་རིགས་ཅན་གྱིས་སྐྱེ་བ་ལེན་ཚུལ་ནི། སྔར་འདོད་པའི་སྒོམ་སྤངས་ཅུང་ཟད་ཀྱང་མ་སྤངས་ཤིང་ཚེ་འདི་ཉིད་ལ་ཡང་མི་སྤོང་བས། ལན་བདུན་ལེན་པའི་རྒྱུ་ཡོད་ཀྱང་བར་སྐབས་སུ་འཕགས་པའི་ལམ་མངོན་དུ་བྱས་ནས་རིས་མཐུན་གྱི་སྐྱེ་སྲིད་གཅིག་ནས་དྲུག་པའི་བར་གང་ཡང་རུང་བ་ལ་མྱང་འདས་མངོན་དུ་བྱེད་པའོ། །མདོ་སྡེ་པའི་ལུགས་ནི། སྲིད་པ་ལན་བདུན་པ་ཞེས་པའི་སྒྲ་ཇི་བཞིན་ཉིད་དུ་སྐྱེ་སྲིད་བདུན་ཁོ་ན་ལེན་པར་བཞེད་ཀྱི་ལྷ་མི་གཉིས་ཆར་གྱི་རྟེན་ལ་སྐྱེ་སྲིད་བདུན་བདུན་ལེན་པ་ནི་མི་བཞེད་དོ་ཞེས་ཀུན་མཁྱེན་གོ་རམས་པའི་སྐྱེས་བུ་མཆོག་གི་གསལ་བྱེད་ལས་སོ། །
Domain	ཆོས་ལུགས།